Hibru 6:2 - Yesus Aqa Anjam Bole

² Anjam bei agi yanso oqajqa anjam. Anjam bei agi Kristen gate naŋgi na wau tamo naŋgi giltnjrqa maroqnsib naŋgo gateq di baŋ ateqnub. Anjam bei agi subq na tigelqajqa anjam. Anjam bei agi Qotei na tamo kalil naŋgo une qa naŋgi peginjrsimqa tamo qudei naŋgi ŋambile enjrimqa naŋgi so bole gaigai sqab. Ariya tamo qudei naŋgi Qotei na ŋamyuoq di breinjrim naŋgi dia gaigai sqab. O was qu, anjam di iga nami utruq na quoqnem. Ariya bini iga anjam dena prugosim olo Kristus aqa anjam qudei iga siŋgilatgwajqa qaji di dauryoqnqom.

Hibru 6:2 ပူးပေါင်းရင်းမြစ်များ

Matyu 28:19

Deqa niŋgi walwelosib sawa sawa kalil keretoqnsibqa tamo uŋgasari kalil naŋgi ijo anjam minjroqnsib laqniye. Minjroqnibqa naŋgi ijo anjam quoqnsib dauryoqnsibqa ijo segi aŋgro bole sqab. Deqa niŋgi na ijo Abu aqa ñam na ti e Qotei aqa Ŋiri ijo segi ñam na ti Qotei aqa Mondor Bole aqa ñam na ti naŋgi yansnjroqniye.

Matyu 3:14

Gilnaqa Jon na saidyosiq minjej, “Ni na e yansbqam di kere. Kiyaqa e na ni yansmqa marsim ijoq bonum?”

Mak 16:16

Tamo naŋgi e qa naŋgo areqalo siŋgilatosib yanso oqab qaji naŋgi di Qotei na oqas. Ariya tamo naŋgi e qa naŋgo areqalo siŋgilatqasai qaji naŋgi di Qotei na naŋgo une qa peginjrsim awai uge enjrqas.

Mak 7:4

Naŋgi maket dena boqnsibqa naŋgi iŋgi uyqa oqnsib mati naŋgo jejamu geregere yanseqnub. Naŋgi naŋgo jejamu yansqasai di naŋgi mati iŋgi uyqasai. Naŋgi kumbra deqaji gargekoba yeqnub. Naŋgo ya gambaŋ, ya nobu, web dego mati geregere yanseleŋoqnsib iŋgi uyeqnub. Kumbra di naŋgo moma naŋgoq dena eleŋosib dauryeqnub.

Mak 7:8

Agi niŋgi kumbra degyeqnub. Niŋgi Qotei aqa dal anjam gotraŋyoqnsibqa olo mandam tamo naŋgo dal anjam dauryqajqa tulaŋ siŋgilaeqnub.”

Luk 11:38

Awoosib Yesus a iŋgi uyqa osiqa a Juda naŋgo moma kumbra dauryqa uratej. Deqa a baŋ mati yansosai. A laŋa iŋgi uyej. Deqa Farisi tamo a Yesus aqa kumbra di unsiqa tulaŋ prugugetej.

Luk 12:50

E yanso bei oqai. E yanso di osaiunum deqa e are tulaŋ gulubekobaibeqnu.

Luk 14:14

Amqa ni tulaŋ areboleboleimqas. Di kiyaqa? Naŋgi na kamba ni iŋgi anaimqa keresai. Deqa mondoŋ tamo uŋgasari kumbra bole bole yeqnub qaji naŋgi subq na tigelo batiamqa Qotei na kamba awai tulaŋ boledamu ni emqas.”

Luk 3:16

Onaqa Jon a naŋgo areqalo di qalieosiqa minjrej, “Tamo Koba a bunuqna ijo qoreq na bqas. A tamo siŋgila koba. Ijo siŋgila aqa siŋgila ti keresai. Deqa e a kaŋgalyqajqa e tamo bolesai. E ya na laŋa yansŋgeqnum. Ariya Tamo Koba a bosimqa Qotei aqa Mondor aqa siŋgila na ti ŋamyuo na ti niŋgi yansŋgwas.

Jon 1:33

E nami a qa qaliesai. Ariya Qotei agi e ya na tamo uŋgasari naŋgi yansnjrqajqa qariŋbej qaji a na merbej, ‘Ijo Mondor Bole aisim tamo bei aqa gateq di awoamqa ni unqam. A na qujai Mondor aqa siŋgila na tamo uŋgasari naŋgi yansnjroqnqas.’

Jon 5:29

Qusib olo sub uratosib tigelqab. Tamo uŋgasari kumbra bole bole yoqneb qaji naŋgi tigelosibqa ŋambile sqab. Tamo uŋgasari kumbra uge uge yoqneb qaji naŋgi tigelabqa e na naŋgo kumbra uge deqa naŋgi peginjrsiy naŋgi padaltnjrqai.”

Aposel 10:47

“Iga Juda tamo nami Qotei aqa Mondor em dego kere sawa bei bei qaji tamo naŋgi dego bini aqa Mondor onub. Deqa tamo bei na iga naŋgi yansnjrqajqa saidgwa keresai.”

Aposel 13:3

Onaqa naŋgi Qotei pailyqa osibqa iŋgi ti ya ti uratosib naŋgo aiyel gateq di baŋ atsib pailyosib Qotei aqa Mondor na anjam minjrej qaji di naŋgi dauryosib naŋgi aiyel qariŋnjrnab gileb.

Aposel 16:15

Deqa tamo uŋgasari Lidia aqa talq di soqneb qaji naŋgi ti Lidia a ti yanso eb. Onaqa Lidia na iga mergej, “E are bulyosim Tamo Koba Yesus qa ijo areqalo siŋgilatonum niŋgi bole edegosib bosib ijo talq endia iga koba na sqom.” Lidia a tulaŋ siŋgilaej deqa iga aqa talq dia a ombla na soqnem.

Aposel 16:33

Onaqa qolo qujai deqa tonto tal taqato tamo a na naŋgi aiyel joqsiqa naŋgo jejamuq di yu yansetnjrej. Osiqa tamo uŋgasari kalil a ombla tal qujaiq di soqneb qaji naŋgi koba na are bulyosib Yesus qa naŋgo areqalo siŋgilateb. Osib naŋgi yanso eb.

Aposel 17:18

Bati bei Grik naŋgo qalie tamo Atens qureq di soqneb qaji naŋgi Pol ombla anjam na qoteb. Naŋgi qudei qalie tamo koba Epikurias aqa skulq dena qalie eb. Naŋgi qudei skul bei aqa ñam Stoik dena qalie eb. Pol a na naŋgi endegsi minjroqnej, “Yesus a moisiq olo subq na tigelej. Deqa mondoŋ tamo kalil naŋgi dego subq na olo tigelqab.” Pol a na naŋgi degsi minjroqnej deqa naŋgi Pol ombla anjam na qotoqnsib segi segi maroqneb, “Pol a anjam laŋa laŋa mareqnu. A anjam kie mergwajqa bqo?” Ariya tamo qudei naŋgi endegsib maroqneb, “Pol a qure bei naŋgo qotei qa mergeqnu kio?”

Aposel 2:38

Onaqa Pita na kamba minjrej, “Niŋgi segi segi are bulyosib Qotei aqaq boiye. Babqa iga Yesus Kristus aqa ñam na niŋgi yansŋgonam Qotei na nuŋgo une kalil kobotetŋgwas. Osim aqa Mondor Bole niŋgi laŋa eŋgwas. Awai saiqoji.

Aposel 2:41

Onaqa tamo uŋgasari kalil Pita aqa anjam di qusib naŋgo are miligiq di ateb qaji naŋgi yansnjreb. Bati deqa tamo uŋgasari 3,000 naŋgi Yesus qa naŋgo areqalo siŋgilatosib tamo uŋgasari nami Yesus qa naŋgo areqalo siŋgilateb qaji naŋgo miligiq aisib koba na soqneb.

Aposel 23:6

Ariya Juda tamo kokba awoeleŋesoqneb qaji naŋgo ambleq dia Sadyusi tamo ti Farisi tamo ti soqneb. Onaqa Pol a degsi qalieosiqa leleŋosiq minjrej, “O ijo was niŋgi quiye. E Farisi tamo. Ijo abu a dego Farisi tamo. Deqa e endegsi are qalonum. Tamo kalil moreŋo qaji naŋgi mondoŋ olo subq na tigelqab. Anjam deqa e ijo areqalo tulaŋ siŋgilatejunum. Anjam deqa qujai naŋgi na e ojsib agi nuŋgo ŋamdamuq di tigeltbonub.”

Aposel 24:15

Mondoŋ Qotei na tamo bole ti tamo uge ti naŋgi olo subq na tigeltnjrqas. Qotei qujai deqa e ijo areqalo siŋgilatoqnsim subq na tigelo bati qa tariŋoqnsim unum. Juda tamo kokba naŋgi dego Qotei qa naŋgo areqalo siŋgilatoqnsib subq na tigelo bati qa tariŋoqnsib unub.

Aposel 24:21

Bole, ijo anjam qujai endeqa naŋgi na ijo jejamuq di une qametbeb. E naŋgo ulatamuq dia tigelesosim leleŋosim endegsi minjrem, ‘Tamo kalil moreŋo qaji naŋgi mondoŋ olo subq na tigelqab. Anjam deqa qujai niŋgi na e ojsib ijo jejamuq di une qametbonub.’ O Tamo Koba Feliks, e naŋgo ulatamuq di tigelosim anjam degsi minjrem.” Pol a na Feliks degsi minjej.

Aposel 24:25

Kumbra bole bole dauryoqnqajqa deqa ti gago segi segi so geregere taqatoqnqajqa deqa ti Feliks minjnaq quej. Mondoŋ Qotei na tamo uŋgasari naŋgo une qa peginjrqajqa deqa ti Pol na Feliks minjnaq quej. Qusiqa ulaosiq Pol minjej, “Ni mati aisim ino warumq di soqne. Bunuqna e bati atsiy olo ni metmit bosim anjam di merbqam.”

Aposel 26:8

Niŋgi qudei endegsib are qaleqnub kio, ‘Qotei na tamo naŋgi subq na tigeltnjrqasai?’ Niŋgi kiyaqa degsib are qaleqnub? Nuŋgo areqalo di bolesai.

Aposel 6:6

Ariya Kristen was naŋgi na tamo 7-pela naŋgi di giltnjrsib Yesus aqa aŋgro 12-pela naŋgo ulatamuq di tigeltnjrnab naŋgo gateq di baŋ atsib naŋgi siŋgila oqajqa deqa naŋgi qa Qotei pailyeb.

1 Korin 10:2

Naŋgi kalil Moses dauryeb deqa naŋgi laŋbi ti Yuwal Lentq dena ti yanso eb.

1 Korin 12:13

Di kiyaqa? Qotei aqa Mondor a segi qujai na iga kalil eleŋosiqa turtgej deqa iga kalil tamo qujaionum. Iga Juda tamo ti Grik tamo ti kaŋgal tamo ti tamo laŋaj ti kalil Qotei aqa Mondor qujai di osim a ya jumbum bul uyoqnsim dena iga siŋgila eqnum.

2 Korin 5:10

Di kiyaqa? Iga qalieonum, mondoŋ iga kalil Kristus aqa ulatamuq dia tigelimqa a na gago kumbra qa iga pegigwas. Iga mandamq endia kumbra bole kio kumbra uge kio yoqnem di a unsim awai segi segi egwas.

Filipai 3:21

Yesus aqa segi siŋgila na a na iŋgi iŋgi kalil eleŋosim aqa segi sorgomq di atim sqas. Aqa siŋgila dena a na gago jejamu bulyetgimqa gago jejamu di Yesus aqa jejamu bulosim so bole gaigai sqas. Gago jejamu di agi bini gulube ti jaqatiŋ ti unu.

Kolosi 2:12

Niŋgi yanso eb bati deqa niŋgi Kristus beteryosib a ti moieb. Onaqa Qotei na niŋgi Kristus ombla subq atej. Ariya Qotei na Kristus olo subq na tigeltej aqa kumbra di niŋgi nuŋgo areqaloq di siŋgilateb deqa a na niŋgi dego Kristus ombla subq na tigeltŋgej unub.

2 Timoti 2:18

Naŋgi aiyel anjam bole qa gam uratosib gisaŋ anjam endegsib mareqnub, “Tamo uŋgasari kalil naŋgi nami subq na tigeleb koboqo. Deqa iga olo bunuqna subq na tigelqasai.” Naŋgo gisaŋ anjam dena naŋgi na tamo uŋgasari qudei nami Yesus qa naŋgo areqalo siŋgilateb qaji naŋgo areqalo olo ugetetnjreqnub.

Hibru 11:35

Uŋgasari qudei naŋgo aŋgro naŋgi moreŋeqnab Qotei na naŋgi olo subq na tigeltnjroqnej. Jeu tamo naŋgi na tamo qudei naŋgi tonto talq di breinjroqnsib jaqatiŋ koba enjroqneb. Osib minjroqneb, “Niŋgi Qotei qoreiyib iga niŋgi uratŋgim niŋgi tonto talq dena oqedqab.” Onaqa naŋgi saidosib minjroqneb, “Sai. Mondoŋ iga olo subq na tigelosim ŋambile gaigai sqom. Deqa uŋgum, bini iga jaqatiŋ oqnsim unum di kere.”

Hibru 9:10

O was qu, dal anjam di uyo iŋgi qa ti ya uyo qa ti yanso oqajqa ti deqa mareqnu. A jejamu qa iŋgi iŋgi qa segi mareqnu. Ariya Qotei na dal anjam di tamo uŋgasari naŋgi enjrej. Osiqa endegsi are qalej, “Naŋgi mati dal anjam di dauryosib giloqnib bunuqna batiamqa e na iŋgi iŋgi kalil tingitnjrit koboamqa e olo gam bunuj naŋgi osornjrqai.”

2 Pita 3:7

Ariya bini laŋ ti mandam ti tariŋoqnsib unub. Mondoŋ Qotei a olo anjam marimqa laŋ ti mandam ti ŋamyuo na yusib koboqab. Bati deqa Qotei na tamo naŋgi a qoreiyeqnub qaji naŋgo une qa peginjrsim naŋgi torei padaltnjrqas.