Efesus 4:31 - Yesus Aqa Anjam Bole

³¹ Deqa niŋgi are uge ti minjiŋ ti ŋiriŋ ti qoto ti misiliŋ anjam ti kumbra uge uge ti kalil torei uratiye.

Efesus 4:31 ပူးပေါင်းရင်းမြစ်များ

Aposel 21:30

Onaqa tamo uŋgasari kalil Jerusalem qureq di soqneb qaji naŋgi anjam di qusibqa minjiŋ oqetnjrnaqa leleŋkobaoqnsibqa gurgur ti atra tal miligiq gilsib Pol ojeb. Ojsib giriŋyosib oqeq atsib atra tal aqa siraŋme kalil kabuteleŋeb.

Rom 3:14

Gaigai naŋgo medabu na tamo naŋgi ugeugeinjroqnsib gulube enjreqnub.

1 Korin 14:20

O was qu, niŋgi aŋgro kiñilala naŋgi bulosib nanariosib walwelaib. Niŋgi tamo bole bole naŋgi bulosib areqalo bole na walweloqniye. Niŋgi qalie, aŋgro mom naŋgi kumbra uge qa poinjrosaieqnu. Deqa niŋgi kumbra uge kalil qa aŋgro mom naŋgi bulosib nanariosib soqniye.

1 Korin 5:8

Deqa iga Bem Tiyosai Qaji Uyqa Bati di unsim bem tiyeqnu qaji sum namij di uratosim olo bem bunuj sum saiqoji unu qaji di oqom. Sum namij di gago une ti gago kumbra uge ti sigitejunu. Ariya bem bunuj sum saiqoji unu qaji di are bole ti anjam bole ti sigitejunu.

2 Korin 12:20

Di kiyaqa? E niŋgi qa ulaeqnum. E niŋgi qa bosiy nuŋgo kumbra unsiy e niŋgi qa areboleboleibqas kio sai kio? Niŋgi dego ijo kumbra unsib niŋgi e qa areboleboleiŋgwas kio sai kio? E deqa ulaeqnum. E niŋgi qa bosiy nuŋgo kumbra endegsi unqai kio? Niŋgi anjam na qoteqnub. Niŋgi nuŋgo was naŋgi qa are ugeiŋgeqnu. Niŋgi minjiŋ oqeqnu. Niŋgi pupoeqnub. Niŋgi nuŋgo was qudei naŋgi misiliŋnjreqnub. Niŋgi yomueqnub. Niŋgi diqeqnub. Niŋgi Qotei aqa wau ugeugeiyeqnub. E degsi unqai kio?

Galesia 5:20

gisaŋ qotei qa louoqa, gumaniŋoqa, was bei jeutoqa, ŋiriŋoqa, was bei aqa iŋgi iŋgi qa maulyoqa, minjiŋ oqoqa, are ugeoqa, ino segi jejamu qa are qalsim anjam na qotoqa, was naŋgi potoaiyeltnjroqa,

Efesus 4:22

Nami niŋgi dego so namijq di sosib walweloqneb. So namij dena niŋgi gisa gisaŋgeqnaqa niŋgi kumbra uge uge yqajqa are prugŋgoqnej. Nuŋgo kumbra dena niŋgi padalqa gamq di soqneb. Ariya bini niŋgi so namij di torei uratosib

Efesus 4:25

Deqa niŋgi gisaŋ kumbra kalil uratekritosib anjam bole segi Kristen tamo uŋgasari naŋgi minjroqniye. Niŋgi kalil Kristus aqa jejamu qujai deqa niŋgi kumbra degyoqniye.

Efesus 4:26

Niŋgi minjiŋ oqimqa ariya niŋgi geregere ŋam atiye. Niŋgi olo une ato uge. Niŋgi urur minjiŋ kobotiye. Niŋgi minjiŋ ti soqnib seŋ aiaiq.

Kolosi 3:19

O tamo, niŋgi nuŋgo ŋauŋ naŋgi tulaŋ qalaqalainjroqniye. Niŋgi naŋgo are ugetetnjraib.

Kolosi 3:8

Ariya bini niŋgi kumbra uge kalil di uratekritiye. Ŋiriŋ ti minjiŋ ti are uge ti yomu anjam ti anjam jiga ti di kalil uratekritiye.

1 Timoti 3:11

Naŋgo uŋgasari naŋgi dego ni na minjrim naŋgi areqalo bole ti sosib kumbra bole bole yoqnebe. Naŋgi yomu anjam maroqnaib. Naŋgi naŋgo segi so geregere taqatosib wau kalil Qotei na naŋgi enjrej qaji di geregere ojoqnebe.

1 Timoti 3:3

A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq.

1 Timoti 5:13

Naŋgo kumbra bei agiende. Naŋgi lalie kobaeqnub. Naŋgi wauqa asginjreqnaqa ta talq giloqnsib anjam laŋa laŋa maroqnsib yomu anjam quqwajqa tulaŋ arearetnjreqnu. Deqa anjam uge uge iga marqa keresai qaji di naŋgi olo mare mare laqnub.

2 Timoti 2:23

Tamo naŋgi areqalo bole ti sosai qaji naŋgi nanari anjam laŋa laŋa marele-ŋeqnub. Deqa ni naŋgo anjam di quoqnaim. Ni qalie, anjam uge dena qoto ti ŋiriŋ ti tigelteqnu.

2 Timoti 3:3

Naŋgi qalaqalaiyo kumbra qalieqasai. Naŋgi ŋiriŋoqnsib jeu atoqnsib olo jeu turyoqnqasai. Naŋgi yomu anjam gargekoba maroqnsib naŋgo segi jejamu taqatoqnqasai. Naŋgi laŋa laŋa qotoqnsibqa tamo naŋgi ñumoqnsib kumbra bole kalil jeutoqnqab.

Taitus 1:7

Ni qalie, Kristen naŋgo gate naŋgi Qotei aqa wau taqateqnub. Deqa ni tamo bei a gate atqa osimqa ni aqa kumbra endeqaji unsim ate. A tamo uŋgasari naŋgo ŋamgalaq di une saiqoji unu. A aqa segi ñam soqtosiq tamo uŋgasari naŋgi siŋgila na taqatnjro-saieqnu di ni unsim a gate ate. A urur minjiŋ oqetosaieqnu. A ya uysiq nanariosaieqnu. A qoto ani tamo sai. A silali koba oqnqajqa tulaŋ arearetosaieqnu.

Taitus 2:3

Ariya ni na uŋa qeli naŋgi anjam endegsim minjroqne, “Kumbra bole kalil Qotei a areareteqnu qaji di niŋgi dauryosib soqniye. Niŋgi yomuoqnaib. Wain uyoqnsib nanarioqnaib. Niŋgi na Kristen was naŋgi kumbra bole osornjroqniye.

Jems 1:19

O ijo was bole, niŋgi ijo anjam endi geregere qalieosib soqniye. Niŋgi anjam bei marqa osib urur medabu waqtaib. Mati didaboqniye. Urur minjiŋ oqaiq.

Jems 3:14

Ariya niŋgi tamo qudei naŋgi qa laŋa are ugeiŋgim nuŋgo segi ñam soqtqa are qaloqnqab di niŋgi areqalo bole ti powo ti sqa keresai. Niŋgi nuŋgo kumbra uge deqa areboleboleiŋgaiq. Niŋgi areboleboleiŋgwas di niŋgi gisaŋ kumbra dauryosib Qotei aqa anjam bole olo ugetqab.

Jems 4:11

O was qu, niŋgi na Qotei aqa tamo uŋgasari naŋgi uge qa minjraib. Tamo bei na aqa was naŋgi uge qa minjrsim naŋgo jejamuq di une qametnjrqas di a dal anjam dego uge qa marsiq qamqo. Niŋgi dal anjam uge qa marsib qamqab di niŋgi dal anjam aqa sorgomq di sqa uratonub. Osib laŋa pegiyonub.

1 Pita 2:1

Niŋgi ŋambile bunuj eb deqa niŋgi kumbra uge kalil uratiye. Gisaŋ anjam ti maqu kumbra ti are uge ti yomu anjam ti kalil di niŋgi torei uratekritiye.

1 Jon 3:12

Iga Kein aqa kumbra dauryqasai. Kein a Satan aqa tamo. A na aqa aube Abel qalnaq moiej. Kiyaqa a na aqa aube qalnaq moiej? Utru agiende. A kumbra uge yo qaji tamo deqa. Ariya Abel a kumbra tiŋtiŋ yoqnej deqa Kein na a qalnaq moiej.

1 Jon 3:15

Tamo naŋgi naŋgo Kristen was naŋgi qa are ugeinjreqnu di naŋgo kumbra dena naŋgi na naŋgo was naŋgi ñumobuleqnub. Niŋgi qalie, tamo ñumo qaji tamo naŋgi ŋambile gaigai sqa keresai.

Uli Anjam 12:10

Onaqa olo laŋ goge dia laŋ aŋgro bei tulaŋ koba leleŋonaqa e aqa kakoro quem. A endegsi marej, “Tamo uŋgasari naŋgi padalqa laqnabqa gago Tamo Koba Qotei a na naŋgi eleŋqo. A kumbra di yqo deqa aqa siŋgila boleq dekritqo. Deqa a gago Mandor Koba unu. Gago was naŋgo ñam ugetetnjro qaji tamo Satan a na qolo ti qanam ti Qotei aqa ŋamgalaq dia naŋgo ñam ugetetnjreqnu. Satan agi waiyonub mandamq aiqo. Deqa bini Qotei aqa Ŋiri Kristus a ñam koba ti siŋgila ti ejunu.