Aposel 7:35 - Yesus Aqa Anjam Bole

³⁵ “O was qu, Moses qujai di nami Israel naŋgi na baŋ gotraŋyetosib minjeb, ‘Yai na ni gago gate koba atqoqa iga taqatgosim gago une gereiyqa bonum?’ Agi a qujai Qotei na qariŋyonaq Isip sawaq aisiqa a Israel tamo uŋgasari naŋgo gate koba sosiqa naŋgi Isip naŋgo mandor koba aqa baŋq dena eleŋej. Agi laŋ aŋgro a ŋam luwitq di sosiqa Moses aqaq di brantonaqa aqa medabuq na Qotei na Moses minjej, ‘E ni qariŋmitqa Isip aiqam.’

Aposel 7:35 ပူးပေါင်းရင်းမြစ်များ

Mak 12:26

“Ariya tamo naŋgi moisib olo subq na tigelqab deqa e niŋgi endegsi nenemŋgwai. Moses a nami Qotei aqa anjam bei neŋgreŋyej di niŋgi sisiyosai kio? Agi Moses a anjam endegsi neŋgreŋyej, ‘Ŋam mariŋ miligiq dia puloŋeqnaqa Qotei a ŋam puloŋq di sosiqa Moses metosiq minjej, “E Abraham aqa Qotei. E Aisak aqa Qotei. E Jekop aqa Qotei.” ’

Luk 19:14

“A degsi minjrsiqa sawa isaq gilsiq di sonaqa aqa qure qujai naŋgi a qa tulaŋ ugeosib are qaleb, ‘A gago mandor koba sqasai.’ Degsib are qalsib deqa tamo qudei naŋgi qariŋnjrnab sawa deq gilsib sawa deqaji tamo uŋgasari naŋgi minjreb, ‘Tamo di a gago mandor koba ataib. A na taqatgwa iga uratonum.’

Jon 18:40

Onaqa Juda tamo kokba naŋgi olo tulaŋ siŋgila na saidosib minjeb, “Ni Yesus uratim oqedaiq. Tonto tamo Barabas uratim oqedem.” Barabas a leŋ ojo tamo bei.

Jon 19:15

Onaqa naŋgi tulaŋ koba leleŋosib minjeb, “Ni na a taqal waiy! Osim ŋamburbasq di qame!” Onaqa Pailat na minjrej, “E nuŋgo mandor koba osiy ŋamburbasq di qamqai e?” Onaqa atra tamo kokba naŋgi na kamba minjeb, “Gago mandor bei saiqoji. Gago mandor qujai agi Sisar.”

Aposel 2:36

“Deqa Israel tamo uŋgasari, niŋgi kalil ijo anjam endi geregere qusib poiŋgem. Yesus agi niŋgi na ŋamburbasq di qalnab moiej qaji a Qotei na olo osiqa gago Tamo Koba Kristus atej.” (Ñam Kristus di aqa damu, “Tamo Qotei na nami giltej qaji”) Pita a na tamo uŋgasari naŋgi anjam degsi minjrej.

Aposel 3:22

“Moses a nami Yesus qa endegsi marej, ‘Mondoŋ Tamo Koba Qotei a na aqa medabu o qaji tamo bei e bul nuŋgo ambleq dena tigeltimqa a na anjam merŋgoqnqas. Anjam merŋgoqnimqa niŋgi aqa anjam kalil qusib dauryoqniye.

Aposel 5:31

Yesus qujai di Qotei na laŋ qureq osi oqsiqa aqa baŋ woq di awotej. Deqa Yesus a gago Tamo Koba. A na qujai iga eleŋamqa iga padalqasai. Yesus qujai dena iga Israel tamo uŋgasari are bulyetgsim gago une kobotetgwas.

Aposel 7:30

“A di sosiqa wausau 40 koboonaqa a wadau sawaq gilsiq Sainai mana utruq dia ŋam luwit yusiq puloŋeqnaqa Qotei aqa laŋ aŋgro bei ŋam puloŋq di sonaq unej.

Aposel 7:51

Stiven a anjam di kalil marekritosiq olo siŋgila na endegsi minjrej, “Niŋgi anjam gotraŋyo ani tamo. Nuŋgo are Qotei aqaq di sosai. Niŋgi sawa bei bei qaji tamo naŋgi bul. Sawa bei bei qaji tamo naŋgi Qotei qaliesai dego kere niŋgi dego Qotei qaliesai. Niŋgi Qotei aqa anjam quqwa urateqnub. Niŋgi bati gaigai Qotei aqa Mondor aqa anjam dego quqwa urateqnub. Nuŋgo moma naŋgi kumbra di yoqneb agi niŋgi na olo yeqnub.

Kolosi 1:15

Gago ŋamdamu na iga Qotei unqa keresai. Ariya Qotei aqa Ŋiri a segi Qotei. Iŋgi iŋgi kalil Qotei na gereiyej qaji di Yesus a segi deqa utru.

Hibru 2:2

Nami Qotei a laŋ aŋgro naŋgo medabu na gago moma utru naŋgi anjam minjroqnej. Anjam di siŋgila koba. Deqa tamo kalil anjam di gotraŋyoqneb qaji naŋgi Qotei na kambatnjroqnsiqa awai uge enjroqnej.

Uli Anjam 15:3

Osib Qotei aqa wau tamo Moses aqa lou ti Kaja Du aqa lou na ti endegsib louoqneb, “O Tamo Koba Qotei, siŋgila kalil inoq di unu. Wau kalil ni yeqnum qaji di siŋgila koba. Iga ino wau di unoqnsim deqa tulaŋ prugugeteqnum. Tamo uŋgasari sawa sawa kalilq di unub qaji naŋgo Mandor Koba agi ni segi. Kumbra kalil ni yeqnum qaji di tulaŋ boledamu.