Galesia 2:20 - Yesus Aqa Anjam Bole

²⁰ Osim e olo ŋambile bunuj em. Ariya ŋambile di ijo segi ŋambile sai. Kristus a segi ijo are miligiq di ŋambile unu. Deqa bini kumbra kalil e mandamq endi yeqnum qaji di e Qotei aqa Ŋiri qa ijo areqalo siŋgilatosim yeqnum. Agi Qotei aqa Ŋiri a na e tulaŋ qalaqalaibosiq deqa a aqa segi ŋambile uratosiq e qa moiej.

Galesia 2:20 ပူးပေါင်းရင်းမြစ်များ

Matyu 20:28

E Tamo Aŋgro. Niŋgi ijo kumbra qalieosib degsib dauryoqniye. Tamo naŋgi na e aqaryaibosib wauetbqajqa e deqa bosai. E na tamo naŋgi wauetnjrqa bem. E na tamo uŋgasari gargekoba naŋgi aqaryainjrsiy ijo segi ŋambile uratosiy naŋgi eleŋqai. E deqa bem.”

Matyu 4:3

Onaqa walawalaiyo tamo Satan a Yesus aqa areq bosiqa minjej, “Ni Qotei aqa Ŋiriamqa meniŋ kalil endi minjrim bem bulyibqa ni uye.”

Jon 1:49

Onaqa Nataniel a Yesus aqa anjam di qusiqa minjej, “O Qalie Tamo Koba, ni degsi maronum deqa e poibqo, ni Qotei aqa Ŋiri. Ni Israel naŋgo Mandor Koba.”

Jon 10:11

E kaja naŋgo Mandor bole. Deqa e na kaja naŋgi aqaryainjrqa osiy ijo segi ŋambile uratosiy moiqai.

Jon 15:13

Tamo bei na aqa kadoi naŋgi tulaŋ qalaqalainjrsim deqa a na naŋgi aqaryainjrqa osimqa aqa segi ŋambile uratosim moiqas di a kumbra tulaŋ boledamu yqas. Qalaqalaiyo kumbra dena qalaqalaiyo kumbra kalil tulaŋ buŋnjrejunu.

Jon 17:21

O Abu, ni ijoq di unum. E dego inoq di unum. Aqo aiyel are qujaitosim unum. Ijo segi tamo uŋgasari kalil naŋgi dego aqo aiyel koba na are qujaitosib sqajqa deqa e ni pailmonum. Soqnibqa mandam endeqa tamo uŋgasari naŋgi na unjrsibqa naŋgi dego e qa naŋgo areqalo siŋgilatqab. Osib qalieqab, ni na e qariŋbonam bem.

Jon 3:16

“Qotei aqa Ŋiri qujai unu. Qotei na tamo uŋgasari kalil mandamq endi unub qaji naŋgi tulaŋ qalaqalainjrsiq deqa aqa segi Ŋiri qujai di naŋgi enjrej. A endegsi are qalej, ‘Tamo uŋgasari kalil ijo Aŋgro qa naŋgo areqalo siŋgilatqab qaji naŋgi di padalqasai. Naŋgi ŋambile gaigai sqab.’ Qotei a degsi are qalsiq deqa aqa segi Ŋiri qujai naŋgi enjrej.

Jon 3:35

Abu Qotei na aqa segi Ŋiri Yesus tulaŋ areiyoqnsiq qalaqalaiyeqnu. Deqa a na iŋgi iŋgi kalil aqa segi Ŋiri aqa baŋq di ateleŋeqnu.

Jon 6:57

Ijo Abu ŋambile unu qaji a na e qariŋbej deqa aqa siŋgila na e segi dego ŋambile unum. Dego kere tamo naŋgi ijo jejamu ti ijo leŋ ti uyqab di naŋgi dego ijo siŋgila na ŋambile sqab.

Jon 6:69

Iga ni qa gago areqalo siŋgilatosim endegsi qalieonum, Qotei aqa segi Tamo Bole a na nami giltej qaji agi ni qujai.”

Aposel 8:36

Onaqa naŋgi gam dauryosib giloqnsib gam qalaq di ya bei sonaq unsibqa Itiopia tamo dena Filip minjej, “Ni une. Ya agide. Iŋgi bei na e getentbqa keresai. Deqa ni e yansbe.”

Rom 1:17

Anjam bole dena Qotei na aqa kumbra iga osorgej. Aqa kumbra agiende. A na iga tamo bole une saiqoji qa mergej. Iga Yesus qa gago areqalo siŋgilatem dena a na iga tamo bole une saiqoji qa mergej. Di kiyaqa? Iga Yesus qa gago areqalo siŋgilatqom gam dena qujai iga Qotei aqa ŋamgalaq di tamo bole une saiqoji sqom. Agi Qotei aqa anjam bei nami endegsib neŋgreŋyeb unu, “Qotei na tamo uŋgasari a qa naŋgo areqalo siŋgilateqnub qaji naŋgi tamo bole une saiqoji qa minjrqas. Yim deqa naŋgi ŋambile gaigai sqab.”

Rom 14:7

Iga qalie, gago ambleq di tamo bei a endegsi marqa keresai, “Ijo ŋambile di ijo segi. E segi na taqatejunum. E moiqai di e segi na marsiy moiqai.” A degsi marqa keresai.

Rom 3:22

Gam agiende. Tamo uŋgasari Yesus Kristus qa naŋgo areqalo siŋgilateqnub qaji naŋgi segi Qotei na tamo bole une saiqoji qa minjreqnu. Gam di segi. Gam bei saiqoji.

Rom 4:25

Qotei na Yesus uratonaqa naŋgi na a qalnab moiej. Yim a gago une kobotqajqa deqa. Onaqa Qotei na Yesus olo subq na tigeltosiq dena iga tamo bole une saiqoji qa mergej.

Rom 5:2

Yesus a na iga tamo uŋgasari a qa gago areqalo siŋgilateqnum qaji gam waqtetgej deqa Qotei a iga qa are tulaŋ boleiyonaqa iga eleŋej. Qotei na kumbra di iga egej deqa bini iga kumbra di osim tigelejunum. Deqa bini iga Qotei na laŋ qureq osi oqsim dia iga a ombla geregere sqajqa deqa tariŋeqnum. Iga deqa tulaŋ areboleboleigeqnaq unum.

Rom 5:6

Iga gago segi jejamu aqaryaiyqa keresai sonamqa Kristus a iga tamo uŋgasari kumbra uge uge yeqnum qaji iga qa osiq moiej. Bati Qotei a nami atej qaji di brantonaqa a iga qa moiej.

Rom 5:8

Ariya iga une tamo sonamqa Kristus a iga qa moiej. Aqa kumbra dena Qotei na iga osorgwo, a iga tulaŋ qalaqalaigeqnu.

Rom 6:13

Une na nuŋgo siŋga ti baŋ ti taqatqa laqnimqa niŋgi na olo saidyiye. Yim niŋgi kumbra uge uge yoqnqasai. Niŋgi subq na olo tigelobulosib ŋambile unub deqa niŋgi nuŋgo segi jejamu osib Qotei yiye. Yosib nuŋgo siŋga ti baŋ ti nuŋgo jejamu ti kalil Qotei aqa baŋq di atibqa a segi na taqatqas. Yim dena niŋgi kumbra bole tiŋtiŋ yoqnqab.

Rom 6:8

Od, iga Kristus ombla moiobulem deqa iga qalieonum, iga a ombla olo ŋambile sqom.

Rom 8:10

Niŋgi une ti unub deqa nuŋgo jejamu moiqas. Ariya Kristus a nuŋgo are miligiq di unu deqa niŋgi Qotei aqa ŋamgalaq di tamo bole une saiqoji unub. Deqa Qotei aqa Mondor na niŋgi ŋambile eŋgwas.

Rom 8:37

Ariya Kristus na iga qalaqalaigej deqa gulube kalil di gagoq di brantoqnqas di uŋgum. A na gaigai iga aqaryaigeqnu deqa iga qoto siŋgilaoqnsim tigelejunum.

1 Korin 6:17

Ariya tamo bei a Tamo Koba Yesus wo beterqab di naŋgi aiyel Mondor qujai ti sqab.

2 Korin 1:24

Niŋgi Yesus qa nuŋgo areqalo siŋgilateqnub nuŋgo areqalo di iga na taqatgwajqa e deqa merŋgosai. Iga qalieonum, niŋgi nuŋgo areqalo di siŋgila na ojsib tigelejunub. O was qu, niŋgi tulaŋ areboleboleiŋgwajqa deqa iga niŋgi ti waueqnum.

2 Korin 10:3

Bole, iga mandam endia sosim waueqnum. Ariya iga mandam tamo naŋgo kumbra na qotosaieqnum.

2 Korin 11:10

Kristus aqa anjam bole ijoq di unu deqa e anjam bole endegsi merŋgwai, Akaia sawa kalilq dia tamo bei na e ijo kumbra deqa ijo segi ñam soqtqajqa getentbqa keresai.

2 Korin 13:3

Kristus a ijo medabuq na anjam mareqnu kio sai kio di niŋgi qalieqajqa deqa e niŋgi qa olo bosiy tamo naŋgi di naŋgo une tingitetnjrqai. Yim niŋgi ijo kumbra di unsib bole qalieqab. Niŋgi quiye. Kristus a siŋgila koba ti unu deqa a lawo na nuŋgo kumbra tingitetŋgwasai. A na niŋgi aqa siŋgila osorŋgim unqab.

2 Korin 13:5

Niŋgi Kristus qa nuŋgo areqalo bole siŋgilateqnub kio sai kio deqa are qalsib nuŋgo segi kumbra tenemtoqniye. Niŋgi qaliesai kio, Yesus Kristus a nuŋgo are miligiq di unu? A niŋgi koba na sqasai di niŋgi a qa nuŋgo areqalo siŋgilaboletosai deqa.

2 Korin 5:14

Kristus a na iga tulaŋ qalaqalaigej. Aqa kumbra dena a gago areqalo tigeltetgej deqa iga waueqnum. Di kiyaqa? Iga qalieonum, tamo qujai Yesus a gago kalil qa sawa osiq moiej deqa iga kalil dego moreŋem.

2 Korin 5:15

Iga ŋambile unum deqa iga gago segi jejamu qa are qalsim walwelqasai. Utru deqa a iga qa moiej. A gago sawa osiq moisiq olo subq na tigelej deqa iga a qa are qalsim walweloqnqom.

2 Korin 5:7

Bini iga a qa gago areqalo siŋgilatosim walweleqnum. Iga a unosaiunum.

Galesia 1:4

Kristus a gago Abu Qotei aqa areqalo dauryosiq deqa a gago une kobotqa marsiqa aqa segi ŋambile uratosiq moiej. A na iga eleŋamqa iga mandam qa kumbra uge kalil uratqajqa deqa marsiq iga qa moiej.

Galesia 2:16

Ariya iga qalieonum, tamo naŋgi Moses aqa dal anjam dauryqab dena Qotei na naŋgi tamo bole une saiqoji qa minjrqasai. Tamo naŋgi Kristus Yesus qa naŋgo areqalo siŋgilatqab gam dena qujai Qotei na naŋgi tamo bole une saiqoji qa minjrqas. Iga dego Kristus Yesus qa gago areqalo siŋgilateqnum. Di kiyaqa? Iga qalie, gam dena qujai Qotei na iga tamo bole une saiqoji qa mergwas. Iga dal anjam dauryqom gam dena sai. Di kiyaqa? Tamo bei a dal anjam dauryqas Qotei a deqa are qalsim a tamo bole une saiqoji qa minjqasai. Sai bolesai.

Galesia 3:11

Olo Qotei aqa anjam bei dego endegsib neŋgreŋyeb unu, “Tamo naŋgi Qotei qa naŋgo areqalo siŋgilatqab gam dena qujai a na naŋgi tamo bole une saiqoji qa minjrqas. Yim naŋgi ŋambile gaigai sqab.” Anjam dena iga qalieonum, tamo naŋgi dal anjam dauryqab gam dena Qotei na naŋgi tamo bole une saiqoji qa minjrqasai.

Galesia 5:24

Tamo kalil Kristus Yesus beteryejunub qaji naŋgi na naŋgo areqalo namij ti naŋgo are prugnjrqajqa kumbra ti kalil ŋamburbasq di qamnab moiej.

Galesia 6:14

Ariya e ijo segi ñam soqtqa keresai. E tamo bei aqa ñam dego soqtqa keresai. E Yesus Kristus aqa ñam segi soqtqai. A ŋamburbasq di moiej e deqa segi areboleboleibeqnu. Kristus a ŋamburbasq di moiej aqa wau dena mandam qa kumbra kalil ijo areqaloq di unu qaji di moiobuleb. E segi dego ŋamburbasq di moiobulem deqa e olo mandam qa kumbra dauryqa keresai.

Efesus 3:17

Osib naŋgi Kristus qa naŋgo areqalo siŋgilatqab dena Kristus a naŋgo are miligiq di sqas. O Abu, ni na Efesus naŋgi siŋgilatnjrimqa qalaqalaiyo kumbra naŋgo are miligiq di tulaŋ siŋgilatib soqnim naŋgi siŋgila na tigelesqab. Mandam na ŋam jirim ojesonaqa ŋam a siŋgila na tigelejunu dego kere.” O was qu, e niŋgi qa degsim Qotei pailyeqnum.

Efesus 5:2

Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

Efesus 5:25

O tamo, Kristus a na aqa segi tamo uŋgasari naŋgi tulaŋ qalaqalainjrsiq deqa aqa segi ŋambile uratosiq naŋgi qa moiej. Dego kere niŋgi na nuŋgo uŋgasari naŋgi tulaŋ qalaqalainjroqniye.

Filipai 1:21

Ijo areqalo agiende. E sqai di e Kristus ombla sqai. Ariya e moiqai di e olo iŋgi tulaŋ boledamu oqai.

Filipai 4:13

Kristus a segi na e siŋgilatbeqnu deqa aqa siŋgila dena e kumbra kalil yqa kere.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

1 Tesalonaika 1:10

Mondoŋ Qotei aqa Ŋiri a laŋ qureq dena olo bqas deqa bini niŋgi a qa tariŋoqnsib unub. A moinaqa Qotei na olo subq na tigeltej. Di Yesus a segi qujai. A na iga eleŋej deqa mondoŋ Qotei aqa minjiŋ oqwa bati boqnimqa iga aqa minjiŋ di turqasai. Iga so bole gaigai sqom.

1 Tesalonaika 5:10

Yesus a iga qa moiej deqa iga ŋambile sqom kio iga moiqom kio di uŋgum. Iga Yesus koba na ŋambile gaigai sqom.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Hibru 8:3

Atra tamo kokba naŋgo wau di niŋgi qalie. Naŋgi iŋgi iŋgi osi boqnsib Qotei atraiyeqnub. Deqa Yesus a dego atra tamo kobaquja sosiqa aqa segi jejamu osiq Qotei atraiyej.

1 Pita 1:8

Niŋgi nami Kristus unosaioqneb. Ariya niŋgi a tulaŋ qalaqalaiyeqnub. Niŋgi bini a unosaieqnub. Ariya niŋgi a qa nuŋgo areqalo siŋgilatoqnsib a qa tulaŋ arebo-leboleiŋgeqnu. Nuŋgo arebolebole dena mandam qaji arebolebole kalil tulaŋ buŋyejunu. Nuŋgo arebolebole di aqa utru iga na dauryosim ubtqa keresai.

1 Jon 1:7

Qotei a suwaŋoq di unu dego kere iga dego suwaŋoq di walwelqom di iga Qotei aqa tamo uŋgasari kalil naŋgi ti areqalo qujaitosim sqom. Soqnimqa Qotei aqa Ŋiri Yesus aqa leŋ aiej qaji dena gago une kalil kobotetgoqnimqa iga aqa ŋamgalaq di tamo bole une saiqoji sqom.

1 Jon 4:14

Abu Qotei a na tamo uŋgasari kalil mandamq endi unub qaji naŋgi eleŋqa osiq deqa aqa Ŋiri qariŋyonaq mandamq aiej. Aqa kumbra di iga unsim deqa mare mare laqnum.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 3:20

“‘Ni e nube. E siraŋmeq di tigelesosimqa kindokindoŋeqnum. Tamo bei a ijo kakoro qusimqa siraŋ waqtetbqas e miligiq gilsiy aqo ombla iŋgi uyqom.