Galesia 2:2 - Yesus Aqa Anjam Bole

² Qotei a segi na merbej deqa e Jerusalem aiem. Ariya e Jerusalem di sosimqa e Kristen naŋgo gate naŋgi segi koba na anjam maroqnem. E sawa bei beiq dia laqnsimqa Kristus aqa anjam bole palontoqnem ijo wau di ubtsim minjrem. E tamo laŋa laŋaj naŋgi minjrosai. Di kiyaqa? Wau e nami yoqnsim agi bini yeqnum qaji di laŋa uloŋo uge.

Galesia 2:2 ပူးပေါင်းရင်းမြစ်များ

Matyu 10:16

Osiqa Yesus a olo anjam endegsi minjrej, “Niŋgi quiye. Niŋgi kaja du du bul deqa e na niŋgi qariŋgitqa gilsib bauŋ juwaŋ naŋgo ambleq dia walweloqnqab. Deqa niŋgi amal naŋgo kumbra dauryoqniye. Amal naŋgi geregere ŋam atoqnsib laqnub. Dego kere niŋgi geregere are qaloqnsib walweloqniye. Niŋgi binoŋ naŋgo kumbra dego dauryoqniye. Binoŋ naŋgi kumbra uge yosaieqnub. Dego kere niŋgi kumbra uge yqajqa are qaloqnaib.

Aposel 15:12

Pita a na naŋgi anjam degsi minjrnaqa naŋgi kalil aqa anjam di qusibqa naŋgi mequmesoqneb. Onaqa Barnabas wo Pol wo naŋgi kamba tigelosib Qotei na nami naŋgi aiyel siŋgilatnjreqnaqa naŋgi sawa bei bei qaji tamo naŋgo ambleq dia maŋwa gargekoba yoqneb deqa naŋgi sainjrnab queb.

Aposel 15:2

Degsi minjrnabqa Pol wo Barnabas wo naŋgi qusibqa ŋiriŋkobaosib naŋgi ti anjam na qotoqneb. Onaqa Kristen tamo uŋgasari naŋgi di qusibqa naŋgi koroosib anjam endegsib kereteb, “Iga na Pol wo Barnabas wo Yesus aqa tamo qudei ti naŋgi qariŋnjrim Jerusalem qureq aisib dia Yesus aqa aŋgro 12-pela naŋgi ti Kristen gate ti koba na koroosib anjam di gereiyqab.”

Aposel 15:4

Ariya naŋgi aisib Jerusalem qureq di brantonabqa Yesus aqa tamo uŋgasari kalil naŋgi ti Yesus aqa aŋgro 12-pela naŋgi ti Kristen gate kokba ti naŋgi na minjreb, “Niŋgi kere bonub. Bonub degamqa niŋgi sawa bei beiq dia Qotei aqa anjam qa wauoqneb deqa iga saigib iga quqwom.” Onaqa Pol wo Barnabas wo Qotei na siŋgilatnjreqnaqa sawa bei beiq dia wau kalil yoqneb qaji deqa naŋgi sainjrnab queb.

Aposel 18:9

Bati bei qolo Qotei na Pol aqa areqalo waqtetonaqa a ŋeiobilqeiobulosiqa Tamo Koba Yesus unej. Unnaqa minjej, “O Pol, ni ulaaim. Ni qure endia sosimqa ino medabu waqtoqnsimqa boleq na ijo anjam mare mare laqne. Mequmaim.

Aposel 23:11

Gilsib di sonab nebeosiq olo qoloonaqa Tamo Koba Yesus a bosiqa Pol aqa areq di tigelosiq minjej, “Ni are siŋgilatime. Ulaaim. Ni Jerusalem endia ijo anjam mare mare laqnum dego kere ni Rom aisim dia dego ijo anjam siŋgila na minjroqne.” Tamo Koba Yesus na Pol degsi minjej.

Aposel 5:34

Onaqa naŋgo ambleq dena Farisi tamo bei aqa ñam Gamaliel a tigelej. A dal anjam qalie tamo kobaquja. Tamo kalil naŋgi bati gaigai a qa maroqneb, “A tamo bolequja.” A tigelosiqa qaja tamo naŋgi minjrej, “Niŋgi mati Yesus aqa aŋgro 12-pela naŋgi joqsib taqal beiq giliye.”

Rom 9:16

Deqa Qotei na tamo bei giltqas di tamo aqa areqalo na sai. Tamo aqa wau na sai. Qotei aqa segi are bole na a tamo bei giltqas.

1 Korin 1:23

Ariya Kristus a ŋamburbasq di moiej anjam di iga palontsim laqnam Juda naŋgi quoqnsib gisaŋ qa mareqnub. Grik naŋgi dego anjam di quoqnsib nanari qa mareqnub.

1 Korin 2:2

E endegsi are qalem. E nuŋgo ambleq di sosiyqa e Yesus Kristus qa segi niŋgi merŋgoqnqai. A ŋamburbasq di moiej anjam di segi niŋgi merŋgoqnqai. E anjam bei niŋgi merŋgwasai. E degsi are qalem.

1 Korin 9:24

E mandam tamo naŋgo alaŋ qa merŋgwai. Tamo naŋgi gurguroqnsib bubuŋeqnub di naŋgi awai oqajqa. Ariya tamo qujai a segi na naŋgi kalil buŋnjrsimqa awai oqas. Dego kere niŋgi awai oqa marsib siŋgila na gurguroqniye.

1 Korin 9:26

Deqa e ururoqnsim laŋa laŋa ŋam atosaieqnum. E awai bole di koqyoqnsim urureqnum. E qoto tamo bul unum deqa e laŋa laŋa ijo baŋ waiyosaieqnum. E tamo qalqajqa deqa ijo baŋ tiŋsim geregere waiyeqnum.

2 Korin 12:1

Ariya e gam bei saibqo deqa e olo ijo ñam soqtqai. Bole, e ijo ñam soqtqai kumbra dena iga aqaryaigwa keresai. Di uŋgum. Nami Tamo Koba Qotei na ŋeiobilqei ti uli anjam ti e osorbej deqa niŋgi saiŋgit quiye. Dena e ijo ñam soqtqai.

Galesia 1:12

E anjam di tamo bei aqa baŋq dena osai. Tamo bei na e osorbosai dego. Yesus Kristus a segi na anjam bole di babtosiq osorbej.

Galesia 1:16

Osiqa bati a nami atej qaji di brantonaqa a na aqa Ŋiri Yesus e osorbej. Yim e na aqa anjam bole osiy giloqnsiy tamo uŋgasari sawa bei beiq di unub qaji naŋgi minjre minjre laqajqa deqa. Onaqa bati di e na tamo qudei naŋgi endegsi nenemnjrosaioqnem, “Yesus a tamo kiero?” o “E Yesus aqa anjam kiersi palontoqnqai?” Qotei a segi na e giltbej deqa e tamo qudei naŋgi degsi nenemnjrosaioqnem.

Galesia 1:6

Kristus a niŋgi qa are tulaŋ boleiyej aqa kumbra dena Qotei na niŋgi aqa segi tamo uŋgasari sqa marsiq metŋgej. Ariya niŋgi olo urur Qotei qoreiyosib Kristus aqa anjam bole dauryqa uratosib olo anjam bei dauryeqnub. E nuŋgo kumbra deqa tulaŋ prugugetonum.

Galesia 2:6

Tamo qudei naŋgi Kristen gate kokba. Naŋgi ñam ti. Ariya ijo areqalo agiende. Naŋgi gate kokba kio sai kio di laŋa. Qotei a tamo naŋgo ñam qa are qalosaieqnu. Ariya e na tamo ñam ti naŋgi di ijo wau ubtsim minjrnamqa naŋgi mareb, “Di kere.” Naŋgi olo anjam bei e merbosai.

Galesia 2:9

Tamo uŋgasari naŋgi mareqnub, Jems na Pita na Jon na naŋgi qalub Kristen naŋgo gate kokba. Ariya naŋgi qalub qalieeb, Qotei a e qa are boleiyosiq wau ebej. Deqa naŋgi aqo Barnabas wo gago baŋ ojsib mergeb, “Niŋgi gago Kristen was bole.” Osib naŋgi iga ti areqalo qujaitosim anjam endegsi keretem, aqo Barnabas wo sawa bei beiq dia Qotei aqa wau yoqnqom. Ariya naŋgi Juda naŋgo ambleq di wauoqnqab.

Galesia 5:7

Nami niŋgi Kristus aqa gam geregere dauryosib walweloqneb. Ariya tamo yai na gam getentetŋgonaqa niŋgi olo anjam bole dauryqa urateqnub?

Filipai 2:29

Deqa niŋgi Epafroditus a qa tulaŋ arebolebo-leiŋgim Tamo Koba Yesus aqa ñam na gereiyoqniye. Niŋgi tamo bole deqaji kalil naŋgo ñam gaigai soqtoqniye.

1 Tesalonaika 3:5

Utru deqa e niŋgi qa tariŋqa keresai. Deqa e Timoti qariŋyonam niŋgi qa bej. E endegsi are qalem. Walawalaiyo tamo Satan a na niŋgi uneq waiŋgwoqa niŋgi na gago wau di laŋa ulontosib nuŋgo areqalo Yesus qa siŋgilatqa uratonub kio? E di qalieqajqa deqa Timoti qariŋyonam niŋgi qa bej.

2 Timoti 4:7

Tamo naŋgi gurguroqnsib bubuŋeqnub dego kere e nami siŋgila na ururosim Kristus dauryoqnem agi e degsi unum. Ariya bini e ijo wau kobotonum. E Qotei qa ijo areqalo siŋgilatoqnem di e uratosai-oqnem. Agi bini e siŋgila na ojejunum.

Hibru 12:1

Tamo nami soqneb qaji naŋgi di Qotei qa naŋgo areqalo siŋgilatoqneb. Naŋgi laŋbi bul iga agutgesonab iga naŋgo kumbra di uneqnum. Qotei na iga giltgej deqa iga siŋgila na gurguroqnqom. Gurguroqnimqa iŋgi iŋgi qudei na iga Qotei aqa kumbra dauryqa gam getentetgwa laqnimqa iga iŋgi iŋgi di olo gotraŋyoqnqom. Une kalil gagoq di beterqajqa laqnu qaji di dego iga gotraŋyoqnsim Qotei aqa kumbra dauryqajqa siŋgilaoqnqom.