Efesus 3:5 - Yesus Aqa Anjam Bole

⁵ Qotei na aqa uli anjam di tamo uŋgasari nami soqneb qaji naŋgi minjrosaioqnej. Ariya bini a na aqa Mondor aqa siŋgila na anjam di babtoqnsiq aqa anjam maro tamo naŋgi ti aqa medabu o qaji tamo naŋgi ti minjreqnu.

Efesus 3:5 ပူးပေါင်းရင်းမြစ်များ

Matyu 13:17

Niŋgi quiye. E bole merŋgwai. Nami Qotei aqa medabu o qaji tamo naŋgi ti tamo naŋgi kumbra bole bole yoqneb qaji naŋgi ti tulaŋ gargekoba kumbra niŋgi bini uneqnub qaji di unqajqa are koba soqnej. Ariya naŋgi unosaioqneb. Anjam niŋgi bini queqnub qaji di dego naŋgi quqwajqa are koba soqnej. Ariya naŋgi quosaioqneb.”

Matyu 20:7

Onaqa naŋgi na minjeb, ‘Tamo bei na iga wau egosai deqa iga laŋa tigelejunum.’ Onaqa wau lanja na minjrej, ‘Niŋgi dego gilsib ijo iŋgi wauq di wauoiye.’

Matyu 23:34

“Deqa niŋgi quiye. E na Qotei aqa medabu o qaji tamo naŋgi ti Qotei aqa powo tamo ti Qotei aqa dal anjam qalie tamo naŋgi ti qariŋnjroqnit nuŋgoq boqnqab. Nuŋgoq boqnibqa niŋgi na naŋgi qudei ñumoqnsib moiotnjroqnqab. Osib naŋgi qudei ŋamburbasq di gaintnjrqab. Osib naŋgi qudei ojeleŋosib nuŋgo Qotei tal miligiq dia kumbaiŋnjroqnqab. Osib naŋgi qudei teteinjribqa naŋgi jaraiosib qure bei beiq giloqnqab.

Luk 10:24

Niŋgi quiye. Nami mandor kokba naŋgi ti Qotei aqa medabu o qaji tamo naŋgi ti tulaŋ gargekoba kumbra niŋgi bini uneqnub qaji di unqajqa maroqneb naŋgi unosaioqneb. Anjam niŋgi bini queqnub qaji di dego naŋgi quqwajqa maroqneb naŋgi quosaioqneb.”

Luk 11:49

“Utru deqa Qotei a endegsi marqo, ‘E na ijo medabu o qaji tamo naŋgi ti tamo naŋgi ijo anjam mare mare laqnub qaji naŋgi ti qariŋnjritqa tamo uŋgasari bini bati endeqa unub qaji naŋgoq giloqnibqa naŋgi na naŋgi jeutnjroqnsib tulaŋ ugeugeinjroqnqab. Qudei ñumoqnib moreŋoqnqab.’ Qotei a powo koba ti unu deqa a degsi marqo.

Jon 14:26

Bunuqna Aqaryaiŋgo tamo a niŋgi qa bosim siŋgilatŋgwas. A Qotei aqa Mondor Bole. Ijo Abu na a qariŋyim ijo ñam na bosim anjam kalil niŋgi merŋgekritqas. Osim nuŋgo areqalo tigeltetŋgimqa anjam kalil e nami niŋgi merŋgoqnem qaji deqa olo are qalqab.

Jon 16:13

Ariya anjam bole qa Mondor a bosimqa nuŋgo areqalo gereiyetŋgimqa niŋgi anjam bole kalil poiŋgekritqas. A aqa segi areqalo na anjam merŋgwasai. A anjam quoqnsim di segi niŋgi merŋgoqnqas. Osim kumbra mondoŋ branteleŋqas qaji di dego ubtsim merŋgoqnqas.

Aposel 10:28

Unjrsiqa minjrej, “Niŋgi qalie, e Juda tamo. Niŋgi Juda tamo sai. Niŋgi sawa bei bei qaji tamo. Deqa gago Juda kumbra agiende. Iga nuŋgo tal gogetqajqa getento koba. Iga niŋgi koba na laqajqa dego getento koba. Moses aqa dal anjam nami degsi neŋgreŋyej unu. Di uŋgum. Qotei na e endegsi merbej, ‘Sawa bei bei qaji tamo naŋgi ijo ŋamdamuq di tamo bolesai edegaim.’ Qotei na e degsi merbej.

Rom 16:25

Qotei a siŋgila koba ti unu deqa a na niŋgi siŋgilatŋgwas. Yim niŋgi Yesus Kristus aqa anjam bole e na mare mare laqnum qaji di osib nuŋgo areqaloq di siŋgilatqab. O was qu, tulaŋ nami Kristus aqa anjam bole di uliesoqnej.

1 Korin 2:10

O was qu, anjam di nami uliesonaqa Qotei na aqa Mondor aqa wau na babtosiq mergej. Mondor a iŋgi iŋgi kalil qa qalie. Qotei aqa areqalo kalil uliejunu qaji di Mondor a qalie.

Efesus 2:20

Niŋgi Qotei aqa tal bul unub. Qotei a segi na tal di gereiyej. Qotei aqa anjam maro tamo naŋgi ti aqa medabu o qaji tamo naŋgi ti tal aqa ai bul tigelejunub. Qotei a segi na tal di tigeltej unu. Kristus Yesus a segi tal aqa ai tuma qaji. A segi na tal di siŋgilatejunu.

Efesus 3:9

Niŋgi qalie, Qotei a na iŋgi iŋgi kalil ateleŋej unub. Ariya kumbra bole kalil a na iga egwajqa nami aqa areqaloq di soqnej qaji di a ulitosiq soqnej. Ariya bini e na aqa areqalo di olo boleq atqajqa deqa marsiq e wau ebej.

Jut 1:17

Ariya ijo was bole, niŋgi kumbra mondoŋ brantqas qaji deqa are qaloqniye. Nami gago Tamo Koba Yesus Kristus a na aqa anjam maro tamo naŋgi qariŋnjreqnaqa niŋgi qa boqnsib anjam merŋgoqneb. Naŋgo anjam deqa niŋgi olo are qaloqniye.