Hibru 4:11 - Yesus Aqa Anjam Bole

¹¹ Ariya iga aqarato sawa di miligiq gilqajqa tulaŋ siŋgilaqom. Siŋgilaqasai di nuŋgo ambleq di tamo bei a Israel naŋgo kumbra dauryosim Qotei aqa anjam gotraŋyosim uloŋo uge.

Hibru 4:11 ပူးပေါင်းရင်းမြစ်များ

Matyu 11:12

“Jon yansnjro qaji a anjam marqajqa bati brantej dena bosi bosiq agi bini tamo naŋgi waukobaoqnsib tulaŋ siŋgilaeqnub. Agi naŋgi Qotei na taqatnjrsim naŋgo Mandor Koba sqa maroqnsib deqa naŋgi siŋgila na qotoqnsib waukobaoqnsib siŋgilaeqnub.

Matyu 7:13

Osiqa Yesus a olo anjam endegsi minjrej, “Niŋgi siraŋme kiñalaq dena miligiq giliye. Niŋgi siraŋme kobaqujaq dena miligiq gilqab di niŋgi padalo sawaq aiqab. Gam di kobaquja. Tamo gargekoba naŋgi gam di dauryeqnub.

Luk 13:24

“Niŋgi siraŋme kiñalaq dena miligiq gilqajqa wauoiye. Niŋgi quiye. Tamo gargekoba naŋgi miligiq gilqajqa wauoqnib ugeinjroqnqas.

Luk 16:16

“Nami Qotei aqa dal anjam ti Qotei aqa medabu o qaji tamo naŋgo anjam ti maroqneb dena bosi bosiq Jon aqa bati brantej. Jon aqa bati brantej dena bosiq agi bini tamo naŋgi sawa sawa kalilq dia Qotei aqa anjam bole palontosib mareqnub. Tamo kalil naŋgi Qotei na taqatnjrsim naŋgo Mandor Koba sqajqa deqa are qaloqnsib areqalo di tulaŋ siŋgilatejunub.

Jon 6:27

Jejamu qa iŋgi a koboqas. Niŋgi iŋgi deqa wauaib. Iŋgi gaigai sqas qaji deqa niŋgi wauoiye. Iŋgi dena niŋgi ŋambile gaigai sqab. Ŋambile gaigai sqajqa iŋgi di e Tamo Aŋgro na niŋgi anaiŋgwai. Ijo Abu Qotei na e giltbej deqa e na iŋgi di anaiŋgwai.”

Aposel 26:19

“Deqa Mandor Koba Agripa, laŋ goge dena puloŋ ainaqa e unsimqa anjam Yesus na merbej qaji di gotraŋyosai.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

Efesus 5:6

Niŋgi geregere ŋam atiye. Tamo qudei naŋgi na niŋgi kumbra uge deqaji yqajqa titŋgoqnsib anjam laŋa laŋa merŋgoqnibqa niŋgi naŋgo anjam di qusib naŋgi daurnjraib. Tamo uŋgasari Qotei aqa anjam gotraŋyeqnub qaji naŋgi kumbra deqaji yeqnub deqa Qotei a naŋgi qa tulaŋ minjiŋ oqeteqnu.

Filipai 2:12

Ariya was qu, e qalieonum, niŋgi gaigai ijo anjam dauryeqnub. Ariya bini niŋgi olo siŋgila na dauryoqniye. E niŋgi koba na sqai bati deqa segi sai. Bini e isaq endi unum deqa niŋgi ijo anjam dauryqa urataib. Niŋgi ijo anjam olo siŋgila na dauryoqniye. Qotei na niŋgi padalo sawaq dena eleŋej deqa niŋgi ulaosib siŋgila na wauoqniye.

Kolosi 3:6

Tamo naŋgi kumbra uge uge deqaji yeqnub qaji naŋgi qa mondoŋ Qotei a minjiŋ oqetim naŋgi awai uge enjrqas. Tamo naŋgi di Qotei aqa anjam gotraŋyo qaji tamo.

Taitus 1:16

Naŋgi segi mareqnub, “Iga Qotei qa qalie bole.” Di gisaŋ. Naŋgi kumbra uge uge yeqnub dena iga poigeqnu, naŋgi Qotei qoreiyeqnub. Deqa Qotei a na naŋgi uratnjreqnu. Naŋgi Qotei aqa anjam gotraŋyeqnub qaji tamo. Naŋgi kumbra bole bei dauryqa keresai.

Taitus 3:3

Ni qalie, iga dego nami areqalo uge ti sosimqa Qotei aqa anjam gotraŋyoqnem. Bati di Satan a na iga gisa gisaŋgeqnaqa iga Qotei aqa gam bole dauryqa uratosim kumbra uge dauryqajqa are pruggeqnaqa gago segi jejamu qa tulaŋ areboleboleigoqnej. Kumbra dena iga siŋgila na ojesoqnej. Deqa iga minjiŋ ti are uge ti sosim walweloqnem. Tamo naŋgi na iga jeutgeqnabqa iga na kamba dego naŋgi jeutnjroqnem.

Hibru 3:12

O was qu, niŋgi geregere ŋam atoqniye. Niŋgi ŋam atqasai di nuŋgo ambleq di was bei aqa areqalo ugeosim a Yesus qa aqa areqalo siŋgilatqa uratosim Qotei ŋambile gaigai unu qaji a qoreiyo uge.

Hibru 3:18

Qotei na tamo yai naŋgi endegsi minjrej, “Niŋgi ijo aqarato sawa miligiq gilqasai”? Osiqa minjrej, “E bole merŋgonum”? Di tamo uŋgasari aqa anjam gotraŋyoqneb qaji naŋgi.

Hibru 4:6

Anjam dena iga endegsi osorgwo, Qotei aqa aqarato sawa di agi unu. Deqa tamo qudei naŋgi miligiq gilqab. Ariya tamo naŋgi Qotei aqa anjam bole nami quoqneb qaji naŋgi aqa anjam di gotraŋyoqneb deqa naŋgi aqa aqarato sawa miligiq gilosai.

Hibru 6:11

Ariya gago areqalo agiende. Niŋgi kalil degsib siŋgila na wauoqniye. Osib mondoŋ Qotei na niŋgi olo boletŋgwajqa deqa tariŋoqnsib soqniye.

2 Pita 2:6

Sodom qure ti Gomora qure ti naŋgi dego Qotei na padaltnjrqa marsiqa ŋamyuo qariŋyonaqa aisiq naŋgi koitnjrnaq naŋgi torei padalekriteb. Deqa bunuqna tamo naŋgi Qotei qoreiyeqnub qaji naŋgi Sodom ti Gomora ti naŋgi qa are qaloqnsib ulaoqnqab.