Jems 1:4 - Yesus Aqa Anjam Bole

⁴ Ariya niŋgi bati gaigai siŋgila na tigeloqnsib gulube qoboiyoqniye. Yimqa nuŋgo kumbra di tulaŋ kobaoqnimqa niŋgi Qotei aqa kumbra bei qa truquqasai. Niŋgi aqa kumbra kalil qa tulaŋ kere na sqab.

Jems 1:4 ပူးပေါင်းရင်းမြစ်များ

Matyu 10:22

Niŋgi ijo ñam ejunub deqa tamo uŋgasari kalil naŋgi niŋgi qa are tulaŋ ugeinjroqnqas. Ariya tamo uŋgasari naŋgi ijo ñam siŋgila na ojsib gilsi gilsib diŋo bati itqab di Qotei na naŋgi oqas.

Matyu 19:20

Onaqa aŋgro wala dena olo minjej, “E dal anjam di kalil nami dauryosim boqnem agi bini degsi unum. E Qotei aqa kumbra kie keretosaiunum?”

Matyu 5:48

Nuŋgo Abu laŋ qureq di unu qaji a gaigai kumbra bole tiŋtiŋ keretsiq yeqnu dego kere niŋgi nuŋgo Abu aqa kumbra di dauryosib kumbra bole tiŋtiŋ keretsib yoqniye.”

Mak 10:21

Onaqa Yesus a tamo di koqyosiqa qalaiyosiq minjej, “Ni dal anjam di kalil daurysim keretonum. Ariya kumbra qujai ni keretosai. Deqa e ni mermqai. Ni gilsim ino iŋgi iŋgi kalil qariŋyosim silali osim tamo iŋgi iŋgi saiqoji unub qaji naŋgi jeisi enjre. Degsim enjrsim bosim e daurbe. Yimqa bunuqna ni laŋ qureq dia awai bole itqam.”

Luk 18:22

Degsi minjnaqa qusiqa kamba minjej, “Ni dal anjam kalil dauryosim keretonum. Ariya kumbra qujai ni keretosai. Deqa e ni mermqai. Ni gilsim ino iŋgi iŋgi kalil qariŋyosim silali osim tamo iŋgi iŋgi saiqoji unub qaji naŋgi jeisi enjre. Degsim enjrsim bosim e daurbe. Osim bunuqna ni laŋ qureq dia awai bole itqam.”

Luk 21:19

Deqa niŋgi ijo ñam siŋgila na ojsib soqnib soqnib Qotei na niŋgi eleŋqas. Amqa niŋgi ŋambile gaigai sqab.

Luk 8:15

Ariya saga yago qudei mol mandam boledamuq di aieb qaji di aqa utru endegsi unu. Tamo qudei naŋgi Qotei aqa anjam qusib ojsib dauryoqnqab. Naŋgo are miligi bolequja deqa naŋgi siŋgila na tigelesosib gei bole ateleŋqab.”

Jon 17:23

E ijo segi tamo uŋgasari naŋgoq di unum. Ni ijoq di unum. Kumbra dena naŋgi kalil dego aqo aiyel koba na are qujaitosib sqab. Soqnibqa mandam endeqa tamo uŋgasari naŋgi na unjrsibqa qalieqab, ni na e qariŋbonam bem. Osib qalieqab, ni na e tulaŋ qalaqalaibeqnum dego kere ijo segi tamo uŋgasari naŋgi dego ni na tulaŋ qalaqalainjreqnum.

1 Korin 2:6

Bole, tamo naŋgi Qotei aqa kumbra qa tulaŋ siŋgilaeqnub qaji naŋgi iga na anjam minjreqnam quoqnsib dena naŋgi powo bole ejunub. Ariya powo di mandam qaji tamo naŋgo powo sai. Powo di mandam qaji tamo kokba padalqa gamq di unub qaji naŋgo powo sai.

Galesia 6:9

Deqa iga kumbra bole yoqnqajqa asgigwasai. Iga asgigwasai di bunuqna iga awai bole oqom.

Kolosi 4:12

Epafras a na dego niŋgi kaiyeiŋgwo. A nuŋgo leŋ. A Kristus Yesus aqa wau tamo. A gaigai siŋgila na niŋgi qa endegsi Qotei pailyeqnu, “O Abu, ni na Kolosi Kristen naŋgi aqaryainjrimqa naŋgi siŋgila na tigeloqnsib naŋgi Kristen tamo tulaŋ boledamu sosib ino kumbra bole keretosib ino areqalo kalil geregere qalieqab.”

1 Tesalonaika 5:23

Qotei a are lawo qa utru. A na nuŋgo areqalo tigeltetŋgimqa niŋgi nuŋgo segi jejamu osib a yekritosib aqa segi kumbra boleq di sosib dauryoqniye. Qotei a na nuŋgo mondor ti nuŋgo qunuŋ ti nuŋgo jejamu ti kalil taqatesoqnimqa niŋgi so bole sqab. Sosib mondoŋ gago Tamo Koba Yesus Kristus a olo bqas bati deqa niŋgi torei une saiqoji sqab.

2 Timoti 3:17

Deqa anjam dena Qotei aqa tamo uŋgasari naŋgi siŋgilatnjreqnaqa naŋgi kumbra bole kalil yoqnsibqa wau bole bole yoqnqajqa tulaŋ siŋgilaeqnub.

Hibru 13:21

Qotei qujai di a na niŋgi siŋgilatŋgoqnimqa niŋgi aqa areqalo geregere dauryosib kumbra bole bole yoqniye. A gago are miligiq di wauoqnimqa iga Yesus Kristus aqa wau na kumbra kalil a tulaŋ areareteqnu qaji di yoqnsim sqom. Iga kalil bati gaigai aqa ñam soqtoqnqom. Bole.

Jems 1:5

Nuŋgo ambleq di tamo bei a powo qa truquosimqa a Qotei pailyem. Yimqa Qotei na a powo yqas. Niŋgi qalie, Qotei a gaigai tamo kalil naŋgi iŋgi bole bole enjreqnu. Naŋgi pailyeqnab a naŋgi qa olo ŋiriŋosaieqnu.

Jems 3:2

Bati gargekoba iga kumbra guro guroyeqnum. Iga kalil degyeqnum. Ariya tamo bei aqa anjam maro qa grotqasai di a tamo bolequja. Deqa a na aqa baŋ ti siŋga ti jejamu ti dego geregere taqatoqnqas.

1 Pita 5:10

Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab.

2 Pita 1:9

Ariya kumbra bole deqaji tamo bei aqaq di sqasai di a tamo ŋam qandimo bul sqas. Deqa iŋgi bole bole isaq di unu qaji di a unqa keresai. Bole, Qotei a nami aqa une kobotetej. Ariya a deqa olo are walyeqnu.