Efesus 5:11 - Yesus Aqa Anjam Bole

¹¹ Tamo naŋgi ambruq di sosib kumbra uge uge yeqnub qaji naŋgi ti beteroqnaib. Kumbra naŋgi yeqnub qaji dena kumbra bole bei babtosaieqnu. Deqa niŋgi na tamo naŋgi di endegsib minjroqniye, “Nuŋgo kumbra di uge.”

Efesus 5:11 ပူးပေါင်းရင်းမြစ်များ

Matyu 18:15

Osiqa Yesus a olo anjam endegsi minjrej, “Ino was bei na ni une bei emimqa niŋgi segi aiyel ombla awoosib aqa une ni emqo qaji di minje. Minjimqa a ino anjam qusim are bulyqas di ni na ino was olo onum.

Luk 3:19

Ariya Jon a gate koba Herot aqa une bei babtosiqa deqa ŋiriŋtej. Aqa une agi aqa segi was aqa ŋauqali Herodias yaiysiq ej. Une deqa ti kumbra uge uge kalil Herot a yoqnej qaji deqa ti Jon na ŋiriŋtej.

Aposel 26:18

Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Rom 13:12

Qolo koboeqnaqa sawa suwaŋqa laqnu. Deqa iga ambru qaji kumbra kalil uratosim suwaŋ qaji kumbraq di sqom. Suwaŋ qaji kumbra di iga qoto qa gara bul jigsim sqom.

Rom 16:17

O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye.

Rom 6:21

Kumbra uge uge niŋgi nami yoqneb qaji dena niŋgi iŋgi bole kie oqneb? Agi bini niŋgi kumbra deqa olo are qaloqnsib dena niŋgi jemai eqnub. O was qu, niŋgi kumbra dena iŋgi bole bei osaioqneb. Agi kumbra dena tamo naŋgi moio gam tureqnub.

Galesia 6:8

Tamo bei na aqa areqalo namij dauryqas di aqa areqalo namij dena kumbra uge babtqas. Yim a padalqas. Ariya tamo bei a Qotei aqa Mondor aqa kumbra dauryqas di Mondor na a ŋambile yimqa a so bole gaigai sqas.

Efesus 4:22

Nami niŋgi dego so namijq di sosib walweloqneb. So namij dena niŋgi gisa gisaŋgeqnaqa niŋgi kumbra uge uge yqajqa are prugŋgoqnej. Nuŋgo kumbra dena niŋgi padalqa gamq di soqneb. Ariya bini niŋgi so namij di torei uratosib

Efesus 5:12

Tamo naŋgi ambruq di unub qaji naŋgi ulioqnsib kumbra yeqnub. Di kiyaqa? Naŋgo kumbra di tulaŋ ugedamu. Deqa e naŋgo kumbra deqa maroqnsiy sqasai. Marqai di e jemaibqas.

Efesus 5:7

Deqa niŋgi tamo deqaji naŋgi ti beteroqnaib.

Kolosi 1:12

O was qu, iga degsim niŋgi qa gago Abu Qotei pailyeqnum. Deqa niŋgi na a biŋiyoqnsib soqniye. A na niŋgi kumbra boleq di breiŋgej deqa agi niŋgi dauryoqnsib unub. Deqa iŋgi bole bole a na nami laŋ goge dia gereiyetŋgej unu qaji di niŋgi mondoŋ oqsib oqab. Agi niŋgi ti Qotei aqa segi tamo uŋgasari kalil suwaŋoq di unub qaji naŋgi ti iŋgi di oqab.

1 Tesalonaika 5:7

Iga qalie, tamo naŋgi ŋereŋeqnub qaji naŋgi qolo ŋereŋeqnub. Tamo naŋgi ya uysib nanarieqnub qaji naŋgi qolo ya uyeqnub.

2 Tesalonaika 3:14

Was bei a gago anjam iga neŋgreŋyonum qaji endi uratimqa niŋgi na a taqal waiyib isaq gilem. Yimqa aqa kumbra uge deqa a jemaiyqas.

2 Tesalonaika 3:6

Ariya was qu, gago Tamo Koba Yesus Kristus aqa ñam na iga anjam bei niŋgi endegsi merŋgwom. Was qudei naŋgi gago anjam iga nami niŋgi merŋgoqnem qaji di dauryqa uratosib wauqajqa asginjreqnu. Deqa niŋgi na was naŋgi di qoreinjrsib isaq giliye. Niŋgi naŋgi koba na saib.

1 Timoti 5:20

Kristen gate bei a une yimqa ni na a osim Kristen gate kalil naŋgo ulatamuq di tigeltosim aqa une boleq atsim minjimqa Kristen gate kalil naŋgi kumbra di unsib naŋgi dego ulaqab.

1 Timoti 5:22

Ni Kristen naŋgo gate bei atqa osimqa ino baŋ aqa gateq di urur ataim. Ni grotqam di a bunuqna une yimqa ni a ombla une oqam. Deqa ni ino segi so geregere taqatosim Qotei aqa ŋamgalaq di tamo bole une saiqoji soqne.

1 Timoti 6:5

Osib naŋgi gaigai ŋiriŋ anjam koba mareleŋeqnub. Tamo deqaji naŋgi areqalo tulaŋ uge na laqnub. Naŋgi Qotei aqa anjam bole qaliesai bolesai. Deqa naŋgi endegsib are qaleqnub, “Iga Qotei aqa kumbra dauryqom dena iga ñoro koba ti sqom.” O Timoti, naŋgo anjam di gisaŋ.

2 Timoti 3:5

Naŋgi laŋa babaŋ na Qotei aqa kumbra dauryobulosib sqab. Qotei aqa kumbra bole di siŋgila ti unu. Ariya siŋgila di naŋgi poinjrqasai. O Timoti, ni na tamo naŋgi deqaji beternjraim. Torei uratnjrsim isaq gile.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.

Taitus 2:15

O Taitus, ni gaigai tamo uŋgasari naŋgi anjam di minjroqnimqa naŋgi qusib dauryoqnqab. Tamo uŋgasari anjam gotraŋyeqnub qaji naŋgi dego siŋgila na minjroqnimqa naŋgi kumbra uge uratoqnqab. Tamo bei na ino anjam di uge qa maraiq.

Uli Anjam 18:4

Onaqa laŋ goge dia Qotei a tulaŋ koba maonaqa e aqa kakoro quem. A endegsi marej, “O ijo segi tamo uŋgasari, niŋgi Babilon qure di uratosib boiye. Une kalil a yeqnu qaji di niŋgi a dauryosib yo uge. Aqa une deqa a awai uge oqas. Niŋgi a beteryosib awai uge di o uge.