Efesus 5:18 - Yesus Aqa Anjam Bole

¹⁸ Niŋgi ya uge uyoqnsib nanarioqnaib. Kumbra dena niŋgi ugeugeiŋgwas. Deqa niŋgi Qotei aqa Mondor aqa kumbra dauryoqnibqa a na niŋgi taqatŋgesqas.

Efesus 5:18 ပူးပေါင်းရင်းမြစ်များ

Matyu 23:25

“O dal anjam qalie tamo ti Farisi ti niŋgi ŋam atiye. Niŋgi anjam maro aiyelteqnub qaji tamo. Deqa niŋgi kap ti tabir ti qore segi yanseqnub. Niŋgi miligi yansosaieqnub. Dego kere niŋgi babaŋ na tamo bole. Ariya nuŋgo are miligi bajiŋ kumbra ti nuŋgo segi jejamu qa are qalqajqa kumbra ti dena maqejunu. Nuŋgo kumbra uge dena niŋgi tulaŋ padalougetqab.

Matyu 24:49

Degsi are qalsimqa tamo naŋgi koba na wauo qaji naŋgi laŋa laŋa kumbaiŋnjroqnqas. Osim wain uyo tamo qudei naŋgi joqsim koba na iŋgi ti wain ti uyoqnsibqa nanarioqnqab.

Luk 1:15

Aŋgro di a ñam kobaquja osimqa Tamo Koba Qotei aqa ŋamdamuq di tamo bolequja sqas. A wain ti ya siŋgila ti uyoqnqasai. A aqa ai miligiq di soqnimqa Qotei aqa Mondor Bole na a geregere taqatesqas.

Luk 11:13

Deqa niŋgi quiye. Niŋgi tamo bolesai. Nuŋgo kumbra uge. Ariya ino aŋgro na iŋgi qa mermeqnaq ni iŋgi bole bole yeqnum. Ni a uratosaieqnum. Nuŋgo kumbra dena niŋgi endegsi poiŋgem, ‘Bole, gago Abu laŋ qureq di unu qaji a dego iga uratgosaieqnu. A na aqa Mondor Bole iga egwajqa pailyqom di a na egwas. A na iga uratgwasai bolesai.’”

Luk 12:45

Ariya wau tamo di a tamo uge qamu a endegsi are qalqas, ‘Ijo tamo koba a urur bqasai.’ Degsi are qalsimqa wau tamo ti uŋgasari ti naŋgi laŋa laŋa kumbaiŋnjroqnqas. Osim laŋa iŋgi koba uyoqnsim sqas. Wain koba dego uyoqnsim nanarioqnqas.

Luk 21:34

Osiqa Yesus a olo anjam endegsi minjrej, “Niŋgi geregere ŋam atsib soqniye. Niŋgi ya uge uyoqnsib nanarioqnqajqa are prugŋgoqnaiq. Nuŋgo segi jejamu qa iŋgi iŋgi qa areqalo kobaiyoqnaib. Niŋgi kumbra uge kalil deqaji yoqnibqa e urur mandamq aisiy niŋgi pruqtŋgo uge.

Jon 2:10

“Bati gaigai tamo naŋgi iŋgi goioqnsib wain qaqatiŋ bole namo tamo naŋgi anainjreqnab uyeqnab olo bunu wain qaqatiŋ bolesai di anainjreqnub. Ariya ni degosai. Ni wain qaqatiŋ bole tentosim namo wain qaqatiŋ bolesai anainjronum uyonub olo bunu wain qaqatiŋ bole anainjronum.”

Aposel 11:24

Barnabas a tamo tulaŋ bolequja. Qotei aqa Mondor aqaq di sonaqa a siŋgila ti wauoqnej. Aqa areqalo kalil Yesus qa siŋgilatsiq soqnej. Deqa a Qotei aqa anjam mareqnaqa tamo uŋgasari gargekoba naŋgi quoqnsib are bulyoqnsib Tamo Koba Yesus qa naŋgo areqalo siŋgilatoqneb.

Rom 13:13

Tamo a qanam walweleqnu dego kere iga kumbra bole tiŋtiŋ na walweloqnqom. Deqa iga diqoqnsim alaŋkobaoqnsim ya uge uyoqnsim nanarioqnqasai. Iga sambala kumbra dego yoqnqajqa are pruggoqnim kumbra uge jigat yoqnqasai. Iga laŋa laŋa ŋiriŋoqnsim tamo qudei naŋgi qa are ugegoqnqasai.

1 Korin 11:21

Niŋgi qunjaŋ bolet deqa niŋgi namo boqnsib Qotei tal miligiq dia iŋgi uyekriteqnab was qudei naŋgi bunu boqnsib mamnjreqnu. Osib tamo qudei naŋgi wain koba dego uyoqnsib nanarieqnub.

1 Korin 5:11

Ariya tamo bei a marqas, “E nuŋgo Kristen was bole.” Osim a olo sambala kumbra yqas kio tamo bei aqa ñoro qa maulyqas kio gisaŋ qotei qa louqas kio tamo naŋgi misiliŋnjrqas kio ya uge uyoqnsim nanarioqnqas kio gisaŋ na tamo naŋgo silali yainjrqas kio Kristen tamo di niŋgi koba na laqnaib. Niŋgi a ombla iŋgi uyoqnaib dego. Agi e nami anjam deqa neŋgreŋyosim niŋgi qa qariŋyem.

1 Tesalonaika 5:7

Iga qalie, tamo naŋgi ŋereŋeqnub qaji naŋgi qolo ŋereŋeqnub. Tamo naŋgi ya uysib nanarieqnub qaji naŋgi qolo ya uyeqnub.

Taitus 1:6

Deqa ni unime. Ni tamo bei a gate atqa osimqa a peleiyosim aqa kumbra kalil unsim di ni a gate ate. Tamo di a tamo uŋgasari kalil naŋgo ŋamgalaq di une saiqoji soqnem. A uŋa aiyeltaiq. Aqa aŋgro naŋgi Kristus qa naŋgo areqalo siŋgilatosib soqneb. Naŋgi kumbra uge uge yoqnaib. Naŋgi diqoqnsib naŋgo ai wo abu wo naŋgo anjam gotraŋyoqnaib.