Efesus 5:3 - Yesus Aqa Anjam Bole

³ Niŋgi sambala kumbra yaib. Niŋgi kumbra jigat dego yaib. Niŋgi tamo qudei naŋgo iŋgi iŋgi qa mamaulŋgaiq. Kumbra uge deqaji nuŋgo ambleq di saiq. Iga Qotei aqa segi tamo uŋgasari unum deqa kumbra kalil deqaji iga na yoqnqasai.

Efesus 5:3 ပူးပေါင်းရင်းမြစ်များ

Matyu 15:19

Iŋgi iŋgi tamo naŋgo are miligiq na branteqnu qaji agi ubtsiy merŋgwai. Areqalo uge uge, tamo qaloqa, uŋa qa laoqa, was aqa ŋauŋ anjamyoqa, bajiŋoqa, was aqa jejamu laŋa gisaŋyoqa, was yomuiyoqa.

Luk 12:15

Degsi minjsiqa tamo uŋgasari kalil naŋgi endegsi minjrej, “Niŋgi ñoro koba ti sqajqa deqa are koba qaloqnaib. Niŋgi ñoro koba ti sqab dena niŋgi ŋambile bole oqa keresai. Niŋgi ijo anjam deqa geregere are qaliye.”

Luk 16:14

Yesus a na aqa aŋgro naŋgi anjam degsi minjrnaqa Farisi naŋgi qusib deqa Yesus yomuiyeb. Farisi naŋgi bati gaigai silali koba oqnqajqa are qaloqneb. Utru deqa naŋgi Yesus yomuiyeb.

Aposel 15:20

Iga anjam qujai endegsim neŋgreŋyosim naŋgoq qariŋyqom, ‘O was qu, niŋgi na qotei gisaŋ atrainjro qaji iŋgi bei uyaib. Niŋgi sambala kumbra yaib. Wagme sil na kakoro tontnjrnab moreŋeb qaji di niŋgi uyaib. Wagme leŋ ti dego uyaib.’ Iga anjam qujai di neŋgreŋyosim sawa bei bei qaji tamo naŋgoq qariŋyqom.

Aposel 20:33

“E silali qa kio gara qa kio tamo bei ŋilyosaioqnem.

Rom 1:29

Naŋgo kumbra uge agiende. Naŋgi kumbra bole tiŋtiŋ yqajqa torei urateqnub. Naŋgi ñoro koba oqajqa mamaulnjreqnu. Naŋgi tamo naŋgi jeutnjreqnub. Naŋgi tamo qudei iŋgi koba ti unub qaji naŋgi qa are ugeinjreqnu. Naŋgi tamo naŋgi ñumsib moiotnjreqnub. Naŋgi laŋa laŋa ŋiriŋoqnsib gisaŋ anjam mareqnub. Naŋgi tamo qudei naŋgo iŋgi iŋgi laŋa yainjreqnub. Naŋgi tamo qudei naŋgi ugeugeinjreqnub. Kumbra di naŋgoq di tulaŋ koba unu. Naŋgi yomueqnub.

Rom 16:2

Niŋgi Tamo Koba Yesus aqa ñam na Fibi osib geregereiyiye. Iga Qotei aqa segi tamo uŋgasari unum deqa iga kumbra bole di yqom. Fibi a gulube ti soqnimqa kio iŋgi bei qa truquamqa kio niŋgi na aqaryaiyiye. A nami tamo uŋgasari gargekoba naŋgi aqaryainjroqnsiq e dego aqaryaiboqnej. Deqa niŋgi a urataib. A kamba dego aqaryaiyiye.

Rom 6:13

Une na nuŋgo siŋga ti baŋ ti taqatqa laqnimqa niŋgi na olo saidyiye. Yim niŋgi kumbra uge uge yoqnqasai. Niŋgi subq na olo tigelobulosib ŋambile unub deqa niŋgi nuŋgo segi jejamu osib Qotei yiye. Yosib nuŋgo siŋga ti baŋ ti nuŋgo jejamu ti kalil Qotei aqa baŋq di atibqa a segi na taqatqas. Yim dena niŋgi kumbra bole tiŋtiŋ yoqnqab.

1 Korin 10:8

Iga sambala kumbra dego yqasai. Agi gago moma qudei naŋgi sambala kumbra yoqneb deqa bati qujai qa Qotei na 23,000 tamo uŋgasari naŋgi ñumnaq moreŋeb.

1 Korin 5:1

O was qu, e anjam bei endegsi quem. Nuŋgo ambleq di tamo bei a sambala kumbra yeqnu. Aqa sambala kumbra di tulaŋ ugedamu. Tamo naŋgi Qotei qaliesai qaji naŋgi sambala kumbra deqaji yosaieqnub. Aqa sambala kumbra agiende. A na aqa abu aqa ŋauqali olo oqnsiq ombla sambalaeqnub.

1 Korin 6:13

Tamo qudei naŋgi mareqnub, “Uyo iŋgi aqa wau agi aisim meneq di sqajqa. Mene aqa wau agi iŋgi uyqajqa.” Di naŋgi bole mareqnub. Ariya mondoŋ Qotei na uyo iŋgi ti mene ti di kalil torei kobotqas. Ariya gago jejamu di sambala kumbra yqajqa sai. Gago jejamu di Tamo Koba Yesus aqa. A segi na taqateqnu.

1 Korin 6:18

Deqa was qu, niŋgi gaigai sambala kumbra uratoqnsib isaq giloqniye. Une kalil tamo naŋgi yeqnub qaji di naŋgo jejamuq di beterosaieqnu. Ariya tamo naŋgi sambala kumbra yeqnub di kumbra dena naŋgo jejamuq di beteroqnsiq naŋgo jejamu ugeteqnu.

2 Korin 12:21

E olo niŋgi qa bosiy nuŋgo ambleq di tamo gargekoba nami une yoqneb qaji naŋgi are bulyosaiunub degsi unqai kio? Degsi unqai di ijo Qotei a nuŋgo ŋamgalaq di e jemai ebqas. Tamo naŋgi di naŋgo une nami yoqneb qaji agiende. Naŋgi kumbra uge jiga ti yoqneb. Naŋgi sambala kumbra yoqneb. Naŋgi kumbra uge yqajqa are prugnjroqnej. E niŋgi qa bosiy tamo naŋgi di naŋgo une olo qoreiyosai degsi unqai di e naŋgi qa are gulubeibqas. E deqa ulaeqnum.

Efesus 5:12

Tamo naŋgi ambruq di unub qaji naŋgi ulioqnsib kumbra yeqnub. Di kiyaqa? Naŋgo kumbra di tulaŋ ugedamu. Deqa e naŋgo kumbra deqa maroqnsiy sqasai. Marqai di e jemaibqas.

Efesus 5:5

Niŋgi endegsib qalieoiye. Tamo naŋgi sambala kumbra ti kumbra jiga ti yeqnub qaji naŋgi Qotei na oqasai. Tamo naŋgi mandam qa iŋgi iŋgi qa mamaulnjreqnu qaji naŋgi dego Qotei na oqasai. Tamo naŋgi mandam qa iŋgi iŋgi qa mamaulnjreqnu qaji naŋgo kumbra dena naŋgi gisaŋ qotei qa louobuleqnub. Deqa tamo naŋgi deqaji Kristus wo Qotei wo naŋgi na taqatnjrsib naŋgo Mandor Kokba sqasai.

Filipai 1:27

Ijo anjam kobaquja bei agiende. Niŋgi Kristus aqa anjam bole di geregere dauryosib walweloqniye. Yim e olo niŋgi qa bosiy nuŋgwai kio endi sosiy niŋgi qa anjam laŋa quqwai kio di uŋgum, e qalieqai, niŋgi siŋgila na tigeloqnsib areqalo qujai na wauoqnsib tamo uŋgasari naŋgo are tigeltetnjreqnabqa naŋgi Kristus aqa anjam bole quoqnsib naŋgo areqaloq di siŋgilateqnub.

Kolosi 3:5

Deqa niŋgi mandam qaji kumbra kalil nuŋgo are miligiq di unu qaji di moiotiye. Mandam qaji kumbra agi ubtsiy merŋgwai. Sambala kumbra ti kumbra jiga ti kumbra uge uge yqajqa are prugŋgoqa, mandam qa iŋgi iŋgi qa maulŋgoqa. Tamo naŋgi mandam qa iŋgi iŋgi qa mamaulnjreqnu qaji naŋgi gisaŋ qotei naŋgi qa louobuleqnub.

1 Tesalonaika 4:3

Qotei aqa areqalo agiende. Niŋgi nuŋgo segi jejamu osib Qotei yekritosib aqa segi kumbra boleq di sosib dauryoqniye. Osib sambala kumbra kalil torei uratiye.

1 Tesalonaika 4:7

Qotei a na iga kumbra jigat yqajqa deqa metgosai. Iga gago segi jejamu osim Qotei yekritosim aqa segi kumbra boleq di sosim dauryqajqa deqa metgej.

1 Timoti 2:10

Ni na uŋgasari naŋgi minjrimqa naŋgi Qotei aqa anjam dauryqa marsib wau bole bole yoqnebe. Di naŋgo wala bole agide.

1 Timoti 3:3

A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq.

1 Timoti 6:10

Tamo deqaji naŋgi silali koba oqajqa tulaŋ arearetnjreqnu. Naŋgo kumbra di agi kumbra uge uge kalil naŋgo utru. Kumbra dena tamo qudei naŋgi titnjreqnaqa naŋgi Yesus qa naŋgo areqalo siŋgilatqa uratoqnsib gulube gargekoba iteqnub.

2 Timoti 3:2

Bati di tamo naŋgi naŋgo segi jejamu qa areboleboleinjroqnim sqab. Sosib silali koba oqnqajqa are prugnjroqnqas. Naŋgi naŋgo segi ñam soqtoqnsib diqoqnsib ŋiriŋ anjam koba maroqnsib tamo naŋgi misiliŋnjroqnqab. Naŋgi naŋgo ai wo abu wo naŋgo anjam gotraŋyoqnqab. Tamo uŋgasari qudei naŋgi na naŋgi kumbra bole bole enjroqnibqa di uratoqnsib olo naŋgi qa are boleinjrqasai. Naŋgi Qotei aqa kumbra kalil qoreiyoqnqab.

Taitus 1:11

Tamo naŋgi di tamo uŋgasari naŋgo silali ti ñoro ti yainjrqajqa deqa marsib kumbra uge uge iga yqa keresai qaji di naŋgi yqajqa minjreqnub. Kumbra dena naŋgi na tamo uŋgasari qudei naŋgo aŋgro ti naŋgo was naŋgi ti areqalo ugetetnjreqnabqa naŋgi Qotei aqa gam bole olo urateqnub. Deqa Taitus, ni na tamo uge uge deqaji naŋgo medabu getentsim saidnjre.

Taitus 1:7

Ni qalie, Kristen naŋgo gate naŋgi Qotei aqa wau taqateqnub. Deqa ni tamo bei a gate atqa osimqa ni aqa kumbra endeqaji unsim ate. A tamo uŋgasari naŋgo ŋamgalaq di une saiqoji unu. A aqa segi ñam soqtosiq tamo uŋgasari naŋgi siŋgila na taqatnjro-saieqnu di ni unsim a gate ate. A urur minjiŋ oqetosaieqnu. A ya uysiq nanariosaieqnu. A qoto ani tamo sai. A silali koba oqnqajqa tulaŋ arearetosaieqnu.

Taitus 2:3

Ariya ni na uŋa qeli naŋgi anjam endegsim minjroqne, “Kumbra bole kalil Qotei a areareteqnu qaji di niŋgi dauryosib soqniye. Niŋgi yomuoqnaib. Wain uyoqnsib nanarioqnaib. Niŋgi na Kristen was naŋgi kumbra bole osornjroqniye.

Hibru 12:16

Niŋgi na tamo naŋgi saidnjribqa naŋgi sambala kumbra yaib. Osib tamo naŋgi Qotei qoreiyqajqa dego saidnjriye. Agi nami Iso na Qotei qoreiyosiqa a aŋgro matu soqnej deqa are qalosaiosiq iŋgi bole kalil aqa abu na nami a yqajqa minjej qaji di bati qujai qa qariŋyosiq dena iŋgi awaiyosiq uyej.

1 Pita 5:2

Qotei aqa tamo uŋgasari naŋgi kaja du du bul deqa a na naŋgi joqsiqa nuŋgo baŋq di atej unub. Deqa niŋgi na naŋgi geregere taqatnjroqniye. Qotei na niŋgi wau di eŋgej deqa niŋgi are bole na wau di yoqniye. Tamo qudei naŋgi siŋgila na niŋgi waiŋgibqa niŋgi deqa wau di yaib. Niŋgi silali qa osib wau di yaib. Niŋgi are bole na wau di yoqniye.

2 Pita 2:10

Tamo qudei naŋgi awai tulaŋ ugedamu oqab. Tamo naŋgi di sambala kumbra tulaŋ jigat yqajqa are prugnjreqnu. Osib naŋgi endegsib are qaleqnub, “Tamo Koba Qotei aqa anjam di laŋa sa anjam. Deqa iga dauryqasai.” Tamo uge deqaji naŋgi nuŋgo ambleq di tigelosib tulaŋ diqoqnsib naŋgo segi areqalo dauryeqnub. Deqa naŋgi laŋ aŋgro kokba naŋgi misiliŋnjrqajqa ulaosaieqnub.

2 Pita 2:14

Naŋgi gaigai uŋa qa mamaulnjreqnu deqa naŋgi sambala kumbra yqajqa are qaleqnub. Naŋgi une yoqnqajqa tulaŋ arearetnjreqnaqa olo uratosaieqnub. Naŋgi na tamo qudei areqalo aiye aiyelteqnub qaji naŋgi walawalainjreqnabqa naŋgi daurnjroqnsib une yeqnub. Tamo naŋgi di tamo qudei naŋgo iŋgi iŋgi qa mamaulnjreqnu. Kumbra di naŋgi qalie bole. Deqa Qotei na naŋgi torei padaltnjrqas.

2 Pita 2:3

Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.

Uli Anjam 2:14

“‘Ariya ino kumbra uge qudei e ubtsiy mermqai. Tamo qudei Pergamum qureq di unub qaji naŋgi Balam aqa kumbra uge siŋgila na ojesonab ni na naŋgi saidnjrosaieqnum. Balam aqa kumbra agiende. Nami Balam na Balak gam osoryonaqa gilsiqa Israel tamo uŋgasari naŋgi gisa gisaŋnjroqnsiqa kumbra ugeq breinjroqnej. Breinjroqnsiqa areqalo tigeltetnjreqnaqa naŋgi qotei gisaŋ atrainjro qaji iŋgi uyoqnsib sambala kumbra yoqnsib laqneb.

Uli Anjam 2:21

A are bulyqajqa bati yem di a are bulyosim aqa sambala kumbra uratqajqa saidej.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.

Uli Anjam 9:21

Ariya tamo naŋgi di naŋgo kumbra tulaŋ uge. Naŋgo kumbra uge agi ubtsiy marqai. Naŋgi na tamo ñumoqnsib moiotnjroqneb. Naŋgi gumaniŋoqneb. Naŋgi quñam qaloqneb. Naŋgi laŋa laŋa sambalaoqneb. Naŋgi bajiŋoqneb. Naŋgo kumbra uge uge kalil di naŋgi uratosaioqneb. Deqa naŋgi are bulyosaioqneb.