Efesus 6:12 - Yesus Aqa Anjam Bole

¹² Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum.

Efesus 6:12 ပူးပေါင်းရင်းမြစ်များ

Matyu 16:17

Pita na kamba Yesus degsi minjnaqa a na minjej, “O Saimon, Jona aqa ŋiri, ni tulaŋ areboleboleimeme. Di kiyaqa? Ino anjam merbonum di mandam tamo bei na babtosiq mermosai. Ijo Abu laŋ qureq di unu qaji a segi na anjam di babtosiq mermqo.

Luk 13:24

“Niŋgi siraŋme kiñalaq dena miligiq gilqajqa wauoiye. Niŋgi quiye. Tamo gargekoba naŋgi miligiq gilqajqa wauoqnib ugeinjroqnqas.

Luk 22:53

E nami koba atra tal miligiq dia niŋgi koba na sosim anjam merŋgoqnem bati deqa niŋgi yala baŋ waiysib e ojosai. Ariya bini nuŋgo bati brantqo. Endego ambru aqa siŋgila agi brantqo.”

Jon 12:31

Niŋgi quiye. Qotei a tamo uŋgasari mandamq endi unub qaji naŋgo une qa naŋgi peginjrqajqa bati brantqo. Qotei na mandam endeqa gate koba Satan taqal waiyqajqa bati agi brantqo.

Jon 14:30

“Mandam endeqa gate koba Satan a beqnu. Deqa e olo anjam olekoba titsiy merŋgoqnsiy sqasai. Satan a na e gulube bei ebqa keresai.

Jon 16:11

Qotei na tamo naŋgo une qa peginjrqas kumbra di aqa utru agiende. Mandam endeqa gate koba Satan aqa une qa Qotei na pegiyosim a ŋamyuoq waiyqas.

Aposel 26:18

Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Rom 8:38

Od, Qotei na iga tulaŋ qalaqalaigeqnu. Deqa e endegsi ijo are siŋgilatosim qalieonum, iŋgi bei na Qotei getentim a na iga olo qalaqalaigwasai iŋgi dego bei sosai. Moio ti ŋambile ti laŋ aŋgro naŋgi ti mondor siŋgila naŋgi ti iŋgi iŋgi bini unub qaji naŋgi ti iŋgi iŋgi bunuqna branteleŋqab qaji naŋgi ti iŋgi iŋgi kalil siŋgila ejunub qaji naŋgi ti iŋgi iŋgi kalil laŋ goge di unub qaji naŋgi ti iŋgi iŋgi kalil mandam sorgomq di unub qaji naŋgi ti iŋgi iŋgi kalil Qotei na nami ateleŋej qaji naŋgi ti kalil dena Qotei getentqa keresai. Yim a na iga olo qalaqalaigwasai. Iga qalieonum, gago Tamo Koba Kristus Yesus aqa siŋgila na Qotei na iga qalaqalaigoqnsim sqas.

1 Korin 15:50

O was qu, e na niŋgi endegsi merŋgwai. Qotei na mandam qaji tamo naŋgi oqa keresai. Deqa a naŋgo Mandor Koba sosim naŋgi taqatnjrqa keresai dego. Gago jejamu moisim qusaqas qaji di ŋambile gaigai sqa keresai.

2 Korin 11:14

O was qu, niŋgi naŋgo kumbra di unsib niŋgi deqa tulaŋ prugaib. Iga qalie, Satan a dego gisaŋoqnsiqa aqa kumbra bulyoqnsiqa Qotei aqa laŋ aŋgro bole riaŋ ti unub qaji naŋgi buleqnu.

2 Korin 4:4

Mandam endeqa qotei gisaŋ Satan a na tamo uŋgasari Kristus qa naŋgo areqalo siŋgilatosaieqnub qaji naŋgo areqalo getentejunu deqa Kristus aqa anjam bole naŋgo are miligiq aiqa keresai. Deqa naŋgi Kristus aqa suwaŋ unosaieqnub. Kristus a segi Qotei. A segi ñam koba ti unu.

Galesia 1:16

Osiqa bati a nami atej qaji di brantonaqa a na aqa Ŋiri Yesus e osorbej. Yim e na aqa anjam bole osiy giloqnsiy tamo uŋgasari sawa bei beiq di unub qaji naŋgi minjre minjre laqajqa deqa. Onaqa bati di e na tamo qudei naŋgi endegsi nenemnjrosaioqnem, “Yesus a tamo kiero?” o “E Yesus aqa anjam kiersi palontoqnqai?” Qotei a segi na e giltbej deqa e tamo qudei naŋgi degsi nenemnjrosaioqnem.

Efesus 1:21

Deqa Kristus a na mondor siŋgila ti gate kokba ti mandor ti tamo kokba ti kalil naŋgi tulaŋ buŋnjrsiqa goge kobaq di unu. A na tamo kalil bini bati endeqa ñam koba ti unub qaji naŋgi ti tamo kalil bunuqna ñam koba ti sqab qaji naŋgi ti tulaŋ buŋnjrsiqa agi goge kobaq di unu.

Efesus 1:3

Iga Qotei aqa ñam soqtoqnqom. A gago Tamo Koba Yesus Kristus aqa Abu Qotei. A Kristus aqa wau na laŋ qaji iŋgi bole bole iga egej. A gago qunuŋ qa are qalsiq deqa iŋgi di iga egej.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

Efesus 3:10

Nami a na aqa areqalo di ulitesoqnej. Ariya bini aqa segi tamo uŋgasari naŋgi are qujaitosib unub kumbra dena a na aqa segi areqalo bole ti aqa powo ti boleq atej. Yim laŋ aŋgro siŋgila kokba ti mondor laŋ goge di unub qaji naŋgi ti Qotei aqa areqalo di unsib qalieqajqa deqa.

Kolosi 1:13

Nami iga ambruq di soqnem. Ambru aqa siŋgila dena iga taqatgesoqnej. Onaqa bunuqna Qotei na iga ambruq dena eleŋosiqa aqa segi Ŋiri qujai tulaŋ qalaqalaiyeqnu qaji aqa sorgomq di iga atej. Deqa bini Yesus a gago Mandor Koba sosiqa iga taqatgejunu.

Kolosi 2:15

Kumbra dena a na mondor uge uge naŋgi ti naŋgo gate kokba ti kalil naŋgo siŋgila kobotej. Osiqa qoto siŋgilaosiqa naŋgi tulaŋ buŋnjrej. Kristus a ŋamburbasq di moiej wau dena qujai Qotei na kumbra di tamo kalil naŋgi osornjrej.

2 Timoti 2:5

Tamo bei wo bei wo gurgurosib bubuŋosib bei na bei buŋyosim di a awai oqas. Ariya bei a ururqajqa kumbra geregere dauryqasai di a awai oqasai.

Hibru 12:1

Tamo nami soqneb qaji naŋgi di Qotei qa naŋgo areqalo siŋgilatoqneb. Naŋgi laŋbi bul iga agutgesonab iga naŋgo kumbra di uneqnum. Qotei na iga giltgej deqa iga siŋgila na gurguroqnqom. Gurguroqnimqa iŋgi iŋgi qudei na iga Qotei aqa kumbra dauryqa gam getentetgwa laqnimqa iga iŋgi iŋgi di olo gotraŋyoqnqom. Une kalil gagoq di beterqajqa laqnu qaji di dego iga gotraŋyoqnsim Qotei aqa kumbra dauryqajqa siŋgilaoqnqom.

Hibru 12:4

Bole, niŋgi siŋgila na qotoqnsib une gotraŋyeqnub. Ariya nuŋgo kumbra dena jeu tamo naŋgi na niŋgi moiotŋgosaieqnub.

1 Pita 3:22

Onaqa Kristus a laŋ qureq oqej deqa bini a Qotei aqa baŋ woq di awejunu. Deqa laŋ aŋgro naŋgi ti laŋ qaji mondor kokba ti laŋ qaji siŋgila ti kalil naŋgi Kristus aqa sorgomq di unub.