Filipai 2:1 - Yesus Aqa Anjam Bole

¹ Kristus a na nuŋgo are siŋgilatetŋgeqnu e? A na niŋgi qalaqalaiŋgoqnsiqa nuŋgo are latetŋgeqnu e? Qotei aqa Mondor a na niŋgi beterŋgejunu e? Niŋgi nuŋgo was naŋgi qa are boleiŋgeqnaqa naŋgi qa duleqnub e?

Filipai 2:1 ပူးပေါင်းရင်းမြစ်များ

Luk 2:25

Jerusalem dia tamo bei soqnej aqa ñam Simion. Aqa so tulaŋ boledamu. A Qotei aqa sorgomq di geregere sosiqa aqa dal anjam kalil dauryoqnej. Qotei aqa Mondor na a siŋgilatonaq soqnej. Qotei na Kristus qariŋyim bosim Israel tamo uŋgasari naŋgo are boletetnjrqajqa deqa Simion a are qalsiq tariŋosiq soqnej.

Jon 14:18

E niŋgi mandum aŋgro bul uratŋgwasai. E niŋgi qa olo bqai.

Jon 14:27

“E niŋgi uratŋgwa osiyqa nuŋgo are latetŋgwai. E segi are lawo na unum niŋgi degsib are lawo na sqajqa deqa e na nuŋgo are latetŋgwai. Mandam tamo uŋgasari naŋgi na degsib nuŋgo are latetŋgwa keresai. Deqa niŋgi are gulubeiŋgaiq. Osib ulaaib.

Jon 17:13

E inoq bqai. E tulaŋ areboleboleibeqnu dego kere ijo segi tamo uŋgasari naŋgi dego tulaŋ areboleboleinjrqajqa deqa e mandamq endia sosimqa anjam endi maronum.

Aposel 2:46

Naŋgi bati gaigai naŋgo areqalo qujaitosib sosibqa Juda naŋgo atra tal miligiq dia korooqnsib louoqneb. Naŋgo segi segi talq dia dego korooqnsibqa bem gentosib uyoqneb. Naŋgi kalil arebolebole ti lawo na sosibqa Qotei aqa ñam soqtoqnsib koba na iŋgi uyoqneb. Degyeqnabqa tamo kalil naŋgi Yesus aqa tamo uŋgasari naŋgo kumbra di unoqnsibqa naŋgi qa tulaŋ areboleboleinjroqnej. Bati gaigai tamo uŋgasari qudei naŋgi are bulyeqnab Tamo Koba Qotei na naŋgi eleŋeqnaqa naŋgi boqnsib tamo nami Yesus qa naŋgo areqalo siŋgilateb qaji naŋgo miligiq aioqnsib koba na soqneb.

Aposel 4:32

Bati deqa tamo uŋgasari Yesus qa naŋgo areqalo siŋgilateb qaji naŋgi kalil areqalo qujaitosib soqneb. Tamo bei na aqa iŋgi iŋgi saiaosiq aqa segi qa marosaioqnej. Naŋgo iŋgi iŋgi kalil di koba qaji degsib maroqnsib Yesus aqa tamo uŋgasari kalil naŋgi jeisib enjroqneb.

Rom 5:5

Ariya iga laŋa tariŋosaieqnum. Qotei na aqa Mondor Bole iga egej deqa Mondor dena aqa qalaqalaiyo kumbra gago are miligiq di atej unu.

Rom 8:26

Iga siŋgila saiqoji unum deqa Qotei aqa Mondor a dego iga aqaryaigeqnu. Iga iŋgi kie qa pailyqajqa di iga geregere qaliesai. Deqa Qotei aqa Mondor a segi na iga aqaryaigwa osiqa iga qa pailyeqnu. A akamoqnsiq boleq na marosaieqnu.

1 Korin 12:13

Di kiyaqa? Qotei aqa Mondor a segi qujai na iga kalil eleŋosiqa turtgej deqa iga kalil tamo qujaionum. Iga Juda tamo ti Grik tamo ti kaŋgal tamo ti tamo laŋaj ti kalil Qotei aqa Mondor qujai di osim a ya jumbum bul uyoqnsim dena iga siŋgila eqnum.

1 Korin 15:31

O was qu, e bole maronum, e bati gaigai moiqa laqnum. Niŋgi ti e ti gago Tamo Koba Kristus Yesus beteryejunum deqa e niŋgi qa tulaŋ areboleboleibeqnu. Deqa e anjam endi ulitosai. E niŋgi merŋgonum.

1 Korin 3:16

Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio?

2 Korin 2:14

Ariya e Qotei biŋiyeqnum. Di kiyaqa? A na gaigai iga aqaryaigeqnu deqa iga Kristus aqa siŋgila na qoto buŋyeqnum. Iga Qotei aqa wau ojeqnum dena tamo uŋgasari sawa sawa kalilq di unub qaji naŋgi Qotei qa bole poinjreqnu. Powo di sabaŋ quleq bolequja jagwa na osi gileqnu dego bul.

Galesia 4:6

Deqa bini niŋgi Qotei aqa aŋgro tiŋtiŋ unub. Agi a na aqa Ŋiri aqa Mondor qariŋyonaqa a gago are miligiq aiej. Aiej deqa iga Qotei metoqnsim endegsi minjeqnum, “O ni gago Abu.”

Galesia 5:22

Ariya Qotei aqa Mondor na iga kumbra bole endeqaji yqajqa are tigeltetgeqnu. Qalaqalaiyo kumbra dauryoqa, areboleboleiyoqa, lawo kumbra yoqa, was naŋgi aqaryainjroqnsim kumbra bole bole enjroqa, kumbra bole tiŋtiŋ dauryoqa,

Efesus 4:4

Iga kalil tamo qujaionum. Deqa iga Kristus aqa jejamu qujai. Iga kalil Mondor qujai ejunum. Deqa Qotei na niŋgi iŋgi qujai qa tariŋqa osiq metŋgej. Iŋgi qujai di agi laŋ qaji iŋgi bole bole a na mondoŋ iga egwas qaji.

Filipai 1:8

Qotei a segi qalie, Kristus Yesus a iga qa are tulaŋ boleiyeqnu aqa kumbra dena ijo are tigeltetbej deqa e niŋgi kalil qa bosiy nuŋgwajqa are koba qaleqnum.

Filipai 3:3

Ariya iga Israel tamo tiŋtiŋo unum. Agi iga Qotei aqa aŋgro unum. Iga muluŋ bole aio qaji. Deqa iga Qotei aqa Mondor aqa siŋgila na Qotei qa louoqnsim Kristus Yesus aqa ñam soqteqnum. Iga qalie, tamo naŋgo jejamu na kumbra dauryqab kumbra dena naŋgi aqaryainjrqa keresai bolesai.

Kolosi 2:2

E nuŋgo are siŋgilatetŋgosiy nuŋgo areqalo tigeltetŋgitqa niŋgi na Qotei aqa segi tamo uŋgasari naŋgi tulaŋ qalaqalainjroqnsib naŋgi ti are qujaitosib sqajqa deqa are qaloqnsim waukobaeqnum. Ijo areqalo agiende. Niŋgi areqalo bole ti sosib dena niŋgi nuŋgo areqalo Kristus qa bole siŋgilatqab. Osib dena niŋgi Qotei aqa uli anjam aqa utru geregere qalieqab. Kristus a segi uli anjam di aqa utru.

Kolosi 3:12

Qotei a niŋgi aqa segi tamo uŋgasari sqa marsiq giltŋgej deqa a na niŋgi tulaŋ qalaqalaiŋgeqnu. Deqa niŋgi kumbra endegyoqniye. Niŋgi nuŋgo Kristen was naŋgi qa duloqnsib kumbra bole bole enjroqniye. Osib niŋgi nuŋgo segi ñam tentoqnsib tamo naŋgi lawo na gereinjroqniye. Tamo qudei naŋgi na niŋgi une bei eŋgibqa niŋgi kamba olo naŋgi qa urur minjiŋ oqaiq.

Hibru 6:18

Deqa Qotei aqa kumbra aiyel unu. A na aqa anjam di Abraham minjej. Osiqa aqa anjam di siŋgilatej. Aqa kumbra aiyel di unu deqa a na aqa anjam di olo bulyqa keresai. A gisaŋqa keresai dego. Deqa iga tamo uŋgasari Qotei aqa areq gileqnum qaji iga aqa anjam deqa are qaloqnsim gago are siŋgilatoqnsim iŋgi bole bole Qotei a nami iga egwa marej qaji di oqajqa tariŋesqom.

1 Pita 1:2

Tulaŋ nami Qotei Abu a niŋgi qa qalieosiq deqa niŋgi aqa segi tamo uŋgasari sqa marsiqa niŋgi giltŋgej. Qotei aqa Mondor Bole a na niŋgi Qotei aqa segi kumbra boleq di atimqa niŋgi nuŋgo jejamu Qotei yekritosib Yesus Kristus aqa anjam geregere dauryosib sqajqa deqa osiqa niŋgi aqaryaiŋgej. Yim Yesus aqa leŋ na niŋgi yansŋgimqa niŋgi Qotei aqa ŋamgalaq di une saiqoji sqajqa deqa. Qotei a niŋgi qa are tulaŋ boleiyimqa niŋgi geregere lawo na soqniye.

1 Jon 3:24

Tamo bei a Qotei aqa dal anjam dauryqas di a Qotei beteryesqas. Qotei a kamba dego tamo di beteryesqas. Qotei na aqa Mondor Bole iga egej deqa iga qalieonum, Qotei na iga betergejunu.

1 Jon 4:12

Tamo bei a nami Qotei aqa ulatamu unosaioqnej. Ariya iga na Kristen tamo uŋgasari naŋgi qalaqalainjrqom di Qotei a gagoq di beteresoqnimqa aqa qalaqalaiyo kumbra di gago are miligiq di tulaŋ kobaoqnsim siŋgilaoqnqas.

1 Jon 4:16

Kumbra dena iga bole qalieonum, Qotei na iga tulaŋ qalaqalaigeqnu. Aqa qalaqalaiyo kumbra di gago are miligiq di unu. Deqa iga Qotei qa gago areqalo siŋgilateqnum. Qotei a segi qalaqalaiyo kumbra qa utru. Tamo a qalaqalaiyo kumbra dauryqas di a na Qotei beteryesqas. Yim Qotei na a kamba dego beteryesqas.