Efesus 4:1 - Yesus Aqa Anjam Bole

¹ E Pol. E Tamo Koba Yesus aqa wau ojeqnum deqa e tonto talq endi unum. Qotei na niŋgi a dauryqa osiq metŋgej deqa e na nuŋgo are tigeltetŋgitqa niŋgi kumbra a tulaŋ areareteqnu qaji di dauryosib walweloqniye.

Efesus 4:1 ပူးပေါင်းရင်းမြစ်များ

Aposel 9:31

Bati deqa Judia sawaq dia, Galili sawaq dia, Samaria sawaq dia dego tamo uŋgasari Yesus qa naŋgo areqalo siŋgilateb qaji naŋgi geregere lawo na soqneb. Naŋgi bati gaigai Tamo Koba Qotei aqa ñam biŋiyoqnsibqa aqa anjam dauryeqnabqa Qotei aqa Mondor na naŋgo are siŋgilatetnjreqnaqa tamo uŋgasari tulaŋ gargekoba are bulyoqnsib naŋgo miligiq aieqnab naŋgi tulaŋ kobaoqneb.

Rom 11:29

Iga qalie, Qotei na aqa segi tamo uŋgasari naŋgi metnjroqnsiq iŋgi bole bole enjreqnu. Aqa kumbra di a olo uratqa keresai.

Rom 12:1

Ariya was qu, Qotei a iga qa are tulaŋ boleiyosiq eleŋej deqa e niŋgi siŋgila na endegsi merŋgwai. Niŋgi nuŋgo segi jejamu osib Qotei atraiyiye. Osib deqa niŋgi ŋambile sosib Qotei aqa segi tamo uŋgasari tiŋtiŋ sqab. Deqa niŋgi kumbra Qotei a tulaŋ areareteqnu qaji di yoqniye. Niŋgi degyoqnqab di niŋgi Qotei aqa kumbra na bole louoqnqab.

1 Korin 4:16

Deqa e niŋgi endegsi merŋgwai. Niŋgi ijo kumbra kalil unoqnsib dauryoqniye.

2 Korin 10:1

Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Korin 5:20

Deqa iga Kristus aqa medabu osim aqa anjam marsim laqnum. Qotei a gago medabu na tamo kalil naŋgi metnjreqnu. Iga na tamo kalil naŋgi Kristus aqa anjam palontosim endegsi minjreqnum, “Niŋgi jeu kumbra uratosib Qotei ombla are qujaitosib soqniye.”

2 Korin 6:1

Iga Qotei ombla waueqnum deqa iga niŋgi siŋgila na endegsi merŋgwom, “Qotei a niŋgi qa are boleiyeqnu aqa kumbra di niŋgi osib olo laŋa urataib.”

Galesia 4:12

O was qu, e niŋgi siŋgila na endegsi merŋgwai. Niŋgi e bul soqniye. Agi e nami dal anjam aqa sorgomq di sqa uratosim niŋgi bul soqnem. Sonam bati deqa niŋgi e kumbra uge bei ebosaioqneb.

Efesus 2:10

Kristus Yesus aqa wau na Qotei na iga tamo uŋgasari bunuj gereigosiqa ŋambile egej. Di kiyaqa? Kumbra bole qa gam a na nami iga gereiyetgej qaji di iga dauryosim walweloqnqajqa deqa.

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Efesus 4:17

Deqa e Tamo Koba Yesus aqa ñam na niŋgi siŋgila na endegsi merŋgwai. Niŋgi sawa bei bei qaji tamo naŋgo kumbra uge uge olo dauryosib walwelaib. Di kiyaqa? Naŋgo areqalo tulaŋ niñaqejunu deqa.

Efesus 4:4

Iga kalil tamo qujaionum. Deqa iga Kristus aqa jejamu qujai. Iga kalil Mondor qujai ejunum. Deqa Qotei na niŋgi iŋgi qujai qa tariŋqa osiq metŋgej. Iŋgi qujai di agi laŋ qaji iŋgi bole bole a na mondoŋ iga egwas qaji.

Efesus 5:2

Kristus a na iga tulaŋ qalaqalaigosiq deqa aqa segi ŋambile uratosiq iga qa moiej. Dego kere niŋgi dego qalaqalaiyo kumbra dauryosib walweloqniye. Atra tamo naŋgi atraiyo iŋgi iŋgi sabaŋ quleq bolequja di oqnsib Qotei atraiyeqnub dego kere Kristus a na aqa segi ŋambile Qotei atraiyosiq moinaqa Qotei a deqa tulaŋ areboleboleiyej.

Filipai 1:27

Ijo anjam kobaquja bei agiende. Niŋgi Kristus aqa anjam bole di geregere dauryosib walweloqniye. Yim e olo niŋgi qa bosiy nuŋgwai kio endi sosiy niŋgi qa anjam laŋa quqwai kio di uŋgum, e qalieqai, niŋgi siŋgila na tigeloqnsib areqalo qujai na wauoqnsib tamo uŋgasari naŋgo are tigeltetnjreqnabqa naŋgi Kristus aqa anjam bole quoqnsib naŋgo areqaloq di siŋgilateqnub.

Filipai 3:14

Tamo naŋgi gurguroqnsib bubuŋeqnub di naŋgi awai oqajqa. Dego kere e awai oqa maroqnsim siŋgila na urureqnum. Awai agiende. Kristus Yesus aqa wau na Qotei na e metbimqa e laŋ qureq oqsiy dia a ombla bole gaigai sqai.

Kolosi 1:10

Osib naŋgo walwel ti naŋgo kumbra ti Tamo Koba Yesus aqa walwel ti aqa kumbra ti keretqab. Yim deqa ni naŋgo kumbra kalil qa tulaŋ areboleboleimoqnqas. O Abu, ni na Kolosi Kristen naŋgi aqaryainjroqnim naŋgi kumbra bole bole degsib yoqnsib ni qa geregere qalieoqnib naŋgo qalie di tulaŋ kobaoqnqas.”

Kolosi 2:6

Niŋgi nami Tamo Koba Kristus Yesus osib nuŋgo areq di ateb. Deqa niŋgi a ombla walweloqniye.

Kolosi 4:12

Epafras a na dego niŋgi kaiyeiŋgwo. A nuŋgo leŋ. A Kristus Yesus aqa wau tamo. A gaigai siŋgila na niŋgi qa endegsi Qotei pailyeqnu, “O Abu, ni na Kolosi Kristen naŋgi aqaryainjrimqa naŋgi siŋgila na tigeloqnsib naŋgi Kristen tamo tulaŋ boledamu sosib ino kumbra bole keretosib ino areqalo kalil geregere qalieqab.”

1 Tesalonaika 2:12

Iga na nuŋgo areqalo tigeltetŋgosim nuŋgo are miligi siŋgilatetŋgwajqa deqa osim anjam merŋgoqnem. Osim niŋgi anjam endegsi merŋgoqnem, “Niŋgi Qotei aqa kumbra keretosib walweloqniye. Qotei agi a na niŋgi endegsi metŋgej, ‘Niŋgi ijoq babqa e nuŋgo Mandor Koba sosiy niŋgi taqatŋgosiy joqsiy laŋ qureq oqitqa dia niŋgi so bole gaigai sqab.’”

2 Tesalonaika 1:11

Deqa was qu, iga bati gaigai niŋgi qa osim gago Qotei endegsi pailyeqnum, “O Abu, ni na Tesalonaika Kristen naŋgi aqaryainjroqnimqa kumbra kalil ni nami naŋgi dauryqa metnjrem qaji di naŋgi dauryoqnibqa ni unsim minjrqam, ‘Niŋgi keretonub.’ O Abu, ni na naŋgi siŋgilatnjrimqa kumbra bole kalil naŋgi yqajqa arearetnjreqnu qaji di naŋgi yoqnqab. Osib Yesus qa naŋgo areqalo siŋgilatoqnsib aqa wau geregere ojqab.” O was qu, iga degsim niŋgi qa Qotei pailyeqnum.

2 Timoti 1:9

Qotei a na iga eleŋosiqa iga aqa segi tamo uŋgasari sqajqa deqa metgej. Iga nami kumbra bole yoqnem a deqa are qalsiq iga metgosai. Tulaŋ nami a iŋgi iŋgi kalil atosaisosiqa a aqa segi areqalo na iga metgosiqa Kristus Yesus aqa wau na iga qa are boleiyosiqa eleŋej.

Taitus 2:10

Naŋgo iŋgi bei bajiŋaib. Naŋgo anjam geregere dauryosib naŋgoq di kumbra bole yoqniye. Yimqa wau qa gate naŋgi nuŋgo kumbra di unsib areboleboleinjrqas. Deqa niŋgi kumbra bole bole yoqnibqa nuŋgo wau qa gate naŋgi unoqnsib Qotei agi iga eleŋej qaji aqa anjam quoqnsib maroqnqab, ‘Di anjam bole.’” O Taitus, Qotei aqa anjam di agi iga palonteqnum. Deqa ni na kaŋgal tamo naŋgi anjam degsim minjroqne.

Hibru 13:21

Qotei qujai di a na niŋgi siŋgilatŋgoqnimqa niŋgi aqa areqalo geregere dauryosib kumbra bole bole yoqniye. A gago are miligiq di wauoqnimqa iga Yesus Kristus aqa wau na kumbra kalil a tulaŋ areareteqnu qaji di yoqnsim sqom. Iga kalil bati gaigai aqa ñam soqtoqnqom. Bole.

Hibru 3:1

O Kristen was qu, Qotei laŋ qureq di unu qaji a na niŋgi dego metŋgej deqa niŋgi Yesus qa are qaloqniye. Qotei na Yesus qariŋyonaq mandamq aiej. A gago atra tamo kobaquja unu. Deqa iga a qa gago areqalo siŋgilatoqnsim aqa ñam boleq na maroqnqom.

1 Pita 2:11

O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye.

1 Pita 3:9

Ariya tamo qudei naŋgi na niŋgi kumbra uge eŋgibqa niŋgi na kamba naŋgi kumbra uge enjraib. Naŋgi na niŋgi misiliŋgoqnsib anjam uge merŋgibqa niŋgi na kamba anjam uge minjraib. Niŋgi kamba naŋgi qa oqnsib Qotei pailyoqniye. Qotei a niŋgi kumbra degyqa osiqa niŋgi metŋgej. Deqa niŋgi kumbra bole degyibqa Qotei a na kamba niŋgi kumbra bole eŋgoqnqas.

1 Pita 5:10

Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab.

2 Pita 1:3

Yesus Kristus a segi Qotei. A siŋgila koba ti unu. Aqa siŋgila dena a na gago ŋambile siŋgilatetgwajqa deqa marsiq iŋgi iŋgi tulaŋ boledamu iga egej. Aqa kumbra dena a na iga aqaryaigej deqa iga Qotei aqa kumbra geregere dauryeqnum. Iga Kristus qa bole qalieonum deqa iga kumbra degyeqnum. Aqa segi ñam koba na ti aqa siŋgila na ti aqa kumbra bole na ti a na iga metgej.

2 Jon 1:5

Ariya uŋa, e ni anjam bei mermitqa ni qusim daurye. Anjam agiende. Iga segi segi na gago Kristen was naŋgi qalaqalainjroqnqom. E dal anjam bunuj ni mermosai. Dal anjam di iga nami qusim ojem.