Filipai 1:10 - Yesus Aqa Anjam Bole

¹⁰ O was qu, niŋgi kumbra kalil geregere pegiyosib kumbra tulaŋ boledamu dauryqajqa deqa e niŋgi qa pailyeqnum. Yimqa niŋgi kumbra bole bole yoqnsib une saiqoji soqnib diŋo bati bqas. Diŋo bati deqa Kristus a olo bosim tamo uŋgasari naŋgo une qa naŋgi peginjrqas.

Filipai 1:10 ပူးပေါင်းရင်းမြစ်များ

Matyu 16:23

Onaqa Yesus a bulosiqa Pita koqyosiqa ŋiriŋtosiq minjej, “Ni Satan bul. Deqa ni ijo qoreq gile. Ni ijo gam getentetbaim. Ni Qotei aqa areqalo dauryosai. Ni mandam tamo naŋgo areqalo dauryonum. Dauryosim agi ni na anjam di merbonum.”

Matyu 26:33

Onaqa Pita na minjej, “Aŋgro kalil naŋgi ino ñam ulontosib jaraiqab e segi ino ñam ulontqasai.”

Jon 1:47

Onaqa Nataniel a walwelosiq Yesus aqa areq beqnaqa unsiqa a qa marej, “Niŋgi uniye. Tamo di a Israel tamo bolequja. A gisaŋ anjam marosaieqnu.”

Jon 3:20

Tamo kalil kumbra uge uge yeqnub qaji naŋgi puloŋ jeuteqnub. Naŋgo kumbra uge uge di puloŋ na boleq ataim deqa naŋgi puloŋ aqaq bosaieqnub.

Aposel 24:16

E subq na tigelo bati qa tariŋeqnum deqa e bati gaigai ijo segi so geregere taqatoqnsimqa Qotei aqa ŋamdamuq dia, tamo uŋgasari kalil naŋgo ŋamdamuq dia kumbra bole bole yoqnsim laqnum.

Rom 12:2

Niŋgi mandam tamo naŋgo kumbra dauryosib walwelaib. Qotei na areqalo bunuj eŋgoqnimqa niŋgi kumbra bunuj dauryoqniye. Osib kumbra dena niŋgi Qotei aqa areqalo geregere qalieqab. Agi niŋgi kumbra bole ti kumbra Qotei a tulaŋ areareteqnu qaji de ti kumbra tulaŋ tiŋtiŋo de ti geregere qalieqab.

Rom 12:9

O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye.

Rom 16:17

O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye.

Rom 2:18

Bole, niŋgi Qotei aqa areqalo qalie bole. A na aqa dal anjam niŋgi osorŋgej deqa niŋgi kumbra tiŋtiŋ dauryqajqa tulaŋ arearetŋgeqnu.

Rom 7:16

Ariya kumbra e yeqnum qaji di e yqajqa arearetbosaieqnu. Ijo kumbra dena e endegsi osorbeqnu, e are qalonum, Qotei aqa dal anjam a bole.

Rom 7:22

Bole, ijo areqaloq di e Qotei aqa dal anjam tulaŋ arearetbeqnu.

Rom 8:7

Tamo naŋgi areqalo namij dauryoqnqab di naŋgi Qotei ti jeu sqab. Di kiyaqa? Naŋgi Qotei aqa dal anjam aqa sorgomq di sosai deqa. Naŋgi dal anjam dauryqa keresai bolesai.

1 Korin 1:8

Yesus Kristus a na niŋgi siŋgilatŋgoqnqas deqa niŋgi siŋgila na tigelesosib gilsib gilsib diŋo bati itqab. Yimqa gago Tamo Koba Yesus Kristus a olo laŋ qureq na brantimqa bati deqa niŋgi Qotei aqa ŋamgalaq di une saiqoji sqab.

1 Korin 10:32

Niŋgi na Juda tamo ti Grik tamo ti Qotei aqa segi tamo uŋgasari naŋgi ti kumbra uge bei enjraib. Yim naŋgi dena ululoŋosib uneq aio uge.

1 Korin 8:13

Deqa e damu bei uyitqa dena ijo was a uneq aiqas di e olo damu uyqasai. Ijo was a uloŋosim uneq aiaim deqa e damu uratqai.

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 6:3

Tamo naŋgi gago wau endi uge qa maraib deqa iga na naŋgi kumbra uge bei enjrosaieqnum. Yim naŋgi uloŋosib uneq aio uge.

2 Korin 8:8

E na niŋgi wau di yqajqa siŋgila na merŋgosai. Kristen tamo uŋgasari qudei naŋgi wau di yqajqa tulaŋ siŋgilaeqnub. Naŋgo kumbra deqa agi e na niŋgi saiŋgonum. Yim niŋgi qusib niŋgi dego qalaqalaiyo kumbra dauryqajqa tulaŋ siŋgilaqab kio di e qalieqajqa deqa niŋgi saiŋgonum.

Galesia 5:11

O was qu, e tamo naŋgi muluŋ aiqajqa minjroqnem qamu kiyaqa jeu tamo naŋgi na e ugeugeibeqnub? E tamo naŋgi muluŋ aiqajqa minjroqnem qamu jeu tamo naŋgi na ŋamburbas qa anjam jeutosai qamu.

Efesus 4:15

Deqa iga naŋgo anjam di quetnjrqasai. Iga qalaqalaiyo kumbra dauryoqnsim anjam bole segi maroqnqom. Osim dena iga kalil boleoqnsim siŋgilaoqnsim gago Gate Koba Kristus beteryesqom.

Efesus 5:10

O was qu, kumbra kalil Tamo Koba Qotei a tulaŋ areareteqnu qaji di niŋgi qalieqa wauoqniye.

Efesus 5:27

Kristus aqa areqalo agiende. A na aqa segi tamo uŋgasari naŋgi yansnjrimqa naŋgi aqa ŋamgalaq di tulaŋ boledamu soqnib jiga bei naŋgoq di sqasai. Naŋgi aqa segi kumbra boleq di sosib une saiqoji sqab. Utru deqa a naŋgi qa moiej.

Efesus 6:24

Tamo kalil gago Tamo Koba Yesus Kristus qalaqalaiyqa uratosaieqnub qaji naŋgi qa Qotei a are boleiyeme.

Filipai 1:16

Tamo naŋgi di naŋgi qalie, e tonto talq endi unum di Kristus aqa anjam bole siŋgilatqajqa deqa. Tamo naŋgi di degsib qalieosib deqa naŋgi na e tulaŋ qalaqalaiboqnsib Kristus aqa anjam mare mare laqnub.

Filipai 1:6

E endegsi qalieonum. Qotei a segi nuŋgo are miligiq di wau boledamu yeqnu. A nami wau di utru atej. Ariya bini a wau di yeqnu dena gilsi gilsim mondoŋ Kristus Yesus olo bqajqa batiamqa a na wau di kobotqas.

1 Tesalonaika 3:13

Yimqa kumbra dena Qotei a nuŋgo are miligi siŋgilatetŋgimqa mondoŋ gago Tamo Koba Yesus a na Qotei aqa segi tamo uŋgasari kalil naŋgi laŋ qureq dena joqsim bosimqa niŋgi Qotei aqa segi kumbra bole dauryeqnub di a bosim unqas. Bati deqa niŋgi tamo uŋgasari tulaŋ boledamu tiŋtiŋ sosib gago Abu Qotei aqa ŋamgalaq di une saiqoji sqab. Bole.

1 Tesalonaika 5:21

Anjam kalil niŋgi queqnub qaji di niŋgi geregere quoqnsib tenemtoqnsib pegiyoqniye. Osib kumbra kalil dego pegiyoqnsib kumbra bole segi siŋgilatosib ojesoqniye.

1 Tesalonaika 5:23

Qotei a are lawo qa utru. A na nuŋgo areqalo tigeltetŋgimqa niŋgi nuŋgo segi jejamu osib a yekritosib aqa segi kumbra boleq di sosib dauryoqniye. Qotei a na nuŋgo mondor ti nuŋgo qunuŋ ti nuŋgo jejamu ti kalil taqatesoqnimqa niŋgi so bole sqab. Sosib mondoŋ gago Tamo Koba Yesus Kristus a olo bqas bati deqa niŋgi torei une saiqoji sqab.

1 Jon 4:1

O ijo kadoi bole, tamo gargekoba naŋgi mandamq endia laqnsibqa gisaŋ anjam endegsib mareqnub, “Qotei aqa Mondor na gago medabu siŋgilatetgeqnaqa iga anjam mareqnum.” Tamo gargekoba naŋgi anjam degsib mareqnub di gisaŋ. Deqa niŋgi mati mondor kalil naŋgi peginjrsib naŋgi Qotei aqaq dena beb kio sai kio di niŋgi qalieqab. Qalieosib naŋgo anjam di qusib nuŋgo areqaloq di siŋgilataib.

Uli Anjam 2:2

Ino kumbra ti ino wau ti di e qalieonum. E qalie, ni siŋgila na tigeloqnsimqa tamo uge naŋgi qa tulaŋ asgimeqnu. Tamo naŋgi di endegsib mermeqnub, “Iga dego Qotei aqa anjam marqajqa deqa qariŋgwo.” Di gisaŋ. Qotei na naŋgi qariŋnjrosai. Ni naŋgo anjam di tenemtosim ni qalieonum, naŋgi gisaŋ tamo. Ni keretsim qalieonum.