Hibru 11:7 - Yesus Aqa Anjam Bole

⁷ Noa a dego Qotei qa aqa areqalo siŋgilatej. Deqa Qotei na minjej, “E bunuqna awa qariŋyit bosim mandam kalil keretqas. Deqa ni qobuŋ qujai gereiyime.” Ariya Noa a Qotei aqa anjam di aqa damu unosaisosiqa a Qotei aqa anjam di dauryosiqa aqa uŋa ti aqa aŋgro ti naŋgi padalaib deqa qobuŋ qujai gereiyej. A Qotei qa aqa areqalo siŋgilatej deqa a na tamo uŋgasari kalil mandamq di soqneb qaji naŋgo kumbra uge ubtsiq minjroqnej. A Qotei qa aqa areqalo siŋgilatosiq qobuŋ gereiyej deqa Qotei na a tamo bole une saiqoji qa minjej. Agi Qotei na tamo kalil a qa naŋgo areqalo siŋgilateqnub qaji naŋgi tamo bole une saiqoji qa minjreqnu.

Hibru 11:7 ပူးပေါင်းရင်းမြစ်များ

Matyu 2:12

Osib naŋgi tal uratosib olo puluqa laqnabqa Qotei a ŋeiobilqei na minjrej, “Niŋgi olo Herot aqaq di brantaib.” Degsi minjrnaqa naŋgi gam bei dauryosib naŋgo segi qure utruq gileb.

Matyu 24:15

Osiqa Yesus a olo anjam endegsi minjrej, “Iŋgi tulaŋ ugedamu Qotei aqa medabu o qaji tamo Daniel a nami deqa marej qaji di niŋgi unqab. Iŋgi ugedamu di a Qotei aqa getento tal miligiq di tigelqas.” E Matyu. Tamo a ijo anjam endi sisiyeqnu qaji a geregere sisiyosim poiyem.

Matyu 24:25

“Niŋgi quiye. Kumbra kalil di brantosaisonaqa agi e namoqna merŋgonum.

Matyu 24:38

Agi Noa aqa bati qa mandam ya maqosaisonaqa tamo naŋgi iŋgi uyoqnsib ya uyoqnsib uŋa baŋ ojeleŋoqnsib sonabqa Noa a qobuŋ miligiq gilej.

Matyu 3:7

Bati deqa Farisi tamo ti Sadyusi tamo ti tulaŋ gargekoba naŋgi Jon na yansnjrqa marsibqa aqa areq beqnabqa unjrsiqa naŋgi endegsi minjroqnej, “Niŋgi amal uge bul. Qotei a niŋgi qa minjiŋ ani oqetqo deqa a na niŋgi ŋolawotŋgwas. Yai na niŋgi merŋgwoqa Qotei aqa minjiŋ nuŋgoq aiaim deqa ulaosib ijoq bonub?

Luk 17:26

“Noa aqa bati qa tamo uŋgasari naŋgi kumbra yoqneb dego kere e Tamo Aŋgro bqajqa bati qa naŋgi kumbra degyoqnqab.

Rom 1:17

Anjam bole dena Qotei na aqa kumbra iga osorgej. Aqa kumbra agiende. A na iga tamo bole une saiqoji qa mergej. Iga Yesus qa gago areqalo siŋgilatem dena a na iga tamo bole une saiqoji qa mergej. Di kiyaqa? Iga Yesus qa gago areqalo siŋgilatqom gam dena qujai iga Qotei aqa ŋamgalaq di tamo bole une saiqoji sqom. Agi Qotei aqa anjam bei nami endegsib neŋgreŋyeb unu, “Qotei na tamo uŋgasari a qa naŋgo areqalo siŋgilateqnub qaji naŋgi tamo bole une saiqoji qa minjrqas. Yim deqa naŋgi ŋambile gaigai sqab.”

Rom 10:6

Ariya tamo naŋgi Kristus qa naŋgo areqalo siŋgilateqnub qaji naŋgi Qotei na tamo bole une saiqoji qa minjrqas. Deqa Moses a naŋgi qa osiq anjam endegsi neŋgreŋyej, “Niŋgi nuŋgo segi are miligiq na endegsib maraib, ‘Yai a laŋ qureq oqwas?’” Niŋgi degsib marqab di niŋgi Kristus osib mandamq osi bqab. Di keresai.

Rom 3:22

Gam agiende. Tamo uŋgasari Yesus Kristus qa naŋgo areqalo siŋgilateqnub qaji naŋgi segi Qotei na tamo bole une saiqoji qa minjreqnu. Gam di segi. Gam bei saiqoji.

Rom 4:11

A muluŋ aiosaisoqnej bati deqa a Qotei qa aqa areqalo siŋgilatej. Deqa Qotei na a tamo bole une saiqoji qa minjej. Osiqa aqa segi anjam Abraham minjej qaji di siŋgilatqa osiqa olo minjej, “Ni muluŋ aie.” Deqa iga endegsi qalieonum, Abraham a tamo kalil muluŋ aiosaiosib naŋgo areqalo Qotei qa siŋgilateqnub qaji naŋgo moma matu.

Rom 4:13

Nami Qotei na Abraham aqa moma naŋgi ti endegsi minjrej, “E niŋgi mandam kalil eŋgwai.” Ariya Abraham a dal anjam dauryej deqa Qotei na anjam di minjosai. A Qotei qa aqa areqalo siŋgilatej gam dena Qotei na a tamo bole une saiqoji qa minjej. Utru deqa Qotei na Abraham aqa moma naŋgi ti minjrej, “E niŋgi mandam kalil eŋgwai.”

Rom 9:30

Deqa iga kiersi marqom? Iga endegsi marqom. Sawa bei bei qaji naŋgi tamo bole une saiqoji sqajqa gam ŋamosaioqneb. Ariya naŋgi gam iteb. Gam agiende. Naŋgi Yesus qa naŋgo areqalo siŋgilateb gam dena naŋgi tamo bole une saiqoji soqneb.

Galesia 5:5

Ariya iga degyosaieqnum. Iga Qotei aqa Mondor aqa siŋgila na Qotei qa gago areqalo siŋgilatoqnsim mondoŋ a na iga tamo bole une saiqoji qa mergwajqa deqa tariŋoqnsim unum.

Filipai 3:9

Osiy a segi beteryesqai. E dal anjam dauryqai gam dena e Qotei aqa ŋamgalaq di tamo bole sqa keresai. Gam bei na e tamo bole sqai. Gam agiende. E Kristus qa ijo areqalo siŋgilatqai. Od, iga Kristus qa gago areqalo siŋgilatqom gam dena qujai Qotei na iga mergwas, “Niŋgi ijo ŋamgalaq di tamo bole une saiqoji unub.”

Hibru 11:1

Iga Qotei qa gago areqalo siŋgilateqnum. Kumbra di aqa utru agiende. Iŋgi iŋgi kalil Qotei a nami iga egwa marej qaji di agi iga egwas. Iga iŋgi iŋgi di oqajqa tariŋesonamqa ariya mondoŋ Qotei na iga egwas. Iga Qotei qa gago areqalo siŋgilateqnum deqa iga bole qalieonum, Qotei na iŋgi iŋgi di egwas. Iga gago ŋamdamu na iŋgi iŋgi di unqa keresai di uŋgum. Iŋgi iŋgi di unu.

Hibru 12:25

O was qu, niŋgi geregere ŋam atiye. Qotei na niŋgi anjam merŋgoqnimqa niŋgi aqa anjam quqwa urato uge. Qotei a nami mandamq endi sosiqa Israel naŋgi anjam siŋgila na minjreqnaqa naŋgi quqwa uratoqneb. Deqa Qotei na naŋgi awai uge enjrej. Awai uge di naŋgi uratnjrqa keresai. Ariya bini Qotei a laŋ goge di sosiqa iga dego anjam siŋgila na mergeqnu. Deqa iga a qoreiyqom di a na iga awai tulaŋ ugedamu egwas. Awai uge di iga uratgwa keresai.

Hibru 5:7

O was qu, Yesus a mandamq endi sosiqa a siŋga pulutoqnsiqa Qotei pailyoqnej. A qalie, Qotei na a oqa kere. Yim a moiqasai. Deqa a siŋgila na Qotei pailyoqnej. A leleŋ ti akam ti pailyoqnej. A aqa segi areqalo uratoqnsiqa Qotei aqa sorgomq di soqnej. Deqa Qotei a aqa pail quetoqnej.

Hibru 8:5

Livai naŋgi gaigai mandam qaji atra tal miligiq giloqnsib waueqnub. Atra tal di laŋa mandam qaji tal. Tal di laŋ qure qaji atra tal laŋa sigitejunu. Agi Moses a nami tal di atqa laqnaqa Qotei na tal sigitosiqa Moses osoryonaqa degsi gereiyej. Agi Qotei na Moses endegsi minjej, “E mana goge dia atra tal sigitosim ni osormem. Ni di geregere dauryosim atra tal aqa iŋgi iŋgi kalil degsi gereiyime.” Qotei na nami Moses degsi minjej.

1 Pita 3:20

Noa aqa bati qa tamo naŋgi di Qotei aqa anjam gotraŋyoqneb. Bati deqa kumbra uge tulaŋ kobaej. Ariya Qotei a tamo naŋgo kumbra uge deqa naŋgi urur kambatnjrosaioqnej. A tariŋosiq sokobaiyonaqa Noa a qobuŋ kobaquja gereiyej. Gereiysiq koboonaqa tamo uŋgasari 8-pela segi qobuŋ gogetosib sonabqa awa koba bosiqa ya tulaŋ koba dej. Ariya tamo uŋgasari 8-pela naŋgi di Qotei na eleŋej deqa naŋgi bole soqneb.

2 Pita 1:1

E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere.

2 Pita 2:5

Nami tamo uŋgasari Noa aqa bati qa soqneb qaji naŋgi Qotei qoreinjrej deqa Qotei na naŋgi dego uratnjrosai. A naŋgi dego padaltnjrej. Awa koba aisiqa mandam ya maqonaqa dena Qotei na naŋgi padaltnjrej. Ariya Qotei a Noa padaltosai. Noa a Qotei aqa kumbra tiŋtiŋ qa marsiq laqnej deqa Qotei na a ti tamo uŋgasari 7-pela naŋgi ti taqatnjrej. Deqa naŋgi bole soqneb.

2 Pita 3:6

Mandam a ya ambleq di brantonaqa bunuqna Noa aqa bati qa Qotei a olo marnaqa ya koba dosiqa mandam ya maqosiqa iŋgi iŋgi kalil padaltej.