Jems 4:11 - Yesus Aqa Anjam Bole

¹¹ O was qu, niŋgi na Qotei aqa tamo uŋgasari naŋgi uge qa minjraib. Tamo bei na aqa was naŋgi uge qa minjrsim naŋgo jejamuq di une qametnjrqas di a dal anjam dego uge qa marsiq qamqo. Niŋgi dal anjam uge qa marsib qamqab di niŋgi dal anjam aqa sorgomq di sqa uratonub. Osib laŋa pegiyonub.

Jems 4:11 ပူးပေါင်းရင်းမြစ်များ

Luk 6:37

“Niŋgi tamo qudei naŋgo kumbra laŋa uge qa minjraib. Yimqa Qotei a kamba dego nuŋgo kumbra uge qa niŋgi merŋgwasai. Niŋgi tamo qudei naŋgo jejamuq di anjam laŋa qametnjraib. Yimqa Qotei a kamba dego nuŋgo jejamuq di anjam bei qametŋgwasai. Niŋgi na tamo naŋgo une kalil taqal atetnjroqniye. Yimqa Qotei a dego nuŋgo une kalil taqal atoqnqas.

Rom 2:1

Niŋgi qudei tamo naŋgo jejamuq di anjam qametnjreqnub qaji niŋgi segi segi e na endegsi merŋgwai. Ni segi une saiqoji qa marqa keresai. Ni que. Ni na tamo naŋgo jejamuq di anjam qametnjreqnum di ni segi dego ino jejamuq di anjam qameqnum. Di kiyaqa? Kumbra uge naŋgi yeqnub qaji di ni segi dego yeqnum.

Rom 2:13

Di kiyaqa? Tamo naŋgi dal anjam laŋa quoqnsib olo dauryosaieqnub qaji naŋgi Qotei aqa ŋamgalaq di tamo bolesai. Tamo naŋgi dal anjam qusib dauryeqnub qaji naŋgi segi Qotei na tamo bole une saiqoji qa minjrqas.

Rom 7:7

E maronum, nami dal anjam a na gago miligiq dia areqalo uge uge tigelteqnaqa iga une yoqnem. Deqa iga kiersi marqom? Dal anjam a une tamo bulej e? Sai. Dal anjam a une tamo bulosai. Dal anjam a na ijo une e osorbeqnu. Osorbosai qamu e une poibosai qamu. Agi dal anjam a marej, “Ni ino was aqa iŋgi iŋgi qa mamaulmaiq.” Degsi marosai qamu mamaul kumbra di kumbra uge e degsi poibosai qamu.

1 Korin 4:5

Qotei na tamo naŋgo une qa peginjrqa bati brantosaiunu deqa niŋgi na tamo qudei naŋgi une ti qa minjraib. Niŋgi mati tariŋesoqnibqa mondoŋ Tamo Koba Yesus a bosimqa a segi na iŋgi iŋgi kalil ambruq di uliejunub qaji di suwaŋoq di atqas. Osim tamo kalil naŋgo areqalo dego boleq atqas. Yim bati deqa Qotei a gago segi segi kumbra geregere pegiyosim mergwas.

2 Korin 12:20

Di kiyaqa? E niŋgi qa ulaeqnum. E niŋgi qa bosiy nuŋgo kumbra unsiy e niŋgi qa areboleboleibqas kio sai kio? Niŋgi dego ijo kumbra unsib niŋgi e qa areboleboleiŋgwas kio sai kio? E deqa ulaeqnum. E niŋgi qa bosiy nuŋgo kumbra endegsi unqai kio? Niŋgi anjam na qoteqnub. Niŋgi nuŋgo was naŋgi qa are ugeiŋgeqnu. Niŋgi minjiŋ oqeqnu. Niŋgi pupoeqnub. Niŋgi nuŋgo was qudei naŋgi misiliŋnjreqnub. Niŋgi yomueqnub. Niŋgi diqeqnub. Niŋgi Qotei aqa wau ugeugeiyeqnub. E degsi unqai kio?

Efesus 4:31

Deqa niŋgi are uge ti minjiŋ ti ŋiriŋ ti qoto ti misiliŋ anjam ti kumbra uge uge ti kalil torei uratiye.

1 Timoti 3:11

Naŋgo uŋgasari naŋgi dego ni na minjrim naŋgi areqalo bole ti sosib kumbra bole bole yoqnebe. Naŋgi yomu anjam maroqnaib. Naŋgi naŋgo segi so geregere taqatosib wau kalil Qotei na naŋgi enjrej qaji di geregere ojoqnebe.

2 Timoti 3:3

Naŋgi qalaqalaiyo kumbra qalieqasai. Naŋgi ŋiriŋoqnsib jeu atoqnsib olo jeu turyoqnqasai. Naŋgi yomu anjam gargekoba maroqnsib naŋgo segi jejamu taqatoqnqasai. Naŋgi laŋa laŋa qotoqnsibqa tamo naŋgi ñumoqnsib kumbra bole kalil jeutoqnqab.

Taitus 2:3

Ariya ni na uŋa qeli naŋgi anjam endegsim minjroqne, “Kumbra bole kalil Qotei a areareteqnu qaji di niŋgi dauryosib soqniye. Niŋgi yomuoqnaib. Wain uyoqnsib nanarioqnaib. Niŋgi na Kristen was naŋgi kumbra bole osornjroqniye.

Jems 1:16

O ijo was bole, une aqa kumbra dena niŋgi gisaŋgaim deqa niŋgi une kalil uratiye.

Jems 1:19

O ijo was bole, niŋgi ijo anjam endi geregere qalieosib soqniye. Niŋgi anjam bei marqa osib urur medabu waqtaib. Mati didaboqniye. Urur minjiŋ oqaiq.

Jems 1:25

Ariya Qotei aqa dal anjam a tulaŋ bole tiŋtiŋo. Dal anjam dena gago une aqa siŋgila kalil kobotetgeqnu. Deqa gago une dena iga olo titgosaieqnu. Tamo naŋgi Qotei aqa dal anjam di geregere peleiyoqnsib dauryoqnqab di Qotei a naŋgo wau kalil tulaŋ boletoqnqas. Ariya tamo naŋgi Qotei aqa dal anjam di laŋa qusib olo are walnjrqas di Qotei a naŋgo wau boletqasai.

Jems 2:8

Qotei a gago Mandor Koba unu. Aqa dal anjam bei nami endegsib neŋgreŋyeb unu, “Niŋgi nuŋgo segi jejamu gereiyeqnub dego kere nuŋgo was qu dego degsib gereinjroqniye.” O was qu, niŋgi dal anjam di dauryqab di niŋgi kumbra tulaŋ boledamu yqab.

Jems 5:10

O was qu, niŋgi Qotei aqa medabu o qaji tamo naŋgi qa are qaliye. Naŋgi Tamo Koba Qotei aqa ñam na anjam palontoqneb deqa jeu tamo naŋgi na naŋgi kumbra uge enjroqneb. Ariya naŋgi Qotei aqa anjam marqa ulaosaioqneb. Naŋgi naŋgo are miligi siŋgilatoqnsib gulube di qoboiyoqneb.

Jems 5:7

Deqa was qu, niŋgi nuŋgo are miligi siŋgilatosib gulube qoboiyoqnsib Tamo Koba Yesus a olo bqajqa tariŋoqniye. Niŋgi tariŋqa asgiŋgaiq. Niŋgi qalie, wau lanja naŋgi asginjrosaieqnu. Naŋgi iŋgi yagoqnsib awa qa tariŋeqnub. Awa beqnaqa iŋgi melieqnaqa naŋgi iŋgi meli di oqnsib uyeqnub.

Jems 5:9

O was qu, niŋgi Qotei aqa tamo uŋgasari naŋgi qa ŋiriŋoqnsib yomuoqnaib. Qotei na kamba nuŋgo une deqa niŋgi olo pegiŋgo uge. Niŋgi quiye. Une pegiyo tamo agi bqa jojomqo. A siraŋmeq di tigelejunu.

1 Pita 2:1

Niŋgi ŋambile bunuj eb deqa niŋgi kumbra uge kalil uratiye. Gisaŋ anjam ti maqu kumbra ti are uge ti yomu anjam ti kalil di niŋgi torei uratekritiye.