Efesus 6:8 - Yesus Aqa Anjam Bole

⁸ Niŋgi are qaliye. Tamo bei a wau bole yimqa di Tamo Koba Yesus a na kamba awai tulaŋ boledamu yqas. A tamo laŋaj kio a kaŋgal tamo kio di uŋgum a wau bole yimqa di Tamo Koba Yesus a na kamba awai tulaŋ boledamu yqas.

Efesus 6:8 ပူးပေါင်းရင်းမြစ်များ

Matyu 16:27

E Tamo Aŋgro. Mondoŋ e ijo Abu aqa riaŋ ti sosiy aqa laŋ aŋgro naŋgi joqsiy bosiy tamo uŋgasari kalil naŋgo kumbra segi segi qa peginjrsiy naŋgo segi segi awai keretsiy enjrqai.

Matyu 20:7

Onaqa naŋgi na minjeb, ‘Tamo bei na iga wau egosai deqa iga laŋa tigelejunum.’ Onaqa wau lanja na minjrej, ‘Niŋgi dego gilsib ijo iŋgi wauq di wauoiye.’

Matyu 5:12

Od, nuŋgo are tulaŋ boleboleiŋgim soqniye. Di kiyaqa? Nuŋgo awai bole laŋ goge di unu deqa. Nami jeu tamo naŋgi na Qotei aqa medabu o qaji tamo naŋgi dego degsib ugeugeinjroqneb.”

Matyu 6:1

Osiqa Yesus a olo anjam endegsi minjrej, “Tamo bei a marqas, ‘E tamo uŋgasari naŋgi gisaŋnjrsiy naŋgo ŋamgalaq dia kumbra bole bole laŋa yoqnit naŋgi e nubsib ijo ñam soqtetboqnqab.’ Ariya niŋgi degyaib. Niŋgi degyqab di nuŋgo Abu laŋ qureq di unu qaji a niŋgi awai bole eŋgwasai.

Matyu 6:4

Di yawo anjam. Aqa damu endegsi unu. Ni uli na tamo uŋgasari iŋgi iŋgi saiqoji unub qaji naŋgi aqaryainjrimqa tamo kalil naŋgi qalieqasai. Ni kumbra bole di uli na yeqnam ino Abu a segi na uneqnu. Deqa a segi na ni awai bole emqas.”

Luk 14:14

Amqa ni tulaŋ areboleboleimqas. Di kiyaqa? Naŋgi na kamba ni iŋgi anaimqa keresai. Deqa mondoŋ tamo uŋgasari kumbra bole bole yeqnub qaji naŋgi subq na tigelo batiamqa Qotei na kamba awai tulaŋ boledamu ni emqas.”

Luk 6:35

Deqa niŋgi ijo anjam endi quiye. Tamo qudei naŋgi na niŋgi jeutŋgoqnibqa niŋgi na kamba naŋgi jeutnjraib. Niŋgi naŋgi qa olo boleoqnsib naŋgi gereinjroqniye. Osib iŋgi bole bole enjroqnsib naŋgi na kamba olo eŋgwajqa minjroqnaib. Niŋgi kumbra degyqab di niŋgi Qotei laŋ goge di unu qaji aqa aŋgro bole sqab. Sosibqa awai tulaŋ boledamu oqab. Niŋgi qalie, tamo qudei naŋgi Qotei biŋiyosaieqnub. Tamo qudei naŋgi kumbra uge uge yeqnub. Ariya tamo naŋgi di Qotei na kamba kumbra uge uge enjrosaieqnu. A na olo naŋgi kumbra bole bole enjreqnu. Deqa niŋgi dego Qotei aqa kumbra di dauryosib tamo bole ti tamo uge ti naŋgi turtnjroqnsib kumbra bole bole enjroqniye. Niŋgi kumbra degyqab di niŋgi Qotei aqa aŋgro bole sqab.

1 Korin 12:13

Di kiyaqa? Qotei aqa Mondor a segi qujai na iga kalil eleŋosiqa turtgej deqa iga kalil tamo qujaionum. Iga Juda tamo ti Grik tamo ti kaŋgal tamo ti tamo laŋaj ti kalil Qotei aqa Mondor qujai di osim a ya jumbum bul uyoqnsim dena iga siŋgila eqnum.

2 Korin 5:10

Di kiyaqa? Iga qalieonum, mondoŋ iga kalil Kristus aqa ulatamuq dia tigelimqa a na gago kumbra qa iga pegigwas. Iga mandamq endia kumbra bole kio kumbra uge kio yoqnem di a unsim awai segi segi egwas.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Kolosi 3:11

Iga so bunujq di unum deqa iga kalil kerekere unum. Deqa iga gago was naŋgi endegsi minjroqnqasai, “Ni Grik qaji” o “Ni Juda qaji” o “Ni muluŋ aio qaji” o “Ni muluŋ aiosai qaji” o “Ni yauŋ tamo” o “Ni yambaŋ tamo” o “Ni kaŋgal tamo” o “Ni tamo laŋaj”. Iga gago was naŋgi degsi minjroqnqasai. Di kiyaqa? Kristus a segi qujai unu. A gago kalil qa Tamo Koba.

Kolosi 3:24

Niŋgi qalie, mondoŋ Tamo Koba Yesus a na niŋgi awai boledamu eŋgwas. Awai di a na nami aqa segi tamo uŋgasari naŋgi enjrqa marej. Niŋgi are qaliye. Niŋgi Tamo Koba Yesus aqa wau tamo. A segi nuŋgo wau qa Gate.

Kolosi 3:25

Tamo bei a une bei atimqa Qotei na kamba a awai uge yqas. Di kiyaqa? Qotei a kumbra qujai na tamo uŋgasari kalil naŋgo une qa peginjreqnu.

Hibru 10:35

Deqa kumbra bole niŋgi nami yoqneb qaji deqa olo are qaloqniye. Osib nuŋgo areqalo Yesus qa siŋgilateqnub qaji di siŋgila na ojesoqniye. Niŋgi olo urataib. Niŋgi uratqasai di mondoŋ niŋgi awai tulaŋ boledamu oqab.

Hibru 11:26

Osiqa olo endegsi are qalej, “E Kristus aqa ñam qa jemai oqai di kere. Mondoŋ e awai tulaŋ boledamu oqai. Awai dena silali ti ñoro ti Isip di unu qaji di tulaŋ buŋyejunu.” Moses a awai boledamu di oqa marsiq deqa a degsi aqa areqalo siŋgilatej.