Galesia 6:3 - Yesus Aqa Anjam Bole

³ Nuŋgo ambleq di tamo bei a marqas, “E ñam koba ti unum.” Ariya a ñam ti sosai. A ñam saiqoji deqa a na aqa segi jejamu gisaŋyqo.

Galesia 6:3 ပူးပေါင်းရင်းမြစ်များ

Luk 18:11

Naŋgi atra tal miligiq gilsibqa Farisi tamo a namo tigelosiqa aqa segi jejamu soqtosiqa endegsi pailyej, ‘O Qotei, e tamo qudei naŋgi unub dego sai. E gisaŋ na tamo uŋgasari naŋgi silali yainjrosaieqnum. E sambala kumbra yosaieqnum. E kumbra uge bei dego yosaieqnum. E takis o qaji tamo di bul sai.

Aposel 5:36

Niŋgi qalie, nami yala tamo bei aqa ñam Teudas a tigelosiqa aqa segi ñam soqtoqnsiqa maroqnej, ‘E tamo kobaquja.’ Degsi mareqnaqa tamo 400 a dauryoqneb. Onaqa Rom naŋgi na bosib a qalnab moinaqa tamo naŋgi a dauryoqneb qaji kalil segi segi jaraionab aqa wau koboej.

Rom 12:16

Niŋgi segi segi kalil areqalo qujaitosib soqniye. Niŋgi nuŋgo segi ñam soqtqa are qalaib. Niŋgi tamo laŋaj naŋgi koba na laqajqa areboleboleiŋgem. Niŋgi nuŋgo segi ñam soqtosib endegsib maraib, “Iga segi qalie koba ti unum.” Niŋgi degaib.

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

1 Korin 13:2

E Qotei aqa medabu osiy anjam palontoqnqai kio e Qotei aqa uli anjam kalil qalieosiy utru babteleŋqai kio e qalie koba ti sqai kio e Qotei qa ijo areqalo tulaŋ siŋgilatosiy deqa mana kobaquja minjitqa a ijo anjam dauryosim tigelosim sawa beiq gilqas kio ariya e qalaqalaiyo kumbra dauryqasai di ijo kumbra kalil di Qotei aqa ŋamgalaq di kumbra bolesai.

1 Korin 3:18

Niŋgi na nuŋgo segi jejamu gisaŋyaib. Nuŋgo ambleq di tamo bei a mandam qaji powo ti sosim endegsi are qalqas, “E segi powo koba ti unum.” Di gisaŋ. Deqa tamo di a mati marqas, “Bole, e powo ti sosai. E nanari tamo.” Degsi marim Qotei na a olo powo yimqa dena a powo bole ti sqas.

1 Korin 8:2

Tamo bei a marqas, “E powo ti unum.” A degsi marqo deqa iga qalieonum, aqa powo kereosaiunu.

2 Korin 12:11

Anjam e mareqnum endi nanari anjam. Di nuŋgo une. Agi niŋgi na ijo areqalo tigeltetbeqnub deqa e nanari anjam endi mareqnum. Niŋgi ijo kumbra bole qa marqa kere. Ariya niŋgi marqa urateqnub. Deqa e segi ijo kumbra bole qa mareqnum. Bole, e tamo bolesai. Ariya niŋgi na olo tamo qudei naŋgo ñam soqtoqnsib mareqnub, “Tamo naŋgi di Qotei aqa wau tamo bolequja.” Ariya tamo naŋgi dena e buŋbosai.

2 Korin 3:5

Bole, iga segi na wau di ojqa keresai. Deqa iga gago segi siŋgila na wau bei yeqnum degsi marqa keresai. Qotei a segi na iga siŋgilatgeqnaqa iga wau yeqnum.

Galesia 2:6

Tamo qudei naŋgi Kristen gate kokba. Naŋgi ñam ti. Ariya ijo areqalo agiende. Naŋgi gate kokba kio sai kio di laŋa. Qotei a tamo naŋgo ñam qa are qalosaieqnu. Ariya e na tamo ñam ti naŋgi di ijo wau ubtsim minjrnamqa naŋgi mareb, “Di kere.” Naŋgi olo anjam bei e merbosai.

Galesia 2:9

Tamo uŋgasari naŋgi mareqnub, Jems na Pita na Jon na naŋgi qalub Kristen naŋgo gate kokba. Ariya naŋgi qalub qalieeb, Qotei a e qa are boleiyosiq wau ebej. Deqa naŋgi aqo Barnabas wo gago baŋ ojsib mergeb, “Niŋgi gago Kristen was bole.” Osib naŋgi iga ti areqalo qujaitosim anjam endegsi keretem, aqo Barnabas wo sawa bei beiq dia Qotei aqa wau yoqnqom. Ariya naŋgi Juda naŋgo ambleq di wauoqnqab.

2 Timoti 3:13

Tamo uge uge naŋgi ti gisaŋ tamo naŋgi ti brantoqnsib tamo uŋgasari naŋgi gisa gisaŋnjroqnqab. Deqa Satan a na kamba dego gisaŋ tamo naŋgi di gisa gisaŋnjroqnqas. Yim naŋgo kumbra di tulaŋ ugedamuqas.

Jems 1:22

Ariya Qotei aqa anjam niŋgi ojejunub qaji di torei dauryoqniye. Laŋa qusib olo urataib. Niŋgi laŋa quqwab di niŋgi nuŋgo segi jejamu gisaŋyqab.

Jems 1:26

Tamo bei a endegsi are qalqas, “E gaigai Qotei qa loueqnum. Deqa e Kristen tamo bole.” Ariya tamo di a aqa segi medabu geregere taqatosaieqnu. Aqa kumbra dena a na aqa segi jejamu gisaŋyeqnu. Deqa a Qotei qa loueqnu di a laŋa loueqnu.

1 Jon 1:8

Iga endegsi marqom, “E une yosaieqnum.” Degsi marqom di iga gago segi jejamu gisaŋyonum. Deqa anjam bole gago are miligiq di sqa keresai.