Jon 17:26 - Yesus Aqa Anjam Bole

²⁶ E na ino ñam naŋgi osornjroqnem. Naŋgi olo osornjrqai. Yimqa ni na e tulaŋ qalaqalaibeqnum dego kere naŋgi dego ino qalaqalaiyo kumbra ti sqab. Amqa e segi naŋgi ti sqai.”

Jon 17:26 ပူးပေါင်းရင်းမြစ်များ

Jon 14:20

Sosib bati deqa niŋgi endegsib qalieqab, e na ijo Abu beteryejunum. Niŋgi na e beterbejunub. E na niŋgi beterŋgejunum.

Jon 14:23

Onaqa Yesus na kamba minjej, “Tamo bei na e tulaŋ qalaqalaibqas di a ijo anjam dauryoqnqas. Yimqa ijo Abu na kamba tamo di qalaqalaiyimqa aqo ijo Abu wo aqaq bosim a ombla gaigai sqom.

Jon 15:15

Kaŋgal tamo naŋgi naŋgo tamo kokba naŋgo wau utru geregere qaliesai. Deqa e niŋgi olo kaŋgal tamo qa merŋgwasai. Anjam kalil ijo Abu na e merbeqnaq queqnum qaji di e na ubtsim niŋgi merŋgeqnum. Deqa e niŋgi ijo kadoi qa merŋgeqnum.

Jon 15:4

Niŋgi e beterbesoqnibqa e dego niŋgi beterŋgesqai. Ŋam dani a segi sqas di a geitqa keresai. Qoboq di qamesqas di a geitqas. Dego kere niŋgi e beterbesqasai di niŋgi gei bole atqa keresai.

Jon 15:9

Ijo Abu na e tulaŋ qalaqalaibeqnu dego kere e na niŋgi tulaŋ qalaqalaiŋgoqnem. Deqa niŋgi gaigai ijo qalaqalaiyo kumbra ti soqniye.

Jon 17:23

E ijo segi tamo uŋgasari naŋgoq di unum. Ni ijoq di unum. Kumbra dena naŋgi kalil dego aqo aiyel koba na are qujaitosib sqab. Soqnibqa mandam endeqa tamo uŋgasari naŋgi na unjrsibqa qalieqab, ni na e qariŋbonam bem. Osib qalieqab, ni na e tulaŋ qalaqalaibeqnum dego kere ijo segi tamo uŋgasari naŋgi dego ni na tulaŋ qalaqalainjreqnum.

Jon 17:6

“Mandam endeqa tamo uŋgasari ni na ebem qaji naŋgi di e na ino ñam osornjroqnem. Naŋgi ino segi tamo uŋgasari sonabqa ni na naŋgi e ebem. Naŋgi ino anjam dauryoqneb.

Jon 17:8

Anjam kalil ni na e merboqnem qaji di e na kamba naŋgi minjreqnam naŋgi quoqnsib endegsi poinjrej, e nami ni ombla sosim dena bem. Deqa naŋgi e qa naŋgo areqalo siŋgilatosib qalieeb, ni na e qariŋbonam bem.

Jon 6:56

Tamo naŋgi ijo jejamu ti ijo leŋ ti uyqab di naŋgi e ombla sqab. E naŋgi ombla sqai.

Jon 8:50

E ijo segi ñam soqtqa are qalosaieqnum. Ijo Abu a segi na ijo ñam soqtetbeqnu. Agi a na qujai nuŋgo une qa niŋgi pegiŋgwas.

Rom 8:10

Niŋgi une ti unub deqa nuŋgo jejamu moiqas. Ariya Kristus a nuŋgo are miligiq di unu deqa niŋgi Qotei aqa ŋamgalaq di tamo bole une saiqoji unub. Deqa Qotei aqa Mondor na niŋgi ŋambile eŋgwas.

1 Korin 1:30

Qotei a segi na niŋgi eleŋosiqa Kristus Yesus aqa baŋq di atej unub. Deqa Kristus aqa wau na iga Qotei aqa areqalo bole ti aqa powo ti unum. Aqa wau na iga tamo bole tiŋtiŋo unum. Aqa wau na iga Qotei aqa segi kumbra boleq di sosim walweleqnum. Aqa wau na Qotei na iga gago uneq dena olo awaigej deqa gago une na iga olo taqatgosai.

1 Korin 12:12

Tamo segi segi kalil naŋgi jejamu qujai. Ariya naŋgo jejamu miligiq dia sarqei gargekoba unub. Agi naŋgi baŋ ti siŋga ti ŋamdamu ti dabkala ti unub. Sarqei kalil di jejamu qujaiq di turtsib unub. Dego kere Kristus a dego degsi unu. Agi iga kalil Kristus aqa jejamu qujai.

Galesia 2:20

Osim e olo ŋambile bunuj em. Ariya ŋambile di ijo segi ŋambile sai. Kristus a segi ijo are miligiq di ŋambile unu. Deqa bini kumbra kalil e mandamq endi yeqnum qaji di e Qotei aqa Ŋiri qa ijo areqalo siŋgilatosim yeqnum. Agi Qotei aqa Ŋiri a na e tulaŋ qalaqalaibosiq deqa a aqa segi ŋambile uratosiq e qa moiej.

Efesus 1:6

Aqa segi Aŋgro qujai Yesus a tulaŋ qalaqalaiyeqnu qaji aqa ñam na a iga qa are tulaŋ boleiyej. Deqa iga aqa kumbra deqa are qaloqnsim aqa ñam soqtoqnqom.

Efesus 3:17

Osib naŋgi Kristus qa naŋgo areqalo siŋgilatqab dena Kristus a naŋgo are miligiq di sqas. O Abu, ni na Efesus naŋgi siŋgilatnjrimqa qalaqalaiyo kumbra naŋgo are miligiq di tulaŋ siŋgilatib soqnim naŋgi siŋgila na tigelesqab. Mandam na ŋam jirim ojesonaqa ŋam a siŋgila na tigelejunu dego kere.” O was qu, e niŋgi qa degsim Qotei pailyeqnum.

Efesus 5:30

Iga kalil Kristus aqa jejamu qujai. Iga segi segi aqa siŋga ti aqa baŋ ti unum.

Efesus 5:32

O was qu, Qotei aqa uli anjam di tulaŋ kobaquja. E Kristus a ti aqa segi tamo uŋgasari naŋgi ti sigitnjrsim agi niŋgi merŋgonum.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

Kolosi 2:10

Iŋgi iŋgi kalil siŋgila ti unub qaji naŋgo gate koba agi Kristus a segi. Niŋgi Kristus aqa segi tamo uŋgasari unub deqa Qotei na niŋgi ŋambile eŋgej. Ŋambile di nuŋgoq di tulaŋ keretsiq maqejunu.

Kolosi 3:11

Iga so bunujq di unum deqa iga kalil kerekere unum. Deqa iga gago was naŋgi endegsi minjroqnqasai, “Ni Grik qaji” o “Ni Juda qaji” o “Ni muluŋ aio qaji” o “Ni muluŋ aiosai qaji” o “Ni yauŋ tamo” o “Ni yambaŋ tamo” o “Ni kaŋgal tamo” o “Ni tamo laŋaj”. Iga gago was naŋgi degsi minjroqnqasai. Di kiyaqa? Kristus a segi qujai unu. A gago kalil qa Tamo Koba.

2 Tesalonaika 2:16

Gago Tamo Koba Yesus Kristus wo gago Abu Qotei wo naŋgi aiyel na iga tulaŋ qalaqalaigeqnub. Qotei a iga qa are boleiyoqnsiq deqa a gaigai gago are boletetgeqnu. Osiqa a na iga siŋgilatgeqnu. Deqa mondoŋ a na iga boletgwajqa deqa iga tariŋoqnsim unum.

Hibru 2:12

Deqa a na aqa Abu Qotei endegsi minjej, “O Qotei, e na ino ñam bole babtoqnsiy ijo was naŋgi minjroqnqai. Naŋgi louqa korooqnibqa e naŋgo ambleq di tigeloqnsiy ino ñam soqtoqnqai.”

1 Jon 3:24

Tamo bei a Qotei aqa dal anjam dauryqas di a Qotei beteryesqas. Qotei a kamba dego tamo di beteryesqas. Qotei na aqa Mondor Bole iga egej deqa iga qalieonum, Qotei na iga betergejunu.