Filipai 3:3 - Yesus Aqa Anjam Bole

³ Ariya iga Israel tamo tiŋtiŋo unum. Agi iga Qotei aqa aŋgro unum. Iga muluŋ bole aio qaji. Deqa iga Qotei aqa Mondor aqa siŋgila na Qotei qa louoqnsim Kristus Yesus aqa ñam soqteqnum. Iga qalie, tamo naŋgo jejamu na kumbra dauryqab kumbra dena naŋgi aqaryainjrqa keresai bolesai.

Filipai 3:3 ပူးပေါင်းရင်းမြစ်များ

Rom 1:9

E ijo are miligi siŋgilatsim deqa e Qotei aqa wau ojoqnsim aqa Ŋiri aqa anjam bole palontosim laqnum. Qotei a segi qalie, bati gaigai e pailyqa oqnsim niŋgi qa are qaleqnum.

Rom 15:17

Aqo Kristus Yesus wo ombla waueqnum deqa e Qotei aqa wau endi yqajqa tulaŋ areboleboleibeqnu.

Rom 7:6

Bati deqa dal anjam na iga tonto talq waigobulonaq soqnem. Ariya bini iga Kristus ombla moiobulejunum deqa iga olo dal anjam aqa sorgomq di sosai. Iga bini waueqnum di iga dal anjam nami neŋgreŋyeb qaji di dauryqajqa wauosai. Qotei aqa Mondor na kumbra bunuj osorgeqnaqa iga kumbra di dauryqajqa waueqnum.

Rom 8:15

Qotei na niŋgi laŋa wau tamo sqajqa deqa aqa Mondor niŋgi eŋgosai. Niŋgi laŋa wau tamo sqab di niŋgi ulaqab. Qotei na niŋgi aqa segi aŋgro tiŋtiŋ sqajqa deqa aqa Mondor niŋgi eŋgej. Deqa aqa siŋgila na niŋgi endegsib Qotei meteqnub, “O ni gago Abu.”

Rom 9:6

Qotei na ijo was agi Jekop aqa leŋ naŋgi di eleŋosai deqa e gaigai naŋgi qa are gulubeibeqnu. Deqa Qotei aqa anjam nami marej qaji di uloŋej e? Sai. E qalie, tamo gargekoba naŋgi Israel naŋgo leŋ dena ŋambabeb ariya naŋgi kalil Israel tamo tiŋtiŋ sai.

2 Korin 11:18

Tamo gargekoba naŋgi mandam endeqa kumbra dauryoqnsib naŋgo segi ñam soqteqnub. Deqa e dego kumbra di dauryosiy ijo segi ñam yala soqtqai.

Galesia 5:25

Qotei aqa Mondor na iga ŋambile egej deqa a na gam osorgim iga aqa kumbra na walweloqnqom.

Galesia 6:16

Tamo kalil areqalo di ojsib dauryeqnub qaji naŋgi qa Qotei a tulaŋ are boleiyoqnsim sqas. Osim naŋgo are latetnjroqnqas. Tamo naŋgi di Qotei aqa tamo bole. Naŋgi Israel tamo tiŋtiŋ.

Efesus 6:18

Niŋgi Qotei aqa Mondor aqa siŋgila na gaigai Qotei pailyoqniye. Niŋgi aqar ataib. Niŋgi gaigai Qotei na niŋgi aqaryaiŋgwa maroqnsib siŋgila na pailyoqniye. Niŋgi pailyo urato uge deqa niŋgi geregere ŋam atoqnsib soqniye. Sosib niŋgi gaigai Qotei na aqa segi tamo uŋgasari naŋgi aqaryainjrqajqa deqa are qaloqnsib naŋgi qa pailyoqniye.

Filipai 1:1

E Pol. Aqo Timoti wo Kristus Yesus aqa wau tamo. Aqo aiyel na anjam endi neŋgreŋyosim niŋgi Kristus Yesus aqa segi tamo uŋgasari kalil Filipai qureq di unub qaji niŋgi ti nuŋgo gate ti nuŋgo wau tamo naŋgi qa ti qariŋyonum.

Filipai 3:12

Bole, e Kristus aqa kumbra di torei dauryekritosaiunum. Ariya e gaigai kumbra di ojqajqa siŋgila na waueqnum. Nami Kristus a na e osiqa giltbej deqa bini e kamba Kristus aqa kumbra di ojqajqa siŋgila na waueqnum.

Filipai 3:14

Tamo naŋgi gurguroqnsib bubuŋeqnub di naŋgi awai oqajqa. Dego kere e awai oqa maroqnsim siŋgila na urureqnum. Awai agiende. Kristus Yesus aqa wau na Qotei na e metbimqa e laŋ qureq oqsiy dia a ombla bole gaigai sqai.

Kolosi 2:11

Niŋgi Kristus taqyejunub deqa niŋgi muluŋ bole ejunub. Di jejamu qaji muluŋ sai. Niŋgi Kristus aqa kumbra na nuŋgo areqalo namij aqa kumbra kalil di urateb. Di muluŋ bole agide.

Jut 1:20

Ariya ijo was bole, nuŋgo areqalo Qotei qa siŋgilateqnub qaji di niŋgi siŋgila na ojesoqnibqa dena nuŋgo are tulaŋ siŋgilaqas. Osib niŋgi bati gaigai Mondor Bole aqa siŋgila na pailyoqniye.