Efesus 4:24 - Yesus Aqa Anjam Bole

²⁴ Osib dena niŋgi tamo uŋgasari bunuj soqniye. Qotei na niŋgi a bul sqa marsiq deqa nuŋgo so bunuj gereiyetŋgej. Niŋgi qalie, tamo naŋgi so bunujq di unub qaji naŋgo kumbra tulaŋ bole tiŋtiŋo. Naŋgi Qotei aqa segi kumbra boleq di unub.

Efesus 4:24 ပူးပေါင်းရင်းမြစ်များ

2 Korin 5:17

Deqa tamo bei a Kristus beteryesqas di Qotei na aqa are bulyetimqa a tamo bunuj brantqas. Niŋgi quiye. Aqa kumbra namij torei koboqo. Kumbra bunuj olo brantqo.

Efesus 2:10

Kristus Yesus aqa wau na Qotei na iga tamo uŋgasari bunuj gereigosiqa ŋambile egej. Di kiyaqa? Kumbra bole qa gam a na nami iga gereiyetgej qaji di iga dauryosim walweloqnqajqa deqa.

Rom 13:14

Niŋgi Tamo Koba Yesus Kristus beteryosib a gara bul jigsib soqniye. Sosib deqa niŋgi nuŋgo jejamu qa areqalo uge uge di dauryqajqa are qaloqnqasai.

Efesus 6:11

Osib qoto qa iŋgi iŋgi Qotei na iga egeqnu qaji di jigeleŋosib siŋgila na tigelosib Satan aqa gisaŋ anjam ti aqa uli kumbra ti gotraŋyoqnsib qotoqniye.

Rom 6:4

Iga yanso osim dena iga Kristus beteryosim a koba na moiobulem. Deqa Abu Qotei na iga Kristus koba na subq atej. Osiqa aqa siŋgila kobaquja na olo Kristus subq na tigeltej. Deqa iga dego a ti ŋambile bunuj em. Deqa iga kumbra bole dauryoqnqom.

2 Korin 3:18

Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

2 Korin 4:16

Iga Qotei aqa kumbra deqa are qaloqnsim deqa iga aqa wau ojqajqa asgigosaieqnu. Bole, gago jejamu a uge qa laqnu. Ariya gago are miligi a bati gaigai olo boleoqnsiq siŋgilaeqnu.

Rom 13:12

Qolo koboeqnaqa sawa suwaŋqa laqnu. Deqa iga ambru qaji kumbra kalil uratosim suwaŋ qaji kumbraq di sqom. Suwaŋ qaji kumbra di iga qoto qa gara bul jigsim sqom.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

1 Pita 2:2

Iga qalie, aŋgro mom naŋgi muŋgum qaq uyqajqa qarnjreqnu. Dego kere niŋgi muŋgum qaq boledamu Qotei aqaq dena beqnu qaji di oqajqa are qaloqniye. Muŋgum qaq di agi Qotei aqa anjam. Muŋgum qaq di jiga bei saiqoji. Muŋgum qaq dena nuŋgo qunuŋ aqaryaiyimqa niŋgi tulaŋ boleosib siŋgilaqab. Yim Qotei na niŋgi oqas.

Rom 8:29

Tamo naŋgi Qotei na nami oqa marej qaji naŋgi di a na giltnjrej dego. Yim naŋgi aqa Aŋgro Yesus a bulosib aqa segi kumbra bole dauryqajqa deqa. Gam dena Qotei aqa aŋgro gargekoba naŋgi brantoqnib Kristus a naŋgo was matu sqas.

Jon 17:17

Ino anjam kalil bole. Ni na ino anjam bole di naŋgi minjroqnimqa naŋgo are miligiq di wauoqnimqa dena naŋgi ino segi tamo uŋgasari tiŋtiŋ sqab.

Galesia 6:15

Iga muluŋ aiqom di laŋa. Iga muluŋ aiqasai di dego laŋa. Ariya Qotei na iga tamo uŋgasari bunuj gereigej di kumbra utru ti.

Galesia 3:27

Niŋgi kalil yanso osib Kristus beteryejunub deqa niŋgi Kristus a gara bul jigsib unub.

1 Korin 15:53

Gago jejamu ugeqas qaji endi iga uratosim olo jejamu bei ugeqasai qaji di oqom. Gago jejamu moiqas qaji endi iga uratosim olo jejamu bei moiqasai qaji di oqom.

Efesus 2:15

A moiej gam dena a na Moses aqa dal anjam kalil taqal atekritej. A degyej. Di kiyaqa? A na Juda tamo naŋgi ti sawa bei bei qaji tamo naŋgi ti turtnjrim naŋgi tamo bunuj qujaiosib sqajqa deqa. Kumbra dena a na jeu kobotosiqa iga lawo kumbraq di atej unum.

Hibru 12:14

Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai.

Hibru 1:8

Ariya Qotei na aqa segi Ŋiri endegsi minjej, “O Qotei, ni bati gaigai Mandor Koba sqam. Sosim ni kumbra tiŋtiŋ na ino segi tamo uŋgasari naŋgi taqatnjroqnqam.

Luk 1:75

Deqa iga mandamq endia bati gaigai kumbra tiŋtiŋ dauryoqnsimqa kumbra bole kalil Qotei a tulaŋ areareteqnu qaji di siŋgila na yoqnqom.

Rom 7:6

Bati deqa dal anjam na iga tonto talq waigobulonaq soqnem. Ariya bini iga Kristus ombla moiobulejunum deqa iga olo dal anjam aqa sorgomq di sosai. Iga bini waueqnum di iga dal anjam nami neŋgreŋyeb qaji di dauryqajqa wauosai. Qotei aqa Mondor na kumbra bunuj osorgeqnaqa iga kumbra di dauryqajqa waueqnum.

Rom 12:2

Niŋgi mandam tamo naŋgo kumbra dauryosib walwelaib. Qotei na areqalo bunuj eŋgoqnimqa niŋgi kumbra bunuj dauryoqniye. Osib kumbra dena niŋgi Qotei aqa areqalo geregere qalieqab. Agi niŋgi kumbra bole ti kumbra Qotei a tulaŋ areareteqnu qaji de ti kumbra tulaŋ tiŋtiŋo de ti geregere qalieqab.

2 Pita 1:4

Osiqa laŋ goge qaji iŋgi bole bole kalil a nami iga egwa marej qaji di iga egej. Are prugwajqa kumbra mandamq endi tulaŋ koba unu. Kumbra dena iga ugeugeigeqnu. Ariya Kristus a na laŋ goge qaji iŋgi bole bole di iga egej. Aqa kumbra dena a na niŋgi aqaryaiŋgimqa niŋgi kumbra uge uge kalil di uratosib ŋambile osib Qotei aqa segi kumbra bole ti soqniye.