Filipai 1:6 - Yesus Aqa Anjam Bole

⁶ E endegsi qalieonum. Qotei a segi nuŋgo are miligiq di wau boledamu yeqnu. A nami wau di utru atej. Ariya bini a wau di yeqnu dena gilsi gilsim mondoŋ Kristus Yesus olo bqajqa batiamqa a na wau di kobotqas.

Filipai 1:6 ပူးပေါင်းရင်းမြစ်များ

Jon 6:29

Onaqa Yesus na kamba minjrej, “Qotei aqa wau agi merŋgwai. Niŋgi tamo Qotei na qariŋyej qaji a qa nuŋgo areqalo siŋgilatiye. Tamo di agi e segi.”

Aposel 11:18

Onaqa Juda tamo Pita ŋiriŋteb qaji naŋgi aqa anjam di qusibqa naŋgo ŋiriŋ koboej. Osib naŋgi Qotei aqa ñam soqtosib mareb, “Bole, Qotei a sawa bei bei qaji tamo naŋgi dego are bulyetnjreqnu. Deqa naŋgi dego ŋambile gaigai sqab.”

Aposel 16:14

Naŋgo ambleq di uŋa bei soqnej aqa ñam Lidia. A gara lent oqnsiq qariŋyeqnaqa tamo naŋgi na awaiyoqneb. Di aqa silali wau. Aqa qure utru Taiataira. A Qotei qa louoqnej qaji uŋa. A ya qalaq di sonaqa Pol na bosiq itej. Bati deqa Qotei na aqa areqalo waqtetonaqa a Pol aqa anjam qusiq poiyonaqa are bulyosiqa aqa areqalo Yesus qa siŋgilatej.

1 Korin 1:8

Yesus Kristus a na niŋgi siŋgilatŋgoqnqas deqa niŋgi siŋgila na tigelesosib gilsib gilsib diŋo bati itqab. Yimqa gago Tamo Koba Yesus Kristus a olo laŋ qureq na brantimqa bati deqa niŋgi Qotei aqa ŋamgalaq di une saiqoji sqab.

2 Korin 1:15

E niŋgi qa ijo areqalo siŋgilatosim endegsi maronum, niŋgi ijo kumbra kalil qa areboleboleiŋgwas. Utru deqa e nami anjam endegsi qosem, e mati niŋgi qa bosiy nuŋgsiy olo niŋgi uratŋgsiy Masedonia sawaq gilsiy dena puluosiy bosiy niŋgi olo nuŋgwai. Deqa bati aiyel e niŋgi nuŋgwajqa are qalem. Yim ijo kumbra dena Qotei na niŋgi gereiŋgoaiyeltŋgwajqa deqa. E niŋgi olo uratŋgsiy Judia sawaq aiqa laqnitqa niŋgi silali qa aqaryaibibqa e gamq dia iŋgi bei qa truquaim deqa are qalem.

2 Korin 2:3

Deqa e niŋgi qa olo bosiy are gulube oqa uratonum. Utru deqa e nami anjam bei di neŋgreŋyosim niŋgi qa qariŋyem. O was qu, e qalieonum, e iŋgi bei qa areboleboleibqas di niŋgi kalil dego e ti koba na areboleboleigwas.

2 Korin 7:16

E niŋgi qa qalieonum, niŋgi kumbra bole yoqnsib sqab. Deqa e niŋgi qa tulaŋ areboleboleibeqnu.

2 Korin 9:4

E qalieonum, niŋgi silali di koroiyosib atib sqas. Ariya e are qalem, Masedonia Kristen tamo qudei naŋgi e ombla na niŋgi qa bosim niŋgi nami silali di atosai di unsim iga ti niŋgi ti jemaigo uge.

Galesia 5:10

Ariya e niŋgi qa ijo areqalo siŋgilatosim endegsi maronum, Tamo Koba Qotei na niŋgi aqaryaiŋgimqa niŋgi ijo areqalo dauryosib areqalo uge uge di olo uratoqnqab. Tamo yai naŋgi na nuŋgo areqalo niñaqyetŋgwa waueqnub di e qaliesai. Ariya uŋgum, tamo naŋgi di naŋgo une deqa awai ugedamu oqab.

Efesus 4:12

Iga Qotei aqa segi tamo uŋgasari unum deqa Kristus a na iga aqaryaigimqa iga aqa wau geregere ojqajqa deqa are qalsiq wau segi segi egeqnu. Kristus aqa segi tamo uŋgasari naŋgi aqa jejamu qujai unub deqa iga naŋgi qa wauetnjroqnqom. Yimqa gago wau dena naŋgi siŋgila oqnsib so bole sqab.

Filipai 1:10

O was qu, niŋgi kumbra kalil geregere pegiyosib kumbra tulaŋ boledamu dauryqajqa deqa e niŋgi qa pailyeqnum. Yimqa niŋgi kumbra bole bole yoqnsib une saiqoji soqnib diŋo bati bqas. Diŋo bati deqa Kristus a olo bosim tamo uŋgasari naŋgo une qa naŋgi peginjrqas.

Filipai 1:29

Niŋgi quiye. Qotei na niŋgi giltŋgej deqa niŋgi Kristus aqa wau ojeqnub. Niŋgi a qa nuŋgo areqalo siŋgilatqajqa deqa segi niŋgi giltŋgosai. Niŋgi aqa ñam qa jaqatiŋ oqajqa deqa ti niŋgi giltŋgej.

Filipai 2:12

Ariya was qu, e qalieonum, niŋgi gaigai ijo anjam dauryeqnub. Ariya bini niŋgi olo siŋgila na dauryoqniye. E niŋgi koba na sqai bati deqa segi sai. Bini e isaq endi unum deqa niŋgi ijo anjam dauryqa urataib. Niŋgi ijo anjam olo siŋgila na dauryoqniye. Qotei na niŋgi padalo sawaq dena eleŋej deqa niŋgi ulaosib siŋgila na wauoqniye.

Filipai 2:13

Iga qalie, Qotei a nuŋgo are miligiq di waueqnu. A segi na nuŋgo are tigeltetŋgeqnaqa niŋgi kumbra a tulaŋ areareteqnu qaji di yeqnub. A na niŋgi siŋgilatŋgeqnu deqa niŋgi kumbra di yeqnub.

Kolosi 2:12

Niŋgi yanso eb bati deqa niŋgi Kristus beteryosib a ti moieb. Onaqa Qotei na niŋgi Kristus ombla subq atej. Ariya Qotei na Kristus olo subq na tigeltej aqa kumbra di niŋgi nuŋgo areqaloq di siŋgilateb deqa a na niŋgi dego Kristus ombla subq na tigeltŋgej unub.

1 Tesalonaika 1:3

Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum.

2 Tesalonaika 1:11

Deqa was qu, iga bati gaigai niŋgi qa osim gago Qotei endegsi pailyeqnum, “O Abu, ni na Tesalonaika Kristen naŋgi aqaryainjroqnimqa kumbra kalil ni nami naŋgi dauryqa metnjrem qaji di naŋgi dauryoqnibqa ni unsim minjrqam, ‘Niŋgi keretonub.’ O Abu, ni na naŋgi siŋgilatnjrimqa kumbra bole kalil naŋgi yqajqa arearetnjreqnu qaji di naŋgi yoqnqab. Osib Yesus qa naŋgo areqalo siŋgilatoqnsib aqa wau geregere ojqab.” O was qu, iga degsim niŋgi qa Qotei pailyeqnum.

2 Tesalonaika 3:4

Iga qalie, anjam kalil iga nami niŋgi merŋgoqnem qaji di niŋgi dauryoqnsib unub. Agi bunuqna dego niŋgi dauryoqnsib sqab. Tamo Koba Yesus na iga degsi mergonaq iga qalieem.

Filemon 1:21

E qalieonum. Ni ijo anjam endi sisiyosim dauryosim Onesimus gereiyqam. Osim ijo anjam endi buŋyosim olo Onesimus kumbra tulaŋ boledamu yqam. Utru deqa e anjam endi neŋgreŋyosim ni qa qariŋyonum.

Hibru 10:35

Deqa kumbra bole niŋgi nami yoqneb qaji deqa olo are qaloqniye. Osib nuŋgo areqalo Yesus qa siŋgilateqnub qaji di siŋgila na ojesoqniye. Niŋgi olo urataib. Niŋgi uratqasai di mondoŋ niŋgi awai tulaŋ boledamu oqab.

Hibru 12:2

Osim iga Yesus koqyoqnqom. Iga Qotei qa gago areqalo siŋgilateqnum kumbra di agi Yesus a segi utru. Bunuqna a na gago kumbra di torei keretqas. Yesus a qalie, a Qotei aqa anjam geregere dauryosim ŋamburbasq di moiqas di bunuqna a olo ŋambile bole osim tulaŋ areboleboleiyqas. A deqa are qalsiq siŋgilaosiq ŋamburbasq di moiej. A nami qalieej, a ŋamburbasq di moiqas di tamo uŋgasari naŋgi a qa maroqnqab, “A tamo tulaŋ uge deqa a moiqo.” Yim a jemakobaiyqas. Ariya Yesus a jemai deqa are qalosai. A Qotei aqa anjam dauryosiq moiej. Ariya bini a olo laŋ qureq dia Qotei aqa awo jaram baŋ woq di awejunu.

1 Pita 5:10

Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab.

2 Pita 3:10

Ariya diŋo bati brantimqa Tamo Koba Yesus a bajiŋ tamo bul urur boqujatqas. Bamqa bati deqa laŋ a poŋosim koboqas. Iŋgi iŋgi kalil dego ŋamyuo na tulaŋ kaŋkaŋam yusib koboqab. Deqa mandam ti aqa iŋgi iŋgi ti kalil olo bunu sqasai.