Jon 14:6 - Yesus Aqa Anjam Bole

⁶ Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Jon 14:6 ပူးပေါင်းရင်းမြစ်များ

Matyu 11:27

Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qa qaliesai dego. E segi ijo Abu qa qalie. Ariya e na tamo qudei naŋgi ijo Abu osornjreqnum. Naŋgi dego ijo Abu qa qalie.

Jon 1:14

Anjam di a tamo yusiqa gago ambleq di soqnej. Onaqa iga aqa ñam koba ti aqa siŋgila ti di unem. Aqa ñam agiende. A segi qujai Qotei aqa Ŋiri. A iga qa are tulaŋ boleiyeqnu. A segi anjam bole qa utru.

Jon 1:17

Bole, nami Qotei a Moses aqa baŋ na iga dal anjam egej. Ariya Yesus Kristus aqa wau na Qotei a iga qa are tulaŋ boleiyeqnu. A segi anjam bole qa utru.

Jon 1:4

Anjam a segi ŋambile qa utru. Ŋambile di puloŋ bul. Deqa ŋambile dena tamo uŋgasari naŋgi suwantnjreqnu.

Jon 10:28

E naŋgi ŋambile enjritqa naŋgi ŋambile gaigai sqab. Deqa naŋgi padalqasai bolesai. Tamo bei na naŋgi ijo baŋq dena yaibqa keresai.

Jon 10:7

Deqa Yesus a na aqa yawo anjam di aqa damu ubtosiqa endegsi minjrej, “Niŋgi quiye. E bole merŋgwai. Kaja naŋgo jeŋ miligiq gilqajqa siraŋme agi e segi.

Jon 10:9

E segi siraŋme. Tamo bei a e qa bosim jeŋ miligiq giloqnqas di Qotei na a oqas. Amqa a miligiq gile oqede osim iŋgi bole uyoqnqas.

Jon 14:19

Tamo uŋgasari mandamq endi unub qaji naŋgi sokiñalaysibqa e olo nubqasai. Ariya niŋgi na e olo nubqab. E ŋambile unum deqa niŋgi dego ŋambile sqab.

Jon 15:1

Osiqa Yesus a olo anjam endegsi minjrej, “E segi wain ŋamtaŋ bole. Ijo Abu a wain wau qa lanja.

Jon 18:37

Onaqa Pailat na olo Yesus nenemyej, “Ni bole mandor e?” Onaqa Yesus na minjej, “Od, ni kere merbonum. E mandor. E anjam bole ubtqajqa deqa mandamq aisim ŋambabem. Tamo kalil anjam bole dauryeqnub qaji naŋgi ijo anjam queqnub.”

Jon 5:21

Ijo Abu na tamo moreŋo qaji naŋgi olo ŋambile enjroqnsiqa subq na tigeltnjreqnu. Deqa e Qotei aqa Ŋiri e kamba dego ijo segi areqalo na tamo naŋgi ŋambile enjreqnum.

Jon 6:33

Bem bole Qotei na niŋgi eŋgeqnu qaji di laŋ qureq dena mandamq aisiq tamo uŋgasari mandamq endi unub qaji naŋgi ŋambile enjreqnu.”

Jon 6:51

E segi ŋambile qa bem bole laŋ qure uratosim mandamq aiem qaji. Tamo bei a bem di uyqas di a ŋambile gaigai sqas. Bem di agi ijo segi jejamu. E na tamo uŋgasari mandamq endi unub qaji naŋgi ijo segi jejamu naŋgi anainjrit uyqab. Uysib naŋgi ŋambile sqab.”

Jon 6:57

Ijo Abu ŋambile unu qaji a na e qariŋbej deqa aqa siŋgila na e segi dego ŋambile unum. Dego kere tamo naŋgi ijo jejamu ti ijo leŋ ti uyqab di naŋgi dego ijo siŋgila na ŋambile sqab.

Jon 6:68

Onaqa Saimon Pita na minjej, “O Tamo Koba, iga ni uratmosim tamo yai aqaq gilqom? Ni segi qujai ŋambile gaigai sqajqa anjam mergeqnum.

Jon 8:32

Deqa niŋgi anjam bole geregere qalieqab. Yimqa anjam bole dena niŋgi aqaryaiŋgimqa une bei na niŋgi ojqa keresai.”

Jon 8:51

Niŋgi quiye. E bole merŋgwai. Tamo bei na ijo anjam qusim dauryqas di a olo moiqa keresai. Saibolesai.”

Aposel 3:15

Ariya Yesus a segi ŋambile qa utru. Di niŋgi na qalnab moiej. Onaqa Qotei na Yesus olo subq na tigeltonaqa iga gago ŋamdamu na unem. Deqa bini iga a qa mare mare laqnum.

Aposel 4:12

Niŋgi quiye. Tamo bei aqa ñam na Qotei na iga oqasai. Iga oqajqa tamo bei saiqoji. Qotei na tamo bei iga osorgosai bolesai. Yesus aqa ñam na qujai Qotei na iga oqas. Amqa iga padalqasai. Sawa bei beiq dia dego tamo bei na iga oqajqa di sosai.”

Aposel 9:2

“Ni anjam bei neŋgreŋyosim ebimqa e anjam di osiy aisiy Damaskus qureq dia Juda tamo kokba naŋgi enjritqa naŋgi na anjam di sisiyosib e odbibqa tamo uŋgasari Damaskus qureq dia Yesus aqa gam dauryeqnub qaji naŋgi tontnjrsiy joqsiy Jerusalem bqai.”

Rom 15:16

E Kristus Yesus aqa wau tamo deqa e sawa bei bei qaji tamo naŋgo ambleq dia wauoqnsim Qotei aqa anjam bole naŋgi minjreqnum. E na naŋgi osiy Qotei aqaq dia atrainjrobulitqa a naŋgi eleŋqajqa deqa waueqnum. Qotei aqa Mondor na naŋgi siŋgilatnjrimqa naŋgi Qotei aqa segi tamo uŋgasari sosib kumbra bole yoqnqajqa deqa e naŋgi qa waueqnum.

Rom 5:2

Yesus a na iga tamo uŋgasari a qa gago areqalo siŋgilateqnum qaji gam waqtetgej deqa Qotei a iga qa are tulaŋ boleiyonaqa iga eleŋej. Qotei na kumbra di iga egej deqa bini iga kumbra di osim tigelejunum. Deqa bini iga Qotei na laŋ qureq osi oqsim dia iga a ombla geregere sqajqa deqa tariŋeqnum. Iga deqa tulaŋ areboleboleigeqnaq unum.

Rom 5:21

Une aqa kumbra na moio babtej deqa une na iga siŋgila na taqatgesoqnej. Ariya bini Qotei a iga qa are tulaŋ boleiyeqnu aqa kumbra dena iga olo taqatgejunu. Gago Tamo Koba Yesus Kristus aqa wau na Qotei a iga qa are tulaŋ boleiyoqnsiqa iga tamo bole une saiqoji qa mergeqnu. Kumbra dena iga ŋambile gaigai sqom.

1 Korin 15:45

Agi Qotei aqa anjam bei nami endegsib neŋgreŋyeb unu, “Adam namij a mandam qaji ŋambile osi soqnej.” Ariya Adam bunuj a bunuqna bosiqa a segi Mondor ti sosiqa tamo uŋgasari naŋgi laŋ qaji ŋambile enjrej. Adam bunuj di Kristus.

Efesus 2:18

Kristus aqa wau na iga koba na Mondor qujai ejunum. Deqa iga are qujaitosim unum. Mondor dena gam waqtetgej deqa iga gaigai gago Abu Qotei aqa ulatamuq di brantoqnqom.

Kolosi 2:17

Kumbra kalil di seŋ qunuŋ bul damu saiqoji. Kumbra dena iŋgi bole bole mondoŋ brantqas qaji di iga laŋa suwi osorgeqnu. Ariya Kristus a kumbra damu ti osi bosiq osorgej.

Kolosi 2:9

Niŋgi qalie, Kristus a tamo bulyosiq gago ambleq di soqnej. Qotei aqa segi ŋambile ti kumbra ti kalil aqaq di keretsiq maqejunu.

Kolosi 3:4

Kristus a segi nuŋgo ŋambile qa utru. Mondoŋ a laŋ goge dena boleq dimqa niŋgi dego a koba na Qotei aqa riaŋ ti wala ti boleq dqab.

Hibru 7:25

Deqa tamo uŋgasari Yesus aqa ñam na Qotei aqa areq gileqnub qaji naŋgi di a na torei oqa kere. Di kiyaqa? A bati gaigai ŋambile sosim naŋgi qa Qotei pailyoqnqas.

Hibru 9:8

Kumbra dena Qotei aqa Mondor na iga endegsi osorgeqnu, atra tal soqnim iga Qotei aqa tal miligiq gilqajqa gam geteŋesqas.

1 Pita 1:21

Kristus a na niŋgi aqaryaiŋgej deqa niŋgi Qotei qa nuŋgo areqalo siŋgilatosib unub. Kristus agi moinaqa Qotei na olo subq na tigeltosiqa metonaq a laŋ qureq oqsiq dia ñam kobaquja ej. Utru deqa niŋgi Qotei qa nuŋgo areqalo siŋgilatoqnsib anjam a nami marej qaji di aqa damu brantqajqa deqa tariŋoqnsib unub.

1 Pita 2:4

Tamo Koba Yesus a tal aqa ai bul siŋgila na tigelejunu. Tal aqa ai di ŋambile unu. Niŋgi tal aqa ai deq boiye. Tal aqa ai di tamo uŋgasari naŋgi na unsibqa uge qa marsib taqal waiyeb. Ariya Qotei na olo tal aqa ai di giltosiqa marej, “Tal aqa ai di tulaŋ boledamu.”

1 Pita 3:18

Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej.

1 Jon 1:8

Iga endegsi marqom, “E une yosaieqnum.” Degsi marqom di iga gago segi jejamu gisaŋyonum. Deqa anjam bole gago are miligiq di sqa keresai.

1 Jon 2:23

Tamo a Qotei aqa Ŋiri qoreiyqas di a Abu dego qoreiyqas. Ariya tamo a Qotei aqa Ŋiri qa aqa areqalo siŋgilatqas di a Abu qa dego aqa areqalo siŋgilatqas.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

1 Jon 5:6

Yesus Kristus a bosiqa ya na yanso ej. Osiq ŋamburbasq di moinaqa aqa leŋ aiej. A ya na yanso oqajqa deqa segi bosai. A moiimqa aqa leŋ aiqajqa deqa ti bej. Qotei aqa Mondor a anjam bole qa utru. A Yesus Kristus aqa kumbra qa anjam palonteqnu.

2 Jon 1:9

Tamo bei a Kristus aqa anjam ojqa uratosim olo anjam bei totoryosim dauryqas di a Qotei ombla sqa keresai. Ariya tamo bei a Kristus aqa anjam siŋgila na ojesqas di Abu Qotei wo aqa Ŋiri wo naŋgi a koba na sqab.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 19:11

Onaqa e olo ŋam atsimqa laŋ waqonaqa hos qat bei brantonaq unem. Tamo hos quraq di awesoqnej qaji aqa ñam agiende, “Qotei aqa Wau Geregere Taqateqnu Qaji Tamo.” Aqa ñam bei, “Kumbra Bole Yeqnu Qaji Tamo.” A kumbra tiŋtiŋ na tamo uŋgasari naŋgo une qa peginjroqnsiqa naŋgi qoto itnjreqnu.

Uli Anjam 20:15

Tamo uŋgasari kalil naŋgo ñam ŋambile qa buk miligiq di sosai qaji naŋgi di Qotei na breinjrnaq ŋamyuoq aieleŋeb.

Uli Anjam 22:1

Ariya laŋ aŋgro dena ya bei osorbej. Ya di ŋambile qa ya. Ya di tulaŋ riaŋosiq qunuŋ bulej. Ya di Qotei wo Kaja Du wo naŋgo awo jaram kobaq dena bosiq qure aqa gam koba dauryosiq sumoqnej.

Uli Anjam 22:17

Qotei aqa Mondor Bole wo Kaja Du aqa uŋa bunuj wo naŋgi aiyel na maronub, “Yesus, ni aue.” Anjam e neŋgreŋyo-num qaji endi niŋgi kalil qusib mariye, “Yesus, ni aue.” Tamo a ya qaryimqa bosim ŋambile qa ya di osim uyem. Ya di awai saiqoji. Qotei na laŋa anaiyqas.

Uli Anjam 3:14

Yesus a na e degsi merbsiqa olo endegsi merbej, “Laodisia qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E Qotei aqa anjam maro qaji tamo. E endegsi mareqnum, “Qotei aqa anjam kalil bole.” Anjam kalil Qotei a nami marej qaji di e olo geregere palontoqnsim mareqnum. Iŋgi iŋgi kalil Qotei na gereiyej qaji di aqa utru agi e segi qujai. Deqa e na anjam endi ni qa qariŋyonum.

Uli Anjam 3:7

Yesus a na e degsi merbsiqa olo endegsi merbej, “Filadelfia qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E Qotei aqa tamo bole tiŋtiŋ. E kumbra bole qa utru. Devit a nami mandor koba soqnej dego kere e kamba aqa wau osim Qotei aqa tamo uŋgasari naŋgi taqatnjreqnum. E siraŋ bei waqtqai di tamo bei na getentqa keresai. E getentqai di tamo bei na waqtqa keresai. E na anjam endi ni qa qariŋyonum.