Efesus 5:2 - Yesus Aqa Anjam Bole

² Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

Efesus 5:2 ပူးပေါင်းရင်းမြစ်များ

Matyu 20:28

E Tamo Aŋgro. Niŋgi ijo kumbra qalieosib degsib dauryoqniye. Tamo naŋgi na e aqaryaibosib wauetbqajqa e deqa bosai. E na tamo naŋgi wauetnjrqa bem. E na tamo uŋgasari gargekoba naŋgi aqaryainjrsiy ijo segi ŋambile uratosiy naŋgi eleŋqai. E deqa bem.”

Jon 13:34

Endego e dal anjam bunuj eŋgwai. Dal anjam bunuj agiende. Niŋgi nuŋgo was naŋgi qalaqalainjroqniye. E niŋgi qalaqalaiŋgeqnum dego kere niŋgi kamba dego nuŋgo was naŋgi qalaqalainjroqniye.

Jon 6:51

E segi ŋambile qa bem bole laŋ qure uratosim mandamq aiem qaji. Tamo bei a bem di uyqas di a ŋambile gaigai sqas. Bem di agi ijo segi jejamu. E na tamo uŋgasari mandamq endi unub qaji naŋgi ijo segi jejamu naŋgi anainjrit uyqab. Uysib naŋgi ŋambile sqab.”

Rom 15:16

E Kristus Yesus aqa wau tamo deqa e sawa bei bei qaji tamo naŋgo ambleq dia wauoqnsim Qotei aqa anjam bole naŋgi minjreqnum. E na naŋgi osiy Qotei aqaq dia atrainjrobulitqa a naŋgi eleŋqajqa deqa waueqnum. Qotei aqa Mondor na naŋgi siŋgilatnjrimqa naŋgi Qotei aqa segi tamo uŋgasari sosib kumbra bole yoqnqajqa deqa e naŋgi qa waueqnum.

Rom 4:25

Qotei na Yesus uratonaqa naŋgi na a qalnab moiej. Yim a gago une kobotqajqa deqa. Onaqa Qotei na Yesus olo subq na tigeltosiq dena iga tamo bole une saiqoji qa mergej.

Rom 8:3

Dal anjam na gago une kobotqa keresai. Di kiyaqa? Iga areqalo namijq di unum deqa iga dal anjam dauryqa keresai. Ariya dal anjam na gago une kobotqa keresai deqa Qotei a segi na gago une kobotej. A gam endena gago une kobotej. A na aqa segi Ŋiri Yesus qariŋyonaqa a une tamo bulosiqa gago une kobotqa bonaqa aqa segi jejamuq di Qotei na gago une aqa awai uge atsiqa une aqa siŋgila kobotej.

Rom 8:37

Ariya Kristus na iga qalaqalaigej deqa gulube kalil di gagoq di brantoqnqas di uŋgum. A na gaigai iga aqaryaigeqnu deqa iga qoto siŋgilaoqnsim tigelejunum.

1 Korin 16:14

Osib niŋgi na tamo kalil naŋgi ti Qotei a ti qalaqalainjroqniye. Niŋgi kumbra bei yqa oqnsib mati qalaqalaiyo kumbra na yoqniye.

1 Korin 5:7

Deqa was qu, niŋgi na bem tiyeqnu qaji aqa sum namij di taqal atiye. Osib dena niŋgi olo bem bunuj bulosib sum saiqoji sqab. E qalieonum, niŋgi sum saiqoji unub koboqo. Di kiyaqa? Bem Tiyosai Qaji Uyqa Bati qa naŋgi na Kristus qalnab a kaja du bulosiq gago une qa moisiq aqa leŋ aiej.

2 Korin 2:14

Ariya e Qotei biŋiyeqnum. Di kiyaqa? A na gaigai iga aqaryaigeqnu deqa iga Kristus aqa siŋgila na qoto buŋyeqnum. Iga Qotei aqa wau ojeqnum dena tamo uŋgasari sawa sawa kalilq di unub qaji naŋgi Qotei qa bole poinjreqnu. Powo di sabaŋ quleq bolequja jagwa na osi gileqnu dego bul.

2 Korin 2:15

Od, iga segi qurem quleq bul Kristus na Qotei atraiyeqnu qaji. Quleq di sawa sawa kalilq giloqnsiqa tamo uŋgasari Qotei na eleŋeqnu qaji naŋgi ti tamo uŋgasari padalqa gamq di unub qaji naŋgi ti naŋgoq aieqnu.

2 Korin 8:9

Gago Tamo Koba Yesus Kristus a niŋgi qa are tulaŋ boleiyosiq aqaryaiŋgej di niŋgi qalie. Agi a nami laŋ qaji ñoro koba esosiqa ariya a niŋgi aqaryaiŋgwa osiq deqa a ñoro kalil di olo uratosiqa iŋgi tulaŋ saiqoji soqnej. Yim niŋgi kamba laŋ qaji ñoro koba oqajqa deqa.

Galesia 1:4

Kristus a gago Abu Qotei aqa areqalo dauryosiq deqa a gago une kobotqa marsiqa aqa segi ŋambile uratosiq moiej. A na iga eleŋamqa iga mandam qa kumbra uge kalil uratqajqa deqa marsiq iga qa moiej.

Galesia 2:20

Osim e olo ŋambile bunuj em. Ariya ŋambile di ijo segi ŋambile sai. Kristus a segi ijo are miligiq di ŋambile unu. Deqa bini kumbra kalil e mandamq endi yeqnum qaji di e Qotei aqa Ŋiri qa ijo areqalo siŋgilatosim yeqnum. Agi Qotei aqa Ŋiri a na e tulaŋ qalaqalaibosiq deqa a aqa segi ŋambile uratosiq e qa moiej.

Efesus 1:4

Tulaŋ nami Qotei a mandam atosaisosiqa a na iga Kristus beteryqajqa marsiq giltgej. Yim iga aqa segi kumbra boleq di sosim aqa ŋamgalaq di une saiqoji sqajqa deqa.

Efesus 3:17

Osib naŋgi Kristus qa naŋgo areqalo siŋgilatqab dena Kristus a naŋgo are miligiq di sqas. O Abu, ni na Efesus naŋgi siŋgilatnjrimqa qalaqalaiyo kumbra naŋgo are miligiq di tulaŋ siŋgilatib soqnim naŋgi siŋgila na tigelesqab. Mandam na ŋam jirim ojesonaqa ŋam a siŋgila na tigelejunu dego kere.” O was qu, e niŋgi qa degsim Qotei pailyeqnum.

Efesus 4:15

Deqa iga naŋgo anjam di quetnjrqasai. Iga qalaqalaiyo kumbra dauryoqnsim anjam bole segi maroqnqom. Osim dena iga kalil boleoqnsim siŋgilaoqnsim gago Gate Koba Kristus beteryesqom.

Efesus 4:2

Osib niŋgi Kristen tamo uŋgasari naŋgo sorgomq di geregere sosibqa naŋgi lawo kumbra enjroqniye. Naŋgi niŋgi une bei eŋgibqa niŋgi kamba olo naŋgi qa urur minjiŋ oqaiq. Niŋgi olo naŋgi qalaqalainjroqnsib gulube naŋgi na niŋgi eŋgeqnub qaji di qoboiyetnjroqniye.

Efesus 5:15

Deqa was qu, niŋgi nuŋgo segi walwel gereiyosib soqniye. Niŋgi nanari tamo bulosib walwelaib. Niŋgi powo ti sosib walweloqniye.

Efesus 5:25

O tamo, Kristus a na aqa segi tamo uŋgasari naŋgi tulaŋ qalaqalainjrsiq deqa aqa segi ŋambile uratosiq naŋgi qa moiej. Dego kere niŋgi na nuŋgo uŋgasari naŋgi tulaŋ qalaqalainjroqniye.

Filipai 4:18

E silali iŋgi iŋgi kere unu. E iŋgi bei qa truquosaieqnum. Di kiyaqa? Niŋgi na silali di Epafroditus yonabqa a na osi bosiq ebej. Niŋgi silali qa e aqaryaibeb deqa niŋgi Qotei atraiyobuleb. Atraiyo iŋgi di quleq bole ti. Qotei a atraiyo iŋgi deqa tulaŋ areboleboleiyqo.

Kolosi 3:14

Osib niŋgi qalaqalaiyo kumbra yoqniye. Qalaqalaiyo kumbra a na kumbra kalil tulaŋ buŋnjreqnu. Osiqa kumbra bole kalil dego siŋgilatoqnsiq iga Kristen tamo uŋgasari kalil iga turtgeqnu. Deqa iga kalil areqalo qujaitoqnsim qalaqalaiyo kumbra dauryoqnsim sqom.

1 Tesalonaika 4:9

E na niŋgi Qotei aqa tamo uŋgasari naŋgi qalaqalainjrqajqa deqa anjam bei neŋgreŋyqasai. Di kiyaqa? Qotei na qalaqalaiyo kumbra di niŋgi osorŋgekritej koboqo.

1 Timoti 2:6

Kristus a moiqajqa bati agi Qotei a nami bati yonaqa a bosiqa tamo uŋgasari kalil naŋgi oqa marsiqa aqa segi ŋambile uratosiq moiej. Aqa kumbra dena Qotei na iga endegsi osorgej, a na tamo uŋgasari kalil naŋgi oqajqa are qaleqnu.

1 Timoti 4:12

Tamo qudei naŋgi ni qa mareqnub, ni aŋgro kiñala. O Timoti, tamo naŋgi dena ino ñam ugetetmaib. Ni kumbra bole segi yoqnimqa Kristen tamo naŋgi na ni numoqnsib daurmoqnqab. Ino anjam maro na ti ino walwel na ti ni kumbra bole segi yoqne. Osim qalaqalaiyo kumbra dauryoqnsim Qotei qa ino areqalo siŋgila-toqnsim Qotei aqa ŋamgalaq di tamo bole une saiqoji soqne.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Hibru 8:3

Atra tamo kokba naŋgo wau di niŋgi qalie. Naŋgi iŋgi iŋgi osi boqnsib Qotei atraiyeqnub. Deqa Yesus a dego atra tamo kobaquja sosiqa aqa segi jejamu osiq Qotei atraiyej.

Hibru 9:14

Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

Hibru 9:23

Atra tal aqa iŋgi iŋgi di mandam qaji iŋgi iŋgi. A laŋ qaji iŋgi iŋgi laŋa sigitejunu. Atra tamo naŋgi na wagme naŋgo leŋ oqnsib dena iŋgi iŋgi di yanseqnub. Ariya laŋ qaji iŋgi iŋgi di wagme naŋgo leŋ na yansqa keresai. Leŋ tulaŋ boledamu na laŋ qaji iŋgi iŋgi yansqas.

Hibru 9:26

A bati gargekoba degyoqnej qamu Qotei na nami mandam atej bati deqa a jaqatiŋ oqnsiq bosi bosiq agi bini a olo jaqatiŋ eqnu qamu. Ariya diŋo bati jojomqo deqa Kristus a bati qujai qa mandamq aisiq a gago une kobotqa marsiq aqa segi jejamu osiq Qotei atraiyej.

1 Pita 4:8

E anjam kobaquja bei dego niŋgi merŋgit quiye. Niŋgi Qotei aqa tamo uŋgasari naŋgi tulaŋ qalaqalainjroqniye. Di kiyaqa? Qalaqalaiyo kumbra na une gargekoba kabutoqnsiqa tulaŋ buŋye-junu.

1 Jon 3:16

Yesus a aqa segi ŋambile uratosiq iga qa moiej. Aqa kumbra dena a na iga qalaqalaiyo kumbra osorgej. Deqa iga dego gago Kristen was naŋgi qa are qalsim gago segi ŋambile uratosim naŋgi qa moreŋqom.

1 Jon 3:23

Qotei aqa dal anjam agiende. Iga aqa Aŋgro Yesus Kristus aqa ñam qa gago areqalo siŋgilatosim gago Kristen was naŋgi qalaqalainjroqnqom. Qotei aqa dal anjam di a na nami iga mergnaq quem.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 5:9

Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb, “O Kaja Du, ni buk di osimqa kandel aqa namur buk qandratejunu qaji di waqtqa kere. Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub. Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.