Filipai 3:11 - Yesus Aqa Anjam Bole

¹¹ Yim deqa mondoŋ e olo subq na tigelqai.

Filipai 3:11 ပူးပေါင်းရင်းမြစ်များ

Luk 14:14

Amqa ni tulaŋ areboleboleimqas. Di kiyaqa? Naŋgi na kamba ni iŋgi anaimqa keresai. Deqa mondoŋ tamo uŋgasari kumbra bole bole yeqnub qaji naŋgi subq na tigelo batiamqa Qotei na kamba awai tulaŋ boledamu ni emqas.”

Jon 11:24

Onaqa Marta na kamba minjej, “E qalie, diŋo batiamqa tamo uŋgasari kalil naŋgi subq na tigelabqa ijo jaja dego ombla tigelqab.”

Aposel 23:6

Ariya Juda tamo kokba awoeleŋesoqneb qaji naŋgo ambleq dia Sadyusi tamo ti Farisi tamo ti soqneb. Onaqa Pol a degsi qalieosiqa leleŋosiq minjrej, “O ijo was niŋgi quiye. E Farisi tamo. Ijo abu a dego Farisi tamo. Deqa e endegsi are qalonum. Tamo kalil moreŋo qaji naŋgi mondoŋ olo subq na tigelqab. Anjam deqa e ijo areqalo tulaŋ siŋgilatejunum. Anjam deqa qujai naŋgi na e ojsib agi nuŋgo ŋamdamuq di tigeltbonub.”

Aposel 26:7

Gago moma utru Jekop a na nami aqa aŋgro 12-pela naŋgi ŋambabtnjrej. Onaqa naŋgo leŋ kalil paraonabqa Qotei na naŋgi endegsi minjrej, ‘Mondoŋ e na niŋgi olo subq na tigeltŋgwai.’ Anjam deqa qujai iga bini gago areqalo siŋgilatejunum. Deqa qolo ti qanam ti iga Qotei qa siŋgila na louoqnsimqa aqa anjam geregere dauryeqnum. O Mandor Koba Agripa, mondoŋ iga olo subq na tigelqom. Anjam deqa qujai Juda tamo kokba naŋgi na ijo jejamuq di une qamsibqa e tigeltbonub.

Aposel 27:12

Deqa iga qobuŋ na gilem. Qunduŋ iga soqnem qaji di jagwa bati qa qobuŋ beterqajqa qunduŋ bolesai. Deqa tamo gargekoba naŋgi mareb, “Jagwa bati brantqa jojomqo. Deqa iga qunduŋ endi uratosim gilsim Finiks qunduŋq di jagwa bati qa beterosim sqom.” Finiks a Krit nuiq di unu. Dia jagwa bati qa beterqajqa qunduŋ bolequja.

Rom 11:14

Di kiyaqa? E na ijo was qu Israel naŋgo areqalo tigeltetnjritqa iŋgi bole bole Qotei a niŋgi eŋgeqnu qaji di naŋgi dego oqa maribqa Qotei na naŋgi qudei eleŋqas.

1 Korin 15:23

Ariya iga gago segi segi bati dauryosim subq na olo tigelosim ŋambile oqom. Namoqna Kristus a subq na tigelej. Ariya mondoŋ Kristus a olo laŋ qureq na bamqa bati deqa iga aqa segi tamo uŋgasari iga dego subq na olo tigelqom.

1 Korin 9:22

Tamo naŋgi siŋgila saiqoji unub qaji naŋgi dego e na oqajqa deqa e naŋgo kumbra dauryoqnsim siŋgila saiqoji sobulosim dena e na naŋgi are bulyetnjreqnam naŋgi Kristus aqaq beqnub. O was qu, e tamo kalil naŋgo sorgomq di sosim naŋgo kumbra dauryeqnum. Di kiyaqa? E na naŋgi qudei are bulyetnjroqnit naŋgi Kristus aqaq bqajqa deqa.

1 Korin 9:27

Osim dena e na ijo segi jejamu qaloqnsim siŋgilateqnum. Yim ijo jejamu a ijo areqalo dauryqajqa deqa. E na tamo uŋgasari naŋgi Yesus aqa anjam bole minjre minjre laqnum. Ariya bunuqna e segi awai bole osaiaim deqa e na ijo segi jejamu qaloqnsim siŋgilateqnum.

2 Korin 11:3

Ariya e amal uge Satan qa are qalsim deqa e niŋgi qa ulaonum. A gisaŋ ani tamo deqa a nami Iv gisaŋyonaqa a une atej. Une di niŋgi qa bosim nuŋgo areqalo ugetetŋgimqa niŋgi Kristus a segi qujai qalaqalaiyqajqa urataib deqa e niŋgi qa ulaonum.

1 Tesalonaika 3:5

Utru deqa e niŋgi qa tariŋqa keresai. Deqa e Timoti qariŋyonam niŋgi qa bej. E endegsi are qalem. Walawalaiyo tamo Satan a na niŋgi uneq waiŋgwoqa niŋgi na gago wau di laŋa ulontosib nuŋgo areqalo Yesus qa siŋgilatqa uratonub kio? E di qalieqajqa deqa Timoti qariŋyonam niŋgi qa bej.

2 Tesalonaika 2:3

Tamo qudei naŋgi gisaŋ anjam deqaji niŋgi merŋgibqa niŋgi qusib dauryaib. Naŋgi gisaŋ kumbra dego niŋgi osorŋgibqa niŋgi bole edegaib. Niŋgi quiye. Yesus a olo bqajqa bati laŋa brantqasai. Bati di brantqa laqnimqa kumbra qudei namoqna endegsi bqas. Tamo gargekoba naŋgi boqnsib naŋgi tulaŋ diqoqnsib Qotei qoreiyoqnsib sqab. Satan a na aqa tamo kobaquja dego qariŋyim bqas. Tamo di a Qotei aqa dal anjam gotraŋyo qaji tamo. A ŋamyuoq di padalougetqas.

2 Timoti 4:8

Tamo naŋgi gurgu-roqnsib bubuŋeqnub di naŋgi awai oqajqa. Ariya ijo awai bole agi Qotei a laŋ goge dia atej unu. E awai di oqajqa deqa tariŋoqnsim unum. Ijo awai agiende. Mondoŋ Tamo Koba Qotei na e tamo bole une saiqoji qa merbqas. Di ijo awai bole. Tamo Koba Qotei a kumbra tiŋtiŋ na tamo uŋgasari naŋgo kumbra qa naŋgi peginjreqnu. Ariya Qotei na naŋgi peginjrqajqa batiamqa a na awai bole di e ebqas. A e segi awai ebqasai. Tamo kalil Yesus a laŋ goge dena brantim unqajqa deqa areboleboleinjreqnaqa tariŋeqnub qaji naŋgi ti awai bole egwas.

Hibru 11:35

Uŋgasari qudei naŋgo aŋgro naŋgi moreŋeqnab Qotei na naŋgi olo subq na tigeltnjroqnej. Jeu tamo naŋgi na tamo qudei naŋgi tonto talq di breinjroqnsib jaqatiŋ koba enjroqneb. Osib minjroqneb, “Niŋgi Qotei qoreiyib iga niŋgi uratŋgim niŋgi tonto talq dena oqedqab.” Onaqa naŋgi saidosib minjroqneb, “Sai. Mondoŋ iga olo subq na tigelosim ŋambile gaigai sqom. Deqa uŋgum, bini iga jaqatiŋ oqnsim unum di kere.”

Uli Anjam 20:5

Di subq na tigelo namo qaji. Ariya tamo uŋgasari Yesus qa naŋgo areqalo siŋgilatosai qaji naŋgi bati deqa ŋambile oqasai. Naŋgi mati tariŋosib soqnibqa wausau 1,000 di koboamqa di naŋgi subq na tigelqab.