Jon 9:24 - Yesus Aqa Anjam Bole

²⁴ Onaqa tamo nami ŋam qandimyesoqnej qaji di Juda tamo kokba naŋgi na olo metonab bonaq minjeb, “Ni Qotei aqa ñam soqtosim anjam bole merge. Iga qalieonum, Yesus a une tamo. Ni degsi merge.”

Jon 9:24 ပူးပေါင်းရင်းမြစ်များ

Mak 15:27

Bati deqa bajiŋ tamo aiyel dego ŋamburbasq di gaintnjrsib ñumeb. Bei Yesus aqa baŋ woq di qameb. Bei Yesus aqa baŋ qonaŋq di qameb.

Luk 15:2

Koroonabqa Farisi naŋgi ti dal anjam qalie tamo naŋgi ti di unsibqa Yesus yomuiyosib mareb, “Niŋgi uniye. Yesus a une tamo naŋgi joqsiqa koba na walweloqnsib iŋgi uyeqnub.”

Luk 19:7

Gilnabqa tamo uŋgasari kalil naŋgi unsibqa ŋiriŋeb. Ŋiriŋosib mareb, “Niŋgi uniye. Yesus a une tamo dauryosiqa aqa talq gilqo.”

Luk 7:39

Uŋa a kumbra di yonaqa Saimon a unsiqa are qalej, “Yesus a Qotei aqa medabu o qaji tamo bole qamu uŋa endi bosiq aqa jejamu ojqo qaji di sambala uŋa degsi qalieqo qamu.”

Jon 14:30

“Mandam endeqa gate koba Satan a beqnu. Deqa e olo anjam olekoba titsiy merŋgoqnsiy sqasai. Satan a na e gulube bei ebqa keresai.

Jon 16:2

Juda tamo kokba naŋgi na niŋgi taqal waiŋgosib niŋgi olo Qotei tal miligiq gilqa saidŋgwab. Yimqa bunuqna bati bei bamqa tamo naŋgi niŋgi liŋgoqnsib moiotŋgeqnub qaji naŋgi endegsib are qalqab, ‘Iga Qotei aqa wau bole yeqnum.’

Jon 18:30

Onaqa naŋgi na Pailat minjeb, “Tamo endi a kumbra uge yosai qamu iga inoq osi bosai qamu.”

Jon 19:6

Degsi minjrnaqa atra tamo kokba ti naŋgo qaja tamo naŋgi ti Yesus unsibqa naŋgi murqumyoqnsib Pailat waiŋyoqnsib minjoqneb, “Ni na ŋamburbasq di qame! Ni na ŋamburbasq di qame!” Onaqa Pailat na minjrej, “Niŋgi segi na Yesus osib ŋamburbasq di qamiye. E aqa jejamuq di une bei unosai.”

Jon 5:23

E wau di yeqnum deqa tamo kalil naŋgi ijo Abu aqa ñam soqteqnub dego kere naŋgi ijo ñam dego soqtetboqnqab. Di kiyaqa? E Qotei aqa Ŋiri deqa. Tamo naŋgi ijo ñam soqtosaieqnub qaji naŋgi ijo Abu e qariŋbej qaji aqa ñam dego soqtosaieqnub.

Jon 8:46

E une yonum niŋgi degsib are qaleqnub e? Niŋgi degsib are qalqab di niŋgi ijo une babtiye. Ariya e anjam bole marqai di niŋgi kiyaqa ijo anjam nuŋgo areqaloq di siŋgilatosaieqnub?

Jon 8:49

Onaqa Yesus na kamba minjrej, “Mondor uge ijoq di sosai. E ijo Abu aqa ñam soqteqnum. Ariya niŋgi na olo ijo ñam ugetetbeqnub.

Jon 9:16

Onaqa Farisi qudei naŋgi endegsib mareb, “Iga qalie, Qotei na Yesus qariŋyosai. Di kiyaqa? A yori bati gentqo deqa.” Ariya tamo qudei naŋgi mareb, “Sai. Une tamo a kiersim maŋwa deqaji babtqas?” Farisi naŋgi anjam deqa ŋiri ŋiriŋosib poaiyeleb.

Jon 9:25

Onaqa a na kamba minjrej, “A une tamo kio sai kio di e qaliesai. Ariya e nami ŋam qandimo soqnem bini e olo ŋam poibqoqa sawa uneqnum di e qalieonum.”

Rom 8:3

Dal anjam na gago une kobotqa keresai. Di kiyaqa? Iga areqalo namijq di unum deqa iga dal anjam dauryqa keresai. Ariya dal anjam na gago une kobotqa keresai deqa Qotei a segi na gago une kobotej. A gam endena gago une kobotej. A na aqa segi Ŋiri Yesus qariŋyonaqa a une tamo bulosiqa gago une kobotqa bonaqa aqa segi jejamuq di Qotei na gago une aqa awai uge atsiqa une aqa siŋgila kobotej.

2 Korin 5:21

Kristus a une yosaieqnu. Ariya Qotei na iga aqaryaigwa marsiq deqa a gago une kalil osiqa Kristus aqa qawarq di atnaqa a une tamo bulej. Iga Yesus beteryosim aqa siŋgila na iga Qotei aqa segi tamo uŋgasari tiŋtiŋ sqajqa deqa osiq gago une kalil osiqa Kristus aqa qawarq di atej.

Uli Anjam 11:13

Onaqa bati qujai deqa mimiŋ tulaŋ kobaquja dosiq qure koba di reŋgiŋyonaqa qure taqal qujai bei padalej. Qure taqal 9-pela soqneb. Mimiŋ dena tamo uŋgasari 7,000 padaltnjrej. Onaqa tamo uŋgasari mimiŋ dena padaltnjrosai qaji naŋgi tulaŋ ulaugetosib Qotei laŋ qureq di unu qaji aqa ñam soqteb.