Efesus 1:1 - Yesus Aqa Anjam Bole

¹ E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. E na anjam endi neŋgreŋyosim niŋgi tamo uŋgasari Efesus qureq di unub qaji niŋgi qa qariŋyonum. Niŋgi Qotei aqa segi tamo uŋgasari tiŋtiŋ unub. Niŋgi Kristus Yesus geregere dauryeqnub.

Efesus 1:1 ပူးပေါင်းရင်းမြစ်များ

Luk 16:10

“Niŋgi tamo bei aqa baŋq di ñoro kiñala atib a na geregere taqatqas di niŋgi ñoro qelikoba dego aqa baŋq di atibqa a na geregere taqatqas. Ariya niŋgi tamo bei aqa baŋq di ñoro kiñala atib a na geregere taqatqasai di niŋgi ñoro qelikoba dego aqa baŋq di atibqa a na geregere taqatqasai.

Aposel 16:15

Deqa tamo uŋgasari Lidia aqa talq di soqneb qaji naŋgi ti Lidia a ti yanso eb. Onaqa Lidia na iga mergej, “E are bulyosim Tamo Koba Yesus qa ijo areqalo siŋgilatonum niŋgi bole edegosib bosib ijo talq endia iga koba na sqom.” Lidia a tulaŋ siŋgilaej deqa iga aqa talq dia a ombla na soqnem.

Aposel 18:19

Tiryosib mandamq aisib Pol a Juda naŋgo Qotei tal miligiq gilsiqa naŋgi Qotei aqa anjam plaltosiq minjroqnej. Onaqa naŋgi Pol aqa anjam qusib minjeb, “Ni bati qudei iga koba na endi sqom.” Minjnabqa a na naŋgi saidnjrsiqa gilqa osiqa minjrej, “Qotei na odbimqa bunuqna e nuŋgoq olo bqai.” Degsi minjrsiqa a qobuŋ gogetosiq gilej. A Prisila wo Akwila wo naŋgi Efesus qureq di uratnjrnaq soqneb.

Aposel 9:13

Onaqa Ananaias na kamba Yesus minjej, “O Tamo Koba, tamo gargekoba naŋgi e merbeqnub, ‘Sol a na Jerusalem dia Yesus aqa tamo uŋgasari naŋgi tulaŋ ugeugeinjreqnu.’ Naŋgi e degsib merbeqnub.

Rom 1:1

E Pol. E Kristus Yesus aqa wau tamo. E aqa anjam maro tamo sqajqa deqa metbej. Osiqa e Qotei aqa anjam bole marsim laqajqa deqa giltbej.

Rom 1:7

Qotei a na niŋgi tamo uŋgasari Rom qureq di unub qaji niŋgi tulaŋ qalaqalaiŋgeqnu. A na niŋgi metŋgej deqa niŋgi aqa segi tamo uŋgasari unub. O was qu, e anjam endi neŋgreŋyosim niŋgi qa qariŋyonum. Gago Abu Qotei wo Tamo Koba Yesus Kristus wo naŋgi aiyel niŋgi qa are tulaŋ boleinjrimqa niŋgi lawo na soqniye.

Rom 8:1

O was qu, iga Kristus Yesus beteryejunum deqa dal anjam na gago une qa iga olo mergwa keresai. Deqa iga gago une qa olo awai uge oqasai.

1 Korin 4:12

Iga ŋes ti gago segi baŋ na ti wauoqnsim unum. Tamo qudei naŋgi na iga misiliŋgeqnub. Ariya iga kamba naŋgi qa olo pailyeqnum. Tamo qudei naŋgi na iga ugeugeigeqnab iga na kamba naŋgi ugeugeinjrosaieqnum. Iga medabu getentosim gulube di qoboiyeqnum.

1 Korin 4:17

Utru deqa e Timoti qariŋyonumqa a niŋgi qa bqas. E nami Tamo Koba Yesus aqa anjam Timoti minjnam a are bulyosiqa siŋgilaej. Deqa a ijo aŋgro bole. E na a tulaŋ qalaqalaiyeqnum. A Tamo Koba Qotei aqa wau geregere taqateqnu. A niŋgi qa bosim ijo kumbra qa niŋgi saiŋgim niŋgi quqwab. Ijo kumbra agiende. E Kristus beteryejunum. Ijo kumbra di e na sawa sawa kalilq dia Kristen tamo uŋgasari naŋgi osornjreqnam naŋgi dauryeqnub.

2 Korin 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum.

Galesia 1:1

E Pol. Yesus Kristus na e qariŋbej deqa e aqa anjam mare mare laqnum. Mandam tamo bei na e qariŋbosai. Tamo bei na e wau ebosai dego. Yesus Kristus naŋgi Abu Qotei agi Kristus subq na tigeltej qaji wo naŋgi aiyel na e wau ebeb.

Galesia 3:26

Niŋgi kalil Kristus Yesus qa nuŋgo areqalo siŋgilatosib a beteryejunub deqa niŋgi Qotei aqa aŋgro tiŋtiŋ unub.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Galesia 3:9

Abraham a Qotei qa aqa areqalo siŋgilatej deqa Qotei na a kumbra boledamu yej. Dego kere Qotei na tamo uŋgasari kalil Kristus qa naŋgo areqalo siŋgilateqnub qaji naŋgi dego kumbra boledamu enjrqas.

Efesus 1:15

E endegsi quem. Niŋgi Tamo Koba Yesus qa nuŋgo areqalo siŋgilatoqnsibqa Qotei aqa tamo uŋgasari kalil naŋgi qalaqalainjreqnub.

Efesus 2:10

Kristus Yesus aqa wau na Qotei na iga tamo uŋgasari bunuj gereigosiqa ŋambile egej. Di kiyaqa? Kumbra bole qa gam a na nami iga gereiyetgej qaji di iga dauryosim walweloqnqajqa deqa.

Efesus 2:13

Nami niŋgi isaq di soqneb. Ariya Kristus a niŋgi qa moisiq aqa leŋ aiej dena niŋgi joqsiqa Qotei aqa areq bej. Deqa bini niŋgi Kristus Yesus beteryesosibqa Qotei aqa jojomq di unub.

Efesus 2:6

Osiqa iga Kristus Yesus ombla na olo subq na tigeltgobulosiqa iga laŋ qureq joqsi oqsiqa Kristus aqa awo jaram kobaq di awotgej.

Efesus 6:21

Ariya Tikikus a niŋgi qa bqo deqa a na ijo wau kalil qa niŋgi saiŋgwas. Tikikus a gago Kristen was bole. A Tamo Koba Yesus aqa wau tamo bole.

Kolosi 1:2

Aqo gago was Timoti wo anjam endi neŋgreŋyosim niŋgi Qotei aqa segi tamo uŋgasari Kolosi qureq di unub qaji niŋgi qa qariŋyonum. Niŋgi gago Kristen was bole. Niŋgi Kristus qa nuŋgo areqalo siŋgilatejunub. Gago Abu Qotei a niŋgi qa are boleiyimqa niŋgi lawo na soqniye.

Uli Anjam 17:14

Osib Kaja Du qa ŋiriŋosib qoto itqab. Amqa Kaja Du a qoto siŋgilaosimqa naŋgi ñumqas. Kaja Du a tamo kokba kalil naŋgo Tamo Koba. A mandor kokba kalil naŋgo Mandor Koba. Tamo kalil a ombla unub qaji naŋgi a ti qoto siŋgilaqab. Naŋgi di Kaja Du na metnjrsiq aqa segi tamo uŋgasari sqajqa giltnjrej qaji. Deqa naŋgi aqa anjam bole dauryeqnub.”

Uli Anjam 2:10

Bunuqna ni jaqatiŋ koba oqam. Ni deqa ulaaim. Ni que. Satan a na niŋgi qudei ojeleŋosim tonto talq breiŋgwas. Breiŋgimqa niŋgi ijo ñam geregere ojqab kio ijo ñam uratosib uloŋqab kio di Satan a nuŋgo areqalo unsim qalieqajqa deqa niŋgi tonto talq breiŋgwas. Niŋgi bati 10-pela gulube ti jaqatiŋ ti sqab. Ariya niŋgi e qa nuŋgo areqalo siŋgilatosib soqniye. Sosib sosib gilsib jeu tamo naŋgi na niŋgi liŋgib moreŋqab. Amqa e na niŋgi ŋambile eŋgwai. Ŋambile di nuŋgo awai boledamu.

Uli Anjam 2:13

Qure ni di unum qaji naŋgo kumbra e geregere qalieonum. Qure di Satan a na taqatejunu. Aqa awo jaram koba qure dia unu. Ariya e qalie, ni ijo ñam siŋgila na ojesosim e qa ino areqalo siŋgilateqnum. Ino areqalo di ni na ulitosaieqnum. Nami ijo anjam palonto tamo Antipas a niŋgi koba na wauoqnej. Antipas a ijo anjam geregere dauryoqnej deqa jeu tamo naŋgi nuŋgo qureq dia a qalnab moiej. Moinaqa ni di unsimqa deqa ni e qoreibosai. Qure dia agi Satan a unu.