Hibru 5:9 - Yesus Aqa Anjam Bole

^9-10 Qalieosiq deqa a Qotei aqa anjam torei dauryekritej. Deqa Qotei na a giltosiq minjej, “Ni atra tamo kobaquja unum. Agi Melkisedek a nami atra tamo kobaquja soqnej dego kere.” Qotei na Yesus degsi minjej deqa Yesus na tamo kalil Qotei aqa anjam dauryeqnub qaji naŋgi oqas. Naŋgi oqajqa utru agi Yesus qujai. Deqa naŋgi ŋambile gaigai sqab.

Hibru 5:9 ပူးပေါင်းရင်းမြစ်များ

Matyu 17:5

Pita a degsi mareqnaqa laŋbi tulaŋ suwaŋo aisiqa naŋgi kabutnjrej. Onaqa laŋbi miligiq dena anjam bei endegsi brantonaq naŋgi queb, “Endi ijo Aŋgro qujai e na tulaŋ qalaqalaiyeqnum qaji. E a qa tulaŋ areboleboleibeqnu. Deqa niŋgi aqa anjam quetoqniye.”

Luk 13:32

Onaqa Yesus na kamba minjrej, “Niŋgi gilsib gisaŋ tamo Herot a endegsib minjiye, ‘Yesus a marqo, “Bini e mondor uge naŋgi winjroqnsiyqa tamo ma ti naŋgi boletnjroqnqai. Nebe dego e wau di yoqnqai. Ariya alieb e ijo wau di kobotqai.” ’ Niŋgi gilsib Herot degsib minjiye.

Jon 19:30

Onaqa Yesus a wain isa koba di uysiqa marej, “Bini e ijo wau kobotonum.” Degsi marsiqa aqa gate gulaiŋosiqa mondor titosiq moiej.

Aposel 3:15

Ariya Yesus a segi ŋambile qa utru. Di niŋgi na qalnab moiej. Onaqa Qotei na Yesus olo subq na tigeltonaqa iga gago ŋamdamu na unem. Deqa bini iga a qa mare mare laqnum.

Aposel 4:12

Niŋgi quiye. Tamo bei aqa ñam na Qotei na iga oqasai. Iga oqajqa tamo bei saiqoji. Qotei na tamo bei iga osorgosai bolesai. Yesus aqa ñam na qujai Qotei na iga oqas. Amqa iga padalqasai. Sawa bei beiq dia dego tamo bei na iga oqajqa di sosai.”

Aposel 5:32

Iga gago segi ŋamdamu na Yesus aqa kumbra di unoqnsim deqa mare mare laqnum. Qotei aqa Mondor Bole na dego Yesus aqa kumbra deqa mare mare laqnu. Qotei na tamo uŋgasari aqa anjam dauryeqnub qaji naŋgi aqa Mondor di enjreqnu.”

Rom 1:5

Yesus Kristus aqa wau na Qotei a iga qa are tulaŋ boleiyosiqa aqa ñam na iga aqa anjam maro tamo sqajqa deqa wau egej. Tamo uŋgasari sawa sawa kalilq di unub qaji naŋgi Yesus qa naŋgo areqalo siŋgilatosib aqa anjam dauryqajqa deqa are qalsiq wau egej.

Rom 10:16

Ariya tamo uŋgasari kalil naŋgi anjam bole di qusib dauryosaieqnub. Agi naŋgi qa Aisaia a nami endegsi marej, “O Tamo Koba, tamo yai naŋgi gago anjam di qusib naŋgo areqaloq di siŋgilateqnub?”

Rom 15:18

E iŋgi bei qa merŋgwasai. Kristus a ijo baŋ na wau yeqnu qaji deqa segi niŋgi saiŋgwai. A na ijo medabu siŋgilatetboqnsiqa ijo baŋ na wau bole bole yeqnu. A na e siŋgila ebeqnaqa e maŋwa gargekoba yeqnum. Qotei aqa Mondor na dego e siŋgilatbeqnaqa e waueqnum. Kristus a kumbra kalil di yeqnu. Di kiyaqa? A na sawa bei bei qaji naŋgo are tigeltetnjrimqa naŋgi Qotei aqa anjam dauryqajqa deqa. Utru deqa e Jerusalem dena wau utru atsim Kristus aqa anjam bole mare mare laqnsim gilsim torei Ilirikum sawaq dia diŋtem.

Rom 2:8

Ariya tamo qudei naŋgi naŋgo segi jejamu qa are qaloqnsib deqa naŋgi anjam bole gotraŋyoqnsib kumbra uge uge dauryeqnub. Deqa Qotei a tamo naŋgi deqaji qa minjiŋ oqimqa awai ugedamu enjrqas.

Rom 6:17

Bole, nami niŋgi une aqa wau tamo soqneb. Ariya bini Qotei na niŋgi osiq aqa anjam aqa sorgomq di atej unub deqa niŋgi nuŋgo are miligiq na aqa anjam dauryeqnub. Qotei a kumbra degyej deqa iga a qa tulaŋ areboleboleigeqnu.

2 Korin 10:5

Areqalo uge uge ti gisaŋ anjam na ti tamo naŋgi Qotei qalieqajqa gam getentetnjreqnu deqa iga na olo gotraŋyeqnum. Osim iga tamo naŋgo areqalo kalil bulyetnjreqnam naŋgi Kristus aqa anjam dauryqajqa are qaleqnub.

Filipai 2:12

Ariya was qu, e qalieonum, niŋgi gaigai ijo anjam dauryeqnub. Ariya bini niŋgi olo siŋgila na dauryoqniye. E niŋgi koba na sqai bati deqa segi sai. Bini e isaq endi unum deqa niŋgi ijo anjam dauryqa urataib. Niŋgi ijo anjam olo siŋgila na dauryoqniye. Qotei na niŋgi padalo sawaq dena eleŋej deqa niŋgi ulaosib siŋgila na wauoqniye.

2 Tesalonaika 1:8

Ariya Yesus a mandamq aisim tamo naŋgi Qotei qaliesai qaji naŋgi ti tamo naŋgi gago Tamo Koba Yesus aqa anjam bole dauryqa urateqnub qaji naŋgi ti ŋolawotnjrqas.

2 Tesalonaika 2:16

Gago Tamo Koba Yesus Kristus wo gago Abu Qotei wo naŋgi aiyel na iga tulaŋ qalaqalaigeqnub. Qotei a iga qa are boleiyoqnsiq deqa a gaigai gago are boletetgeqnu. Osiqa a na iga siŋgilatgeqnu. Deqa mondoŋ a na iga boletgwajqa deqa iga tariŋoqnsim unum.

2 Timoti 2:10

Deqa e na ijo are miligi siŋgilatoqnsim gulube kalil di qoboiyoqnsim unum. E tamo uŋgasari Qotei na aqa segi qa giltnjrej qaji naŋgi aqaryainjrqajqa deqa osim gulube di qoboiyeqnum. Yimqa Qotei na naŋgi eleŋamqa naŋgi dego Kristus Yesus aqa ñam na ŋambile osib a ombla gaigai sqajqa deqa.

Hibru 1:14

Laŋ aŋgro naŋgi mondor. Naŋgi Qotei aqa wau ojeqnub. Agi Qotei na naŋgi qariŋnjreqnaqa naŋgi giloqnsib tamo uŋgasari a na oqas qaji naŋgi aqaryainjreqnub.

Hibru 11:40

Di kiyaqa? Qotei na iŋgi tulaŋ boledamu iga kalil egwa marsiqa atej unu. Ariya Qotei na tamo nami soqneb qaji naŋgi torei boletnjrimqa naŋgi namoosib iga buŋgosib iŋgi tulaŋ boledamu di oqa saidnjrej. Osiqa a iga qa tariŋeqnu. Mondoŋ a na iga ti tamo nami soqneb qaji naŋgi ti turtgosim iga kalil torei boletgwajqa deqa marsiqa iga qa tariŋeqnu.

Hibru 11:8

Abraham a dego Qotei qa aqa areqalo siŋgilatej deqa Qotei na metonaqa a Qotei aqa anjam dauryosiqa mandam bei Qotei na a yqajqa minjej qaji deq gilej. A sawa qabitqas kio di a qalieosaisosiqa gilej.

Hibru 12:2

Osim iga Yesus koqyoqnqom. Iga Qotei qa gago areqalo siŋgilateqnum kumbra di agi Yesus a segi utru. Bunuqna a na gago kumbra di torei keretqas. Yesus a qalie, a Qotei aqa anjam geregere dauryosim ŋamburbasq di moiqas di bunuqna a olo ŋambile bole osim tulaŋ areboleboleiyqas. A deqa are qalsiq siŋgilaosiq ŋamburbasq di moiej. A nami qalieej, a ŋamburbasq di moiqas di tamo uŋgasari naŋgi a qa maroqnqab, “A tamo tulaŋ uge deqa a moiqo.” Yim a jemakobaiyqas. Ariya Yesus a jemai deqa are qalosai. A Qotei aqa anjam dauryosiq moiej. Ariya bini a olo laŋ qureq dia Qotei aqa awo jaram baŋ woq di awejunu.

Hibru 2:10

Qotei a iŋgi iŋgi kalil qa utru. A na iŋgi iŋgi kalil gereiyej. A na aŋgro gargekoba naŋgi joqsim laŋ qureq oqwajqa deqa are qalsiq Yesus siŋgilatonaqa a jaqatiŋ osiq moiej. Moisiq aqa jaqatiŋ dena a na iga oqajqa wau tigeltej. Qotei aqa wau di tulaŋ tiŋtiŋo.

Hibru 2:3

Ariya bini Qotei na iga oqajqa marsiq wau kobaquja yej. Deqa iga Qotei aqa wau di qoreiyqom di iga awai uge turqom. Awai di iga britosim jaraiqa keresai. Namoqna Tamo Koba Yesus a segi na iga oqajqa anjam di maroqnej. Onaqa tamo naŋgi aqa anjam di quoqneb qaji naŋgi na kamba olo iga endegsib mergoqneb, “Anjam di bole.”

Hibru 9:12

Ariya Kristus a bulmakau ti kaja du du ti naŋgo leŋ osiqa atra tal di miligiq gilosai. A aqa segi leŋ osiqa bati qujai qa atra tal miligiq gilej. Aqa wau dena a na iga olo awaigej. Deqa iga ŋambile gaigai sqom.

Hibru 9:15

Yesus aqa leŋ na iga aqaryaigej deqa iga Qotei aqa ŋamgalaq di tamo bole unum. Aqa wau dena a Qotei aqa anjam bunuj siŋgilatqa osiqa Qotei ti iga ti gago ambleq di tigelejunu. Tamo uŋgasari naŋgi anjam namij aqa sorgomq di sosib bati deqa naŋgi une yoqnsib laqneb. Onaqa Yesus a naŋgi qa moisiq wau dena a naŋgi olo awainjrsiqa naŋgo une kobotetnjrej. Deqa tamo uŋgasari kalil Qotei na metnjreqnaq qusib dauryeqnub qaji naŋgi ŋambile gaigai sqab. Ŋambile di agi Qotei a nami aqa aŋgro naŋgi enjrqa marej.

Hibru 9:28

Dego kere Kristus a bati qujai qa tamo gargekoba naŋgo une qoboiyetnjrqa marsiqa aqa segi jejamu osiq Qotei atraiyej. Ariya mondoŋ a olo laŋ qureq dena bosimqa a tamo uŋgasari naŋgo une olo kobotetnjrqasai. A bosim tamo uŋgasari a qa tariŋeqnub qaji naŋgi oqas.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

Jut 1:21

Qotei a na niŋgi tulaŋ qalaqalaiŋgeqnu. Deqa niŋgi a beteryesoqnibqa a na gaigai niŋgi qalaqalaiŋgoqnqas. Gago Tamo Koba Yesus Kristus a iga qa tulaŋ duleqnu aqa kumbra di a na mondoŋ boleq atqas. Yim niŋgi ŋambile gaigai sqab. Deqa niŋgi gaigai a qa tariŋoqnsib soqniye.