Efesus 2:12 - Yesus Aqa Anjam Bole

¹² bati deqa niŋgi Kristus aqaq di sosai. Niŋgi isaq di soqneb. Niŋgi Israel tamo uŋgasari naŋgi ti sosai dego. Qotei na Israel naŋgi iŋgi bole bole enjrqa minjrsiqa aqa anjam di siŋgilatosiq soqnej. Ariya anjam di a na niŋgi merŋgosai. Deqa iŋgi bole bole mondoŋ brantqas qaji deqa niŋgi tariŋosaioqneb. Niŋgi mandamq endia laŋa Qotei qaliesai soqneb.

Efesus 2:12 ပူးပေါင်းရင်းမြစ်များ

Luk 1:72

Qotei a nami gago moma utru naŋgi qa dulosiqa aqaryainjrej. Aqa segi anjam nami marsiq siŋgilatej qaji deqa are qalsiqa naŋgi aqaryainjrej.

Jon 10:16

Ijo kaja qudei dego jeŋ oqeq di unub. Naŋgi jeŋ miligiq endi sosai. Deqa e naŋgi dego joqsiy bosiy ijo kaja jeŋ miligiq endi unub qaji naŋgi ti turtnjrsiy jeŋ qujaiq di breinjrqai. Yim naŋgi mandor qujaiq di sosib ijo medabu dauryoqnqab.

Jon 15:5

“E segi wain ŋamtaŋ bole. Niŋgi ijo dani bul. Tamo bei a e beterbesqas di e dego a beteryesqai. Yimqa a gei koba ateleŋoqnqas. Niŋgi e uratbqab di niŋgi kumbra bole bei yqa keresai.

Jon 4:22

Niŋgi Samaria qaji tamo uŋgasari niŋgi louqa oqnsib niŋgi yai qa loueqnub di niŋgi geregere poiŋgosai. Ariya iga Juda qaji iga louqa oqnsim iga yai qa loueqnum di iga geregere poigeqnu. Di kiyaqa? Qotei na iga Juda tamo iga giltgej. Deqa gago baŋ na Qotei na tamo uŋgasari naŋgi eleŋqas.

Aposel 2:39

Qotei a nami marej, ‘E niŋgi ti nuŋgo aŋgro ti tamo kalil isa isaq di unub qaji naŋgi ti ijo Mondor eŋgwai.’ Qotei a nami degsi marej. Deqa niŋgi quiye. Qotei na aqa anjam di uratqasai. Tamo uŋgasari kalil gago Tamo Koba Qotei na metnjrim aqaq bqab qaji naŋgi aqa Mondor enjrqas.”

Aposel 28:20

Utru deqa e niŋgi metŋgonum. E niŋgi niŋgsiy ijo anjam merŋgwajqa deqa metŋgonum. Mondoŋ Qotei na iga Israel tamo uŋgasari iga subq na tigeltgwas. Iga anjam deqa qujai gago areqalo siŋgilatosim tariŋeqnum. Utru deqa e sil kokba endena tontbonub.” Pol a na degsiqa Juda tamo kokba naŋgi minjrej.

Aposel 3:25

“Qotei a niŋgi eleŋqa osiqa deqa aqa medabu o qaji tamo naŋgi qariŋnjreqnaqa aqa anjam mare mare laqneb. A nami nuŋgo moma naŋgi ti anjam qoseb. Anjam qosisib anjam di siŋgilatosib kereonaqa Abraham endegsi minjej, ‘Mondoŋ ino leŋ naŋgi paraosibqa dena tamo bei ŋambabqas. Ŋambabosim tamo uŋgasari kalil mandamq endi unub qaji naŋgi eleŋosim geregereinjrqas.’ Qotei a niŋgi eleŋqa osiqa deqa anjam di Abraham minjej.

Rom 9:8

Anjam di aqa utru agiende. Tamo naŋgi mandam tamo naŋgo leŋ na ŋambabeb qaji naŋgi Qotei aqa aŋgro tiŋtiŋ sai. Tamo naŋgi Qotei aqa anjam nami marej qaji di qusib bole qa marsib naŋgo areqaloq di siŋgilatqab qaji naŋgi segi Abraham aqa aŋgro tiŋtiŋ sqab.

Galesia 4:8

Nami niŋgi Qotei qalieosaisosib bati deqa niŋgi gisaŋ qotei naŋgo kaŋgal tamo bul soqneb.

Efesus 2:19

Deqa bini niŋgi olo yauŋ tamo sosai. Niŋgi Qotei aqa segi tamo uŋgasari naŋgi koba na unub. Niŋgi Qotei aqa tamo tiŋtiŋ unub.

Efesus 4:18

Naŋgo qalie ti powo ti tulaŋ ambruejunu. Naŋgi tulaŋ nanarioqnsib laqnub. Naŋgo are miligi geteŋejunu. Deqa Qotei aqa ŋambile naŋgoq di sosai.

Kolosi 1:21

Nami niŋgi Kristus qa isaq di soqneb. Niŋgi nuŋgo segi areqalo na laqnsib Qotei ti jeu sosib kumbra uge uge yoqneb.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

1 Tesalonaika 4:13

Ariya was qu, tamo uŋgasari nami moreŋeb qaji naŋgi mondoŋ kumbra kie turqab di niŋgi qalieqajqa deqa merŋgwom. Tamo uŋgasari Qotei qaliesai qaji naŋgi subq na tigelqa bati qa tariŋosaieqnub. Deqa naŋgo was bei a moiqas di naŋgi tulaŋ are ugeinjrqas. Ariya niŋgi degsib tulaŋ are ugeiŋgaim deqa anjam endi merŋgwom.

1 Tesalonaika 4:5

Yimqa nuŋgo areqalo uge uge dena niŋgi titŋgimqa sambala kumbra tamo naŋgi Qotei qaliesai qaji naŋgi yeqnub di niŋgi dego dauryo uge.

2 Tesalonaika 2:16

Gago Tamo Koba Yesus Kristus wo gago Abu Qotei wo naŋgi aiyel na iga tulaŋ qalaqalaigeqnub. Qotei a iga qa are boleiyoqnsiq deqa a gaigai gago are boletetgeqnu. Osiqa a na iga siŋgilatgeqnu. Deqa mondoŋ a na iga boletgwajqa deqa iga tariŋoqnsim unum.

1 Timoti 1:1

E Pol. Kristus Yesus na e qariŋbej deqa e aqa anjam marsim laqnum. Qotei agi iga padalo sawaq dena eleŋej qaji naŋgi Kristus Yesus wo naŋgi aiyel na e giltbeb deqa e naŋgo anjam marsim laqnum. Iga Yesus a olo laŋ qureq dena bam unqajqa deqa tariŋeqnum.

Hibru 11:34

Ŋamyuo na naŋgi koitnjrqa laqnaq naŋgi olo ŋamyuo mosotoqneb. Jeu tamo naŋgi bosib serie na naŋgi ñumqa laqnab naŋgi jaraioqneb. Naŋgi segi siŋgila saiqoji sonab Qotei na naŋgi olo siŋgilatnjroqnej. Naŋgi siŋgila-oqnsib qotoqnsib sawa bei bei qaji tamo naŋgi teteinjroqnsib ñumoqneb.

Hibru 6:18

Deqa Qotei aqa kumbra aiyel unu. A na aqa anjam di Abraham minjej. Osiqa aqa anjam di siŋgilatej. Aqa kumbra aiyel di unu deqa a na aqa anjam di olo bulyqa keresai. A gisaŋqa keresai dego. Deqa iga tamo uŋgasari Qotei aqa areq gileqnum qaji iga aqa anjam deqa are qaloqnsim gago are siŋgilatoqnsim iŋgi bole bole Qotei a nami iga egwa marej qaji di oqajqa tariŋesqom.

Hibru 8:6

Ariya bini Yesus a atraiyo wau ojeqnu di wau tulaŋ bolequja. Aqa wau dena atra tamo namij naŋgo wau tulaŋ buŋyejunu. Di kiyaqa? Yesus a Qotei aqa anjam bunuj siŋgilatqa osiqa Qotei ti iga ti gago ambleq di tigelejunu. Deqa anjam bunuj dena anjam namij di tulaŋ buŋyejunu. Iŋgi iŋgi Qotei a Yesus aqa baŋ na iga egwa marej qaji dena iŋgi iŋgi Qotei a Moses aqa baŋ na iga egwa marej qaji di tulaŋ buŋyejunu.

1 Pita 1:21

Kristus a na niŋgi aqaryaiŋgej deqa niŋgi Qotei qa nuŋgo areqalo siŋgilatosib unub. Kristus agi moinaqa Qotei na olo subq na tigeltosiqa metonaq a laŋ qureq oqsiq dia ñam kobaquja ej. Utru deqa niŋgi Qotei qa nuŋgo areqalo siŋgilatoqnsib anjam a nami marej qaji di aqa damu brantqajqa deqa tariŋoqnsib unub.

1 Pita 1:3

Iga gago Tamo Koba Yesus Kristus aqa Abu Qotei aqa ñam soqtoqnqom. Qotei a iga qa tulaŋ dulosiqa Yesus Kristus olo subq na tigeltej. Gam dena Qotei na iga ŋambile bunuj egej. Ŋambile bunuj dena iga siŋgilatgejunu deqa iga iŋgi bole bole Qotei na mondoŋ egwas qaji deqa tariŋoqnsim unum.

1 Pita 3:15

Niŋgi nuŋgo are miligiq di Kristus atsib sosibqa a segi qujai nuŋgo Tamo Koba degsib are qaloqniye. Yimqa tamo qudei naŋgi nuŋgo kumbra di unsib endegsib nenemŋgoqnqab, “Niŋgi iŋgi bole kie qa tariŋoqnsib deqa niŋgi tulaŋ areboleboleiŋgeqnu?” Degsib nenemŋgoqnibqa niŋgi na kamba olo naŋgi anjam minjrqajqa gam gereiysib soqniye. O was qu, niŋgi bati gaigai degyoqniye.

1 Jon 3:3

Tamo kalil Kristus qa tariŋeqnub qaji naŋgo kumbra dena naŋgi naŋgo segi une olo uratoqnsib Qotei aqa ŋamgalaq di jiga saiqoji unub. Agi Kristus a segi jiga saiqoji unu dego kere.