Filipai 3:2 - Yesus Aqa Anjam Bole

² Niŋgi geregere ŋam atsib soqniye. Tamo qudei naŋgi bauŋ juwaŋ bul sosib kumbra uge uge yoqnsib laqnub. Tamo deqaji naŋgi Israel naŋgo kumbra dauryqajqa tulaŋ siŋgilaoqnsib deqa naŋgi na iga kalil muluŋ waigwajqa mareqnub. Naŋgo muluŋ di bolesai.

Filipai 3:2 ပူးပေါင်းရင်းမြစ်များ

Matyu 24:10

Bati deqa tamo uŋgasari gargekoba e qa naŋgo areqalo siŋgilato qaji naŋgi ijo ñam ulontosib naŋgi segi segi jeu sosibqa naŋgo segi was naŋgi ojeleŋoqnsib tamo uge naŋgo baŋq di atoqnqab.

Matyu 7:15

Osiqa Yesus a olo anjam endegsi minjrej, “Niŋgi geregere ŋam atsib soqniye. Tamo qudei naŋgi na bosib gisaŋosib merŋgwab, ‘Iga Qotei aqa medabu o qaji tamo bole.’ Di gisaŋ koba. Tamo naŋgi di kaja bul lawo na nuŋgoq boqnsib walawalaiŋgoqnsib anjam merŋgeqnub. Ariya naŋgo are miligiq di naŋgi tamo uge bauŋ juwaŋ bul. Deqa naŋgi na niŋgi ugeugeiŋgwajqa laqnub. Bauŋ juwaŋ naŋgi na kaja naŋgi ñumoqnsib uyeqnub dego kere.

Matyu 7:6

“Niŋgi iŋgi boledamu osib bauŋ naŋgi enjraib. Enjrqab di naŋgi iŋgi di uratsib bosib niŋgi uñiŋgwab. Niŋgi kolilei bole bole osib bel naŋgi enjraib. Enjrqab di naŋgi kolilei di mandamq di waiysib naŋgo siŋga na soseleŋqab.”

Rom 2:28

Tamo bei a laŋa babaŋ na Juda tamo sqas di a Juda tamo bolesai. Aqa jejamu segi osim muluŋ aiqas di aqa muluŋ bolesai.

2 Korin 11:13

Tamo naŋgi di Qotei na qariŋnjrosai. Naŋgi wau tamo bolesai. Naŋgi gisaŋoqnsib naŋgo segi kumbra bulyoqnsib tamo bole buleqnub. Yim tamo uŋgasari naŋgi unsib marqab, “Naŋgi Kristus aqa wau tamo bole.”

Galesia 5:13

O was qu, Kristus a na niŋgi eleŋej deqa dal anjam na niŋgi olo bunu taqatŋgwasai. Qotei a deqa are qalsiq niŋgi metŋgej. Ariya niŋgi endegsib are qalaib, “Iga dal anjam aqa sorgomq di sosai deqa uŋgum, iga olo gago areqalo namij dauryosim kumbra uge uge yoqnqom.” Niŋgi degsib are qalaib. Niŋgi nuŋgo Kristen was naŋgo kaŋgal tamo bul sosib naŋgi qalaqalainjroqniye.

Galesia 5:15

Ariya niŋgi segi segi ŋiriŋoqnsib qotoqnaib. Qotoqnqab di niŋgi koba na uneq aisib padalqab.

Galesia 5:6

Tamo a Kristus Yesus beteryesqas di a marqas, iga muluŋ aiqom di laŋa. Iga muluŋ aiqasai di dego laŋa. Ariya iga Kristus qa gago areqalo siŋgilatosim dena iga qalaqalaiyo kumbra dauryoqnqom di kumbra bole utru ti.

Filipai 3:19

Tamo naŋgi di naŋgo segi jejamu qa are qaloqnsib dauryeqnub. Naŋgo areqalo di naŋgo gisaŋ qotei bul ateqnub. Naŋgi bati gaigai mandam qa iŋgi iŋgi oqajqa are tulaŋ prugnjreqnu. Naŋgi jemai kumbra yqajqa tulaŋ areboleboleinjreqnu. Deqa mondoŋ tamo naŋgi di ŋamyuoq di torei padalqab.

Filipai 3:3

Ariya iga Israel tamo tiŋtiŋo unum. Agi iga Qotei aqa aŋgro unum. Iga muluŋ bole aio qaji. Deqa iga Qotei aqa Mondor aqa siŋgila na Qotei qa louoqnsim Kristus Yesus aqa ñam soqteqnum. Iga qalie, tamo naŋgo jejamu na kumbra dauryqab kumbra dena naŋgi aqaryainjrqa keresai bolesai.

1 Timoti 1:19

Gotraŋysimqa ino areqalo Yesus qa bole siŋgilat. Osim Qotei aqa ŋamgalaq di ni une saiqoji soqne. Tamo qudei naŋgi segi qalie, naŋgi une yeqnub. Ariya Qotei na naŋgo kumbra tingitetnjrqa laqnaq naŋgi olo urateqnub. Deqa naŋgi Yesus qa naŋgo areqalo siŋgilatqa asginjreqnaqa qobuŋ a sargumq di paraqas dego kere naŋgi areqalo uge ugeiysib laqnub. Kumbra dena naŋgi tulaŋ ugetnjrqas.

Taitus 1:16

Naŋgi segi mareqnub, “Iga Qotei qa qalie bole.” Di gisaŋ. Naŋgi kumbra uge uge yeqnub dena iga poigeqnu, naŋgi Qotei qoreiyeqnub. Deqa Qotei a na naŋgi uratnjreqnu. Naŋgi Qotei aqa anjam gotraŋyeqnub qaji tamo. Naŋgi kumbra bole bei dauryqa keresai.

2 Pita 2:22

Tamo naŋgi di bauŋ ti bel ti bul. Agi anjam bole bei endegsi unu, “Bauŋ naŋgo kumbra agiende. Naŋgi ŋiloqnsib olo puluoqnsib naŋgo ŋilo uyeqnub.” Anjam bei dego unu, “Bel naŋgo kumbra agiende. Naŋgi yaq di yaloqnsib olo boqnsib jagiq di briŋeqnub.”

Jut 1:4

Jeu tamo qudei naŋgi uliosib nuŋgo ambleq aieb. Qotei a nami naŋgi qa marej, “Mondoŋ e na naŋgo une qa peginjrsiy padaltnjrqai.” Es was qu, jeu tamo naŋgi di Qotei qoreiyeqnub. Qotei a iga qa are tulaŋ boleiyeqnu aqa anjam di jeu tamo naŋgi dena olo bulbulyoqnsib mareqnub, “Qotei a iga qa laŋa are boleiyeqnu. Deqa uŋgum, iga kumbra uge uge yoqnqom.” Degsib maroqnsib gago Gate Koba Yesus Kristus dego qoreiyeqnub.

Uli Anjam 2:9

Ni gulube ti jaqatiŋ ti ejunum di e qalie. Ni iŋgi tulaŋ saiqoji unum di dego e qalie. Di uŋgum. Ni laŋ qure qa iŋgi iŋgi koba eleŋejunum. E qalie, tamo qudei naŋgi na ni misiliŋmoqnsib anjam uge uge mermeqnub. Naŋgi segi qa mareqnub, “Iga Juda tamo.” Di gisaŋ. Naŋgi Satan aqa aŋgro.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.

Uli Anjam 3:9

Deqa ni que. E na maritqa Satan aqa wau tamo naŋgi bosib ino siŋgaq di siŋga pulutosib endegsib qalieqab, e ni tulaŋ qalaqalaimeqnum. Ni qalie, Satan aqa wau tamo naŋgi di mareqnub, “Iga Juda tamo.” Di gisaŋ. Naŋgi Juda tamo sai.