Hibru 10:24 - Yesus Aqa Anjam Bole

²⁴ Iga segi segi Qotei aqa tamo uŋgasari naŋgi qa dego are qaloqnqom. Osim naŋgo areqalo tigeltetnjroqnimqa naŋgi na Kristen tamo kalil naŋgi qalaqalainjroqnsib kumbra bole bole enjroqnqab.

Hibru 10:24 ပူးပေါင်းရင်းမြစ်များ

Aposel 11:29

Kristen tamo uŋgasari naŋgi Agabus aqa anjam di qusibqa naŋgi naŋgo segi segi silali soqnej qaji di koroiyosib Kristen was qu Judia sawaq di soqneb qaji naŋgi aqaryainjrqa osibqa silali qariŋyonab naŋgoq aiej.

Rom 11:4

Ariya Qotei na kamba Elaija kiersi minjej? A endegsi minjej, “Ni segi e daurbosai. Ijo tamo 7,000 naŋgi dego e daurbeqnub. Naŋgi siŋga pulutosib gisaŋ qotei Bal a qa louosaieqnub.” Qotei na Elaija degsi minjej.

Rom 12:15

Kristen was qudei naŋgi areboleboleinjrimqa niŋgi kamba dego naŋgi koba na areboleboleiŋgeme. Ariya was qudei naŋgi akamoqnibqa niŋgi kamba dego naŋgi koba na akamoiye.

1 Korin 10:33

E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.

1 Korin 9:22

Tamo naŋgi siŋgila saiqoji unub qaji naŋgi dego e na oqajqa deqa e naŋgo kumbra dauryoqnsim siŋgila saiqoji sobulosim dena e na naŋgi are bulyetnjreqnam naŋgi Kristus aqaq beqnub. O was qu, e tamo kalil naŋgo sorgomq di sosim naŋgo kumbra dauryeqnum. Di kiyaqa? E na naŋgi qudei are bulyetnjroqnit naŋgi Kristus aqaq bqajqa deqa.

2 Korin 8:8

E na niŋgi wau di yqajqa siŋgila na merŋgosai. Kristen tamo uŋgasari qudei naŋgi wau di yqajqa tulaŋ siŋgilaeqnub. Naŋgo kumbra deqa agi e na niŋgi saiŋgonum. Yim niŋgi qusib niŋgi dego qalaqalaiyo kumbra dauryqajqa tulaŋ siŋgilaqab kio di e qalieqajqa deqa niŋgi saiŋgonum.

2 Korin 9:2

E qalieonum, niŋgi wau di yqajqa are tulaŋ prugŋgeqnu. Deqa e gaigai Masedonia Kristen naŋgo ŋamgalaq dia nuŋgo ñam soqteqnum. Osim endegsi minjreqnum, “Wausau bei nami tamo uŋgasari Akaia sawaq di unub qaji naŋgi silali koroiyqajqa wau di tigeltqa mareb.” O was qu, niŋgi wau di yqajqa tulaŋ siŋgilaeqnub deqa e na Masedonia Kristen naŋgi minjreqnam quoqnsib naŋgi gargekoba dego wau di yqajqa are prugnjreqnu.

Galesia 5:13

O was qu, Kristus a na niŋgi eleŋej deqa dal anjam na niŋgi olo bunu taqatŋgwasai. Qotei a deqa are qalsiq niŋgi metŋgej. Ariya niŋgi endegsib are qalaib, “Iga dal anjam aqa sorgomq di sosai deqa uŋgum, iga olo gago areqalo namij dauryosim kumbra uge uge yoqnqom.” Niŋgi degsib are qalaib. Niŋgi nuŋgo Kristen was naŋgo kaŋgal tamo bul sosib naŋgi qalaqalainjroqniye.

Galesia 5:22

Ariya Qotei aqa Mondor na iga kumbra bole endeqaji yqajqa are tigeltetgeqnu. Qalaqalaiyo kumbra dauryoqa, areboleboleiyoqa, lawo kumbra yoqa, was naŋgi aqaryainjroqnsim kumbra bole bole enjroqa, kumbra bole tiŋtiŋ dauryoqa,

Galesia 5:6

Tamo a Kristus Yesus beteryesqas di a marqas, iga muluŋ aiqom di laŋa. Iga muluŋ aiqasai di dego laŋa. Ariya iga Kristus qa gago areqalo siŋgilatosim dena iga qalaqalaiyo kumbra dauryoqnqom di kumbra bole utru ti.

Galesia 6:1

O was qu, nuŋgo ambleq di tamo bei a une bei atim unsibqa niŋgi Qotei aqa Mondor dauryeqnub qaji niŋgi na tamo di lawo na osib aqa kumbra gereiyetiye. Ariya niŋgi geregere ŋam atsib soqniye. Satan a na niŋgi dego uneq waiŋgimqa niŋgi uloŋo uge.

Kolosi 3:16

Osib niŋgi Kristus aqa anjam osib nuŋgo are miligiq di siŋgilatib soqnem. Osib niŋgi na nuŋgo Kristen was qu naŋgi areqalo bole ti powo ti osornjroqniye. Yim naŋgi kumbra bole bole yoqnqajqa deqa. Niŋgi nuŋgo are miligiq di Qotei biŋiyoqnsib a qa louoqniye. Lou qudei neŋgreŋq di unu qaji dena ti lou qudei Qotei aqa Mondor na nuŋgo are miligiq di ateqnu qaji dena ti niŋgi Qotei qa louoqniye.

1 Tesalonaika 1:3

Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum.

1 Tesalonaika 5:11

Deqa niŋgi segi segi Qotei aqa tamo uŋgasari naŋgi anjam bole minjroqnsib dena naŋgo are siŋgilatetnjroqniye. Agi bini niŋgi degyeqnub.

2 Tesalonaika 3:9

Bole, iga ñam ti deqa iga nuŋgo iŋgi iŋgi laŋa yaiŋgwa kere. Di iga uratem. Di kiyaqa? Iga endegsi are qalem. Iga wauoqnsim gago segi iŋgi iŋgi awaiyoqnsim uyoqnimqa gago kumbra di niŋgi unsib bole qa marsib dauryoqnqab.

1 Timoti 6:18

Deqa niŋgi kumbra bole bole yoqnsib tamo uŋgasari naŋgi aqaryainjroqniye. Osib gaigai nuŋgo iŋgi iŋgi jeioqnsib tamo uŋgasari iŋgi iŋgi qa truqueqnub qaji naŋgi olo enjroqniye. Niŋgi marqab, silali di iŋgi bole. Degaib. Iŋgi bole agi was naŋgi geregereinjrqajqa kumbra. O Timoti, ni na tamo naŋgi mandam qa silali ti ñoro ti ejunub qaji naŋgi degsim minjroqne.

Taitus 2:4

Osib uŋa meli naŋgi minjribqa naŋgi naŋgo tamo ti naŋgo aŋgro ti qala-qalainjroqnqab.

Taitus 3:8

Qotei aqa anjam di tulaŋ boledamu. Deqa iga anjam di gago areqaloq di siŋgilatqom. O Taitus, ni Qotei aqa anjam di siŋgila na palontoqnimqa tamo uŋgasari Qotei qa naŋgo areqalo siŋgilateqnub qaji naŋgi quoqnsib kumbra bole bole yoqnqab. Kumbra deqaji na tamo uŋgasari naŋgi aqaryainjreqnu. Kumbra di bolequja.

Hibru 13:1

Ariya Kristen was qu, bati gaigai niŋgi segi segi nuŋgo was naŋgi qalaqalainjroqniye.

Hibru 13:3

Ariya Qotei aqa tamo uŋgasari qudei naŋgi tonto talq di unub. Deqa niŋgi naŋgi uratnjraib. Niŋgi naŋgi qa are qaloqnsib koba na tonto talq di sobulosib naŋgi geregereinjroqniye. Ariya jeu tamo naŋgi na Kristen tamo qudei naŋgi ugeugeinjroqnsib jaqatiŋ enjreqnub. Deqa niŋgi naŋgi qa dego are qaloqnsib koba na jaqatiŋ obuloqnsib naŋgi geregereinjroqniye. Di kiyaqa? Niŋgi naŋgi ti Kristen was qu deqa. Niŋgi qalie, niŋgi mandamq endi sonabqa jeu tamo naŋgi na niŋgi dego ugeugeiŋgeqnub.

Hibru 3:13

Bati gaigai iga mareqnum, “Bini bati endi”. Deqa niŋgi bati gaigai Qotei aqa tamo uŋgasari naŋgi anjam bole minjroqnsib naŋgo areqalo tigeltetnjroqniye. Nuŋgo ambleq di une aqa kumbra na tamo bei gisaŋyim aqa are miligi getento uge.

1 Jon 3:18

O ijo aŋgro kalil, niŋgi quiye. Iga laŋa anjam maro na segi Kristen tamo naŋgi qalaqalainjrqom di keresai. Iga naŋgi bole qalaqalainjrsim kumbra bole bole enjroqnqom.