Galesia 5:24 - Yesus Aqa Anjam Bole

²⁴ Tamo kalil Kristus Yesus beteryejunub qaji naŋgi na naŋgo areqalo namij ti naŋgo are prugnjrqajqa kumbra ti kalil ŋamburbasq di qamnab moiej.

Galesia 5:24 ပူးပေါင်းရင်းမြစ်များ

Rom 13:14

Niŋgi Tamo Koba Yesus Kristus beteryosib a gara bul jigsib soqniye. Sosib deqa niŋgi nuŋgo jejamu qa areqalo uge uge di dauryqajqa are qaloqnqasai.

Rom 6:6

Iga qalie, gago areqalo namij a Kristus ombla ŋamburbasq di moiej. Yim une aqa siŋgila gago jejamuq di waueqnu qaji di koboqajqa deqa. Deqa bini iga olo une aqa sorgomq di sqasai.

Rom 8:13

Niŋgi areqalo namij na walwelqab di niŋgi moreŋqab. Ariya niŋgi Qotei aqa Mondor aqa kumbra na walwelosib aqa siŋgila na nuŋgo segi jejamu aqa kumbra uge uge moiotqab di niŋgi ŋambile sqab.

Rom 8:9

Ariya niŋgi areqalo namij na walwelosaieqnub. Qotei aqa Mondor a nuŋgo are miligiq di unu deqa niŋgi aqa kumbra na walweleqnub. Tamo a Kristus aqa Mondor ti sqasai di a Kristus aqa tamo sqa keresai.

1 Korin 15:23

Ariya iga gago segi segi bati dauryosim subq na olo tigelosim ŋambile oqom. Namoqna Kristus a subq na tigelej. Ariya mondoŋ Kristus a olo laŋ qureq na bamqa bati deqa iga aqa segi tamo uŋgasari iga dego subq na olo tigelqom.

1 Korin 3:23

Ariya niŋgi Kristus aqa. Ariya Kristus a Qotei aqa.

1 Korin 6:13

Tamo qudei naŋgi mareqnub, “Uyo iŋgi aqa wau agi aisim meneq di sqajqa. Mene aqa wau agi iŋgi uyqajqa.” Di naŋgi bole mareqnub. Ariya mondoŋ Qotei na uyo iŋgi ti mene ti di kalil torei kobotqas. Ariya gago jejamu di sambala kumbra yqajqa sai. Gago jejamu di Tamo Koba Yesus aqa. A segi na taqateqnu.

2 Korin 10:7

Niŋgi laŋa babaŋ na tamo naŋgo kumbra unsib tenemtaib. Niŋgi geregere tenemtiye. Tamo bei a endegsi marqas, “E Kristus aqa tamo bole.” Ariya a endegsi poiyem, a Kristus aqa tamo qa marqo deqa iga dego Kristus aqa tamo. A degsi poiyem.

Galesia 2:20

Osim e olo ŋambile bunuj em. Ariya ŋambile di ijo segi ŋambile sai. Kristus a segi ijo are miligiq di ŋambile unu. Deqa bini kumbra kalil e mandamq endi yeqnum qaji di e Qotei aqa Ŋiri qa ijo areqalo siŋgilatosim yeqnum. Agi Qotei aqa Ŋiri a na e tulaŋ qalaqalaibosiq deqa a aqa segi ŋambile uratosiq e qa moiej.

Galesia 3:26

Niŋgi kalil Kristus Yesus qa nuŋgo areqalo siŋgilatosib a beteryejunub deqa niŋgi Qotei aqa aŋgro tiŋtiŋ unub.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Galesia 3:29

Niŋgi Kristus aqa segi tamo unub deqa niŋgi Abraham aqa aŋgro tiŋtiŋ dego unub. Agi niŋgi segi na iŋgi bole bole Qotei a nami Abraham aqa leŋ naŋgi enjrqajqa marej qaji di oqab.

Galesia 5:20

gisaŋ qotei qa louoqa, gumaniŋoqa, was bei jeutoqa, ŋiriŋoqa, was bei aqa iŋgi iŋgi qa maulyoqa, minjiŋ oqoqa, are ugeoqa, ino segi jejamu qa are qalsim anjam na qotoqa, was naŋgi potoaiyeltnjroqa,

Galesia 6:14

Ariya e ijo segi ñam soqtqa keresai. E tamo bei aqa ñam dego soqtqa keresai. E Yesus Kristus aqa ñam segi soqtqai. A ŋamburbasq di moiej e deqa segi areboleboleibeqnu. Kristus a ŋamburbasq di moiej aqa wau dena mandam qa kumbra kalil ijo areqaloq di unu qaji di moiobuleb. E segi dego ŋamburbasq di moiobulem deqa e olo mandam qa kumbra dauryqa keresai.

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Efesus 3:11

Tulaŋ nami Qotei a kumbra bole di iga egwajqa are qalej. Ariya bini a gago Tamo Koba Kristus Yesus aqa wau na kumbra di agi iga egej.

Efesus 3:6

Anjam di aqa utru agiende. Niŋgi sawa bei bei qaji tamo uŋgasari niŋgi Kristus aqa anjam bole qusib nuŋgo areqaloq di ateb deqa Qotei na niŋgi ti iga ti turtgosiqa sawa qujaiq di atej. Deqa iga kalil tamo qujaionum. Deqa iga ti niŋgi ti kalil iŋgi bole bole Qotei a nami iga Kristus Yesus aqa baŋ na egwajqa marej qaji di oqom.

Kolosi 2:11

Niŋgi Kristus taqyejunub deqa niŋgi muluŋ bole ejunub. Di jejamu qaji muluŋ sai. Niŋgi Kristus aqa kumbra na nuŋgo areqalo namij aqa kumbra kalil di urateb. Di muluŋ bole agide.

1 Pita 2:11

O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye.