Jon 17:11 - Yesus Aqa Anjam Bole

¹¹ “E inoq olo bqai. Deqa e mandamq endia olo sqasai. Ariya ijo segi tamo uŋgasari naŋgi mandamq endi sqab. O Abu, ino kumbra kalil boledamu. Ni segi qujai une saiqoji. Ino segi ñam koba ni na ebem qaji ñam dena ni na ijo segi tamo uŋgasari naŋgi geregere taqatnjroqnime. Amqa aqo aiyel are qujaitejunum dego kere naŋgi kamba dego are qujaitosib sqab.

Jon 17:11 ပူးပေါင်းရင်းမြစ်များ

Matyu 10:16

Osiqa Yesus a olo anjam endegsi minjrej, “Niŋgi quiye. Niŋgi kaja du du bul deqa e na niŋgi qariŋgitqa gilsib bauŋ juwaŋ naŋgo ambleq dia walweloqnqab. Deqa niŋgi amal naŋgo kumbra dauryoqniye. Amal naŋgi geregere ŋam atoqnsib laqnub. Dego kere niŋgi geregere are qaloqnsib walweloqniye. Niŋgi binoŋ naŋgo kumbra dego dauryoqniye. Binoŋ naŋgi kumbra uge yosaieqnub. Dego kere niŋgi kumbra uge yqajqa are qaloqnaib.

Matyu 5:48

Nuŋgo Abu laŋ qureq di unu qaji a gaigai kumbra bole tiŋtiŋ keretsiq yeqnu dego kere niŋgi nuŋgo Abu aqa kumbra di dauryosib kumbra bole tiŋtiŋ keretsib yoqniye.”

Matyu 6:9

“Deqa niŋgi endegsib Qotei pailyoqniye, ‘O gago Abu, ni laŋ goge di unum. Ino ñam tulaŋ boledamu. Deqa iga na ino ñam getentoqnqom.

Jon 13:1

Qotei a nami Israel naŋgi Isip sawaq dia padalqa laqnabqa eleŋosiq aqaryainjrej deqa are qalqajqa yori bati koba jojomonaqa Yesus a endegsi qalieej, “E mandam endi so bati koboqo. E moisiy ijo Abu aqaq olo oqwa bati brantqo.” A degsi qalieosiq deqa aqa segi tamo uŋgasari mandamq di soqneb qaji naŋgi tulaŋ qalaqalainjroqnsiq gilsi gilsiq aqa moiqa bati itej.

Jon 13:3

Ariya Yesus a qalieej, aqa Abu na iŋgi iŋgi kalil aqa baŋq di ateleŋej. A Qotei aqaq dena bej olo puluosim Qotei aqaq oqwas di dego qalieej.

Jon 14:20

Sosib bati deqa niŋgi endegsib qalieqab, e na ijo Abu beteryejunum. Niŋgi na e beterbejunub. E na niŋgi beterŋgejunum.

Jon 16:28

Nami e ijo Abu ombla sosim dena mandamq aiem. Bini e olo mandam uratosiy aqaq olo oqwai.”

Jon 16:33

Niŋgi na e beterbosib are lawo na sqajqa deqa e na anjam endi niŋgi merŋgonum. Niŋgi mandamq endia sosib niŋgi gulube koba oqnqab. Deqa uŋgum. Niŋgi are siŋgilatiye. E segi na mandam endeqa siŋgila kalil gotraŋyosim tigelejunum.”

Jon 17:23

E ijo segi tamo uŋgasari naŋgoq di unum. Ni ijoq di unum. Kumbra dena naŋgi kalil dego aqo aiyel koba na are qujaitosib sqab. Soqnibqa mandam endeqa tamo uŋgasari naŋgi na unjrsibqa qalieqab, ni na e qariŋbonam bem. Osib qalieqab, ni na e tulaŋ qalaqalaibeqnum dego kere ijo segi tamo uŋgasari naŋgi dego ni na tulaŋ qalaqalainjreqnum.

Jon 17:25

O Abu, ino kumbra kalil tulaŋ tiŋtiŋo. Mandam endeqa tamo uŋgasari naŋgi ni qa qaliesai. Ariya e ni qa qalie. Ijo segi tamo uŋgasari naŋgi dego ni qa qalie. Deqa naŋgi qalieonub, ni na e qariŋbonam bem.

Jon 17:6

“Mandam endeqa tamo uŋgasari ni na ebem qaji naŋgi di e na ino ñam osornjroqnem. Naŋgi ino segi tamo uŋgasari sonabqa ni na naŋgi e ebem. Naŋgi ino anjam dauryoqneb.

Jon 7:33

Deqa Yesus a endegsi marej, “E niŋgi koba na sokiñalaysiy ijo Abu e qariŋbej qaji aqaq olo oqwai.

Aposel 3:21

A laŋ qureq oqej di unu. A di soqnimqa Qotei na mandam bunuj ti laŋ bunuj ti atqa bati brantimqa a olo bqas. Qotei a nami marej, ‘E mandam bunuj ti laŋ bunuj ti atqai.’ Osiqa aqa anjam di aqa medabu o qaji tamo naŋgi minjrnaqa naŋgi na neŋgreŋyeb.

Rom 12:5

Dego kere iga tamo uŋgasari gargekoba unum. Ariya iga kalil Kristus aqa jejamu qujai. Deqa iga segi segi kalil koba na korooqnsim jejamu qujaiq di turtejunum.

Rom 9:17

Agi Qotei na nami Isip naŋgo mandor koba endegsi minjej, “E na ni mandor koba atem unum. Di kiyaqa? E na ijo siŋgila kobaquja ni osormitqa tamo uŋgasari kalil naŋgi unsib ijo ñam osib sawa sawa kalilq dia mare mare laqajqa deqa e ni mandor koba atem.” Qotei aqa anjam di nami neŋgreŋyeb unu.

1 Korin 1:10

Ariya was qu, e gago Tamo Koba Yesus Kristus aqa ñam na niŋgi siŋgila na endegsi merŋgwai. Niŋgi kalil areqalo qujaitosib anjam qujai maroqniye. Niŋgi anjam bei bei qa ŋiriŋosib pupoaib. Niŋgi areqalo qujai ti sosib koba na geregere soqniye.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Efesus 4:4

Iga kalil tamo qujaionum. Deqa iga Kristus aqa jejamu qujai. Iga kalil Mondor qujai ejunum. Deqa Qotei na niŋgi iŋgi qujai qa tariŋqa osiq metŋgej. Iŋgi qujai di agi laŋ qaji iŋgi bole bole a na mondoŋ iga egwas qaji.

Filipai 2:9

Onaqa Qotei na aqa ñam olo soqtetosiqa laŋ qureq osi oqej. Od, Qotei na a ñam tulaŋ kobaquja yej. Deqa bini aqa ñam dena ñam kalil tulaŋ buŋnjrejunu.

Hibru 1:3

Yesus a na Qotei aqa riaŋ koba iga osorgeqnu. Yesus aqa so ti Qotei aqa so ti ombla kerekere. Aqa anjam siŋgila ti unu deqa anjam dena a na iŋgi iŋgi kalil siŋgilatejunu. A na gago une kobotetgosiqa laŋ qureq oqsiq Qotei siŋgila koba ti unu qaji aqa baŋ woq di awejunu.

Hibru 9:24

Iga qalie, Kristus a mandam qaji atra tal tamo naŋgi na gereiyeb qaji di miligiq gilosai. Mandam qaji atra tal di Qotei aqa atra tal bole laŋa sigitejunu. Kristus a laŋ qureq oqej. Deqa bini a Qotei aqa areq di sosiqa iga qa waueqnu.

Jems 4:4

Uŋa bei na aqa gumbuluŋ uratosiq olo tamo bei ombla sambala kumbra yeqnub dego kere niŋgi Qotei uratobuloqnsib kumbra uge uge yeqnub. Niŋgi quiye. Tamo bei a mandam qa kumbra qa tulaŋ areboleboleiyqas di a olo Qotei jeutqas. Niŋgi di qaliesai kio? Deqa tamo bei na mandam qa kumbra kadoiyqas di a Qotei ti jeu sqas.

1 Pita 1:5

Niŋgi Kristus qa nuŋgo areqalo siŋgilateqnub deqa Qotei aqa siŋgila kobaquja na niŋgi taqatŋge-junu. Qotei a na niŋgi eleŋam niŋgi bole sqajqa deqa are qaleqnu. Deqa mondoŋ diŋo batiamqa aqa kumbra di brantim niŋgi unqab.

1 Jon 3:12

Iga Kein aqa kumbra dauryqasai. Kein a Satan aqa tamo. A na aqa aube Abel qalnaq moiej. Kiyaqa a na aqa aube qalnaq moiej? Utru agiende. A kumbra uge yo qaji tamo deqa. Ariya Abel a kumbra tiŋtiŋ yoqnej deqa Kein na a qalnaq moiej.

1 Jon 5:19

Iga qalie, iga Qotei aqa aŋgro unum. Ariya tamo uŋgasari kalil mandamq endi unub qaji naŋgi tamo uge Satan aqa sorgomq di unub deqa a na naŋgi siŋgila na taqatnjreqnu.

Jut 1:1

E Jut. E Yesus Kristus aqa wau tamo. E Jems aqa was. E na anjam endi neŋgreŋyosim niŋgi tamo uŋgasari Qotei na metŋgej qaji niŋgi qa qariŋyonum. Gago Abu Qotei a na niŋgi tulaŋ qalaqalaiŋgeqnu. Yesus Kristus a segi na niŋgi taqatŋgeqnu.

Jut 1:24

O was qu, Qotei a na niŋgi taqatŋgoqneme. Yim niŋgi uloŋqasai. Mondoŋ a na niŋgi joqsim laŋ qureq osi oqimqa niŋgi aqa riaŋ unsib une saiqoji sosib tulaŋ areboleboleiŋgim sqab.

Uli Anjam 15:4

O Tamo Koba, ni segi qujai kumbra tulaŋ bolequja yeqnum. Ino jejamuq di une bei saiqoji. Deqa tamo uŋgasari kalil naŋgi bati gaigai ni biŋimoqnsibqa ino ñam soqtoqnsib sqab. Tamo uŋgasari sawa sawa kalilq di unub qaji naŋgi ino areq boqnsibqa ni qa louoqnqab. Di kiyaqa? Ino kumbra bole kalil ni segi na boleq atekritonum.”

Uli Anjam 19:12

Aqa ŋamdamu ŋam puloŋ bul puloŋoqnej. Aqa gateq di gate tatal gargekoba atesoqnej. Gate tatal di mandor kokba naŋgi na ateqnub deqaji bul. Aqa jejamuq di ñam bei neŋgreŋyonab soqnej. Ñam di a segi qalie. Tamo bei ñam di qaliesai.

Uli Anjam 4:8

Wagme qolqe ŋambile so qaji naŋgi segi segi bari 6-pela ti. Bileqsi qoreqsi bariqsi ŋamdamu gargekoba soqneb. Qanam ti qolo ti naŋgi gaigai louoqnsib endegsib mareqnub, “Qotei a siŋgila koba ti unu. Siŋgila kalil aqaq di unu. A nami soqnej. A bini unu. A bunuqna bqas.” Naŋgi degsib louoqnsib maroqnsib olo waiŋoqnsib mareqnub, “Qotei a getento koba. Qotei a getento koba. Qotei a getento koba.” Wagme qolqe naŋgi gaigai degsib louoqnsib mareqnub. Naŋgi aqaratosaieqnub.