Jon 6:45 - Yesus Aqa Anjam Bole

⁴⁵ Qotei aqa medabu o qaji tamo naŋgi nami anjam endegsib neŋgreŋyeb unu, ‘Qotei a na tamo uŋgasari kalil naŋgi aqa kumbra osornjroqnim naŋgi a qa qalieoqnqab.’ Deqa tamo uŋgasari kalil ijo Abu aqa anjam quoqnsib a qa qalieeqnub qaji naŋgi ijoq beqnub.

Jon 6:45 ပူးပေါင်းရင်းမြစ်များ

Matyu 11:27

Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qa qaliesai dego. E segi ijo Abu qa qalie. Ariya e na tamo qudei naŋgi ijo Abu osornjreqnum. Naŋgi dego ijo Abu qa qalie.

Matyu 17:5

Pita a degsi mareqnaqa laŋbi tulaŋ suwaŋo aisiqa naŋgi kabutnjrej. Onaqa laŋbi miligiq dena anjam bei endegsi brantonaq naŋgi queb, “Endi ijo Aŋgro qujai e na tulaŋ qalaqalaiyeqnum qaji. E a qa tulaŋ areboleboleibeqnu. Deqa niŋgi aqa anjam quetoqniye.”

Mak 1:2

Nami Qotei na aqa Ŋiri Yesus endegsi minjej, “Ni que. E na ijo anjam maro tamo qariŋyitqa a ni qa namoosim ino gam gereiyetmqas.

Luk 1:70

Anjam di Qotei na nami aqa segi medabu o qaji tamo naŋgi minjreqnaqa naŋgi qusib palontoqneb.

Luk 18:31

Yesus a na aqa aŋgro 12-pela naŋgi anjam degsi minjrsiq koboonaqa naŋgi joqsiqa segitnjrsiqa endegsi minjrej, “Niŋgi quiye. Iga Jerusalem aieqnum. E Tamo Aŋgro deqa Jerusalem dia anjam kalil Qotei aqa medabu o tamo naŋgi nami e qa neŋgreŋyeb qaji di aqa damu brantqas.

Jon 10:27

Ijo kaja naŋgi ijo medabu queqnub. E naŋgi qa qalie. Naŋgi e daurbeqnub.

Jon 6:37

Tamo uŋgasari kalil Qotei na e ebej qaji naŋgi ijoq boqnqab. Tamo ijoq bqas qaji di e na olo wiyqa keresai bolesai.

Jon 6:65

Osiqa minjrej, “Tamo naŋgi di e qa naŋgo areqalo siŋgilatosaieqnub. Utru deqa e niŋgi merŋgonum, ‘Qotei na tamo bei siŋgila yqasai di a ijoq bqa keresai.’”

Aposel 13:40

Deqa niŋgi geregere ŋam atsib soqniye. Gulube kalil Qotei aqa medabu o tamo naŋgi nami deqa maroqneb qaji di nuŋgoq bo uge. Agi nami naŋgi na nuŋgo moma naŋgi anjam endegsib minjroqneb,

Aposel 7:42

Naŋgi kumbra degyeb deqa Qotei na naŋgi qoreinjrnaqa naŋgi seŋ ti bai ti bongar ti biŋinjroqneb. Naŋgo kumbra deqa Qotei aqa medabu o qaji tamo naŋgi nami endegsib neŋgreŋyeb, ‘O Israel tamo uŋgasari, niŋgi wausau 40 wadau sawaq di sosibqa bulmakau ti kaja ti ñumoqnsib qotei gisa gisaŋ atrainjroqneb. Niŋgi na e atraibosaioqneb.

Efesus 1:17

A gago Tamo Koba Yesus Kristus aqa Qotei. A gago Abu riaŋ koba ti siŋgila ti unu qaji. Deqa e niŋgi qa endegsi pailyeqnum, “O Abu, ni na Efesus naŋgi areqalo bole enjrimqa naŋgi ino anjam aqa utru geregere poinjrim ni qa bole qalieoqnqab.”

Filipai 3:15

Niŋgi areqalo bole ti unub qaji niŋgi ijo areqalo di dauryoqniye. Ariya niŋgi qudei areqalo bei ejunub kio? Soqnim Qotei na nuŋgo areqalo di olo gereiyetŋgwas.

1 Tesalonaika 4:9

E na niŋgi Qotei aqa tamo uŋgasari naŋgi qalaqalainjrqajqa deqa anjam bei neŋgreŋyqasai. Di kiyaqa? Qotei na qalaqalaiyo kumbra di niŋgi osorŋgekritej koboqo.

Hibru 10:16

“Tamo Koba Qotei a marqo, ‘Ijo anjam bunuj agiende. Bati bei brantimqa e na ijo dal anjam kalil osiy tamo uŋgasari naŋgo areqaloq di atsiy siŋgilatqai. Osiy naŋgo are miligiq di dego neŋgreŋyqai.’”

1 Jon 2:27

Ariya niŋgi Kristus aqa Mondor Bole eb agi nuŋgoq di unu. Deqa niŋgi powo bei qa truquosaieqnub. Deqa e anjam bei totoryosiy niŋgi merŋgwasai. Qotei aqa Mondor a segi na anjam kalil niŋgi merŋgeqnaqa qusib poiŋgeqnu. Qotei aqa Mondor aqa anjam di gisaŋ sai. Di anjam bole. Deqa niŋgi Mondor aqa anjam di qusib poiŋgim Kristus beteryosib soqniye.