Hibru 11:10 - Yesus Aqa Anjam Bole

¹⁰ Abraham a laŋ qureq oqsim dia sqajqa deqa are qaloqnsiq tariŋoqnej. Laŋ qure di bati gaigai sqas. Laŋ qure agi Qotei a segi na atej unu.

Hibru 11:10 ပူးပေါင်းရင်းမြစ်များ

Jon 14:2

Laŋ qureq dia ijo Abu aqa talq di warum gargekoba unub. E oqsiy nuŋgo segi segi warum gereiyetŋgwai. Degsi sosai qamu e anjam endi niŋgi merŋgosai qamu.

2 Korin 5:1

Iga qalieonum, gago mandam qaji jejamu endi torei ugeqas. Gago jejamu endi gago tal bul. Ariya mondoŋ Qotei na olo tal bei iga egwas. Tal di tamo bei na gereiyosai. Tal di a laŋ qureq di unu. A bati gaigai sqas.

Filipai 3:20

Ariya iga laŋ goge qaji tamo unum deqa mondoŋ Tamo Koba Yesus Kristus a laŋ qureq dena mandamq aisim iga oqas. Deqa bini iga a qa tariŋoqnsim unum.

Hibru 11:16

Ariya naŋgi naŋgo segi mandam utruq olo aiqajqa uratosib sawa tulaŋ boledamu agi laŋ qureq di unu qaji deq oqwajqa are qaleqnub. Tamo naŋgi dena Qotei endegsib minjeqnub, “Ni gago Qotei.” Yeqnaqa Qotei a naŋgo anjam deqa jemaiyosaieqnu. Naŋgi a qa naŋgo areqalo siŋgilateqnub deqa a naŋgo sqajqa qure agi laŋ goge dia gereiyetnjrej unu.

Hibru 12:22

Ariya niŋgi iŋgi iŋgi deq bosai. Niŋgi Saion manaq beleŋeb. Osib Qotei ŋambile unu qaji aqa segi qureq dego beleŋeb. Qure di agi Jerusalem bunuj laŋ goge di unu qaji. Niŋgi laŋ aŋgro tulaŋ gargekoba sisiyqa keresai naŋgi qa dego beleŋeb.

Hibru 12:28

Qotei a gago Mandor Koba sosiq iga taqatgeqnu. Iŋgi iŋgi kalil a na iga egej qaji di reŋgiŋqasai. Deqa iga Qotei biŋiyoqnsim kumbra a tulaŋ areareteqnu qaji dena a qa louoqnsim aqa ñam soqtoqnsim a qa ulaoqnsim aqa sorgomq di sqom.

Hibru 13:14

Iga qalie, mandam endia qure unub di kalil koboqab. Deqa iga yauŋ tamo bul qure utru saiqoji laŋa unum. Ariya mondoŋ iga laŋ qureq oqsim dia gaigai sqom. Deqa iga qure deq oqwajqa tariŋeqnum.

Hibru 3:4

Tal kalil agi tamo naŋgi na gereiyeqnub. Ariya Qotei a segi na iŋgi iŋgi kalil gereiyej.

Uli Anjam 21:2

Onaqa e Qotei aqa segi qure koba Jerusalem bunuj di dego unem. Qure di Qotei aqaq di sosiqa laŋ goge dena mandamq aieqnaq unem. Qure di aqa wala tulaŋ boledamu. Duŋgeŋge tamo baŋ ojqa osim walaeqnu dego kere.