Hibru 5:12 - Yesus Aqa Anjam Bole

¹² Niŋgi nami are bulyeb bati olekoba gilqo. Deqa niŋgi Qotei aqa anjam plaltosib Kristen tamo uŋgasari naŋgi minjrqa kere. Ariya nuŋgo powo kobaosaiunu deqa niŋgi Qotei aqa anjam plaltsib marqa keresai. Tamo qudei naŋgi na olo niŋgi Qotei aqa anjam utruq na merŋgwab di niŋgi poiŋgwas. Niŋgi aŋgro mom muŋgum uyeqnub dego bul. Niŋgi iŋgi siŋgila uyqa kereosaiunu.

Hibru 5:12 ပူးပေါင်းရင်းမြစ်များ

Matyu 17:17

Onaqa Yesus a anjam di qusiqa endegsi marej, “Niŋgi tamo uŋgasari bini bati endeqa unub qaji nuŋgo areqalo e qa siŋgilatosai bolesai. Nuŋgo kumbra ti nuŋgo areqalo ti tulaŋ uge. Bati gembub e niŋgi koba na sosiyqa nuŋgo gulube di qoboiyoqnqai? Aŋgro mel di ijo areq osi boiye.”

Mak 9:19

Onaqa Yesus a anjam di qusiqa marej, “Niŋgi tamo uŋgasari bini bati endeqa unub qaji nuŋgo areqalo e qa siŋgilatosai bolesai? Bati gembub e niŋgi koba na sosiyqa nuŋgo gulube di qoboiyoqnqai? Aŋgro mel di ijo areq osi boiye.”

Aposel 7:38

Moses qujai dena Israel tamo uŋgasari naŋgi joqsiq wadau sawaq dia korooqneb. Di gago moma naŋgi. Moses qujai di Sainai manaq oqsiqa dia laŋ aŋgro na anjam minjej qaji a ombla soqneb. Sosibqa Moses na ŋambile gaigai sqajqa anjam Qotei aqaq dena yaiyosiqa gago moma naŋgi enjrej.

Rom 3:2

Deqa e niŋgi kamba endegsi merŋgwai. Qotei a na iŋgi tulaŋ bole bole Juda naŋgi enjrej. Iŋgi bole bei agiende. A na Juda naŋgi aqa anjam taqatqajqa deqa wau enjrej.

1 Korin 14:19

Ariya Kristen tamo uŋgasari naŋgi Qotei louqa koroesoqnibqa e naŋgo koroq dia anjam tulaŋ truquyala segi minjroqnit naŋgi qusib poinjrqas di bolequja. Ariya e meŋ bulyosiy qure utru segi segi naŋgo anjam tulaŋ olekoba totoryosiy naŋgi minjroqnit naŋgi poinjrqasai di keresai.

1 Korin 14:20

O was qu, niŋgi aŋgro kiñilala naŋgi bulosib nanariosib walwelaib. Niŋgi tamo bole bole naŋgi bulosib areqalo bole na walweloqniye. Niŋgi qalie, aŋgro mom naŋgi kumbra uge qa poinjrosaieqnu. Deqa niŋgi kumbra uge kalil qa aŋgro mom naŋgi bulosib nanariosib soqniye.

Galesia 4:3

Dego kere iga nami aŋgro kiñilala bul sosimqa bati deqa iga mondor uge uge mandam ti laŋ ti taqatejunub qaji naŋgo sorgomq di soqnem.

Filipai 3:1

Ariya was qu, e ijo anjam getentqai. E anjam qujai bei unu. Anjam agiende. Niŋgi Tamo Koba Yesus qa tulaŋ areboleboleiŋgim soqniye. E anjam di olo neŋgreŋyosiy niŋgi qa qariŋyqa asgibosaieqnu. Di kiyaqa? E are qalonum, anjam dena niŋgi aqaryaiŋgwas.

Kolosi 3:16

Osib niŋgi Kristus aqa anjam osib nuŋgo are miligiq di siŋgilatib soqnem. Osib niŋgi na nuŋgo Kristen was qu naŋgi areqalo bole ti powo ti osornjroqniye. Yim naŋgi kumbra bole bole yoqnqajqa deqa. Niŋgi nuŋgo are miligiq di Qotei biŋiyoqnsib a qa louoqniye. Lou qudei neŋgreŋq di unu qaji dena ti lou qudei Qotei aqa Mondor na nuŋgo are miligiq di ateqnu qaji dena ti niŋgi Qotei qa louoqniye.

Hibru 10:32

Ariya niŋgi are qaliye. Nami Qotei na nuŋgo areqalo suwaŋtetŋgonaqa bati deqa jeu tamo naŋgi na gulube ti jaqatiŋ ti gargekoba niŋgi eŋgoqneb. Ariya bati deqa niŋgi siŋgila na tigeloqnsibqa gulube di gotraŋyoqneb. Di niŋgi keretoqneb.

Hibru 5:11

O was qu, e deqa anjam gargekoba niŋgi merŋgwajqa unu. Ariya nuŋgo areqalo geteŋo deqa niŋgi anjam di aqa utru poiŋgwa keresai. Deqa e niŋgi merŋgwajqa baŋgi koba.

Hibru 5:13

Iga qalie, aŋgro mom naŋgi muŋgum segi uyeqnub. Naŋgi kumbra tiŋtiŋ dauryqajqa geregere poinjrosaieqnu.

Hibru 6:1

Deqa was qu, iga Kristus aqa anjam nami utruq na quoqnem qaji dena prugosim olo Kristus aqa anjam qudei iga siŋgilatgwajqa qaji di dauryoqnqom. Anjam nami utruq na quoqnem qaji agiende. Iga dal anjam dauryqa marqom di iga moio gam turqom. Ariya iga are bulyosim Qotei qa gago areqalo siŋgilatqom di iga ŋambile sqom.

1 Pita 2:2

Iga qalie, aŋgro mom naŋgi muŋgum qaq uyqajqa qarnjreqnu. Dego kere niŋgi muŋgum qaq boledamu Qotei aqaq dena beqnu qaji di oqajqa are qaloqniye. Muŋgum qaq di agi Qotei aqa anjam. Muŋgum qaq di jiga bei saiqoji. Muŋgum qaq dena nuŋgo qunuŋ aqaryaiyimqa niŋgi tulaŋ boleosib siŋgilaqab. Yim Qotei na niŋgi oqas.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.