Galesia 1:1 - Yesus Aqa Anjam Bole

¹ E Pol. Yesus Kristus na e qariŋbej deqa e aqa anjam mare mare laqnum. Mandam tamo bei na e qariŋbosai. Tamo bei na e wau ebosai dego. Yesus Kristus naŋgi Abu Qotei agi Kristus subq na tigeltej qaji wo naŋgi aiyel na e wau ebeb.

Galesia 1:1 ပူးပေါင်းရင်းမြစ်များ

Jon 10:30

Aqo ijo Abu wo iga tamo qujai.”

Jon 20:21

Onaqa Yesus na olo minjrej, “Niŋgi are lawo na soqniye. E ijo Abu na qariŋbonaq mandamq aiem. Dego kere e na niŋgi qariŋgitqa gilsib ijo anjam mare mare laqniye.”

Jon 5:19

Onaqa Yesus na kamba minjrej, “Niŋgi quiye. E bole merŋgwai. E Qotei aqa Ŋiri. E ijo segi areqalo na kumbra bei yqa keresai. Kumbra ijo Abu na yeqnaq e uneqnum qaji di segi e yeqnum. E Qotei aqa Ŋiri deqa kumbra kalil ijo Abu na yeqnu qaji di e dego yeqnum.

Aposel 22:10

“Onaqa e na olo Yesus minjem, ‘O Tamo Koba, ni e wau kie yqajqa merbqam?’ Onaqa Tamo Koba Yesus na merbej, ‘Ni tigelosim Damaskus qureq aisim dia tamo bei itqam. A na ni wau kie yqam di mermqas.’

Aposel 3:15

Ariya Yesus a segi ŋambile qa utru. Di niŋgi na qalnab moiej. Onaqa Qotei na Yesus olo subq na tigeltonaqa iga gago ŋamdamu na unem. Deqa bini iga a qa mare mare laqnum.

Aposel 9:6

Deqa ni tigelosim Damaskus qureq aie. Aisim dia tamo bei itqam. A na ni wau kie yqam di mermqas.”

Rom 1:1

E Pol. E Kristus Yesus aqa wau tamo. E aqa anjam maro tamo sqajqa deqa metbej. Osiqa e Qotei aqa anjam bole marsim laqajqa deqa giltbej.

Rom 10:9

Deqa niŋgi nuŋgo medabu waqtosib Yesus a segi qujai Tamo Koba degsib boleq na marqab di Qotei na niŋgi oqas. Qotei a Yesus subq na olo tigeltej anjam di nuŋgo are miligiq di siŋgilatosib sqab di Qotei na niŋgi oqas.

Rom 14:9

Kristus a dego moisiq olo ŋambile osiq subq na tigelej. Di kiyaqa? A tamo ŋambile unub qaji ti tamo moreŋeb qaji naŋgi ti naŋgo Tamo Koba sqajqa deqa.

1 Korin 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. O was qu, aqo gago was Sostenes wo anjam endi neŋgreŋyosim niŋgi qa qariŋyonum.

2 Korin 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum.

Galesia 1:15

Ariya nami e ŋambabosaisonamqa Qotei na e giltbosiqa a e qa are boleiyosiq metbej.

Galesia 1:17

E Jerusalem gilosai dego. Yesus aqa anjam maro tamo Qotei na nami giltnjrej qaji naŋgi Jerusalem di soqneb bati deqa e naŋgi unjrqajqa gilosai. E Arebia sawaq gilsim di soqnem. Sosim olo bunuqna e puluosim Damaskus qureq aiem.

Efesus 3:8

Qotei aqa tamo uŋgasari kalil naŋgi na e tulaŋ buŋbejunub. Ariya Qotei a e qa are boleiyosiq wau ebej. E na sawa bei bei qaji tamo naŋgi Kristus aqa anjam bole minjre minjre laqajqa deqa osiq e wau ebej. Anjam bole di aqa utru agiende. Kristus na iga laŋ qaji iŋgi bole bole egeqnu. Iŋgi bole bole di aqa utru iga na ubtsim marqa keresai.

2 Timoti 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e giltbosiq merbej, “Ni Yesus aqa anjam marsim laqne.” Onaqa e Qotei aqa areqalo di dauryosim deqa e Yesus aqa anjam marsim laqnum. Qotei a nami anjam endegsi marej, “E na tamo uŋgasari Kristus Yesus qa naŋgo areqalo siŋgilateqnub qaji naŋgi ŋambile enjrqai.” A degsi marej deqa e na aqa anjam di tamo uŋgasari naŋgi minjroqnsim laqnum.

Taitus 1:3

Ariya bati a nami atej qaji di brantonaqa a na tamo qudei naŋgi wau enjrsiqa minjrej, “Niŋgi ijo anjam marsib laqniye.” Kumbra dena Qotei na aqa segi anjam boleq atej. Qotei agi iga eleŋej qaji a na e dego merbonaqa e aqa wau di ojsim aqa anjam marsim laqnum.

Hibru 13:20

Gago Tamo Koba Yesus a gago Mandor Koba. A na kaja du du naŋgi geregere taqatnjreqnu. Aqa kaja du du agi iga. Aqa leŋ aiej dena a na Qotei aqa anjam bunuj gaigai sqas qaji di siŋgila-tej. Deqa Qotei agi iga are lawo egeqnu qaji a na Yesus subq na olo tigeltej.

1 Pita 1:21

Kristus a na niŋgi aqaryaiŋgej deqa niŋgi Qotei qa nuŋgo areqalo siŋgilatosib unub. Kristus agi moinaqa Qotei na olo subq na tigeltosiqa metonaq a laŋ qureq oqsiq dia ñam kobaquja ej. Utru deqa niŋgi Qotei qa nuŋgo areqalo siŋgilatoqnsib anjam a nami marej qaji di aqa damu brantqajqa deqa tariŋoqnsib unub.

Uli Anjam 1:18

E ŋambile gaigai sqajqa utru. Nami e moiem. Bini ni e nube. E olo ŋambile unum. E bati gaigai ŋambile sqai. E segi na moio ti moio qure ti taqatejunum.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 2:8

Yesus a na e degsi merbsiqa olo endegsi merbej, “Smerna qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E segi qujai namoq di unum. E segi qujai bunuq di sqai. Nami e moiem. Bini e olo ŋambile unum. E na anjam endi ni qa qariŋyonum.