Galesia 3:1 - Yesus Aqa Anjam Bole

¹ O Galesia tamo, niŋgi tulaŋ nanari. Iga nami niŋgi Yesus Kristus osorŋgem. Kumbra dena niŋgi a ŋamburbasq di gaiŋesonaq unobuleb. Ariya tamo yai na nuŋgo areqalo olo niñaqyetŋgej deqa niŋgi Kristus aqa anjam olo urateqnub?

Galesia 3:1 ပူးပေါင်းရင်းမြစ်များ

Matyu 24:24

Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

Matyu 7:26

Ariya tamo a ijo anjam endi qusim dauryqa uratqas di a nanari tamo bei laŋa sub gogeq di tal atej a bul sqas.

Luk 24:25

Onaqa Yesus na kamba minjrej, “Nuŋgo areqalo tulaŋ truquiŋgwo. Qotei aqa medabu o qaji tamo naŋgo anjam nami maroqneb qaji di niŋgi poiŋgosai.

Aposel 16:6

Bati bei Pol na Sailas na Timoti na naŋgi qalub walwelosib Frigia sawa ti Galesia sawa ti dia Qotei aqa anjam mare mare giloqneb. Naŋgi nami Esia sawaq dia Yesus aqa anjam marqa laqnabqa Qotei aqa Mondor na naŋgi saidnjrej.

Aposel 6:7

Bati deqa Qotei aqa anjam tulaŋ kobaoqnej. Tamo uŋgasari Jerusalem di soqneb qaji naŋgo ambleq di tamo uŋgasari tulaŋ gargekoba naŋgi are bulyoqnsib Yesus qa naŋgo areqalo siŋgilatoqnsib tamo nami Yesus qa naŋgo areqalo siŋgilateb qaji naŋgo miligiq aioqneb. Atra tamo gargekoba naŋgi dego Yesus aqa aŋgro 12-pela naŋgo anjam dauryoqnsibqa Yesus qa naŋgo areqalo siŋgilatoqneb.

Rom 10:16

Ariya tamo uŋgasari kalil naŋgi anjam bole di qusib dauryosaieqnub. Agi naŋgi qa Aisaia a nami endegsi marej, “O Tamo Koba, tamo yai naŋgi gago anjam di qusib naŋgo areqaloq di siŋgilateqnub?”

Rom 2:8

Ariya tamo qudei naŋgi naŋgo segi jejamu qa are qaloqnsib deqa naŋgi anjam bole gotraŋyoqnsib kumbra uge uge dauryeqnub. Deqa Qotei a tamo naŋgi deqaji qa minjiŋ oqimqa awai ugedamu enjrqas.

Rom 6:17

Bole, nami niŋgi une aqa wau tamo soqneb. Ariya bini Qotei na niŋgi osiq aqa anjam aqa sorgomq di atej unub deqa niŋgi nuŋgo are miligiq na aqa anjam dauryeqnub. Qotei a kumbra degyej deqa iga a qa tulaŋ areboleboleigeqnu.

1 Korin 11:26

O was qu, niŋgi Yesus aqa anjam deqa are qaloqnsib bati gaigai niŋgi bem ti wain gambaŋ ti di uyoqnsib niŋgi anjam endegsib marsib laqniye, “Tamo Koba Yesus a iga qa jaqatiŋ osiq moiej.” Marsib laqnib mondoŋ a olo bqas.

1 Korin 2:2

E endegsi are qalem. E nuŋgo ambleq di sosiyqa e Yesus Kristus qa segi niŋgi merŋgoqnqai. A ŋamburbasq di moiej anjam di segi niŋgi merŋgoqnqai. E anjam bei niŋgi merŋgwasai. E degsi are qalem.

2 Korin 10:5

Areqalo uge uge ti gisaŋ anjam na ti tamo naŋgi Qotei qalieqajqa gam getentetnjreqnu deqa iga na olo gotraŋyeqnum. Osim iga tamo naŋgo areqalo kalil bulyetnjreqnam naŋgi Kristus aqa anjam dauryqajqa are qaleqnub.

2 Korin 11:3

Ariya e amal uge Satan qa are qalsim deqa e niŋgi qa ulaonum. A gisaŋ ani tamo deqa a nami Iv gisaŋyonaqa a une atej. Une di niŋgi qa bosim nuŋgo areqalo ugetetŋgimqa niŋgi Kristus a segi qujai qalaqalaiyqajqa urataib deqa e niŋgi qa ulaonum.

Galesia 1:2

Kristen was kalil sawa endia unub qaji naŋgi e ti ombla na anjam endi neŋgreŋyosim niŋgi Galesia sawaq dia Yesus aqa ñam qa korooqnsib loueqnub qaji niŋgi qa qariŋyonum.

Galesia 1:6

Kristus a niŋgi qa are tulaŋ boleiyej aqa kumbra dena Qotei na niŋgi aqa segi tamo uŋgasari sqa marsiq metŋgej. Ariya niŋgi olo urur Qotei qoreiyosib Kristus aqa anjam bole dauryqa uratosib olo anjam bei dauryeqnub. E nuŋgo kumbra deqa tulaŋ prugugetonum.

Galesia 2:14

Naŋgi Kristus aqa anjam bole degsib ugetonabqa e unsimqa naŋgo ŋamgalaq dia Pita endegsi minjem, “Ni Juda tamo. Ariya ni sawa bei bei qaji tamo naŋgi bulosim naŋgo kumbra dauryeqnum. Ni Juda naŋgo kumbra dauryosaieqnum. Di ni kere degyeqnum. Ariya kiyaqa ni olo sawa bei bei qaji tamo naŋgi Juda naŋgo kumbra dauryqajqa minjreqnum?”

Galesia 3:3

Niŋgi nanarionub e? Niŋgi nami Mondor aqa siŋgila na walweloqneb. Ariya bini niŋgi olo nuŋgo segi siŋgila na walweleqnub e?

Galesia 4:9

Ariya bini niŋgi Qotei bole qalieonub. A niŋgi qa dego bole qalieqo. Deqa kiyaqa niŋgi olo puluosib mondor uge uge naŋgi daurnjrqajqa are qaleqnub? Kiyaqa niŋgi olo naŋgo kaŋgal tamo bul sqajqa are qaleqnub? Niŋgi qalie, mondor uge uge naŋgi dena niŋgi aqaryaiŋgwa keresai.

Galesia 5:11

O was qu, e tamo naŋgi muluŋ aiqajqa minjroqnem qamu kiyaqa jeu tamo naŋgi na e ugeugeibeqnub? E tamo naŋgi muluŋ aiqajqa minjroqnem qamu jeu tamo naŋgi na ŋamburbas qa anjam jeutosai qamu.

Efesus 3:8

Qotei aqa tamo uŋgasari kalil naŋgi na e tulaŋ buŋbejunub. Ariya Qotei a e qa are boleiyosiq wau ebej. E na sawa bei bei qaji tamo naŋgi Kristus aqa anjam bole minjre minjre laqajqa deqa osiq e wau ebej. Anjam bole di aqa utru agiende. Kristus na iga laŋ qaji iŋgi bole bole egeqnu. Iŋgi bole bole di aqa utru iga na ubtsim marqa keresai.

Efesus 4:14

Deqa iga olo aŋgro kiñilala bul sqasai. Tamo qudei naŋgi gisaŋ kumbra ti maqu kumbra ti tulaŋ qalieosib yeqnub. Deqa naŋgi gisaŋ anjam koba marsib laqnub. Jagwa na yuwal tigelteqnaqa oqe aieqnu dego kere anjam dena tamo qudei naŋgo areqalo niñaqyetnjreqnu. Ariya iga aŋgro kiñilala bul sqasai deqa anjam dena gago areqalo niñaqyetgwasai.

Efesus 5:15

Deqa was qu, niŋgi nuŋgo segi walwel gereiyosib soqniye. Niŋgi nanari tamo bulosib walwelaib. Niŋgi powo ti sosib walweloqniye.

2 Tesalonaika 1:8

Ariya Yesus a mandamq aisim tamo naŋgi Qotei qaliesai qaji naŋgi ti tamo naŋgi gago Tamo Koba Yesus aqa anjam bole dauryqa urateqnub qaji naŋgi ti ŋolawotnjrqas.

1 Timoti 6:4

Deqa iga qalieonum, tamo deqaji naŋgi naŋgo segi areqalo dauryqajqa tulaŋ arearetnjreqnaqa diqoqnsib laqnub. Deqa naŋgi powo saiqoji sosibqa anjam kiñilala qudei qa laŋa ŋiriŋoqnsib ñam qudei qa anjam na qotoqnsib unub. Naŋgi anjam degsib mareqnub deqa naŋgi tamo naŋgi qa are ugeinjreqnaqa laŋa qoto itnjroqnsibqa misiliŋ anjam koba minjroqnsib naŋgi qa areqalo uge ti laqnub.

Hibru 11:8

Abraham a dego Qotei qa aqa areqalo siŋgilatej deqa Qotei na metonaqa a Qotei aqa anjam dauryosiqa mandam bei Qotei na a yqajqa minjej qaji deq gilej. A sawa qabitqas kio di a qalieosaisosiqa gilej.

Hibru 5:9

Qalieosiq deqa a Qotei aqa anjam torei dauryekritej. Deqa Qotei na a giltosiq minjej, “Ni atra tamo kobaquja unum. Agi Melkisedek a nami atra tamo kobaquja soqnej dego kere.” Qotei na Yesus degsi minjej deqa Yesus na tamo kalil Qotei aqa anjam dauryeqnub qaji naŋgi oqas. Naŋgi oqajqa utru agi Yesus qujai. Deqa naŋgi ŋambile gaigai sqab.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Pita 4:17

Iga Qotei aqa segi aŋgro tiŋtiŋ unum. Ariya iga pegigwajqa bati agi jojomqo. Qotei a namoqna iga pegigwas. Deqa iga qalieonum, tamo naŋgi Qotei aqa anjam bole gotraŋyeqnub qaji naŋgo une qa Qotei na awai tulaŋ ugedamu enjrqas.

2 Pita 2:18

Tamo naŋgi di naŋgo segi medabu waqtoqnsib diqoqnsib anjam uge uge mareqnub. Naŋgi na tamo qudei naŋgi walawalainjreqnab naŋgi sambala kumbra yoqnsib naŋgo segi jejamu aqa kumbra uge uge dauryeqnub. Tamo naŋgi di ya ya endi are bulyosib tamo uge naŋgo kumbra urateb. Ariya tamo uge naŋgi na olo naŋgi titnjreqnab naŋgi kumbra uge uge dauryeqnub.

Uli Anjam 18:3

Tamo uŋgasari sawa sawa kalilq di unub qaji naŋgi Babilon ombla na sambalaoqnsib laqneb. Naŋgo kumbra uge di naŋgi wain siŋgila koba uyoqnsib nanarioqneb dego bul. Mandor kokba mandamq di unub qaji naŋgi dego Babilon ombla na sambala-oqnsib laqneb. Silali qa wauo qaji tamo naŋgi silali qa wauoqnsib Babilon aqa kumbra uge uge dena silali koba oqneb. Babilon a kumbra tulaŋ ugedamu yoqnej a deqa jemaiyosaioqnej.”

Uli Anjam 2:20

“‘Ariya ino kumbra uge qujai agi ubtsiy mermqai. Uŋa Jesebel a ni ombla sosiq waueqnaqa ni na a wiyosaieqnum. A segi qa mareqnu, “E Qotei aqa medabu o qaji uŋa.” Di gisaŋ. A Qotei aqa medabu o qaji uŋa sai. A na ijo wau tamo naŋgi gisa gisaŋnjroqnsiqa gam osornjreqnaqa naŋgi na sambala kumbra yoqnsibqa qotei gisaŋ atrainjro qaji iŋgi uyeqnub.