Galesia 4:6 - Yesus Aqa Anjam Bole

⁶ Deqa bini niŋgi Qotei aqa aŋgro tiŋtiŋ unub. Agi a na aqa Ŋiri aqa Mondor qariŋyonaqa a gago are miligiq aiej. Aiej deqa iga Qotei metoqnsim endegsi minjeqnum, “O ni gago Abu.”

Galesia 4:6 ပူးပေါင်းရင်းမြစ်များ

Luk 11:13

Deqa niŋgi quiye. Niŋgi tamo bolesai. Nuŋgo kumbra uge. Ariya ino aŋgro na iŋgi qa mermeqnaq ni iŋgi bole bole yeqnum. Ni a uratosaieqnum. Nuŋgo kumbra dena niŋgi endegsi poiŋgem, ‘Bole, gago Abu laŋ qureq di unu qaji a dego iga uratgosaieqnu. A na aqa Mondor Bole iga egwajqa pailyqom di a na egwas. A na iga uratgwasai bolesai.’”

Luk 11:2

Onaqa Yesus na aqa aŋgro naŋgi endegsi minjrej, “Niŋgi Qotei pailyqa osibqa endegsib pailyiye, ‘O Abu, ino ñam tulaŋ boledamu. Deqa iga na ino ñam getentoqnqom. Ni bosim gago Mandor Koba sosim iga taqatgoqnime.

Jon 14:16

Amqa e na ijo Abu minjitqa a na Aqaryaiŋgo tamo bei qariŋyimqa nuŋgoq bosim siŋgilatŋgwas. Osim bati gaigai niŋgi koba na sqas.

Jon 15:26

“Niŋgi siŋgilatŋgwajqa Mondor a ijo Abu ombla unub. E na a qariŋyit niŋgi qa bqas. A anjam bole qa Mondor. A ijo Abu aqaq dena bqas. Bosim ijo wau qa ti ijo kumbra qa ti anjam babtqas.

Jon 16:7

Niŋgi quiye. E bole merŋgwai. E niŋgi aqaryaiŋgwajqa deqa uratŋgsiy oqwai. E oqwasai di niŋgi siŋgilatŋgwajqa Mondor a nuŋgoq bqasai. Ariya e oqsiy Mondor qariŋyitqa a nuŋgoq bqas.

Jon 3:34

Tamo Qotei na qariŋyej qaji a Qotei aqa anjam babtosiq mergeqnu. Di kiyaqa? Qotei na aqa Mondor aqa siŋgila potosiq taqal bei segi Yesus yosai. A na aqa siŋgila kalil Yesus yekritej.

Jon 7:39

Yesus a ya qa marej di a Qotei aqa Mondor qa sigitosiqa yawo anjam marej. Yesus a laŋ qureq oqsiq ñam koba osaisoqnej deqa Qotei aqa Mondor bosaisoqnej. A bunuqna oqsim Qotei aqa Mondor qariŋyim bamqa tamo naŋgi Yesus qa naŋgo areqalo siŋgilatqab qaji naŋgi Qotei aqa Mondor oqab. Deqa Yesus a yawo anjam degsi marej.

Aposel 16:7

Deqa naŋgi Frigia sawa ti Galesia sawa ti dia laqnsibqa dena walwelosib Misia sawaq di branteb. Dena Bitinia sawaq gilqa laqnabqa Yesus aqa Mondor na naŋgi saidnjrnaqa naŋgi Misia sawa amble potosib aisib torei Troas qureq di branteb.

Rom 5:5

Ariya iga laŋa tariŋosaieqnum. Qotei na aqa Mondor Bole iga egej deqa Mondor dena aqa qalaqalaiyo kumbra gago are miligiq di atej unu.

Rom 8:9

Ariya niŋgi areqalo namij na walwelosaieqnub. Qotei aqa Mondor a nuŋgo are miligiq di unu deqa niŋgi aqa kumbra na walweleqnub. Tamo a Kristus aqa Mondor ti sqasai di a Kristus aqa tamo sqa keresai.

1 Korin 15:45

Agi Qotei aqa anjam bei nami endegsib neŋgreŋyeb unu, “Adam namij a mandam qaji ŋambile osi soqnej.” Ariya Adam bunuj a bunuqna bosiqa a segi Mondor ti sosiqa tamo uŋgasari naŋgi laŋ qaji ŋambile enjrej. Adam bunuj di Kristus.

2 Korin 1:22

Osiqa aqa segi toqor egsiqa gago are miligiq di atej unu. Aqa toqor di aqa Mondor Bole. Mondor di a na iga namo egej deqa iga qalieonum, bunuqna iŋgi iŋgi kalil a na iga egwa marej qaji di olo egwas.

2 Korin 3:17

Tamo Koba Yesus a segi Qotei aqa Mondor Bole. Tamo bei a Tamo Koba Yesus aqa Mondor ti sqas di aqa une na a olo ojqa keresai. A bole sqas.

Efesus 1:13

Niŋgi sawa bei bei qaji tamo uŋgasari niŋgi dego Qotei aqa anjam bole queb. Anjam bole agiende. Qotei a Kristus aqa wau na niŋgi eleŋej. Niŋgi Kristus qa nuŋgo areqalo siŋgilatosib deqa a beteryesonab Qotei na aqa anjam nami marej qaji di dauryosiq aqa toqor niŋgi eŋgej. Deqa niŋgi aqa segi tamo uŋgasari unub. Toqor di agi Qotei aqa Mondor Bole.

Efesus 2:18

Kristus aqa wau na iga koba na Mondor qujai ejunum. Deqa iga are qujaitosim unum. Mondor dena gam waqtetgej deqa iga gaigai gago Abu Qotei aqa ulatamuq di brantoqnqom.

Efesus 4:30

Niŋgi na Qotei aqa Mondor Bole are gulube yaib. Mondor di Qotei aqa segi toqor. Mondor di a na niŋgi eŋgej. Deqa niŋgi qalieonub, niŋgi aqa segi tamo uŋgasari tiŋtiŋ unub. Mondoŋ Qotei na niŋgi awaiŋgosim sawa boleq di atim bati deqa niŋgi so bole gaigai sqab. Niŋgi di qalieqajqa deqa Qotei na aqa Mondor Bole niŋgi eŋgej.

Efesus 6:18

Niŋgi Qotei aqa Mondor aqa siŋgila na gaigai Qotei pailyoqniye. Niŋgi aqar ataib. Niŋgi gaigai Qotei na niŋgi aqaryaiŋgwa maroqnsib siŋgila na pailyoqniye. Niŋgi pailyo urato uge deqa niŋgi geregere ŋam atoqnsib soqniye. Sosib niŋgi gaigai Qotei na aqa segi tamo uŋgasari naŋgi aqaryainjrqajqa deqa are qaloqnsib naŋgi qa pailyoqniye.

Filipai 1:19

Deqa was qu, e tulaŋ areboleboleiboqnim sqai. Di kiyaqa? E endegsi qalieonum. Niŋgi bati gaigai e qa Qotei pailyeqnub deqa Yesus Kristus aqa Mondor na e siŋgilatbeqnu. Gam dena Qotei na e aqaryaibosim tonto talq endena oqeq atim e bole sqai.

1 Tesalonaika 4:8

Deqa tamo bei a gago anjam endi gotraŋyqas di a tamo naŋgo anjam gotraŋyosai. A Qotei agi aqa Mondor Bole niŋgi eŋgeqnu qaji aqa anjam gotraŋyqo.

1 Pita 1:11

Kristus aqa Mondor a naŋgo are miligiq di sosiqa naŋgo medabuq na anjam endegsi babtosiq maroqnej, “Bunuqna Kristus a jaqatiŋ osim moiqas. Moisim olo subq na tigelosim laŋ qureq oqsim dia a ñam koba ti sqas.” O was qu, Qotei aqa medabu o qaji tamo naŋgi endegsib nenemoqneb, “Kristus a bati gembu bqas? Kumbra kie namoqna brantim Kristus a bunuqna bqas?”

Jut 1:20

Ariya ijo was bole, nuŋgo areqalo Qotei qa siŋgilateqnub qaji di niŋgi siŋgila na ojesoqnibqa dena nuŋgo are tulaŋ siŋgilaqas. Osib niŋgi bati gaigai Mondor Bole aqa siŋgila na pailyoqniye.

Uli Anjam 19:10

Laŋ aŋgro na e degsi merbonaqa e aqa areq di siŋga pulutosim a biŋiyqa laqnamqa a na merbej, “Ni e biŋibaim! E ni bul. E ni ti tamo kalil Yesus aqa anjam qa naŋgo areqalo siŋgilateqnub qaji naŋgi ti iga koba na wau qujai. Iga kalil was. Deqa ni Qotei segi biŋi-yoqnime. Iga qalie, Qotei aqa Mondor a na qujai Qotei aqa medabu o qaji tamo naŋgi qariŋnjreqnaqa naŋgi Qotei aqa anjam marsib laqnub. Deqa naŋgi Yesus aqa ñam dego marsib laqnub.”