Jon 5:23 - Yesus Aqa Anjam Bole

²³ E wau di yeqnum deqa tamo kalil naŋgi ijo Abu aqa ñam soqteqnub dego kere naŋgi ijo ñam dego soqtetboqnqab. Di kiyaqa? E Qotei aqa Ŋiri deqa. Tamo naŋgi ijo ñam soqtosaieqnub qaji naŋgi ijo Abu e qariŋbej qaji aqa ñam dego soqtosaieqnub.

Jon 5:23 ပူးပေါင်းရင်းမြစ်များ

Matyu 10:37

“Deqa tamo bei na aqa ai wo abu wo naŋgi tulaŋ qalaqalainjrsimqa ariya di buŋyosim e tulaŋ qalaqalaibqasai di a ijo aŋgro sqa keresai. Tamo bei na aqa aŋgro mel naŋgi ti aqa aŋgro sebiŋ naŋgi ti tulaŋ qalaqalainjrsimqa ariya di buŋyosim e tulaŋ qalaqalaibqasai di a ijo aŋgro sqa keresai.

Matyu 11:27

Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qa qaliesai dego. E segi ijo Abu qa qalie. Ariya e na tamo qudei naŋgi ijo Abu osornjreqnum. Naŋgi dego ijo Abu qa qalie.

Matyu 12:21

Yimqa tamo uŋgasari sawa bei beiq di unub qaji naŋgi Kristus qa naŋgo areqalo siŋgilatsibqa a na naŋgi aqaryainjrqajqa deqa tariŋoqnsib sqab.” Qotei aqa medabu o qaji tamo Aisaia a nami anjam degsi neŋgreŋyonaq soqnej.

Matyu 15:8

‘Tamo naŋgi di naŋgo medabu na ijo ñam soqteqnub. Ariya naŋgo are miligi e qa sosai. Naŋgo areqalo isaq di unu.

Matyu 28:19

Deqa niŋgi walwelosib sawa sawa kalil keretoqnsibqa tamo uŋgasari kalil naŋgi ijo anjam minjroqnsib laqniye. Minjroqnibqa naŋgi ijo anjam quoqnsib dauryoqnsibqa ijo segi aŋgro bole sqab. Deqa niŋgi na ijo Abu aqa ñam na ti e Qotei aqa Ŋiri ijo segi ñam na ti Qotei aqa Mondor Bole aqa ñam na ti naŋgi yansnjroqniye.

Luk 10:16

Yesus a anjam degsi marsiqa aqa aŋgro naŋgi endegsi minjrej, “Tamo bei a nuŋgo anjam qusim dauryqas di a ijo anjam dego qusim dauryqas. Ariya tamo a niŋgi qoreiŋgwas di a e dego qoreibqas. Tamo a e qoreibqas di ijo Abu e qariŋbej qaji a dego qoreiyqas.”

Jon 14:1

Osiqa Yesus a na aqa aŋgro kalil naŋgi olo endegsi minjrej, “Niŋgi are gulubeiŋgaiq. Niŋgi Qotei qa nuŋgo areqalo siŋgilateqnub. Ariya niŋgi e qa dego nuŋgo areqalo siŋgilatoqniye.

Jon 16:14

A ijo anjam osim niŋgi merŋgoqnqas. Osim kumbra dena a na ijo ñam koba ti ijo siŋgila ti boleq atoqnqas.

Jon 17:10

Ijo segi tamo uŋgasari kalil naŋgi di ino dego. Ino segi tamo uŋgasari kalil naŋgi di ijo dego. Naŋgoq dena ijo ñam kobaqujaeqnu.

Rom 1:7

Qotei a na niŋgi tamo uŋgasari Rom qureq di unub qaji niŋgi tulaŋ qalaqalaiŋgeqnu. A na niŋgi metŋgej deqa niŋgi aqa segi tamo uŋgasari unub. O was qu, e anjam endi neŋgreŋyosim niŋgi qa qariŋyonum. Gago Abu Qotei wo Tamo Koba Yesus Kristus wo naŋgi aiyel niŋgi qa are tulaŋ boleinjrimqa niŋgi lawo na soqniye.

Rom 15:12

Ariya Aisaia a dego Qotei aqa medabu osiq anjam bei endegsi marej, “Mondoŋ Devit aqa abu Jesi aqa leŋ dena mandor kobaquja bei brantqas. Brantosim a na sawa bei bei qaji tamo uŋgasari kalil naŋgi taqatnjresqas. A bosim naŋgi boletnjrqajqa deqa naŋgi a qa tariŋoqnsib sqab.”

Rom 6:22

Ariya nuŋgo une na niŋgi tonto talq waiŋgobulonaq sonabqa Qotei a dena olo niŋgi eleŋej. Deqa bini niŋgi Qotei aqa segi wau tamo unub. Deqa niŋgi iŋgi bole bole endi oqnqab. A na niŋgi aqa segi kumbra boleq di atimqa niŋgi kumbra bole bole a tulaŋ areareteqnu qaji di yoqnqab. Osib niŋgi ŋambile gaigai sqab.

Rom 8:9

Ariya niŋgi areqalo namij na walwelosaieqnub. Qotei aqa Mondor a nuŋgo are miligiq di unu deqa niŋgi aqa kumbra na walweleqnub. Tamo a Kristus aqa Mondor ti sqasai di a Kristus aqa tamo sqa keresai.

1 Korin 1:3

Gago Abu Qotei wo Tamo Koba Yesus Kristus wo naŋgi aiyel niŋgi qa are tulaŋ boleinjrimqa niŋgi lawo na soqniye.

1 Korin 10:31

Deqa niŋgi iŋgi ti ya ti uyqa oqnsib niŋgi Qotei aqa ñam soqtetoqnsib uyoqniye. Niŋgi kumbra bei yqa oqnsib niŋgi Qotei aqa ñam soqtetoqnsib yoqniye.

1 Korin 16:22

Ariya e ijo anjam getentqai. Tamo bei a Tamo Koba Yesus qalaqalaiyqasai di Qotei na kamba tamo di uge qa minjsim ŋolawotqas. O Tamo Koba Yesus, ni aue.

1 Korin 6:19

Nuŋgo jejamu di Qotei aqa Mondor aqa segi tal. Qotei a segi na Mondor di niŋgi eŋgej deqa a nuŋgo miligiq di unu. Niŋgi di qaliesai kio? Nuŋgo jejamu di nuŋgo segi jejamu sai. Di Qotei aqa jejamu.

2 Korin 1:9

Bole, iga are qalem, gulube dena iga moiotgwas. Agi anjam pegiyo tamo a na tamo bei minjqas, “Ni une ti deqa ni moiqam.” Dego kere iga are qalem, gulube dena iga moiotgwas. Ariya Qotei aqa areqalo agiende. Iga gulube osim dena iga poigwas, bole, iga gago segi siŋgila qa are qalqasai. Iga Qotei aqa siŋgila qa are qalqom. Agi a na qujai tamo moreŋo qaji naŋgi olo subq na tigeltnjreqnu.

2 Korin 5:14

Kristus a na iga tulaŋ qalaqalaigej. Aqa kumbra dena a gago areqalo tigeltetgej deqa iga waueqnum. Di kiyaqa? Iga qalieonum, tamo qujai Yesus a gago kalil qa sawa osiq moiej deqa iga kalil dego moreŋem.

2 Korin 5:19

Gago anjam agiende. Tamo uŋgasari mandamq endi unub qaji naŋgi Qotei ti jeu soqnej di a na kobotim naŋgi a ombla are qujaitosib sqajqa deqa a Kristus aqa ñam na waueqnu. Deqa a naŋgo une qa olo are qalosaieqnu. Anjam di iga na marsim laqajqa deqa a na wau egej. Yim anjam dena a na jeu kobotim tamo uŋgasari naŋgi a ombla are qujaitosib sqajqa deqa.

Efesus 6:24

Tamo kalil gago Tamo Koba Yesus Kristus qalaqalaiyqa uratosaieqnub qaji naŋgi qa Qotei a are boleiyeme.

2 Timoti 1:12

Deqa uŋgum, e gulube oqnsiy sqai. E deqa jemaibqasai. E Yesus qa ijo areqalo siŋgilateqnum deqa e a qa bole qalieonum. A segi na wau endi ijo baŋq di atej deqa e qalieonum, a na wau di geregere taqatoqnqas. Taqatsim gilsim a olo bqajqa bati brantqas.

Hibru 1:6

Nami Qotei na aqa Ŋiri matu Yesus qariŋyim mandamq aiqa osiqa a qa olo anjam bei endegsi marej, “Ijo laŋ aŋgro kalil naŋgi a qa louoqnqab.”

2 Pita 1:1

E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere.

2 Pita 3:18

Gago Tamo Koba Yesus Kristus agi iga eleŋej qaji a niŋgi qa are boleiyeqnu. Niŋgi a qa bole qalieonub. Ariya a niŋgi qa are boleiyeqnu aqa kumbra dena niŋgi olo siŋgilatŋgimqa niŋgi aqaq dena qalie koba oqniye. Kristus a ñam koba ti unu deqa iga bini bati endeqa aqa ñam soqtoqnqom. Osim bati gaigai aqa ñam soqtoqnsim sqom. Bole.

1 Jon 2:23

Tamo a Qotei aqa Ŋiri qoreiyqas di a Abu dego qoreiyqas. Ariya tamo a Qotei aqa Ŋiri qa aqa areqalo siŋgilatqas di a Abu qa dego aqa areqalo siŋgilatqas.

2 Jon 1:9

Tamo bei a Kristus aqa anjam ojqa uratosim olo anjam bei totoryosim dauryqas di a Qotei ombla sqa keresai. Ariya tamo bei a Kristus aqa anjam siŋgila na ojesqas di Abu Qotei wo aqa Ŋiri wo naŋgi a koba na sqab.