Filipai 1:20 - Yesus Aqa Anjam Bole

²⁰ Deqa ijo areqalo kobaquja agiende. E kumbra uge bei yqasai. Yim deqa e jemaibqasai. E endegsi are qalonum. Bini bati endeqa ti bunuq qa ti e siŋgila na tigeloqnsiy kumbra bole segi dauryoqnqai. Agi e kumbra degyeqnum. Deqa e moiqai kio e sqai kio di uŋgum. E ijo kumbra kalil qa Kristus aqa ñam soqtoqnqai.

Filipai 1:20 ပူးပေါင်းရင်းမြစ်များ

Jon 21:19

Pita aqa moiqajqa gam di Yesus na ubtetqa osiqa deqa degsi minjej. Pita a gam kie na moisim dena Qotei aqa ñam soqtqas di Pita a qalieqajqa deqa Yesus na degsi minjej. Osiqa Pita minjej, “Ni e daurbe.”

Aposel 20:24

“Di uŋgum. E ijo segi jejamu qa are qalosaieqnum. Wau kalil Tamo Koba Yesus na ebej qaji di yosiy kobotqajqa are qaleqnum. Wau di endegsi unu. E siŋgila na Yesus aqa anjam bole tamo uŋgasari naŋgi minjre minjre laqnqai. Anjam bole di aqa damu agiende. Qotei a tamo uŋgasari naŋgi qa are boleiyoqnsiqa naŋgi eleŋeqnu.

Aposel 21:13

Onaqa Pol na iga mergej, “Niŋgi kiyaqa akamoqnsib are gulubetetbeqnub? E Tamo Koba Yesus aqa ñam qa tonto talq waibqab di kere. Aqa ñam qa e lubib moiqai di dego kere. E gulube di uratqasai. E itqai.”

Aposel 4:31

Naŋgi degsib Qotei pailyosib koboonaqa tal naŋgi koroesoqneb qaji di reŋgiŋyej. Onaqa Qotei aqa Mondor aisiqa naŋgi siŋgila enjrnaqa naŋgi walwelosib siŋgila na Qotei aqa anjam mare mare laqneb. Naŋgi ulaosai.

Rom 12:1

Ariya was qu, Qotei a iga qa are tulaŋ boleiyosiq eleŋej deqa e niŋgi siŋgila na endegsi merŋgwai. Niŋgi nuŋgo segi jejamu osib Qotei atraiyiye. Osib deqa niŋgi ŋambile sosib Qotei aqa segi tamo uŋgasari tiŋtiŋ sqab. Deqa niŋgi kumbra Qotei a tulaŋ areareteqnu qaji di yoqniye. Niŋgi degyoqnqab di niŋgi Qotei aqa kumbra na bole louoqnqab.

Rom 5:5

Ariya iga laŋa tariŋosaieqnum. Qotei na aqa Mondor Bole iga egej deqa Mondor dena aqa qalaqalaiyo kumbra gago are miligiq di atej unu.

Rom 6:13

Une na nuŋgo siŋga ti baŋ ti taqatqa laqnimqa niŋgi na olo saidyiye. Yim niŋgi kumbra uge uge yoqnqasai. Niŋgi subq na olo tigelobulosib ŋambile unub deqa niŋgi nuŋgo segi jejamu osib Qotei yiye. Yosib nuŋgo siŋga ti baŋ ti nuŋgo jejamu ti kalil Qotei aqa baŋq di atibqa a segi na taqatqas. Yim dena niŋgi kumbra bole tiŋtiŋ yoqnqab.

Rom 6:19

O was qu, e mandam tamo naŋgo kumbra qa niŋgi yawo anjam merŋgeqnum. Di kiyaqa? Niŋgi ijo anjam endi geregere poiŋgosai deqa. Nami niŋgi na nuŋgo siŋga ti baŋ ti nuŋgo jejamu ti kalil naŋgi odnjreqnabqa naŋgi kumbra jiga ti kumbra uge ti naŋgo wau tamo sosib niŋgi kumbra ugeq di breiŋgoqneb. Ariya bini niŋgi na nuŋgo siŋga ti baŋ ti nuŋgo jejamu ti kalil di olo minjribqa naŋgi kumbra bole tiŋtiŋ aqa wau tamo sqab. Yim deqa niŋgi Qotei aqa segi tamo uŋgasari boledamu sosib aqa kumbra bole dauryoqnqab.

Rom 8:19

Di kiyaqa? Qotei a nami aqa aŋgro naŋgi boleq atqajqa bati atej. Iŋgi iŋgi kalil Qotei a nami ateleŋej qaji naŋgi bati di unqajqa deqa tariŋoqnsib unub. Iŋgi iŋgi naŋgi di taroqnsib ŋam atoqnsib endegsib nenemeqnub, “Bati gembu bati di brantqas?”

Rom 9:33

Agi Qotei aqa anjam bei nami endegsib neŋgreŋyeb unu, “Niŋgi quiye. E na tal aqa ai utru bei giltem unu. Deqa tal aqa ai utru di tamo naŋgi quraqyosib maŋgalqab. E na tal aqa ai utru di olo osiy tal siŋgilatqajqa deqa Saion qureq di tigeltit sqas. Tamo naŋgi tal aqa ai utru deqa naŋgo areqalo siŋgilatqab di naŋgi jemainjrqasai.”

1 Korin 15:31

O was qu, e bole maronum, e bati gaigai moiqa laqnum. Niŋgi ti e ti gago Tamo Koba Kristus Yesus beteryejunum deqa e niŋgi qa tulaŋ areboleboleibeqnu. Deqa e anjam endi ulitosai. E niŋgi merŋgonum.

1 Korin 6:20

Qotei a awai kobaquja na niŋgi awaiŋgej. Deqa kumbra kalil niŋgi yeqnub qaji di niŋgi Qotei aqa ñam soqtqa maroqnsib yoqniye.

1 Korin 7:34

Deqa naŋgi areqalo aiye aiyeltoqnsib unub. Duŋgeŋge naŋgi ti uŋa naŋgi tamo osai qaji naŋgi ti dego Tamo Koba Yesus aqa kumbra dauryqajqa are qaloqnsib unub. Deqa naŋgi Qotei aqa kumbra boleq di sosib naŋgo segi jejamu ti qunuŋ ti torei Qotei yekriteqnub. Ariya uŋa naŋgi tamo ti unub qaji naŋgi mandam qa iŋgi iŋgi qa are qaloqnsib unub. Deqa kumbra naŋgo tamo a areareteqnu qaji di naŋgi yoqnsib unub.

2 Korin 10:8

Tamo Koba Yesus a na iga siŋgila egej deqa iga aqa wau ojeqnum. Di kiyaqa? Iga na nuŋgo areqalo Yesus qa siŋgilateqnub qaji di olo siŋgilatetŋgwajqa deqa. Iga niŋgi ugeugeiŋgwajqa deqa sai. Deqa e gago wau endeqa areboleboleibim gago ñam yala soqtqai di e deqa jemaibqasai.

2 Korin 3:12

Riaŋ di bosim gaigai gagoq di sqajqa deqa tariŋoqnsim unum. Deqa iga ulaosaieqnum. Iga riaŋ deqa mare mare laqnum.

2 Korin 4:10

Gago jejamuq dia tamo uŋgasari naŋgi gaigai Yesus aqa moio uneqnub. Deqa Yesus aqa ŋambile dego gago jejamuq di branteqnaq naŋgi uneqnub.

2 Korin 5:15

Iga ŋambile unum deqa iga gago segi jejamu qa are qalsim walwelqasai. Utru deqa a iga qa moiej. A gago sawa osiq moisiq olo subq na tigelej deqa iga a qa are qalsim walweloqnqom.

2 Korin 7:14

Nuŋgo kumbra boledamu deqa e nami Taitus saiyosim nuŋgo ñam soqtem. E ijo anjam deqa jemaibosai. Gago anjam kalil nami iga niŋgi merŋgoqnem qaji di bole. Dego kere bini Taitus a qalieqo, anjam iga niŋgi qa saiyosim minjem qaji di dego bole.

2 Korin 7:4

E qalieonum, niŋgi tamo bole deqa e anjam bei ulitqasai. E anjam kalil boleq na merŋgwai. E niŋgi qa tulaŋ areboleboleibqo. Ijo are miligi niŋgi qa tulaŋ laejunu. Iga gulube koba eqnum di uŋgum, e niŋgi qa are qaloqnsim dena ijo are miligiq di e tulaŋ areboleboleibqo.

Filipai 1:14

E tonto talq endia unum deqa Kristen was gargekoba naŋgi kamba siŋgilaoqnsib Tamo Koba Qotei qa naŋgo areqalo siŋgilateqnub. Osib deqa naŋgi ulaosaieqnub. Naŋgi Qotei aqa anjam siŋgila na mareqnub.

Filipai 2:17

O was qu, nuŋgo areqalo Yesus qa siŋgilateqnub qaji di niŋgi Qotei atraiyobuleqnub. Jeu tamo naŋgi na e lubib ijo leŋ wain bul aiqas de ti nuŋgo areqalo de ti turtosiy dena Qotei atraiyobulqai. E moiqai di uŋgum. E deqa tulaŋ areboleboleibqas. Osiy niŋgi ti koba na areboleboleigim sqom.

Kolosi 1:24

E niŋgi aqaryaiŋgwa osim deqa e jaqatiŋ koba eqnum. E ijo jaqatiŋ deqa tulaŋ areboleboleibeqnu. E na Kristus aqa segi tamo uŋgasari naŋgi aqaryainjreqnum. Naŋgi aqa segi jejamu bul. A naŋgo gate. A na naŋgi aqaryainjrqa marsiq jaqatiŋ koba ej. Aqa jaqatiŋ di koboosaiunu. Deqa e dego tamo uŋgasari naŋgi qa osimqa ijo segi jejamuq di jaqatiŋ koba eqnum. Ijo kumbra dena e na Kristus aqa jaqatiŋ dauryosim kereteqnum.

1 Tesalonaika 5:23

Qotei a are lawo qa utru. A na nuŋgo areqalo tigeltetŋgimqa niŋgi nuŋgo segi jejamu osib a yekritosib aqa segi kumbra boleq di sosib dauryoqniye. Qotei a na nuŋgo mondor ti nuŋgo qunuŋ ti nuŋgo jejamu ti kalil taqatesoqnimqa niŋgi so bole sqab. Sosib mondoŋ gago Tamo Koba Yesus Kristus a olo bqas bati deqa niŋgi torei une saiqoji sqab.

1 Pita 4:16

Ariya tamo bei a Kristen tamo unu deqa a jaqatiŋ oqas a deqa jemaiyaiq. A ñam Kristen ojejunu deqa a tulaŋ areboleboleiyim Qotei aqa ñam soqtoqneme.

1 Jon 2:28

Od, ijo aŋgro, niŋgi Kristus beteryosib soqniye. Yim deqa mondoŋ a olo brantimqa iga jemaigwasai. Iga are siŋgilatosim aqa ulatamuq di tigelesqom.