Efesus 5:8 - Yesus Aqa Anjam Bole

⁸ Niŋgi nami ambruq di soqneb. Ariya bini Tamo Koba Qotei na niŋgi aqa suwaŋoq di atej unub. Deqa niŋgi suwaŋ qaji tamo uŋgasari sosib suwaŋoq di laqniye.

Efesus 5:8 ပူးပေါင်းရင်းမြစ်များ

Matyu 3:8

Niŋgi are bulyqa marsibqa kumbra bole bole babtoqniye. Yim tamo naŋgi unsib marqab, ‘Bole, niŋgi are bulyonub.’

Matyu 4:16

Deqa tamo uŋgasari ambruqsi unub qaji naŋgi puloŋ kobaquja unqab. Tamo uŋgasari padalo gam dauryosib ambruqsi unub qaji naŋgi puloŋ dena suwantnjrqas.”

Luk 1:79

Tamo naŋgi ambruq di sosib moreŋqa ulaoqnibqa Qotei na naŋgi suwantnjroqnqas. Osim a na iga gam osorgoqnimqa iga lawo kumbra dauryoqnqom.”

Luk 16:8

“Onaqa ñoro tamo a aqa ñoro taqato tamo aqa kumbra gisaŋ di poiyonaqa aqa ñam soqtosiq minjej, ‘Ni keretonum.’ Degsi minjej. Di kiyaqa? Ñoro taqato tamo uge di a powo ti sosiq deqa kumbra gisaŋ di yej. Deqa niŋgi quiye. Mandam endeqa tamo uŋgasari naŋgi mandam qa kumbra dauryqajqa naŋgo powo kobaquja. Ariya niŋgi Qotei aqa segi tamo uŋgasari suwaŋoq di unub qaji niŋgi mandam qa kumbra dauryqajqa nuŋgo powo kiñala.

Jon 1:9

Puloŋ di puloŋ bole. A mandamq aisiqa tamo uŋgasari kalil naŋgi suwantnjreqnu.

Jon 12:35

Onaqa Yesus na minjrej, “Puloŋ a nuŋgo ambleq di sokiñalaysim niŋgi olo uratŋgwas. Puloŋ a nuŋgo ambleq endi unu. Deqa niŋgi puloŋ di osib puloŋq na laqniye. Yimqa ambruiŋgwasai. Tamo ambruq na laqnu qaji a ambruq di sosim qabitqas kio? Di a qalieqasai.

Jon 12:36

Puloŋ a nuŋgo ambleq endi unu. Deqa niŋgi puloŋ di osib puloŋ qa nuŋgo areqalo siŋgilatiye. Niŋgi degyqab di niŋgi puloŋ aqa aŋgro bole sqab.” Yesus a anjam degsi minjrsiqa naŋgi uratnjrnaq naŋgi a olo unosai.

Jon 12:46

E puloŋ bulosim mandamq aiem. Deqa tamo uŋgasari kalil e qa naŋgo areqalo siŋgilatqab qaji naŋgi ambruq di sqasai.

Jon 8:12

Yesus a uŋa degsi minjnaq gileqnaqa a na tamo uŋgasari naŋgi olo endegsi minjrej, “E mandam endeqa puloŋ. Tamo a e daurbqas di a ambruq di walwelqasai. A suwaŋoq di walweloqnsim ŋambile gaigai sqas.”

Aposel 17:30

“Nami tamo naŋgi nanari soqneb. Naŋgi Qotei qaliesai. Deqa naŋgi qotei gisa gisaŋ naŋgo sulum gereinjroqnsib biŋinjroqneb. Bati di Qotei a naŋgo kumbra di unsiqa unosaibulosiqa naŋgi kambatnjrosaioqnej. Ariya bini Qotei na tamo uŋgasari kalil sawa sawa kalilq di unub qaji naŋgi endegsi minjreqnu, ‘Niŋgi are bulyosib kumbra uge uge di uratiye.’

Aposel 26:18

Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Rom 1:21

Naŋgi Qotei qa qalie unub. Ariya a segi Qotei bole naŋgi degsib marosaieqnub. Deqa naŋgi aqa ñam soqtosib a biŋiyosaieqnub. Naŋgo kumbra dena naŋgi nanaritnjroqnsiq naŋgo areqalo getentetnjreqnaqa naŋgi ambruq di laqnub.

Rom 13:12

Qolo koboeqnaqa sawa suwaŋqa laqnu. Deqa iga ambru qaji kumbra kalil uratosim suwaŋ qaji kumbraq di sqom. Suwaŋ qaji kumbra di iga qoto qa gara bul jigsim sqom.

Rom 2:19

Osib niŋgi endegsib are qaleqnub, “Iga dal anjam ti unum deqa iga powo bole ti anjam bole ti ejunum. Deqa tamo ŋam qandimo unub qaji naŋgi iga na gam osornjreqnum. Osim tamo naŋgi ambruq di unub qaji iga na suwantnjreqnum. Tamo powo saiqoji unub qaji naŋgi iga na powo enjreqnum. Tamo naŋgi aŋgro kiñilala bulosib Qotei aqa anjam qaliesai qaji naŋgi iga na anjam aqa damu osornjreqnum.”

1 Korin 1:30

Qotei a segi na niŋgi eleŋosiqa Kristus Yesus aqa baŋq di atej unub. Deqa Kristus aqa wau na iga Qotei aqa areqalo bole ti aqa powo ti unum. Aqa wau na iga tamo bole tiŋtiŋo unum. Aqa wau na iga Qotei aqa segi kumbra boleq di sosim walweleqnum. Aqa wau na Qotei na iga gago uneq dena olo awaigej deqa gago une na iga olo taqatgosai.

2 Korin 3:18

Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

2 Korin 4:6

Tulaŋ nami Qotei a iŋgi iŋgi kalil gereiyqa osiqa a endegsi marej, “Ambruq dena suwaŋ brantqas.” Ariya bunuqna Qotei aqa suwaŋ di iga qa bosiqa gago are miligi suwantetgej deqa iga Kristus aqa ulatamu uneqnum. Dena iga suwaŋ bole unsimqa Qotei aqa riaŋ ti aqa siŋgila ti geregere poigeqnu.

2 Korin 6:14

Tamo uŋgasari Kristus qa naŋgo areqalo siŋgilatosaieqnub qaji naŋgo kumbra nuŋgo kumbra ti keresai. Deqa niŋgi naŋgi ti beterosib koba na wauaib. Niŋgi kumbra tiŋtiŋ dauryeqnub. Ariya naŋgi Qotei aqa dal anjam gotraŋyeqnub. Deqa niŋgi naŋgi ti beterosib wauqa kere e? Sai. Niŋgi suwaŋoq di unub. Ariya naŋgi ambruq di laqnub. Deqa niŋgi naŋgi ti beterosib wauqa kere e? Di keresai.

Galesia 5:25

Qotei aqa Mondor na iga ŋambile egej deqa a na gam osorgim iga aqa kumbra na walweloqnqom.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

Efesus 4:18

Naŋgo qalie ti powo ti tulaŋ ambruejunu. Naŋgi tulaŋ nanarioqnsib laqnub. Naŋgo are miligi geteŋejunu. Deqa Qotei aqa ŋambile naŋgoq di sosai.

Efesus 5:2

Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

Efesus 6:12

Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum.

Kolosi 1:12

O was qu, iga degsim niŋgi qa gago Abu Qotei pailyeqnum. Deqa niŋgi na a biŋiyoqnsib soqniye. A na niŋgi kumbra boleq di breiŋgej deqa agi niŋgi dauryoqnsib unub. Deqa iŋgi bole bole a na nami laŋ goge dia gereiyetŋgej unu qaji di niŋgi mondoŋ oqsib oqab. Agi niŋgi ti Qotei aqa segi tamo uŋgasari kalil suwaŋoq di unub qaji naŋgi ti iŋgi di oqab.

Kolosi 1:13

Nami iga ambruq di soqnem. Ambru aqa siŋgila dena iga taqatgesoqnej. Onaqa bunuqna Qotei na iga ambruq dena eleŋosiqa aqa segi Ŋiri qujai tulaŋ qalaqalaiyeqnu qaji aqa sorgomq di iga atej. Deqa bini Yesus a gago Mandor Koba sosiqa iga taqatgejunu.

Taitus 3:3

Ni qalie, iga dego nami areqalo uge ti sosimqa Qotei aqa anjam gotraŋyoqnem. Bati di Satan a na iga gisa gisaŋgeqnaqa iga Qotei aqa gam bole dauryqa uratosim kumbra uge dauryqajqa are pruggeqnaqa gago segi jejamu qa tulaŋ areboleboleigoqnej. Kumbra dena iga siŋgila na ojesoqnej. Deqa iga minjiŋ ti are uge ti sosim walweloqnem. Tamo naŋgi na iga jeutgeqnabqa iga na kamba dego naŋgi jeutnjroqnem.

1 Jon 1:7

Qotei a suwaŋoq di unu dego kere iga dego suwaŋoq di walwelqom di iga Qotei aqa tamo uŋgasari kalil naŋgi ti areqalo qujaitosim sqom. Soqnimqa Qotei aqa Ŋiri Yesus aqa leŋ aiej qaji dena gago une kalil kobotetgoqnimqa iga aqa ŋamgalaq di tamo bole une saiqoji sqom.