Efesus 4:14 - Yesus Aqa Anjam Bole

¹⁴ Deqa iga olo aŋgro kiñilala bul sqasai. Tamo qudei naŋgi gisaŋ kumbra ti maqu kumbra ti tulaŋ qalieosib yeqnub. Deqa naŋgi gisaŋ anjam koba marsib laqnub. Jagwa na yuwal tigelteqnaqa oqe aieqnu dego kere anjam dena tamo qudei naŋgo areqalo niñaqyetnjreqnu. Ariya iga aŋgro kiñilala bul sqasai deqa anjam dena gago areqalo niñaqyetgwasai.

Efesus 4:14 ပူးပေါင်းရင်းမြစ်များ

Matyu 11:7

Onaqa Jon aqa aŋgro naŋgi Yesus aqa anjam di qusibqa naŋgi olo puluosib Jon minjqajqa aieqnabqa Yesus a na tamo uŋgasari gargekoba naŋgi di Jon qa endegsi minjrej, “Niŋgi nami wadau sawaq gilsibqa niŋgi tamo kiero unqajqa gileb? Niŋgi tamo silai aqa baŋga bul jagwa na pileteqnaqa di unqajqa gileb kio? Sai. Jon a tamo deqaji sai.

Matyu 24:11

Gisaŋ tamo tulaŋ gargekoba naŋgi dego boqnsib tamo uŋgasari naŋgi endegsib minjroqnqab, ‘E Qotei aqa medabu o qaji tamo bole.’ Degsib naŋgi gisaŋnjroqnqab.

Matyu 24:24

Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

Aposel 23:21

Deqa ni naŋgo anjam di quetnjraim. Tamo 40-pela naŋgi anjam endegsib qosisib maronub, ‘Iga Pol qalsim moiotqom. Gago anjam di iga bole dauryqom. Iga uratqasai bolesai. Deqa iga Pol moiotosaisosimqa iga iŋgi ti ya ti mati uyqasai. Iga Pol qalsim moiotosimqa ariya bati deqa iga olo iŋgi ti ya ti uyqom.’ Naŋgi anjam degsib qosonub. Deqa bini naŋgi gamq di tariŋeqnub. Ni na Pol osi aioqnimqa gamq dia naŋgi Pol qalsib moiotqab.”

1 Korin 12:2

Niŋgi qalie, nami niŋgi Qotei qalieosaisonabqa sulum naŋgi na niŋgi titŋgeqnabqa niŋgi naŋgi daurnjroqneb. Sulum naŋgi di anjam marqa keresai.

1 Korin 14:20

O was qu, niŋgi aŋgro kiñilala naŋgi bulosib nanariosib walwelaib. Niŋgi tamo bole bole naŋgi bulosib areqalo bole na walweloqniye. Niŋgi qalie, aŋgro mom naŋgi kumbra uge qa poinjrosaieqnu. Deqa niŋgi kumbra uge kalil qa aŋgro mom naŋgi bulosib nanariosib soqniye.

1 Korin 3:19

Di kiyaqa? Tamo naŋgi mandam qaji powo ti unub qaji naŋgi Qotei aqa ŋamgalaq di nanari tamo unub. Agi Qotei aqa anjam bei nami endegsib neŋgreŋyeb unu, “Tamo naŋgi powo ti unub qaji naŋgi naŋgo kumbra uge na tamo qudei naŋgi ugeugeinjrqa are qaleqnub. Deqa Qotei a kamba naŋgo kumbra uge dena naŋgi olo padaltnjreqnu.”

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

Galesia 3:1

O Galesia tamo, niŋgi tulaŋ nanari. Iga nami niŋgi Yesus Kristus osorŋgem. Kumbra dena niŋgi a ŋamburbasq di gaiŋesonaq unobuleb. Ariya tamo yai na nuŋgo areqalo olo niñaqyetŋgej deqa niŋgi Kristus aqa anjam olo urateqnub?

Efesus 6:11

Osib qoto qa iŋgi iŋgi Qotei na iga egeqnu qaji di jigeleŋosib siŋgila na tigelosib Satan aqa gisaŋ anjam ti aqa uli kumbra ti gotraŋyoqnsib qotoqniye.

1 Timoti 3:6

Kristen tamo bunuj a gate ataim. A gate sqas di a diqosim marqas, “E tamo bolequja.” Yim Qotei na nami Satan ŋolawotej dego kere tamo di dego ŋolawotqas.

2 Timoti 1:15

Ni qalie, tamo kalil Esia sawaq di unub qaji naŋgi e uratbosib jaraieb. Figelus wo Hermogenes wo naŋgi aiyel dego e uratbosib jaraieb.

2 Timoti 3:13

Tamo uge uge naŋgi ti gisaŋ tamo naŋgi ti brantoqnsib tamo uŋgasari naŋgi gisa gisaŋnjroqnqab. Deqa Satan a na kamba dego gisaŋ tamo naŋgi di gisa gisaŋnjroqnqas. Yim naŋgo kumbra di tulaŋ ugedamuqas.

2 Timoti 4:3

Ni que. Bunuqna tamo gargekoba naŋgi Qotei aqa anjam quqwa asginjroqnimqa naŋgi anjam utru bei bei quqwajqa are prugnjroqnim naŋgo segi areqalo na tamo qudei naŋgi metnjroqnib bosib gisaŋ anjam minjroqnib qusib arearetnjroqnqas.

Hibru 13:9

Deqa tamo qudei naŋgi bosib anjam utru segi segi na nuŋgo are tigeltetŋgibqa niŋgi naŋgo anjam di dauryaib. Osib Qotei aqa gam urataib. Qotei a iga qa are tulaŋ boleiyeqnu anjam dena iga gago are siŋgilatoqnqom. Tamo qudei naŋgo iŋgi uyo qa anjam mareqnub. Anjam di gisaŋ. Anjam di laŋa jejamu qa anjam. Deqa anjam dena iga gago are siŋgilatqa keresai. Tamo uŋgasari naŋgi iŋgi uyo qa anjam di dauryeqnub ariya kumbra dena naŋgi yala aqaryainjrosaieqnu.

Jems 1:6

Ariya tamo di a Qotei pailyqa osimqa a areqalo aiyeltaiq. Osim endegsi maraiq, “Qotei na iŋgi di ebqas kio sai kio?” A degsi maraiq. A Qotei qa aqa areqalo siŋgilatosim areqalo qujaitosim pailyem. Jagwa tigelosiq yuwal korkortoqnsiqa oqe aieqnu dego kere tamo areqalo aiyelteqnu qaji a bati bei aqa areqalo siŋgilatoqnsiqa olo bati bei aqa areqalo siŋgilatosaieqnu.

Jems 3:4

Niŋgi qobuŋ uniye. Qobuŋ a tulaŋ kobaquja. Ariya aqa kuñi tulaŋ kiñala. Ariya jagwa koba tigelosiq qobuŋ tutqa laqnaqa qobuŋ aqa abu na kuñi ojoqnsiq tingiteqnaq qobuŋ a dauryoqnsiq gileqnu.

2 Pita 2:18

Tamo naŋgi di naŋgo segi medabu waqtoqnsib diqoqnsib anjam uge uge mareqnub. Naŋgi na tamo qudei naŋgi walawalainjreqnab naŋgi sambala kumbra yoqnsib naŋgo segi jejamu aqa kumbra uge uge dauryeqnub. Tamo naŋgi di ya ya endi are bulyosib tamo uge naŋgo kumbra urateb. Ariya tamo uge naŋgi na olo naŋgi titnjreqnab naŋgi kumbra uge uge dauryeqnub.

1 Jon 2:19

Jeu tamo naŋgi di nami gago ambleq di soqneb. Sosib olo bunuqna iga uratgosib jaraieb. Di kiyaqa? Naŋgi Kristen tamo bolesai deqa. Naŋgi Kristen tamo bole qamu naŋgi iga ti unum qamu. Ariya naŋgi iga uratgosib jaraieb deqa iga qalieonum, naŋgi Kristen tamo bolesai.

1 Jon 2:26

O was qu, gisaŋ tamo naŋgi na niŋgi gisaŋgwajqa laqnub. E deqa are qalsim anjam endi neŋgreŋyosim niŋgi qa qariŋyonum.

1 Jon 4:1

O ijo kadoi bole, tamo gargekoba naŋgi mandamq endia laqnsibqa gisaŋ anjam endegsib mareqnub, “Qotei aqa Mondor na gago medabu siŋgilatetgeqnaqa iga anjam mareqnum.” Tamo gargekoba naŋgi anjam degsib mareqnub di gisaŋ. Deqa niŋgi mati mondor kalil naŋgi peginjrsib naŋgi Qotei aqaq dena beb kio sai kio di niŋgi qalieqab. Qalieosib naŋgo anjam di qusib nuŋgo areqaloq di siŋgilataib.

Jut 1:12

Bati gaigai niŋgi nuŋgo iŋgi goioq di awooqnsib Qotei aqa qalaqalaiyo kumbra dauryeqnab tamo uge naŋgi di uli na boqnsib nuŋgo ambleq di kumbra tulaŋ jigat yeqnub. Naŋgi kumbra di yqajqa jemainjrosaieqnu. Naŋgi naŋgo segi jejamu qa are qaleqnub. Jagwa na awa puyeqnaqa urur koboeqnu dego kere tamo naŋgi di kumbra bole bei babtosaieqnub. Qura geitqa batieqnaqa a geitosaieqnu dego kere tamo uge naŋgi di kumbra bole bei babtosaieqnub. Iga ŋamtaŋ moio otoroqnsim taqal breinjreqnum dego kere tamo naŋgi di Qotei na osim sawa ugeq breinjrqas. Deqa mondoŋ naŋgi moiougetosib torei padalqab.

Uli Anjam 19:20

Ariya tamo hos quraq di awesoqnej qaji a na wagme juwaŋ wo Satan aqa gisaŋ anjam maro tamo wo naŋgi aiyel ŋambile sonab ojsiqa wainjrnaq ŋamyuoq aieb. Ŋamyuoq dia meniŋ kalil yusiq ñaŋgaeqnu. Satan aqa gisaŋ anjam maro tamo di nami wagme juwaŋ aqa ŋamgalaq dia maŋwa tulaŋ kokba yoqnej. Aqa kumbra dena a na tamo uŋgasari wagme juwaŋ aqa toqor osib aqa sulum biŋiyoqneb qaji naŋgi gisa gisaŋnjroqnej.