Hibru 5:13 - Yesus Aqa Anjam Bole

¹³ Iga qalie, aŋgro mom naŋgi muŋgum segi uyeqnub. Naŋgi kumbra tiŋtiŋ dauryqajqa geregere poinjrosaieqnu.

Hibru 5:13 ပူးပေါင်းရင်းမြစ်များ

Matyu 11:25

Bati deqa Yesus a endegsi Qotei pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Di kiyaqa? Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu.

Mak 10:15

Niŋgi quiye. E bole merŋgwai. Tamo bei a aŋgro du du naŋgi dego bul sqasai di Qotei na a osim taqatqasai. Deqa a naŋgo Mandor Koba sqa keresai dego.”

1 Korin 13:11

Nami e aŋgro kiñala sosimqa e aŋgro kiñilala naŋgo powo ti areqalo ti osim anjam maroqnem. Ariya bunuqna e tamo kobaqujaosimqa e aŋgro kiñilala naŋgo kumbra di uratem.

1 Korin 14:20

O was qu, niŋgi aŋgro kiñilala naŋgi bulosib nanariosib walwelaib. Niŋgi tamo bole bole naŋgi bulosib areqalo bole na walweloqniye. Niŋgi qalie, aŋgro mom naŋgi kumbra uge qa poinjrosaieqnu. Deqa niŋgi kumbra uge kalil qa aŋgro mom naŋgi bulosib nanariosib soqniye.

1 Korin 3:1

O was qu, e nuŋgo ambleq di soqnem bati deqa niŋgi Kristus aqa kumbra geregere qalieosaisoqneb deqa niŋgi aŋgro mom bul soqneb. Deqa anjam e na tamo uŋgasari Qotei aqa Mondor dauryeqnub qaji naŋgi minjreqnum di niŋgi olo merŋgwa keresai. Anjam e na tamo uŋgasari naŋgo areqalo namij dauryeqnub qaji naŋgi minjreqnum di segi niŋgi merŋgoqnem.

2 Korin 3:9

Dal anjam aqa wau agiende. Dal anjam na iga gago une qa mergoqnsiq iga padaltgeqnu. Wau di Qotei aqa riaŋ ti bej. Ariya iga qalieonum, iga na tamo uŋgasari naŋgi Qotei aqa ŋamgalaq di tamo bole une saiqoji sqajqa gam osornjreqnum wau di olo tulaŋ riaŋ koba ti bqas. A na dal anjam aqa riaŋ tulaŋ buŋyqas.

Efesus 4:14

Deqa iga olo aŋgro kiñilala bul sqasai. Tamo qudei naŋgi gisaŋ kumbra ti maqu kumbra ti tulaŋ qalieosib yeqnub. Deqa naŋgi gisaŋ anjam koba marsib laqnub. Jagwa na yuwal tigelteqnaqa oqe aieqnu dego kere anjam dena tamo qudei naŋgo areqalo niñaqyetnjreqnu. Ariya iga aŋgro kiñilala bul sqasai deqa anjam dena gago areqalo niñaqyetgwasai.

2 Timoti 3:16

Qotei aqa anjam kalil neŋgreŋq di so qaji di aqa utru Qotei aqa Mondor a segi na babtonaqa naŋgi neŋgreŋyeb unu. Anjam dena iga aqaryaigwa kere. Agi anjam dena iga anjam bole qa utru osorgoqnsiqa tamo uŋgasari areqalo bole ti sosai qaji naŋgo areqalo olo tingitetnjroqnsiqa gago walwel gereiyetgoqnsiqa iga kumbra bole dauryqa gam osorgeqnu.

1 Pita 2:2

Iga qalie, aŋgro mom naŋgi muŋgum qaq uyqajqa qarnjreqnu. Dego kere niŋgi muŋgum qaq boledamu Qotei aqaq dena beqnu qaji di oqajqa are qaloqniye. Muŋgum qaq di agi Qotei aqa anjam. Muŋgum qaq di jiga bei saiqoji. Muŋgum qaq dena nuŋgo qunuŋ aqaryaiyimqa niŋgi tulaŋ boleosib siŋgilaqab. Yim Qotei na niŋgi oqas.

2 Jon 1:11

Niŋgi a baŋ ojqab di niŋgi a aqaryaiyosib a ombla wau uge ojqab.