Filipai 4:12 - Yesus Aqa Anjam Bole

¹² E iŋgi saiqoji sqai kio e iŋgi koba ti sqai kio di uŋgum, e are lawo na sqai. E lawo kumbra qalieonum deqa e iŋgi kere sqas kio e mambqas kio e iŋgi koba ti sqai kio e iŋgi qa truquoqnqai kio di uŋgum, e are lawo na sqai. Kumbra kie ijoq di brantqas di uŋgum, e are lawo na sqai.

Filipai 4:12 ပူးပေါင်းရင်းမြစ်များ

Matyu 11:29

Niŋgi e qa geregere qalieosib ijo anjam aqa sorgomq di soqniye. Di kiyaqa? E na tamo naŋgi lawo kumbra enjroqnsim ijo segi ñam aguq ateqnum. Deqa niŋgi e qa qalieabqa iŋgi bei na niŋgi gulube eŋgwasai. Niŋgi aqaratqab.

Matyu 13:52

Onaqa Yesus na olo minjrej, “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Anjam di dal anjam qalie tamo qudei naŋgi poinjreqnu. Poinjreqnu qaji naŋgi tal aqa abu bul unub. Deqa naŋgi naŋgo talq dena ñoro bunuj ti ñoro namij ti eleŋoqnsib oqeq ateqnub.”

2 Korin 10:1

Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Korin 10:10

Bole, tamo qudei naŋgi e qa endegsib yomueqnub, “Pol a anjam siŋgila na neŋgreŋyosiq iga qa qariŋyeqnu. Ariya a iga koba na sosim anjam mergoqnsim iga a unoqnem di a siŋgila saiqoji. Anjam palontqajqa wau di dego a qaliesai bolesai.”

2 Korin 11:27

E ŋes na ti jaqatiŋ na ti waukobaoqnem. Qolo gargekoba e waukobaoqnsim ŋeiosaioqnem. E mam ti laqnem. E ya qarboqnej. Bati gargekoba e iŋgi saiqoji soqnem. Bati gargekoba e yorbeqnaqa e ijo jejamu kabutqajqa gara saiqoji soqnem.

2 Korin 11:7

Niŋgi qalie, e Qotei aqa anjam bole niŋgi merŋgoqnem di e laŋa merŋgoqnem. E awai bei niŋgi yaiŋgosaioqnem. Ijo kumbra dena e ijo segi ñam aguq atoqnem. Yim nuŋgo ñam olo goge oqwajqa deqa. E kumbra di yoqnem di une e? Sai.

2 Korin 11:9

E nuŋgo ambleq di sosimqa e iŋgi iŋgi qa truquoqnsimqa e deqa tamo bei gulube yosaioqnem. Kristen was qudei Masedonia sawaq dena Korin qureq beleŋeb qaji naŋgi na e taqatbosib iŋgi iŋgi qa aqaryaiboqneb. E niŋgi gulube eŋgwajqa tulaŋ uratoqnem agi bini e degsim unum.