Jems 1:12 - Yesus Aqa Anjam Bole

¹² Tamo naŋgi siŋgila na tigeloqnsib gulube qoboiyeqnub qaji naŋgi areboleboleinjreme. Di kiyaqa? Naŋgi gulube kalil di gotraŋyoqnsib siŋgila na tigelesqab di Qotei na awai boledamu enjrqas. Yim naŋgi ŋambile gaigai sqab. Agi Qotei a marej, a na tamo kalil a qalaqalaiyeqnub qaji naŋgi awai bole enjrqas.

Jems 1:12 ပူးပေါင်းရင်းမြစ်များ

Matyu 10:22

Niŋgi ijo ñam ejunub deqa tamo uŋgasari kalil naŋgi niŋgi qa are tulaŋ ugeinjroqnqas. Ariya tamo uŋgasari naŋgi ijo ñam siŋgila na ojsib gilsi gilsib diŋo bati itqab di Qotei na naŋgi oqas.

Matyu 25:34

Osiyqa tamo bole ijo baŋ woq di unub qaji naŋgi endegsi minjrqai, ‘Ijo Abu a niŋgi qa tulaŋ areboleboleiyqo. Nami a mandam atej bati deqa a nuŋgo Mandor Koba sosim niŋgi taqatŋgwajqa marej. Deqa niŋgi ijoq boiye. Babqa ijo Abu a nuŋgo Mandor Koba sosim niŋgi taqatŋgwas.

Luk 6:22

“Niŋgi ijo ñam oqnsib e daurbeqnub deqa bunuqna tamo qudei naŋgi na niŋgi jeutŋgoqnsib misiliŋgoqnsib nuŋgo ñam ugeugeiyoqnqab. Nami naŋgo moma naŋgi na Qotei aqa medabu o qaji tamo naŋgi degsib ugeugeinjroqneb. Dego kere bunuqna naŋgi niŋgi dego ugeugeiŋgoqnqab. Di kiyaqa? Niŋgi na e Tamo Aŋgro daurbeqnub deqa. Di uŋgum. Naŋgi niŋgi ugeugeiŋgibqa niŋgi tulaŋ areboleboleiŋgeme. Niŋgi quiye. Nuŋgo awai bole agi laŋ goge di unu. Bunuqna niŋgi oqsib awai di itqab.

Rom 5:4

Iga siŋgila na tigeleqnum deqa gulube gagoq beqnaqa iga na gotraŋyeqnum. Iga gulube gotraŋyoqnsim deqa iga Qotei qa gago areqalo siŋgilatoqnsim a na iga laŋ qureq osim oqwajqa deqa tariŋoqnsim unum.

Rom 8:28

Iga qalieonum, Qotei na tamo uŋgasari kalil a tulaŋ qalaqalaiyeqnub qaji naŋgi geregere taqatnjreqnu. Deqa kumbra kalil naŋgoq di branteqnu qaji dena naŋgi olo boletnjreqnu. Tamo naŋgi di Qotei na nami oqa marsiq metnjrej.

1 Korin 2:9

Agi Qotei aqa anjam bei nami endegsib neŋgreŋyeb unu, “Laŋ qure qa iŋgi iŋgi di tamo naŋgo ŋamdamu na unosaieqnub. Naŋgo dabkala na quosaieqnub. Deqa naŋgi iŋgi iŋgi deqa are qalosaieqnub. Ariya iŋgi iŋgi di Qotei na tamo uŋgasari a tulaŋ qalaqalaiyeqnub qaji naŋgi gereiyetnjrej unu. Deqa mondoŋ naŋgi oqsib oqab.”

1 Korin 8:3

Ariya tamo bei a Qotei qalaqalaiyoqnqas di Qotei a tamo deqa bole poiyqo.

1 Korin 9:25

Tamo gurgureqnub qaji naŋgi awai oqa marsib deqa gurgur qalieqa osib mati naŋgo segi jejamu siŋgilateqnub. Yim gurgur batiamqa naŋgi siŋgila na gurgurqab. Ariya naŋgo awai di mandam qaji awai. Deqa naŋgo awai di koboqas. Ariya laŋ qaji awai iga oqa mareqnum qaji di koboqasai. Di gaigai sqas.

2 Timoti 2:15

Ni Qotei aqa wau tamo boledamu sqajqa siŋgilaoqnim Qotei a nuŋgo wau qa tulaŋ arearetoqnqas. Deqa ni Qotei aqa anjam bole geregere palontoqne. Ni degyqam di ni aqa ŋamgalaq di jemaimqasai.

2 Timoti 4:8

Tamo naŋgi gurgu-roqnsib bubuŋeqnub di naŋgi awai oqajqa. Ariya ijo awai bole agi Qotei a laŋ goge dia atej unu. E awai di oqajqa deqa tariŋoqnsim unum. Ijo awai agiende. Mondoŋ Tamo Koba Qotei na e tamo bole une saiqoji qa merbqas. Di ijo awai bole. Tamo Koba Qotei a kumbra tiŋtiŋ na tamo uŋgasari naŋgo kumbra qa naŋgi peginjreqnu. Ariya Qotei na naŋgi peginjrqajqa batiamqa a na awai bole di e ebqas. A e segi awai ebqasai. Tamo kalil Yesus a laŋ goge dena brantim unqajqa deqa areboleboleinjreqnaqa tariŋeqnub qaji naŋgi ti awai bole egwas.

Hibru 10:32

Ariya niŋgi are qaliye. Nami Qotei na nuŋgo areqalo suwaŋtetŋgonaqa bati deqa jeu tamo naŋgi na gulube ti jaqatiŋ ti gargekoba niŋgi eŋgoqneb. Ariya bati deqa niŋgi siŋgila na tigeloqnsibqa gulube di gotraŋyoqneb. Di niŋgi keretoqneb.

Hibru 11:17

Ariya Qotei na Abraham aqa areqalo tenemtqa osiqa endegsi minjej, “Ni ino segi aŋgro qujai Aisak qalsim e atraibe.” Onaqa Abraham a Qotei aqa anjam di uratosai. Bole, Qotei na nami minjej, “Ino leŋ naŋgi tulaŋ gargekobaqab.” Ariya a Qotei qa aqa areqalo siŋgilatej deqa a Aisak osiq Qotei atraiyqa gilej.

Hibru 12:5

Nami Qotei a nuŋgo are siŋgilatetŋgwa osiqa niŋgi anjam endegsi merŋgej, “O ijo aŋgro, e nuŋgo Tamo Koba. Deqa e na nuŋgo kumbra tingitetŋgwa marsiyqa gulube eŋgoqnit niŋgi gulube di qoboiyqa asgiŋgaiq. Osib are gulubeiŋgaiq. Niŋgi quiye. Tamo naŋgi e na qalaqalainjreqnum qaji naŋgi di e na olo tingitnjreqnum. Tamo naŋgi ijo segi aŋgro qa mareqnum qaji naŋgi e na gulube enjreqnum.” Qotei a na niŋgi aqa segi aŋgro sqa marsiqa anjam degsi merŋgej. Niŋgi anjam deqa olo are walŋgwo kio?

Hibru 6:15

Onaqa Abraham a Qotei aqa anjam di qusiqa aqa areqaloq di siŋgilatosiq tariŋosiq soqnej. A tariŋqa asgiyosai. A tariŋesosiq sosiq bunuqna iŋgi bole Qotei na a yqa minjej qaji di a na ej.

Jems 2:5

O ijo was bole, niŋgi quiye. Qotei a tamo iŋgi iŋgi saiqoji unub qaji naŋgi qa osiqa giltnjrej. Yim naŋgi a qa naŋgo areqalo siŋgilaboletibqa a na naŋgi taqatnjrsim naŋgo Mandor Koba sqajqa deqa. Agi Qotei a nami endegsi marej, “Tamo uŋgasari e qalaqalaibeqnub qaji naŋgi e na taqatnjrsiy naŋgo Mandor Koba sqai.” Ariya mandam endeqaji tamo uŋgasari naŋgi mareqnub, “Tamo iŋgi iŋgi saiqoji unub qaji naŋgi tamo uge.”

Jems 5:11

Niŋgi quiye. Iga endegsi mareqnum, “Tamo naŋgi naŋgo are miligi siŋgilatoqnsib gulube qoboiyeqnub qaji naŋgi Qotei na taqatnjreqnu. Deqa naŋgi areboleboleinjreqnu.” Niŋgi Jop aqa kumbra qa nami queb. Jop a aqa are miligi siŋgilatosiq gulube kobaquja qoboiyesoqnej. Niŋgi qalie, bunuqna Tamo Koba Qotei na Jop olo boletej. Od, iga qalieonum, Tamo Koba Qotei a gaigai iga qa duloqnsiqa iga qa are boleiyeqnu.

1 Pita 3:14

Bole, niŋgi kumbra tiŋtiŋ yibqa tamo qudei naŋgi na nuŋgo kumbra di unsib deqa jaqatiŋ eŋgwab di uŋgum. Niŋgi deqa areboleboleiŋgem. Naŋgi na niŋgi naŋgi ulainjrqajqa anjam bei merŋgibqa niŋgi naŋgi qa ulaaib. Osib are gulubeiŋgaiq.

1 Pita 4:13

Niŋgi gulube di eqnub deqa niŋgi Kristus aqa kumbra dauryeqnub. Agi Kristus a nami jaqatiŋ qoboiyej dego kere niŋgi dego jaqatiŋ qoboiyeqnub. Deqa niŋgi areboleboleiŋgim soqniye. Yimqa mondoŋ Kristus a ñam koba ti brantimqa bati deqa niŋgi olo tulaŋ areboleboleiŋgim sqab.

1 Pita 4:14

Niŋgi Kristus aqa ñam ojejunub deqa jeu tamo naŋgi na niŋgi misiliŋgwab di uŋgum. Niŋgi deqa areboleboleiŋgem. Di kiyaqa? Niŋgi qalie, Qotei aqa Mondor ñam koba ti siŋgila ti unu qaji a na niŋgi beterŋgejunu deqa.

1 Pita 5:10

Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab.

1 Pita 5:4

Niŋgi kumbra degyibqa mondoŋ kaja naŋgo Mandor Koba Yesus a laŋ qureq na olo brantimqa bati deqa niŋgi awai tulaŋ boledamu oqab. Awai di ugeqa keresai. Gaigai sqas.

1 Jon 4:19

Iga na gago Kristen was naŋgi qalaqalainjreqnum. Di kiyaqa? Qotei a namoqna iga qalaqalaigej deqa.

Uli Anjam 2:10

Bunuqna ni jaqatiŋ koba oqam. Ni deqa ulaaim. Ni que. Satan a na niŋgi qudei ojeleŋosim tonto talq breiŋgwas. Breiŋgimqa niŋgi ijo ñam geregere ojqab kio ijo ñam uratosib uloŋqab kio di Satan a nuŋgo areqalo unsim qalieqajqa deqa niŋgi tonto talq breiŋgwas. Niŋgi bati 10-pela gulube ti jaqatiŋ ti sqab. Ariya niŋgi e qa nuŋgo areqalo siŋgilatosib soqniye. Sosib sosib gilsib jeu tamo naŋgi na niŋgi liŋgib moreŋqab. Amqa e na niŋgi ŋambile eŋgwai. Ŋambile di nuŋgo awai boledamu.

Uli Anjam 3:19

Tamo naŋgi e qalaqalainjreqnum qaji di e na olo ŋiriŋtnjroqnsim gereinjreqnum. Deqa ni are siŋgilatosim ino segi kumbra gereiyosim are bulye.

Uli Anjam 3:21

Tamo a Satan ombla qotsim siŋgilaqas di e na minjitqa aqo ombla ijo awo jaram kobaq di awoqom. Nami e segi qoto siŋgilaosimqa aqo ijo Abu wo aqa awo jaram kobaq di awoem dego kere.