Hibru 9:23 - Yesus Aqa Anjam Bole

²³ Atra tal aqa iŋgi iŋgi di mandam qaji iŋgi iŋgi. A laŋ qaji iŋgi iŋgi laŋa sigitejunu. Atra tamo naŋgi na wagme naŋgo leŋ oqnsib dena iŋgi iŋgi di yanseqnub. Ariya laŋ qaji iŋgi iŋgi di wagme naŋgo leŋ na yansqa keresai. Leŋ tulaŋ boledamu na laŋ qaji iŋgi iŋgi yansqas.

Hibru 9:23 ပူးပေါင်းရင်းမြစ်များ

Luk 24:26

Agi Qotei aqa medabu o qaji tamo naŋgi nami anjam endegsib maroqneb, ‘Kristus agi Qotei na giltej qaji a jaqatiŋ koba osim moiqas. Osim a laŋ qureq oqimqa Qotei na ñam kobaquja yqas.’ Qotei aqa medabu o qaji tamo naŋgi nami anjam degsib maroqneb. Naŋgo anjam di niŋgi qaliesai kio?”

Luk 24:46

Onaqa Yesus na olo minjrej, “Qotei aqa anjam bei nami endegsib neŋgreŋyeb unu, ‘Kristus a jaqatiŋ koba osim moiqas. Moisim bati qalub koboamqa a olo subq na tigelqas.’ Nami e qa anjam degsib neŋgreŋyeb unu.

Jon 14:3

E nuŋgo segi segi warum gereiyetŋgsiy olo bosiy niŋgi joqsiy qure e sqai di niŋgi dego e ombla sqab.

Aposel 23:15

Deqa niŋgi na qaja tamo naŋgo gate koba a endegsi minjiye, ‘Ni Pol olo osau. Osbamqa iga olo koroosimqa aqa anjam geregere qusim aqa une qalieqom.’ Niŋgi na qaja tamo naŋgo gate koba a degsi minjibqa a Pol osi bosim nuŋgoq di brantosaisoqnimqa gamq dia iga Pol qalsim moiotqom.”

Kolosi 2:17

Kumbra kalil di seŋ qunuŋ bul damu saiqoji. Kumbra dena iŋgi bole bole mondoŋ brantqas qaji di iga laŋa suwi osorgeqnu. Ariya Kristus a kumbra damu ti osi bosiq osorgej.

Hibru 10:1

Moses aqa dal anjam a na iŋgi bole bole Qotei a mondoŋ iga egwas qaji di iga laŋa suwi osorgeqnu. Damu osorgosaieqnu. Dal anjam a marej, niŋgi wagme naŋgo leŋ oqnsib wausau gaigai atraiyoqniye. Dal anjam a degsi marej deqa iga qalieonum, dal anjam a na tamo uŋgasari Qotei aqa areq gileqnub qaji naŋgo une kobotqa keresai.

Hibru 10:4

Anjam di aqa utru agiende. Bulmakau ti kaja du du ti naŋgo leŋ na tamo uŋgasari naŋgo une kobotqa keresai.

Hibru 8:5

Livai naŋgi gaigai mandam qaji atra tal miligiq giloqnsib waueqnub. Atra tal di laŋa mandam qaji tal. Tal di laŋ qure qaji atra tal laŋa sigitejunu. Agi Moses a nami tal di atqa laqnaqa Qotei na tal sigitosiqa Moses osoryonaqa degsi gereiyej. Agi Qotei na Moses endegsi minjej, “E mana goge dia atra tal sigitosim ni osormem. Ni di geregere dauryosim atra tal aqa iŋgi iŋgi kalil degsi gereiyime.” Qotei na nami Moses degsi minjej.

Hibru 9:14

Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

Hibru 9:24

Iga qalie, Kristus a mandam qaji atra tal tamo naŋgi na gereiyeb qaji di miligiq gilosai. Mandam qaji atra tal di Qotei aqa atra tal bole laŋa sigitejunu. Kristus a laŋ qureq oqej. Deqa bini a Qotei aqa areq di sosiqa iga qa waueqnu.

Uli Anjam 5:9

Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb, “O Kaja Du, ni buk di osimqa kandel aqa namur buk qandratejunu qaji di waqtqa kere. Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub. Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.