Jon 13:34 - Yesus Aqa Anjam Bole

³⁴ Endego e dal anjam bunuj eŋgwai. Dal anjam bunuj agiende. Niŋgi nuŋgo was naŋgi qalaqalainjroqniye. E niŋgi qalaqalaiŋgeqnum dego kere niŋgi kamba dego nuŋgo was naŋgi qalaqalainjroqniye.

Jon 13:34 ပူးပေါင်းရင်းမြစ်များ

Matyu 5:44

Ariya e na dal anjam di buŋyosiy niŋgi endegsi merŋgwai. Niŋgi nuŋgo jeu tamo naŋgi dego qalaqalainjroqniye. Tamo qudei naŋgi na niŋgi ugeugeiŋgibqa niŋgi na olo naŋgi qa Qotei pailyoqniye.

Jon 15:17

E na niŋgi dal anjam endegsi merŋgwai. Niŋgi segi segi na nuŋgo was naŋgi qalaqalainjroqniye.”

Jon 17:21

O Abu, ni ijoq di unum. E dego inoq di unum. Aqo aiyel are qujaitosim unum. Ijo segi tamo uŋgasari kalil naŋgi dego aqo aiyel koba na are qujaitosib sqajqa deqa e ni pailmonum. Soqnibqa mandam endeqa tamo uŋgasari naŋgi na unjrsibqa naŋgi dego e qa naŋgo areqalo siŋgilatqab. Osib qalieqab, ni na e qariŋbonam bem.

Rom 12:10

Niŋgi gaigai Qotei aqa segi tamo uŋgasari naŋgi nuŋgo was tiŋtiŋ edegosib naŋgi qalaqalainjroqniye. Niŋgi nuŋgo segi ñam tentoqnsib Kristen was naŋgo ñam olo soqtoqniye.

Rom 13:10

Tamo bei na tamo bei qalaqalaiyqas di a na tamo di kumbra uge bei yqa keresai. Deqa tamo bei na tamo qudei naŋgi qalaqalainjrqas di a dal anjam kalil dego keretosim dauryqas.

Rom 13:8

Niŋgi was bei aqa iŋgi iŋgi onub di nuŋgoq di sokobaiyaiq. A qa kamba olo yiye. Ariya iŋgi bei nuŋgoq di gaigai soqnem. Iŋgi agiende. Niŋgi qalaqalaiyo kumbra yoqnsib soqniye. Di kiyaqa? Tamo a qalaqalaiyo kumbra dauryqas di a Qotei aqa dal anjam kalil dego keretosim dauryekritqas.

Galesia 5:22

Ariya Qotei aqa Mondor na iga kumbra bole endeqaji yqajqa are tigeltetgeqnu. Qalaqalaiyo kumbra dauryoqa, areboleboleiyoqa, lawo kumbra yoqa, was naŋgi aqaryainjroqnsim kumbra bole bole enjroqa, kumbra bole tiŋtiŋ dauryoqa,

Galesia 5:6

Tamo a Kristus Yesus beteryesqas di a marqas, iga muluŋ aiqom di laŋa. Iga muluŋ aiqasai di dego laŋa. Ariya iga Kristus qa gago areqalo siŋgilatosim dena iga qalaqalaiyo kumbra dauryoqnqom di kumbra bole utru ti.

Galesia 6:10

Deqa bati soqnimqa iga na tamo kalil naŋgi kumbra bole bole enjroqnqom. Ariya iga na olo Kristus aqa tamo uŋgasari naŋgi kumbra tulaŋ boledamu enjrqajqa siŋgilaoqnqom.

Galesia 6:2

Niŋgi na nuŋgo Kristen was naŋgi aqaryainjroqnsib naŋgo gulube qoboiyetnjroqniye. Degsib qoboiyoqnqab kumbra dena niŋgi Kristus aqa dal anjam keretosib dauryqab.

Efesus 5:2

Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

Kolosi 1:4

Aqo aiyel niŋgi qa anjam bei endegsi quem. Kristus aqa anjam bole niŋgi qa bonaqa niŋgi qusibqa iŋgi tulaŋ boledamu Qotei na laŋ goge dia gereiyetŋgej unu qaji di niŋgi oqajqa deqa nuŋgo areqalo siŋgilateb. Niŋgi deq oqwajqa tariŋoqnsib unub. Utru deqa niŋgi Kristus Yesus qa nuŋgo areqalo siŋgilatoqnsib Qotei aqa segi tamo uŋgasari kalil naŋgi qalaqalainjreqnub. Kristus aqa anjam bole di sawa sawa kalilq gileqnaqa tamo uŋgasari gargekoba naŋgi quoqnsib naŋgo areqaloq di siŋgilatoqnsib dauryoqnsib kumbra bole bole yeqnub. Qotei a iga qa are tulaŋ boleiyosiq Yesus egej anjam bole di niŋgi nami qusib poiŋgej bati deqa kumbra bole deqaji nuŋgo ambleq di dego brantej.

1 Tesalonaika 3:12

Gago areqalo bei dego agiende. Tamo Koba Qotei a na niŋgi siŋgilatŋgimqa qalaqalaiyo kumbra nuŋgoq di tulaŋ kobaamqa niŋgi na Qotei aqa segi tamo uŋgasari naŋgi ti tamo kalil naŋgi ti tulaŋ qalaqalainjroqnqab. Agi iga na niŋgi tulaŋ qalaqalaiŋgeqnum dego kere.

2 Tesalonaika 1:3

O was qu, iga gaigai niŋgi qa are qaloqnsim deqa Qotei biŋiyeqnum. Iga kere degyeqnum. Di kiyaqa? Nuŋgo areqalo Yesus qa siŋgilateqnub qaji di tulaŋ kobaqujaeqnu. Niŋgi segi segi na nuŋgo Kristen was qu naŋgi qalaqalainjreqnub. Nuŋgo kumbra di dego tulaŋ kobaqujaeqnu.

Hibru 13:1

Ariya Kristen was qu, bati gaigai niŋgi segi segi nuŋgo was naŋgi qalaqalainjroqniye.

Jems 2:8

Qotei a gago Mandor Koba unu. Aqa dal anjam bei nami endegsib neŋgreŋyeb unu, “Niŋgi nuŋgo segi jejamu gereiyeqnub dego kere nuŋgo was qu dego degsib gereinjroqniye.” O was qu, niŋgi dal anjam di dauryqab di niŋgi kumbra tulaŋ boledamu yqab.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

2 Pita 1:7

Osib dena niŋgi nuŋgo Kristen was qu naŋgi kadoinjrsib geregereinjroqniye. Osib dena niŋgi qalaqalaiyo kumbra dauryosib soqniye.

1 Jon 3:11

Nami niŋgi dal anjam endegsib queb. Iga gago Kristen was naŋgi qalaqalainjroqnqom.

1 Jon 3:23

Qotei aqa dal anjam agiende. Iga aqa Aŋgro Yesus Kristus aqa ñam qa gago areqalo siŋgilatosim gago Kristen was naŋgi qalaqalainjroqnqom. Qotei aqa dal anjam di a na nami iga mergnaq quem.

1 Jon 4:21

Iga dal anjam di Kristus aqaq na em. Dal anjam agiende. Tamo a Qotei qalaqalaiyoqnqas di a na aqa Kristen was naŋgi dego qalaqalainjroqneme.

2 Jon 1:5

Ariya uŋa, e ni anjam bei mermitqa ni qusim daurye. Anjam agiende. Iga segi segi na gago Kristen was naŋgi qalaqalainjroqnqom. E dal anjam bunuj ni mermosai. Dal anjam di iga nami qusim ojem.