Galesia 2:11 - Yesus Aqa Anjam Bole

¹¹ Ariya bunuqna Pita a Antiok qureq bonaqa e aqa ulatamuq di a ŋiriŋtem. Di kiyaqa? A kumbra uge yej deqa.

Galesia 2:11 ပူးပေါင်းရင်းမြစ်များ

Matyu 16:23

Onaqa Yesus a bulosiqa Pita koqyosiqa ŋiriŋtosiq minjej, “Ni Satan bul. Deqa ni ijo qoreq gile. Ni ijo gam getentetbaim. Ni Qotei aqa areqalo dauryosai. Ni mandam tamo naŋgo areqalo dauryonum. Dauryosim agi ni na anjam di merbonum.”

Jon 1:42

Degsi minjsiqa Saimon osiq Yesus aqa areq osi gilej. Onaqa Yesus na Saimon unsiqa minjej, “Ni Saimon, Jon aqa ŋiri. Bunuqna ino ñam Sifas mermoqnqab.” Ñam “Sifas” di Hibru anjam. Gago anjam, “Pita.” Aqa damu, “Meniŋ.”

Aposel 11:19

Nami Juda tamo kokba naŋgi na Stiven qalsib moiotsibqa bati deqa tamo uŋgasari kalil Yesus qa naŋgo areqalo siŋgilateb qaji naŋgi dego ugeugeinjroqnsib gulube koba enjroqneb. Deqa naŋgi segi segi jaraiosib Fonisia sawa ti Saiprus nui ti Antiok qure ti deq gileleŋeb. Gilsib dia Qotei aqa anjam mare mare laqneb. Laqnsibqa Juda tamo uŋgasari naŋgi segi Qotei aqa anjam minjroqneb. Sawa bei bei qaji tamo naŋgi anjam minjrosaioqneb.

Aposel 11:20

Ariya naŋgo ambleq di Saiprus qaji tamo qudei ti Sairini qaji tamo qudei ti soqneb. Naŋgi Antiok qureq aisib dia Grik tamo naŋgi dego Tamo Koba Yesus aqa anjam bole plaltosib minjroqneb.

Aposel 11:22

Onaqa Yesus aqa tamo uŋgasari Jerusalem di soqneb qaji naŋgi di qusibqa Barnabas qariŋyonab Antiok qureq aiej.

Aposel 11:27

Onaqa bati bei Qotei aqa medabu o qaji tamo qudei naŋgi Jerusalem dena tigelosib walwelosib Antiok qureq beb.

Aposel 15:1

Bati bei Yesus aqa tamo uŋgasari Jerusalem qureq di soqneb qaji naŋgo ambleq na Juda tamo qudei naŋgi tigelosib Judia sawa uratosib walwelosib Antiok qureq gileb. Gilsib dia Kristen tamo uŋgasari naŋgi endegsib minjreb, “Niŋgi Moses aqa dal anjam dauryosib muluŋ unqab di Qotei a niŋgi oqas. Niŋgi muluŋ unqasai di Qotei a niŋgi oqasai.”

Aposel 15:5

Naŋgi kalil qusibqa tamo qudei nami Farisi naŋgo ambleq di soqneb qaji naŋgi tigelosib mareb, “Sawa bei bei qaji tamo naŋgi Yesus qa naŋgo areqalo siŋgilatqa osib muluŋ dego unsib Moses aqa dal anjam dauryoqnqab di kere. Naŋgi Yesus qa naŋgo areqalo laŋa siŋgilatqab di keresai.”

2 Korin 11:5

Niŋgi are qaleb, “Tamo naŋgi di Qotei na bole qariŋnjrej.” Sai. Niŋgi quiye. Tamo naŋgi dena e buŋbosai. Tamo naŋgi di ñam ti unub ariya e dego ñam ti unum.

2 Korin 12:11

Anjam e mareqnum endi nanari anjam. Di nuŋgo une. Agi niŋgi na ijo areqalo tigeltetbeqnub deqa e nanari anjam endi mareqnum. Niŋgi ijo kumbra bole qa marqa kere. Ariya niŋgi marqa urateqnub. Deqa e segi ijo kumbra bole qa mareqnum. Bole, e tamo bolesai. Ariya niŋgi na olo tamo qudei naŋgo ñam soqtoqnsib mareqnub, “Tamo naŋgi di Qotei aqa wau tamo bolequja.” Ariya tamo naŋgi dena e buŋbosai.

2 Korin 5:16

Deqa bini iga areqalo namij dauryosim tamo uŋgasari naŋgo kumbra qa peginjrosaieqnum. Bole, nami iga areqalo namij na Kristus aqa kumbra qa pegiyoqnem. Ariya bini iga olo kumbra dena a pegiyosaieqnum.

Galesia 1:18

Ariya wausau qalub koboonaqa e Pita segi unqajqa Jerusalem gilem. Gilsim bati 15 Pita ombla soqnem.

Galesia 2:14

Naŋgi Kristus aqa anjam bole degsib ugetonabqa e unsimqa naŋgo ŋamgalaq dia Pita endegsi minjem, “Ni Juda tamo. Ariya ni sawa bei bei qaji tamo naŋgi bulosim naŋgo kumbra dauryeqnum. Ni Juda naŋgo kumbra dauryosaieqnum. Di ni kere degyeqnum. Ariya kiyaqa ni olo sawa bei bei qaji tamo naŋgi Juda naŋgo kumbra dauryqajqa minjreqnum?”

Galesia 2:5

Aisib naŋgi na iga mergeb, “Niŋgi na Taitus osib muluŋ waiyiye.” Onaqa iga naŋgo anjam di quetnjrosai. Naŋgi Kristus aqa anjam bole olo bulbulyaib deqa iga na naŋgi saidnjrem. Yim niŋgi Kristus aqa anjam bole siŋgila na ojsib gaigai dauryqajqa deqa.

Galesia 2:7

Pita aqa wau agiende. A Juda naŋgo ambleq di wauoqnsiqa Kristus aqa anjam bole naŋgi minjre minjre laqnu. Qotei na wau di Pita yej. Dego kere e dego wau ti. Ijo wau agi e na tamo uŋgasari sawa bei beiq di unub qaji naŋgo ambleq di wauoqnsimqa Kristus aqa anjam bole naŋgi minjre minjre laqnum. Wau di Qotei na e ebej. Tamo ñam ti naŋgi degsib unsib ariya naŋgi e kamba olo anjam bei merbosai.

Galesia 2:9

Tamo uŋgasari naŋgi mareqnub, Jems na Pita na Jon na naŋgi qalub Kristen naŋgo gate kokba. Ariya naŋgi qalub qalieeb, Qotei a e qa are boleiyosiq wau ebej. Deqa naŋgi aqo Barnabas wo gago baŋ ojsib mergeb, “Niŋgi gago Kristen was bole.” Osib naŋgi iga ti areqalo qujaitosim anjam endegsi keretem, aqo Barnabas wo sawa bei beiq dia Qotei aqa wau yoqnqom. Ariya naŋgi Juda naŋgo ambleq di wauoqnqab.

1 Timoti 5:20

Kristen gate bei a une yimqa ni na a osim Kristen gate kalil naŋgo ulatamuq di tigeltosim aqa une boleq atsim minjimqa Kristen gate kalil naŋgi kumbra di unsib naŋgi dego ulaqab.

Jems 3:2

Bati gargekoba iga kumbra guro guroyeqnum. Iga kalil degyeqnum. Ariya tamo bei aqa anjam maro qa grotqasai di a tamo bolequja. Deqa a na aqa baŋ ti siŋga ti jejamu ti dego geregere taqatoqnqas.

Jut 1:3

O ijo was bole, Qotei na iga kalil padalo sawaq dena eleŋej wau di aqa utru e na neŋgreŋyosiy niŋgi qa qariŋyqajqa are koba unu. Ariya e anjam bei dego neŋgreŋyosiy niŋgi qa qariŋyqa are qaleqnum. Anjam agiende. Jeu tamo naŋgi bosib Kristus aqa anjam bole ugeugeiyqa laqnib nuŋgo areqalo Kristus qa siŋgilateqnub qaji di niŋgi olo siŋgila na ojsibqa jeu tamo naŋgi di gotraŋnjroqniye. Iga Qotei aqa tamo uŋgasari unum deqa Qotei na gago areqalo tigeltetgonaqa iga Kristus aqa anjam bole gago areqaloq di siŋgilatejunum. Deqa tamo bei na anjam di olo bulyqa keresai.